“Naxçıvanın tarixi abidələri” adlı dərslik işıq üzü görüb
AMEA Naxçıvan Bölməsinin
Tarix, Etnoqrafiya və Arxeologiya İnstitutunun şöbə müdiri, AMEA-nın müxbir
üzvü Vəli Baxşəliyev və Naxçıvan
Dövlər Universitetinin müəllimi Fizzə Quliyevanın müəllifi olduqları "Naxçıvanın
tarixi abidələri” adlı dərslik işıq üzü görüb.
"Naxçıvan” Universiteti Elmi şurasının qərarı
ilə nəşr olunan dərslikdə e.ə. VII minillikdən başlayaraq Naxçıvanda yaranan qədim
yaşayış yerləri və memarlıq abidələri haqqında məlumatlar öz əksini tapıb. Kitabda
Naxçıvan Muxtar Respublikası Ali Məclis Sədrinin 6 dekabr 2005-ci il tarixli
"Naxçıvan Muxtar Respublikası ərazisindəki tarix və mədəniyyət abidələrinin
qorunması və pasportlaşdırılması işinin təşkili haqqında” Sərəncamı əsasında 2006-2007,
2006-2012, 2008-2012, 2013-2016-cı illərdə beynəlxalq ekspedisiyaların da
qoşulduğu arxeoloji araşdırmalar zamanı aşkar olunan müxtəlif dövrlərə aid abidələr
və maddi-mədəniyyət nümunələri elmi cəhətdən təhlil edilib. Naxçıvanın Kür-Araz
mədəniyyəti abidələrinin tədqiqi bu mədəniyyətin mənşəyi, xronologiyası və
inkişaf xüsusiyyətləri ilə bağlı bir sıra məsələlərə aydınlıq gətirilir. Tədqiqatların
nəticələri göstərir ki, Naxçıvanın Kür-Araz mədəniyyətinin formalaşdığı əsas
regionlardan biridir.
Tədqiqatçılar, müəllimlər,
universitet tələbələri üçün nəzərdə tutulan, giriş, altı fəsil və nəticədən
ibarət olan dərslikdə Naxçıvanın qədim abidələri, o cümlədən Orta əsr tarix-memarlıq
abidələri ətraflı şəkildə işıqlandırılıb.
Yeni nəşrdə verilən məlumatlar Naxçıvanın qədim abidələrinin öyrənilməsi
baxımından böyük əhəmiyyətə malikdir. Dərsliyin
nəşr edilməsi heç şübhəsiz ki, qədim tariximizi daha dərindən öyrənmək istəyənlərə
dəyərli bir töhfədir.