Nömrəsində defisi olmayan sürücülərə güzəşt edilməyəcək
Noyabrın
13-də Baş Dövlət Yol Polisi İdarəsinin sürücülərə və avtomobil sahiblərinə
mexaniki nəqliyyat vasitələrinin dövlət qeydiyyat nişanları standartlarının
tələbləri ilə əlaqədar verdiyi möhlət başa çatıb. Bəzi sürücülər guya daha gözəl göründüyünü düşünərək nömrələrin
üzərinə həkk olunmuş defis simvollarını bilərəkdən müxtəlif üsullarla silirlər,
lakin bu hərəkət qayda pozuntusu hesab edilir. Yəni sürücünün adi kiçik xətt
hesab etdiyi simvolun pozulması dövlət qeydiyyat nişanları standartının
tələblərinin pozulması kimi qiymətləndirilir. Bu da nəticədə yol polisi
tərəfindən sürücünün cərimə olunmasına şərait yaradır.
Bununla
əlaqədar Baş Dövlət Yol Polisi İdarəsi oktyabrın 12-də nəqliyyat vasitələri
sahiblərinə və sürücülərə nəqliyyat vasitələrinin dövlət qeydiyyat nişanlarında
qanunvericiliklə nəzərdə tutulmuş standartların tələblərinin pozulması (defis
simvollarının, çərçivə xəttinin silinməsi) hallarının aradan qaldırılması üçün
1 ay müddətində vaxt vermişdi. Və həmin müddət noyabrın 13-də bitdi.
Məsələ ilə bağlı
media nümayəndələrinin münasibətini öyrəndik.
Avtosfer.az
saytının baş redaktoru Elməddin Muradlı deyir ki, bəzi sürücülər tənbəllik edərək
bu problemi həll etməyiblər: "İstəməzdim belə xırda bir məsələ böyüyüb bu
səviyyəyə çatsın. Hər halda bunu zamanla da həll etmək olardı. Məsələn,
sürücülər texniki baxış üçün müraciət edəndə və ya avtomobillərin alqı-satqısı, qeydiyyat və təkrar qeydiyyat
zamanı bunu mərhələli şəkildə, heç kimi incitmədən, bu qədər hay-küy salmadan
yoluna qoyma mümkün idi. Amma artıq qərar belə verilibsə, buna əməl etmək
lazımdır. Şəxsən mənim avtomobilimdə də nömrələrdən birində defis işarəsi yox
idi. Əvvəlki sahibindən o formada almışam. İki həftə bundan qabaq nömrəmdəki
problemi aradan qaldırdım. Və deyərdim ki, Dövlət Yol Polisi humanist bir addım
ataraq bir ay ərzində bu məsələni pulsuz həll etməyi təklif edib. Sadəcə, bəzi
sürücülər tənbəllik edərək nömrələrindəki bu problemi həll etməyiblər”.
"Gündəlik Teleqraf” MMC-nin
direktoru, publika.az və teleqraf.com saytlarının rəhbəri Aynur Camanl bildirir ki, maşının nömrəsində
defis işarəsi əvvəldən var idi. Və qeyd etdi ki, əgər hansısa nömrədə defis
yoxdursa, bu aiddiyatı orqanın günahıdır. Heç kim dövlət nişanlarını özü
hazırlamır. Və burada qanuna zidd hərəkət varsa, sürücü ilə birlikdə məmur da
cəzalanmalıdır.
Modern.az saytının baş redaktoru
Elşad Eyvazlı deyir ki,
qoyulan hər bir qərara, qanuna əməl etmək lazımdır: "Bu məsələyə normal
yanaşıram. Mənim maşınımın nömrələrindən birində defis işarəsi silinmişdi və bərpa
etdirdim. Mən həmişə həmkarlarıma da bu kimi mövzularda problem yaşamamaları
üçün qoyulan qayda və qanunlara əməl etmələrini məsləhət görmüşəm”.
Ölkə.az saytının baş redaktoru Məmməd
Gülməmmədov bildirir ki,
bu məsələyə görə sürücüləri cərimələmək insafdan deyil: "İlk olaraq onu qeyd
edim ki, həmin defis olmayan nömrələri də Dövlət Yol Polisi verib. Heç kim özü
gedib haradasa, xüsusi bir nömrə çap etdirib, maşınına vurmayıb. Problemin həlli
üçün də qısa müddət veriblər. Buna görə sürücüləri cərimələmək məncə, bir az
insafdan deyil. Axı bu defis elə də qlobal bir məsələ deyil. Və düşünürəm ki, qayda
bundan sonra verilən nömrələrə şamil edilsəydi daha yaxşı olardı. Mənim maşınım
da isə bu məsələ ilə bağlı bir problem yox idi. Bunu da qeyd edim ki, belə
xırda məsələlər ictimaiyyətə qlobal bir problem kimi təqdim edilməməli idi”.
Azvision.az saytının baş redaktoru
Vüsal Məmmədovməsələnin detalları ilə tam tanış olmadığını və maşının nömrəsində də hər şeyin
qaydasında olduğunu deyir.
Bəzi
media nümayəndələrinin iradlarını nəzərə alaraq Bakı şəhər Baş Dövlət Yol
Polisi ilə əlaqə saxlayıb məsələni aydınlaşdırmağa çalışdıq.
Baş DYPİ-nin şöbə rəisi, polkovnik Kamran Əliyev "Kaspi”yə açıqlamasında bildirdi ki, nömrələrin defissiz çapı
mümkün deyil və dövlət qeydiyyat nişanlarının 90-95 faizi defislə verilir:
"Nömrədə olan defis işarəsinin silinməsi ilə bağlı bir sıra faktlar olduğu üçün
həmin sürücülərə müəyyən müddət verildi ki, onlar bu məsələni həll etsinlər. Və
sürücülərin çoxu da bu müddətdən yararlanaraq həmin nöqsanı aradan qaldırıb.
Əgər sürücü bu müddət ərzində bir neçə dəqiqəyə həll olunacaq bir məsələni həll
etməyibsə, bu halda təbii ki, inzibati
məsuliyyətə cəlb olunacaq. Necə ola bilər ki, nömrələr defissiz
verilsin? Dövlət qeydiyyat nişanlarının 90-95 faizi defislə verilir. Biz hətta
nömrələrin çap olunmasını çəkib ictimaiyyətə göstərmişik ki, bu proses hansı
formada həyata keçirilir. Nömrələrin defissiz çapı mümkün deyil. Sadəcə
sürücülər hansısa bir metodla həmin defisi siliblər. Və bu qoyulan standartın
tələblərinin pozulması deməkdir. Biz sürücülərin bu qayda pozuntusuna görə
əlavə vəsait ödəməmələri üçün möhlət verdik. Hətta bildirdik ki, sürücülər
istənilən yol polisi bölməsinə yaxınlaşıb, həmin defisləri bərpa etdirə
bilərlər. Bu məsələ ilə bağlı kiminsə irad bildirməsini, narazılıq etməsini
doğru hesab etmirəm. Çünki biz məsələnin həlli üçün kifayət qədər vaxt
vermişdik. Yəni istənilən məsuliyyətli sürücü iki dəqiqə vaxt ayırıb, defis
işarəsini qoydura bilərdi. Əgər kimsə bunu etməyibsə, bu artıq sürücünün
məsuliyyətsizliyindən, intizamsızlığından xəbər verir”.
Günel Azadə