Mərkəzi Asiya dövlətləri real inteqrasiya yolunda
Mərkəzi Asiya dövlətlərinin
daha sıx əməkdaşlığı məqsədilə vahid bir ittifaqda birləşməsi zaman-zaman müxtəlif
siyasi dairələr tərəfindən səslənməkdədir. Bu məsələdə təşəbbüskar kimi daha çox
Mərkəzi Asiyanın lider dövlətlərindən olan Qazaxıstan nəzərə çarpır. Belə ki, Prezident
Nursultan Nazarbayev dəfələrlə öz çıxışlarında qeyd edib ki, regionun stabilliyinin,
inkişafının, eləcə də hərbi və siyasi müstəqilliyinin yolu bu beş Mərkəzi Asiya
ölkəsi arasında sıx iqtisadi əməkdaşlıqdan keçir və artıq praktiki olaraq bu istiqamətdə
sözdən əmələ keçməyin vaxtı çatıb.
Məsələni maraqlı
edən isə odur ki, Qazaxıstan liderinin bu fikirləri təkcə yerli KİV-lərdə deyil,
eləcə də beynəlxalq mətbuatda da öz əksini tapmaqdadır və geniş auditoriyanın müzakirə
mövzusuna çevrilib. Hətta beynəlxalq nəşrlər belə Nursultan Nazarbayevi regionun
baş inteqratoru -prosesləri əvvəlcədən hesablamaq gücünə malik olan fitri istedad
- elan ediblər. Analitiklər hesab edirlər ki, məhz Qazaxıstan on ildən artıqdır
ki, Mərkəzi Asiya məkanında bütün əməkdaşlıq
proseslərinin baş təşəbbüsçüsü rolunda çıxış etməkdədir. Odur ki, haqlı olaraq Nursultan
Nazarbayevin təşəbbüsləri beynəlxalq arenada özünə belə böyük dəstək qazanmaqdadır.
Məsələn, Mərkəzi Asiyada yerləşən beş dövlətin daha sıx əməkdaşlığı üçün səylərin
birləşdirilməsinin vacibliyindən söhbət düşərkən Nursultan Nazarbayev deyir: "...Allah
özü bizə kömək olur. Baxın 55 milyon əhalimiz var, demək olar ki, dil problemimiz
yoxdur, iqtisadiyyatımız qarşılıqlı əvəzolunandır, eyni məkanda nəqliyyat və energetika
əlaqələrimiz mövcuddur. Bu region özünü ərzaq, energetika və s. məhsullarla tam
şəkildə təmin edə bilər. Hətta daxili tələbatımızdan da artıq məhsul istehsal edə
bilərik. Soruşuram, bizə daha nə lazımdır?...”. Ekspertlərin fikrincə, bu məsələdə
Qazaxıstan prezidenti haqlıdır. Elə buradan da haqlı sual meydana çıxır. Bəs elə
isə, bir sıra cəhətlər baxımından bir-birinə
yaxın və doğma olan, eyni ərazilərdə yaşayan, mentalitet baxımından fərqli olmayan
bu ölkələrin nəhayət birləşməsi üçün daha nələr lazımdır? Analitiklər hesab edirlər
ki, istənilən birlik, yaxud əməkdaşlığın özündə "plyuslar” və "minuslar” var. Bu beş Mərkəzi Asiya dövlətlərinin
- Qazaxıstan, Türkmənistan, Özbəkistan, Qırğızıstan və Tacikistanın bu birlik və
əməkdaşlıqdan özləri üçün yalnız xeyir götürə biləcəklərinə regiondan kənarda da
şübhə etmirlər. Hamı çox gözəl başa düşür ki, bu beş Mərkəzi Asiya dövlətinin birləşməsi
dünyada yeni böyük siyasi və iqtisadi güc yarada bilər.
Bu beş ölkənin malik
olduqları təbii sərvətlərin zənginliyi və müxtəlifliyinə nəzər saldıqda, heç kimdə
şübhə yeri qalmır ki, onlar bir-birləri üçün nə qədər xeyirli ola bilərlər. Məsələn,
Qazaxıstan MDB ölkələri arasında xrom filizləri və qurğuşun ehtiyatı həcminə görə
birinci, neft, gümüş, mis, sink, nikel və fosfor ehtiyatına görə ikinci, qaz, daş
kömür, qızıl və qalay ehtiyatına görə isə üçüncü yerdədir. Üstəlik, Qazaxıstanın
1,6 milyon ton təsdiqlənmiş uran ehtiyatı var və ölkə bu göstəriciyə görə, dünyada
ikinci yerdə qərarlaşıb.
Məşhur amerikalı
politoloq Z.Bjezinski vaxtilə Qazaxıstanın geosiyasi əhəmiyyətini vurğulayaraq,
onu Avrasiyanın "ürəyi” adlandırmış və bildirmişdi ki, "Qazaxıstan Mərkəzi
Asiyaya nəzarət edilməsinə imkan yaradır, eyni zamanda, Rusiyaya, Çinə, Xəzər vasitəsilə
Qafqaza yol açır. Avrasiya İttifaqının gələcəyi Qazaxıstanın inkişafından birbaşa
asılıdır".
Analitiklər hesab
edirlər ki, Qazaxıstanın regiona verə biləcəyi töhfələr saymaqla bitirmək olmaz.
Belə ki, bu ölkənin sərgilədiyi mehriban qonşuluq mədəniyyəti humanitar sahədə əməkdaşlığa
da böyük töhfə verə bilər. Bundan əlavə, Qazaxıstanın MDB, Kollektiv Təhlükəsizlik
Müqaviləsi Təşkilatı, Şanxay Əməkdaşlıq Təşkilatı, Avrasiya İqtisadi İttifaqı və
Asiyada Qarşılıqlı Təsir və Etimad Tədbirləri Müqaviləsi kimi regional birliklərlə əməkdaşlığı zamanı qazandığı
təcrübə də bu məsələdə çox böyük əhəmiyyət daşıyır. Eləcə də Qazaxıstan ATƏT kimi
nüfuzlu təşkilata sədrlik edib, BMT Təhlükəsizlik Şurasının qeyri-daimi üzvü seçilib.
Ekspertlərin fikrincə, bu ölkənin rolu və yeri təkcə beynəlxalq siyasətçilər tərəfindən
deyil, iqtisadi analitiklər camiyəsi tərəfindən də təqdir olunmaqdadır. Odur ki,
nüfuzlu iqtisadçı alimlərin qənaətinə görə, ümumi tarixi köklərə və ortaq dəyərlərə
malik regional oyunçuların birgə əməkdaşlığı onlara indiki zamanda dünyanı bürümüş
iqtisadi böhrandan xilas olmaqda yardım etmiş olacaqdır. Təbii, əgər xarici təsirlərin iştirakı olmadan düzgün regional
siyasət yürütmək mümkün olarsa. Əslində Mərkəzi Asiya ölkələrinin problemləri bir
o qədər də ciddi deyil və onlar xarici qüvvələr olmadan da region dövlətlərinin
özləri tərəfindən həll oluna bilər. Odur ki, ümumilikdə götürdükdə, məhz əməkdaşlıqdakı
qarşılıqlı anlaşma qlobal maliyyə və siyasi çaxnaşmaların fonunda regionun duruş
gətirməsinə imkan yarada bilər. Analitiklər belə hesab edirlər ki, bu zaman region
da təbii ki, iqtisadi cəhətdən rəqabətədavamlı
və siyasi cəhətdən stabil olmalıdır yalnız bu halda əməkdaşlıq fayda verə bilər.
Sadə dillə desək, Mərkəzi Asiya məkanında əməkdaşlıq - nəinki regionun iqtisadi
potensialının aşkarlanaraq üzə çıxarılmasıdır, bu, eyni zamanda siyasi, iqtisadi
və ideoloji cəhətdən dost olmayan qüvvələrin, eləcə də köhnə və yeni dünya mərkəzlərinin
təsirindən effektiv müdafiə deməkdir.
Yeri gəlmişkən xatırladaq
ki, hələ bir neçə il bundan əvvəl Qazaxıstan lideri Nursultan Nazarbayev Mərkəzi
Asiya Dövlətləri İttifaqının (MADİ) yaradılmasının vacibliyini bildirmişdi. O, belə
bir təşəbbüslə ilk dəfə 2005-ci ilin fevralında, ənənəvi xalqa müraciəti zamanı
çıxış etmişdi. "Biz sıx iqtisadi əməkdaşlıqda artıq sözdən işə keçməliyik, ümumi
bazara və vahid valyutaya doğru irəliləməliyik”, - deyə dövlət başçısı vurğulamışdı.
N.Nazarbayevin fikrincə, Mərkəzi Asiyada inteqrasiya bu regionda sabitlik, tərəqqi,
iqtisadi, hərbi və siyasi müstəqillik deməkdir. "Belə bir birlik regionda yaşayan
sadə xalqın maraqlarına cavab verir”, - deyə o zaman Qazaxıstan prezidenti bildirmişdi.
Bu beş dövlətin inteqrasiyasından söhbət gedərkən, burada analitiklər haqlı olaraq
qeyd edirlər ki, region dövlətlərinin birləşdirilməsi təşəbbüsü əvvəllər də mövcud
olub. Belə ki, Qazaxıstanın MADİ yaratmaq
ideyasından əvvəl, hələ sovet dövründə, Qırğızıstan və Özbəkistan Mərkəzi Asiya
İttifaqının (MAİ) yaradılmasına dair razılığa gəliblər. Və 1944-cü ildə həmin ölkələr
öz aralarında vahid iqtisadi məkanın yaradıldığını elan ediblər. Sonradan Tacikistanın
da bu alyansa daxil olması ilə, qurum adını dəyişərək Mərkəzi Asiya İqtisadi Birliyi
adlandırılıb. Ekspertlər qeyd edirlər ki, əfsuslar olsun ki, Birliyin qlobal şəkildə
əməkdaşlığı mümkün olmayıb. Çünki regional ittifaqın daxilində mövcud olan çoxsaylı
maneələr və daxili ziddiyyətlər bu əməkdaşlığa mane olur. Analitiklər hesab edirlər
ki, hər hansı bir regionda vahid iqtisadi məkanın yaradılması mütləq öz ardınca
dövlət sərhədlərinin müəyyənləşdirilməsi məsələsini gətirməlidir və bu mümkün olmadıqda
sərhəd problemi getdikcə daha da gərginləşə bilər. Elə Özbəkistan və Tacikistan
arasında mövcud olan dövlət sərhədinin müəyyənləşdirilməməsi problemi kimi.
Ekspertlər
hesab edirlər ki, unutmaq lazım deyil ki, bu regionun dövlətləri malik olduqları
təbii ehtiyatların fərqliliklərinə rəğmən, həm də bir-birlərinə rəqibdirlər. Belə
ki, onların əksəriyyəti məhz təbii xammal ixrac edən ölkələrdir. Digər tərəfdən
isə əməkdaşlıq layihələrinin böyük əksəriyyətinin iflasa uğramasının əsas səbəblərindən
biri də ölkələrin regionda özünü tam təsdiq edə bilməsi ilə bağlı olub. Başqa sözlə,
ölkələrin əksəriyyəti regional inkişafın perspektivlərinə inamsızlıq nümayiş etdiriblər.
Hətta Qazaxıstan belə, tamhüquqlu regional alyansın yaradılması ideyası ilə dəfələrlə
cəhdlər göstərməkdən yorularaq, özünü Mərkəzi Asiya dövlətindən çox, Avrasiya dövləti
kimi göstərməyə başlayıb. Bundan əlavə, analitiklərin fikrincə, Mərkəzi Asiya ölkələri
arasındakı inteqrasiyaya bu dövlətlərin malik olduqları müxtəlif iqtisadi inkişaf
modelləri, eləcə də dünyaya açıqlıq baxımından bir-birinə uyğun gəlməyən siyasi
üsul-idarə formaları da mane olub. Buraya həmçinin, qarşılıqlı ərazi iddiaları, eləcə də təbii su
ehtiyatlarından səmərəli istifadə edilməsindəki fikir ayrılıqlarını da əlavə etmək
lazımdır. Bütün bu sadalananları nəzərə alaraq haqlı sual ortaya çıxır. Bəs onda
beş Mərkəzi Asiya dövləti arasında inteqrasiyaya necə nail olmalı? Nədən başlamaq
lazımdır? Bu suala analitiklərin cavabı çox sadədir. Xüsusi olaraq heç nədən başlamaq
lazım deyil. İnteqrasiya prosesi artıq davam edir və ona çoxdan start verilib. Belə ki, bu, əsas etibarı
ilə qarşılıqlı ticarət əlaqələrinin artan statistikasına söykənir.
Analitiklər hesab
edirlər ki, birləşmə prosesini regional siyasətçilərin maraqları baxımından dərk
etmək və anlamaq lazımdır. Lakin bütün bunlara baxmayaraq, inteqrasiya prosesi getməkdədir
və bu, bəzi Mərkəzi Asiya liderlərinin subyektiv iradələrindən asılı olmayaraq baş
verir. Ekspertlərin fikrincə, hazırda gündəlikdə əsas bir məsələ durur - bu beş
dövlət arasındakı real inteqrasiya məsələsini indi həll etmək lazımdır, daha onu
hansısa sandığın bir küncünə atmaq lazım deyil. Çünki, birləşmənin əsasları üçün
səylər artıq mövcuddur, bundan sonraya isə yalnız rəqabətədavamlı ümumi bazarın
formalaşması, eləcə də indiyədək regionda mövcud olmayan Mərkəzi Asiya blokunun
yaradılması məsələsi qalır. Söhbət o alyansdan gedir ki, onun yaradılmasını gözləyənlərin
sayı, ondan ehtiyatlananlardan dəfələrlə və qat-qat çoxdur.
Kamran