Bakı 13°C
“Nizami Gəncəvi Azərbaycan və dünya ədəbiyyatının dahisi kimi”
AMEA Naxçıvan Bölməsinin İncəsənət,
Dil və Ədəbiyyat İnstitutunda "Nizami Gəncəvi Azərbaycan və dünya ədəbiyyatının
dahisi kimi” mövzusunda elmi konfrans keçirilib.
Tədbirdə institutun direktoru,
AMEA-nın müxbir üzvü Əbülfəz Quliyev dahi Azərbaycan şairi Nizami Gəncəvinin həyat
və yaradıcılıq irsindən, qüdrətli söz ustadının ölməz əsərlərinin Şərq və dünya
ədəbiyyatındakı yeri və mövqeyindən ətraflı bəhs edib.
Naxçıvan Muxtar Respublikası Ali
Məclisi Sədrinin "Oxunması zəruri olan kitablar haqqında” 28 avqust 2017-ci il
tarixli Sərəncamını xatırladan alim bu sənədin yeni nəslin dünyagörüşünün
inkişaf etməsinə, möhkəmlənməsinə, vətənpərvərlik ruhunda yetişməsinə xidmət etdiyini
vurğulayıb.
Daha sonra institutun Ədəbiyyatşünaslıq şöbəsinin müdiri, filologiya üzrə fəlsəfə
doktoru, dosent Ramiz Qasımovun "Nizami Gəncəvinin "Sirlər xəzinəsi” poeması və
aforizmlər”, filologiya üzrə fəlsəfə doktoru Əli Həşimovun "Nizami Gəncəvinin
"Hikmətlər və nəsihətlər” kitabında intibah humanizmi” mövzusunda məruzələri
dinlənilib. Məruzəçilər Azərbaycan xalqının dünya mədəni irsinə bəxş
etdiyi görkəmli şəxsiyyətlər sirasında dahi Azərbaycan şairi Nizami Gəncəvinin
müstəsna yerindən bəhs ediblər. Qeyd olunub ki, Nizami Gəncəvi məhz özünü elm,
bilik, humanist ideallar, bəşəri dəyərlər əxz edən yaradıcılığı ilə bütün bəşər
və dünya xalqlarının ehtiramla mütaliə etdiyi bilik mənbələrindəndir. Bu görkəmli
sənətkarın həyatı və yaradıcılığının mükəmməl şəkildə öyrənilməsi ümummilli
lideri Heydər Əliyevin siyasi hakimiyyətinin ilk illərində təşəbbüsü
və cəsarəti ilə qəbul edilən "Azərbaycanın böyük şairi və mütəfəkkiri Nizami Gəncəvinin irsinin
öyrənilməsini, nəşrini və təbliğini daha da yaxşılaşdırmaq tədbirləri
haqqında”kı qərarından sonra başlanılıb və söz ustadının yubileyləri davamlı
olaraq qeyd edilib, adı əbədiləşdirilib.
Diqqətə çatdırılıb ki, N. Gəncəvinin
zəngin əxlaqi-mənəvi dəyərlər əxz edən yaradıcılığının xüsusi qiymət kəsb etməsindəndir
ki, Naxçıvan Muxtar Respublikası Ali Məclisi Sədrinin imzaladığı oxunması zəruri
olan kitablar haqqındakı sərəncamında xüsusi yer tutur. Bildirilib ki, bu böyük
Azərbaycan mütəfəkkir şairinin "Sirlər xəzinəsi” poeması və aforizmləri gənc nəsillər
üçün əsl humanist dəyərlər, vətənpərvərlik, əməksevərlik, xalqa bağlılıq təlim
edən zəngin dərslik kitabıdır.
