Moldova ordusu prezidentə tabe olmaqdan imtina etdi
"Moldova prezidenti İqor Dodon xalqa müraciət edərək ümumxalq
etirazlarına rəhbərlik edəcək”. Bunu Moldova parlamentinin deputatı Vladimir
Çurkan bildirib. Deputat qeyd edib ki, Sosialistlər Partiyası ölkədə ən yüksək
reytinqə malikdir və sentyabrın 24-də baş tutacaq mitinqində hökumətin NATO-nun
Ukraynada keçiriləcək təlimlərinə prezidentin etirazlarına baxmayaraq
hərbçiləri göndərmək qərarını qabardacaq. Prezident partiyasından olan deputat
onu da deyib ki, hökumətin addımı milli müdafiə haqında qanunla ziddiyyət
təşkil edir. Antihökumət mitinqlərinin növbədənkənar parlament seçkilərinə
gətirib çıxara biləcəyi xüsusi qeyd edilir. Rusiyayönümlü qüvvələrin bu ərəfədə
xüsusilə fəallıq göstərdikləri vurğulanır.
Ölkədə artıq Konstitusiya münaqişəsi göz önündədir. Moldova
Xalq-Sosialist Partiyasının lideri Viktor Stepanyuk bu qənaətdədir. Moldovalı
siyasətçi bildirib ki, hökumət Ukraynada keçiriləcək NATO təlimlərinə
hərbiçiləri göndərməklə Konstitusiyanı pozub. Belə ki, ali qanuna görə, bu
hüquq prezidentə aiddir. Prezident isə "Rapid Trident 2017” adlanan təlimlərə
moldovalı hərbçiləri göndərməyi qadağan edib. Bundan sonra isə hökumət əks
qərar qəbul edib və müdafiə naziri də ona tabe olub. Bundan sonra prezident
Konstitusiya Məhkəməsinə müraciət etməli olub. Lakin son hadisələr göstərir ki,
Konstitusiya Məhkəməsi də hökumət və parlament çoxluğu ilə birgə prezidentə
qarşı çıxır. Bu səbəbdən də hadisələrin gedişi dövlət başçısının xeyrinə olmaya
bilər. Lakin məsələ ondadır ki, Dodona xalqın müəyyən bir hissəsinin dəstəyi
var. Bu səbəbdən də sentyabrın 24-də keçirilməsi nəzərdə tutulan mitinq kütləvi
hal ala bilər. Rusiyapərəst siyasətçi hesab edir ki, hakimiyyətlə siyasi elita
arasında qarşıdurmanın kökündə geosiyasi məsələ olduğu göz önündədir. Prezident
və tərəfdarları qatı rusiyapərəstdir. Seçkilərdə də Rusiya açıq şəkildə ona
dəstək verib. Hökumət və parlament çoxluğu isə əksinə, qərbyönümlü, Avropa
strukturlarına inteqrasiyanın tərəfdarı kimi tanınır. Viktor Stepanyuk xüsusi
vurğulayıb ki, sollar növbədənkənar seçkilərin keçirilməsi üzərində sona kimi
duracaqlar. Lakin məsələ ondadır ki, sosialistlərin cəbhəsində də birlik mövcud
deyil. Məsələn, Renato Usatının "Bizim Partiya”sı prezidenti tənqid etməyə
başlayıb. Bu partiyanın müəyyən elektoratı da var. Stepanyuk iddia edir ki,
insanlar Usatının Dodona qarşı tənqidlərlə çıxış etdiyini müşahidə etdikdə,
elektoratı ondan üz döndərəcək. Növbədənkənar seçkilərin keçirilməsinə qarşı
sağ partiyalar da çıxış edir. Onlar da son günlərə qədər sosialistlərlə birgə
idilər, lakin indi mövqelərini dəyişiblər. Bu səbəbdən də siyasətçi hesab edir
ki, qarşıdakı aksiyanın nəticələrini proqnoz etmək çox çətindir.
Xatırladaq ki, ötən gün
Moldova Milli Ordusunun birləşmələri prezidentin qadağasına baxmayaraq,
Ukraynada keçiriləcək "Rapid Trident 2017” beynəlxalq təlimlərinə yola düşüb. Lvov
vilayətində keçirilən təlimlərdə Moldovanın 57 hərbçisi iştirak edir. Sentyabrın
23-nə qədər davam edəcək təlimlərdə Ukraynadan 2,5 min hərbçi iştirak edəcək.
Ukrayna Müdafiə Nazirliyinin mətbuat xidmətinin məlumatına görə, bundan əlavə,
Alyansa üzv olan dövlətlərdən 14-nün hərbçiləri təlimdə təmsil olunurlar.
Moldova hərbçilərinin rəhbəri Aleksandr Markuça bildirib ki, bu təlimlərin
məqsədi Moldova ordusunun döyüş qabiliyyətinin artırılması, onun müdafiə
qabiliyyətinin möhkəmləndirilməsi, beynəlxalq arenada pozitiv obrazının
formalaşdırılmasıdır.
Sosialistlərin böyük ümid bəslədikləri aksiyaya dəstəyin güclü
olmadığını düşünənlər də var. Onların qənaətincə, hakimiyyətin Qərblə son
anlaşmaları əhali arasında hökumətə inamı artırıb. Keçirilən rəy sorğularının
nəticələrinə görə, prezidentə qarşı münasibət də birmənalı deyil. Bəziləri onun
qatı rusiyapərəst olması ilə barışmaq istəmir və hesab edirlər ki, ölkənin
ərazi bütövlüyünün pozulmasında Moskvanın əvəzsiz rolu olub. Bir qisim isə
əksinə, hökumətin korrupsiya girdabında çürüdüyünü əsas götürürlər. Belə ki, hələ
də bütün dünyaya səs salan "əsrin oğurluğu” qalmaqalı ilə bağlı gərginlik
səngiməyib. Bir milyard dollarlıq büdcə talanı ilə bağlı həbslər və istintaq
araşdırmaları getsə də, arada heç nə yoxdur. Hökumət üçün müsbət olanı odur ki,
prezidentin elə də böyük səlahiyyətləri yoxdur. Mitinq ona olan dəstəyin hansı
səviyyədə olduğunu üzə çıxara bilər. Bu səbəbdən də rusiyapərəst qüvvələr
təbliğat maşınını tam gücü ilə işə salıblar. Moldovada Ukrayna ssenarisinin
təkrarlana biləcəyinə də inam azdır. Alman politoloq Aleksandr Rar isə hesab
edir ki, prezident İqor Dodon Avropa İttifaqı ilə yaxşı münasibətlərin
qurulmasında, eləcə də, Rusiya ilə münasibətlərin bərpasında maraqlıdır. "Prezidentdən
fərqli olaraq isə yerdə qalan hakimiyyət rıçaqları Avropa İttifaqı ilə
münasibətlərin genişləndirilməsində maraqlıdırlar. Avropa İttifaqını isə
hazırda Moldova elə də maraqlandırmır - onun özünün problemləri kifayət
qədərdir”, - deyə o bildirib.
Son məlumatlara görə, prezident hərbi hissələri yoxlanılması barədə
qərar qəbul edib. Prezidentin mətbuat katibi bildirib ki, məqsəd hərbçilərin
hərbi hissələrdə olub-olmadığını üzə çıxarmaqdır. "Əgər onların yoxluğu üzə
çıxarsa, onda hərbi rütbələrindən məhrum ola bilərlər”, - deyə mətbuat katibi
sosial şəbəkələrdə yazıb. İstənilən halda, proseslərin gedişi sentyabrın
sonlarında keçirilməsi nəzərdə tutulan mitinqdən, daha dəqiq desək orada nə
qədər insanın iştirak etməsindən asılı olacaq.
Azər NURİYEV