• cümə axşamı, 28 mart, 22:31
  • Baku Bakı 13°C

Nazirlik: Azərbaycan Vyana sazişinin vaxtının uzadılmasını məqbul hesab edir

28.03.17 15:00 705
Nazirlik: Azərbaycan Vyana sazişinin vaxtının uzadılmasını məqbul hesab edir
"Azərbaycan dünya bazarında neftin qiymətinin sabitləşməsi üçün OPEC çərçivəsində irəli sürülən təşəbbüslərə ilk vaxtdan qoşulan ölkələrdən biri kimi iyun ayının sonunda müddəti bitən Vyana sazişinin vaxtının uzadılması qərarını məqbul hesab edir". Bu barədə "APA-Economics"ə açıqlamasında Energetika Nazirliyinin mətbuat katibi Zəminə Əliyeva bildirib.
"Sazişin icrası artıq bazarda neftin qiyməti ilə bağlı müsbət tendensiya ilə müşayiət olunur. Bu isə göstərir ki, OPEC və təşkilata daxil olmayan neft hasil edən ölkələr bu istiqamətdə fəaliyyətlərini koordinasiya etməli və bütün zəruri addımları atmalıdırlar. Sazişin müddətinin uzadılması və ya prosesə xitam verilməsi, eləcə də əlavə həcmlərdə hasilatın azalması ilə bağlı hər hansı qərarın qəbulu OPEC-in iclası zamanı müəyyənləşəcək. Bununla belə OPEC-in növbəti toplantısında neft hasilatının azaldılması barədə sazişin uzadılmasına qərar veriləcəyi təqdirdə Azərbaycan razılaşmanı imzalayan tərəf kimi növbəti addımları da atmağa hazırdır. Yanvar ayından başlayaraq Azərbaycan üzərinə götürdüyü öhdəliyi tam yerinə yetirməkdədir. Bildiyiniz kimi, yanvar ayında gündəlik neft hasilatı 793,9 min barrel, fevral ayında isə bu göstərici 776,4 min barrel olub. Təsadüfi deyil ki, OPEC-in Monitorinq Komitəsi də Azərbaycanı hasilatın azaldılması üzrə öhdəliyin icrasında aparıcı rol oynayan ölkələr sırasına daxil edib", - deyə Z.Əliyeva bildirib.
Qeyd edək ki, hasilatın azaldılmasına dair əldə olunan razılığı əsasən, Azərbaycan cari ilin I yarısında sutkalıq hasilatı 35 min barel azaltmalıdır. Yanvar-fevral ayında Azərbaycan öhdəliyi 214% yerinə yetirib.
Azərbaycanda yanvar ayı ərzində orta sutkalıq hasilat 793,9 min barel təşkil edib. Bunun 743,1 min bareli xam neftin, 50,8 min bareli isə kondensatın payına düşüb.
Bununla yanaşı, yanvarda Azərbaycan 617 min barel xam neft və 50,8 min barel kondensat hasil edib.
Fevral ayında Azərbaycan 726,4 min barel xam neft, 50 min barel kondensat hasil edib. Ötən ay ərzində Azərbaycandan sutkada orta hesabla 604,1 min barel xam neft və 50 min barel kondensat ixrac olunub.
Xatırladaq ki, OPEC üzvləri və kartelə daxil olmayan ölkələr 2017-ci ilin I yarısında neft bazarının stabilləşdirilməsinə dair razılığa gəliblər. Bu müddət ərzində OPEC ölkələri sutkalıq hasilatı 1,2 mln. barel, kartelə üzv olmayan ölkələr isə 558 min barel azaltmaqla bağlı üzərinə öhdəlik götürüblər.
banner

Oxşar Xəbərlər