“Nə qədər müasirləşsək də, adət-ənənələrimizi qorumalıyıq” - Fotolar
Aşıq Samirə Əliyeva: Gənclər daha çox dəblə uyğunlaşmaq istəyirlər, biz öz keçmişimizi dəbə gətirməliyik
Onunla sazdan-sözdən
istədiyin qədər danışa bilərsən. Sonuncu dəfə 5 il bundan öncə görüşüb, gənc
aşıqların cəmiyyətdəki yeri haqda söhbətləşmişdik. Bu dəfə isə onunla yeni
layihələrindən, sözə, aşıq sənətinə verilən dəyərdən və xanım aşıqların ümumi aşıq
yaradıcılığına qatdığı rəngdən danışdıq. Beləliklə, xanım aşıq deyiləndə ilk
yada düşən - Sənətşünaslıq elmi üzrə fəlsəfə doktoru, Aşıq Samirə kimi
tanıdığımız Samirə Əliyeva qonağımız oldu.
- Sami Yusufun dahi Azərbaycan şairi İmadəddin Nəsiminin
"Sığmazam” qəzəli əsasında hazırladığı musiqi kompozisiyası böyük əks-səda
doğurdu. Bu kompozisiyada aşıq havasının rolunu necə dəyərləndirirsiniz?
-Yay
aylarında Heydər Əliyev Mərkəzində keçirilən UNESCO-nun Ümumdünya İrs
Komitəsinin43-cü sessiyasınınaçılış mərasimində biz bu kompozisiya
ilə çıxış etdik. Bu layihədə UNESCO-nun qeyri-maddi mədəni irsi siyahısına
düşən Azərbaycanın milli musiqi alətlərinin ifasında möhtəşəm kompozisiyalar
vardı. Biz "Nəsimi” layihəsində yer aldıq. Saz ifaçılarına mən rəhbərlik edirdim.
Həqiqətən çox möhtəşəm bir layihə idi. Sami Yusuf dünya şöhrətli bir ifaçıdır. Məşq
prosesində qeyd olundu ki, muğamla saz xüsusi olaraq vurğulanacaq. Açığı, nə Təyyar
Bayramovun, nə də mənim ifam nəzərdə tutulmuşdu. Sami Yusuf dedi ki, yaxşı olar
ki, orada fərqli səslər, aşıq havası da olsun.
- Amma
nədənsə səsiniz tam aydın şəkildə eşidilmirdi.
- Bu, səslənmədən irəli gəlirdi. Əslində
bu, normal haldır, böyük bir layihədə, canlı ifa ilə 57 nəfərlik bir heyətlə
çıxış edirdik.Nəsimi haqqında belə gözəl layihənin hazırlanması
yerinə düşdü. Son dönəmlər "Nəsimi ili” olduğu üçün dahi şairimizin qəzəllərini
ona yaraşmayan tərzdə ifa edirdilər. Bu da Nəsiminin sənətinə, yaradıcılığına yaraşmırdı.
Yetişməkdə olan gənclər isə Nəsimini bu cür qəbul etməməli idi. Biz onlara əsil
Nəsimini göstərməyə çalışdıq. Nəinki biz, "Nəsimi ili” çərçivəsində bizim
dəyərli xanəndələrimiz, gözəl bəstəkarlarımız səviyyəli şəkildə layihələrlə,
konsert proqramı ilə çıxış etdilər.
- Ancaq
bunların içərisində Sami Yusufun hazırladığı kompozisiya sanki kulminasiya
oldu.
- Burda mədəniyyətin içində bir siyasət
vardı ki, dünya həm Nəsimini, həm də bizim milli musiqi alətlərimizi tanıdı.
Bilirsiniz ki, bizim musiqimiz çox zəngindir. Belə bir layihədə milli musiqi
alətlərimizin ifası isə gözəl düşünülmüş bir siyasət oldu. Digər bir maraqlı
məqam isə, Nəsimi poeziyasında bu vaxta qədər ilk dəfə aşıq yaradıcılığından istifadə
olunması idi. Aşıq havalarında adətən qoşma, gəraylı üslubunda olan şeirlərdən istifadə
olunur, qəzəliyyata yer verilmir. Burada sazın olması, aşıq ifa tərzinin göstərilməsi
aşıq sənətində də bir yenilik oldu.
-
İstərdik, yeni layihələrinizdən danışaq. "Evimizə gəlin gəlir” adlı yeni mahnınız
işıq üzü gördü. Bu mahnı necə yarandı?
- Bu mahnı "Orta müxəmməsi” adlı saz havasıdır.
Bu havanı bir çox ustadlarımız fərqli sözlərlə ifa ediblər. Aşıq yaradıcılığında
belə bir məqam var ki, musiqi qalır, şeirləri isə dəyişmək mümkündür. Burada fərqli
şairlərin sözləri ifa oluna bilər. Bu günə qədər kliplərdə, şeirlərdə,
mahnılarda toy mövzusuna çox müraciət olunub. Bunu ucuzluğa aparmağın əleyhinəyəm.
Azərbaycan toylarında dünyaya nümunə ola biləcək ənənələrimiz, milli
dəyərlərimiz var. Oğlanla qızın bir-birini görmə səhnəsindən tutmuş, elçi getmə
mərasimi, bayramlıqlar, nişan taxma mərasimlərinə kimi gözəl dəyərlərimiz var.
Bu mahnıda onları əks etdirmək istədim. Ən əsası da bunu maddi gəlir əldə etmək
üçün deyil, o gözəlliyi, zənginliyi göstərmək üçün etdim. İstəyirəm ki, bu
mahnını klip şəklində çəkdirim. Klipdə gəlinin evdən aşıq tərifi ilə çıxması,
qədim adət-ənənəmizin hər detalı orda canlandırılsın. Layihəyə başlayanda düşündüm
ki, əvvəlcə sözlərini yazım. Söz yazmaq böyük bir məsuliyyətdir. Bu mənim ya ikinci,
ya da üçüncü şeirimdir. Şeir yazmağa bir az ehtiyatla yanaşıram.
- Hər aşıqda
bu istedad olmur. Bu günün aşıqları söz yazmaq cəhətdən bir qədər axsayırlar.
- Aşıq sənəti sinkretik sənətdir. Aşıq deyiləndə,
aktyorluq, şairlik, bəstəkarlıq, rejissorluq istedadları cəmləşən sənətkar göz önünə
gətirilir. Aşıq saz tutub, söz qoşmağı bacarmalıdır. Mən demirəm ki, durub ustad
aşıqlarımız kimi dahiyanə şeirlər yarada bilərəm. Ancaq bir aşıq olaraq yeni
layihədə, düşündüm ki, gəlinimizi öz dilimlə, ürəyimdən keçən sözlərlə vəsf
edim. Tariximizə boylananda görürük ki, əvvəllər bəyi, gəlini aşıq tərif edib. Hətta
döyüşə gedəndə əsgərlərə aşıq xeyir-dua verərmiş, döyüşdən dönəndə onları aşıq qarşılayarmış.
O zamanlar aşıq xeyir-duası valideyn xeyir-duası qədər önəmli idi.
- Sonra
necə oldu ki, bu dəyərlərimiz unuduldu?
- Milli-mənəvi dəyərlərimizin məhv olmasında
günahkar bizlərik. Biz öz adət-ənənələrimizə sahib çıxmalı və onu qorumalıyıq. Nə
qədər inkişaf etsək, müasirləşsək də, gərək bu adətlərimizi qoruyaq. İndi
keçirilən el şənliklərimizdə, məclislərimizdə başqa mentalitetlərin hakim
olduğunu görürük. Demirəm ki, toylarımız, xınalarımız aşıq havası ilə
keçirilsin. Bu günün gəncləri də razı olmaz ki, onların toyunu başdan-ayağa aşıq
aparsın. Çünki dövrün insanları əylənmək istəyir, dinamik musiqilərə can atır. Amma
bizə tək özümüz baxmırıq. Uşaq vaxtında valideynlərim mənə deyirdi ki, "ayıbdır,
sənə qonşu baxır”. İndi valideynlərim demiş, bizə qonşular da baxır. Bizi istəyənlər
də var, istəməyənlər də. Bu adətlərimizi gənclərimizə sevdirmək üçün gərək onlar
bunu təkcə köhnə filmlərdə deyil, eyni zamanda bu günkü ifaçıların
repertuarında da görsünlər. Gənclər daha çox dəblə uyğunlaşmaq istəyirlər. Biz öz
keçmişimizi dəbə gətirməliyik.
- Əvvəllər
toyda aşıq deyişmələri və dastanlar olardı. Bu gün aşıqlar toylarda nə ifa edirlər?
- Aşıqlar bu gün toylara gələndə deyirlər
ki, oynamalı bir hava çal. Hamı oynamaq istəyir. Bu gün istəyirlər ki, daha çox
konkret sözlü mövzular olsun. İnsanlar, daha çox da gənclər sətiraltı, düşündürücü
sözlərə varmaq istəmirlər.
-
Bəzən sazı digər musiqi alətləri ilə birlikdə ifa edirlər. Bəlkə də, bu düzgün
deyil, çünki saz özü bir orkestrdir...
- Bu fikirlə razıyam, doğrudan da saz özlüyündə
bir orkestrdir. Öz-özünü müşayiət edir və öz ritmini saxlayır. Amma gənclərimizin
qulağı daha müasir musiqi alətlərinin səsinə öyrəşib deyə, onların əhatəsində sazı
gənclərə sevdirmək üçün burada ana xətti qorumaq şərti ilə bu ritmlərdən də
istifadə edilir. Bu, zamanın tələbidir. Saz havalarının bu günə qədər gəlib çıxmasında
sazla yanaşı, zurna, balaban, zərb alətlərinin də rolu var. Müasir dövrə
uyğunlaşmaq niyyəti ilə digər alətlərdən saz havalarını müşayiəti üçün istifadə
etməyə çalışıram. Yeni aranjemanda ifa etdiyim saz havaları buna nümunədir. Bu
o demək deyil ki, klassik saz havalarımızı müasir formada ifa edirik. Klassik
üslub qorunub saxlanmalıdır, bununla bərabər, müasir tərzdə mütləq yeni ifa
tərzləri nümayiş etdirməliyik ki, gənclərə bu sənəti sevdirək.
- Bu gün
elektron saz ifa edənlər də az deyil. Elektron sazın səsi sanki fərqlidir.
Sizcə, bu yenilik sazın qədimliyinə, onun ağırlığına təsir etmirmi?
- Təəssüf hissi ilə qeyd edim ki, hələ elə
bir aparat icad olunmayıb ki, biz ansamblla müşayiət edəndə, sazın səsini olduğu
kimi ucalda bilsin.
-
Bəzən aşıqlarımız efirdə çıxış zamanı bir-birilərinə sərt atmacalar atırlar. Ümumiyyətlə,
efirdə aşıqlarımızın davranışları çox zaman qənaətbəxş olmur...
- Tarixən aşıq deyişmələrində aşıqlar bir-birinə
atmacalar atıb, ancaq onlar çərçivələri aşmayıblar. Bəzən efirdə ifa edən
aşıqlar ləhcədən bayağı şəkildə istifadə edirlər. Əlbəttə ki, hər bölgənin özünəməxsus şirin ləhcəsi var. Ancaq bunu
efirdə təqdim edəndə, elə formada etməlidirlər ki, şirin alınsın. Bunu bayağı formada
təqdim edib, insanların gözündən salmağa ehtiyac yoxdur.
- Bir
yaşlı aşıq sənətkarı ilə söhbət edəndə demişdi ki, bu gün aşıq sənəti çox urvatdan
düşüb. Səbəbini soruşduqda, mənə çayxanalarda aşıq adı ilə fəaliyyət göstərən insanları
nümunə göstərmişdi. Bu da gənc nəsildə aşıq sənəti ilə bağlı yanlış fikir formalaşdırır.
- Şükür ki, bu gün çayxanalara gedən, özünü
aşıq adlandıranların sayı azalıb. Mən insanları qınamıram. Bəzi insanlar dolanmaq
xatirinə bunu etməyə məcbur olub. Sənət dalınca deyil, pul dalınca qaçanlar da
var. Düşünürlər ki, sənəti, ifasını nümayiş etdirirlər. Ancaq düşünmürlər ki, aşıq
sənətinin kimliyini satırlar. Tariximizi aşıq adı altında ucuzlaşdırırdılar. İnsanlar
isə onlara "aşıq” deyə müraciət edirlər...
- Təkcə
çayxanalardamı əlinə saz alan hər kəsə aşıq deyə müraciət edirlər? Sizcə, aşıq
olmaq üçün hansı bacarığa sahib olmaq lazımdır?
- Bəzən efirlərdə də hər yetənə aşıq deyirlər.
Əvvəla, aşıq dediyin şəxs tək sazda ifa etməklə kifayətlənməməlidir. Aşığın oxumağı,
dastan bilmə bacarığı olmalıdır. Aşığa məxsus olan nə xüsusiyyətlər varsa, hamısını
özündə cəmləməyi bacarmalıdır. Bəzən olur ki, ansamblda saz ifaçısını aşıq kimi
təqdim edirlər. Axı bu, aşıq deyil, kimisə müşayiət edir. Aşıq nə vaxtdan kimisə
müşayiət edib ki? Aşıqdan müşayiətçi olmaz. Aşıq öz oxumağını göstərməlidir. Axı
bizim Aşıqlar Birliyimiz, tarixi araşdırmaçılar, tanınmış nüfuzlu aşıqlarımız var.
Ən azından, onları verilişlərə dəvət etdikdə, bir soruşsunlar ki, bu insanlara
necə müraciət edək.
- Son
zamanlar efirə çıxan aşıq xanımlarımız da çox səliqəsiz və baxımsız olublar.
Siz onlardan tamamilə fərqlənirsiniz.
- Səhnə gözəlliyi sevdiyi kimi, aşıq sənəti
də gözəlliyi sevir. Bəzən görürsən ki, aşıq səhnəyə çıxır, saçına daraq belə çəkmir.
Milli geyimdə olanda nə olar ki? Milli geyim o demək deyil ki, köhnə bir xələti
üstünə atıb, efirə çıxmalısan. Bizim o qədər gözəl, möhtəşəm dizayn olunmuş milli
geyimlərimiz var ki... Onu niyə köhnə kimi təqdim etməlisən ki? Demirəm, qızıl saplarla
geyim tikdirib onu mirvarilərlə bəzətdirməlidirlər. Heç olmasa geyimləri göz oxşasın.
Bu elə də çox maddiyyat tələb etmir. Səhnə formada olmağı, gözəlliyi sevir. Aşıqlar
ömür boyu məclisə girəndə hər kəsin diqqətini çəkib.
- Kökü
aşıq Alıya, aşıq Abbas Tufarqanlıya gedib çıxan aşıq sənətimizin bugünkü məktəbi
haqqında nə deyə bilərsiniz?
- Böyük hansı diqqəti göstərərsə, digərləri
də ona baxıb addım atarlar. Bu gün dövlət başçımızın, cənab prezidentimiz İlham
Əliyevin və eləcə də Birinci vitse-prezidentimiz Mehriban xanım Əliyevanın Azərbaycan
mədəniyyətinə, eyni zamanda aşıq sənətinə göstərdiyi diqqət və qayğı, onun dünya
səviyyəsində tanıdılması, UNESCO-nun siyahısına daxil edilməsi bizim üçün böyük
bir dəyərdir. Son illər bir çox aşıqlarımıza fəxri adlar verildi. Mən özüm 3 il
ard-arda Prezident mükafatına layiq görüldüm. Bu gün aşıqlar elmi müdafiə ilə
məşğul olurlar, ali təhsil ocaqlarında pedaqoq kimi çalışırlar. Bunun özü aşıq sənətinə
böyük təkandır. Bu gün musiqi məktəblərində aşıq dərsi tədris olunur. Azərbaycan
Dövlət Mədəniyyət və İncəsənət Universitetində aşıq sənəti kafedrası var. Baxmayaraq
ki, biz təhsil alanda belə bir kafedra yox idi. Bu kafedranın Aşıq Əhliman, Məhərrəm
Qasımlı və biz gənclər - Nemət Qasımlı, Fəzail Miskinli, Altay Məmmədov kimi
pedaqoqları var. Bizim dövlət tədbirlərində iştirakımız, xarici ölkələrdə dövlətimizi
təmsil etməyimiz gənclərdə maraq yaradır. Məhz görülən bu işlərin nəzdində
gənclər daha da həvəslənir və bizim universitetə çox müraciət edirlər.
Xəyalə Rəis