Mənəvi dəyərlər bizim sabaha olan təminatımızdır - Fotolar
Mənəvi
dəyərlər insanı cəmiyyətdə formalaşdıran, inkişafa kömək edən davranış
qaydalarıdır. Bu qaydalar dünya sivilizasiyasının təməli qoyulandan yaranmağa
başlayıb. Dəyərlərin formalaşması prosesi nəticəsində dünyada hər bir fərdin
haqlarını daha dolğun təsdiq edən xüsusiyyətlər yaranır. Dünya xalqları
arasında milli-mənəvi dəyərləri ilə tanınan Azərbaycan xalqı yaşatdığı və
təbliğ etdiyi bəşəri ideyaları, adət-ənənələri, milli xüsusiyyətləri ilə
özünəməxsus yer tutur. 1969-cu il iyulun 14-də Azərbaycanda siyasi hakimiyyətə
gələn ümummilli lider Heydər Əliyev ilk gündən hər cür ideoloji-siyasi
baryerlərə sinə gərərək Azərbaycan xalqının milli özünüdərki üçün bütün zəruri
tədbirləri həyata keçirməyə başlayıb, ictimai şüurdakı qorxunu, ehtiyatlılığı
aradan qaldırmağı, cəmiyyəti bütün sahələr üzrə gələcək mənəvi yüksəlişlərə
ruhlandırmağı bacarıb. Məhz ulu öndər Heydər Əliyevin təşəbbüsü və qətiyyəti
ilə sovet dönəmində Azərbaycan SSR-nin Konstitusiyası qəbul olunarkən orada ana
dilimizin dövlət dili statusu təsbit olunub, həmçinin Novruz bayramı daha geniş
şəkildə təbliğ edilib.
"Milli-mənəvi
dəyərləri olmayan millət həqiqi millət, xalq ola bilməz”
1993-cü ildə
xalqın təkidli tələbi ilə yenidən siyasi rəhbərliyə gələn ulu öndər Heydər
Əliyev həyata keçirdiyi dövlət quruculuğu prosesi ilə paralel surətdə
mədəni-mənəvi quruculuq və milli-tarixi yaddaşın bərpası işlərinə də başlayıb.
Vaxtilə qadağalara məruz qalan, yasaq olunan milli və dini bayramlar, adət və
mərasimlər xalqa qaytarılıb, milli-mənəvi dəyərlərimizin təbliğinə geniş yer
verilib. Ümummilli lider Heydər Əliyev dünyada yaşayan azərbaycanlılara tövsiyə
xarakterli çıxışında xüsusilə vurğulayıb ki, soydaşlarımız öz ana dilini,
dinini, milli ənənələrini heç zaman unutmamalıdırlar. Onun sözlərinə görə, hər
bir azərbaycanlı fəxr etməlidir ki, onun böyük tarixə, qədim, zəngin
mədəniyyətə malik olan Azərbaycan kimi vətəni vardır: "Bizim milli-mənəvi
dəyərlərimiz əsrlər boyu xalqımızın həyatında, yaşayışında formalaşıb.
Milli-mənəvi dəyərləri olmayan millət həqiqi millət, həqiqi xalq ola bilməz”.
Dəyərlərimiz
mühafizə olunur
Milli-mənəvi
dəyərlərimizin qorunmasında, həmçinin təbliğində Heydər Əliyev siyasi kursunun
layiqli davamçısı Prezident İlham Əliyevin də kifayət qədər xidmətləri var.
Ölkəmizin başçısı bu gün də ən yaxın silahdaşı – birinci vitse-prezident, Heydər
Əliyev Fondunun prezidenti Mehriban Əliyeva ilə birlikdə bu ali ideyaların
gerçəkləşməsində yaxından iştirak edir. Hər iki şəxsin rəhbərliyi ilə milli-mənəvi
dəyərlərimiz mühafizə olunur. Prezident İlham Əliyevin konsepsiyasına görə,
milli ruhu qorumağın, inkişaf etdirməyin və yeni nəsillərə çatdırmağın ən mühüm
şərti məhz milli dövlətçilikdir.
Təsadüfi deyil ki, dövlət başçısı tərəfindən
ardıcıl tədbirlər nəticəsində aparılan tikinti, yenidənqurma və bərpa
işlərindən sonra Bibiheybət, Təzəpir, İçərişəhər Cümə, digər məscid və
ziyarətgahları, habelə Qafqazın ən böyük ibadət evini - Heydər Məscidini
görəndə hər bir azərbaycanlının qəlbi iftixar hissi ilə dolur. Bu müqəddəs
ocaqlar öz unikal milli memarlıq xüsusiyyətləri və tarixiliyi ilə ölkəmizin
çağdaş mədəni simasına misilsiz gözəllik və zənginlik gətirməklə yanaşı,
vətənimizin İslam dünyasında yerini möhkəmləndirərək, nüfuzunu daha da artırır.
Media
cəmiyyəti daha doğru istiqamətləndirə bilər
Heç kimə sirr
deyil ki, hər bir millət üçün ən böyük və ən qiymətli dəyərlər sayılan din, dil,
mədəni-mənəvi irsin qorunub saxlanmasında, təbliğində, nəsillərdən-nəsillərə
ötürülməsində media da mühüm rol oynayır. Xüsusən də nəzərə alanda ki, cəmiyyətimiz
inkişaf edir və müasirləşir, bu inkişafdan, dünyadakı qloballaşmadan irəli
gələrək dəyərlərimizə müxtəlif təsirlər ola bilər, məhz belə zamanda milli
dəyərlərimizi qorumaq getdikcə çətinləşir. Ona görə də medianın bu sahədə
oynadığı rol daha böyük önəm daşıyır, medianın üzərinə böyük məsuliyyət düşür.
Bəs media bu məsuliyyətin, üzərinə düşən işin öhdəsindən layiqincə gələ
bilirmi?
Milli Məclisin İctimai birliklər və dini qurumlar
komitəsinin üzvü Fazil Mustafa hesab edir ki, Azərbaycanda milli-mənəvi
dəyərlər anlayışı doğru müəyyənləşmədiyinə görə, çox vaxt cəmiyyətdə gerilikçi
təzahürlərin təbliğ olunmasına münbit şərait yaradır. Deputatın sözlərinə görə,
milli-mənəvi dəyərlər ilk öncə modernlik baxımından faydalı dəyərlər kimi
anlaşılmalıdır: "Çox zaman media peşəkarlığının zəif olması illərdir ideoloji
xarakterli əzbər mətnlərin dəyərlər kateqoriyasında təqdim olunmasına səbəb
olur. İlk növbədə düşüncə adamları bu dəyərlərin təsnifatını verməlidir, media
quruluşları da fikirlərə istinad prinsipi ilə bu istiqamətdə təbliğat
aparmalıdırlar. Burada bəlkə də ən mühüm rol mediaya aiddir. Xüsusilə də
internet məkanında çevik informasiya silahına malik olan media cəmiyyəti daha
doğru istiqamətə yönləndirə bilər”.
Mənəvi
dəyərlərə sadiqlik ruhuna köklənmək
Azərbaycan Mətbuat Şurasının sədri, millət vəkili
Əflatun Amaşov bizimlə söhbətində deyib ki, mənəvi dəyərlər
səviyyəsindən, intellektual hazırlığından asılı olmayaraq istənilən cəmiyyət
üçün vacib həyat mexanizmləridir. Deputat bildirib ki, cəmiyyət onun üzərində
qurulur: "Düşünürəm ki, media ilk növbədə bu amili nəzərə almalıdır. Nəinki
nəzərə almalı, eyni zamanda inkişaf etdirməlidir. Bu, medianın üzərinə düşən
başlıca missiyalardandır. Əlbəttə, bəzən ziddiyyətli məqamlar da ortaya çıxır.
Media elə edə bilər ki, həmin ziddiyyətlər münaqişə halına gələr. Ancaq elə
etməlidir ki, ziddiyyətli məsələlər əsaslı və soyuq şəkildə izah olunsun. O
zaman anlaşma mühiti formalaşır. Media peşəkarlığı da məhz bundan ibarətdir.
Yəni peşəkarlıq ilk növbədə həssaslığa söykənməlidir. Media həssas olacaqsa,
mənəvi dəyərlər təbliğ olunacaq. Təbliğ olunacaqsa, deməli, həm də
qorunacaqdır. Düşünürəm ki, Azərbaycan mediası mahiyyət etibarilə mənəvi
dəyərlərə sadiq ictimai institut kimi özünü təsdiqləyib. İstər tarixilik,
istərsə də müstəqillik illərindəki fəaliyyət baxımından ortada olan mənzərə
bunu deməyə əsas verir. Ancaq hər bir halda media vasitəçidir. Mövcud
istiqamətdə çalışan qurumlar var. Hesab edirəm ki, onlar işlərinə daha
institusional şəkildə yanaşmalıdırlar. Yəni, medianı informasiyalarla təmin
etməlidirlər. Belə olduqda bu qurumların fəaliyyətlərinin cəmiyyətdəki təzahürü
də mənəvi dəyərlərə sadiqlik ruhuna köklənəcəkdir”.
Yalnız
medianın deyil, hər kəsin vəzifəsi
Siyasi şərhçi Azər Həsrət bildirib ki,
mənəvi dəyərlərin qorunması və təbliğ edilməsi yalnız medianın deyil, hər kəsin
vəzifəsidir. Onun fikrincə, bu dəyərlər aşındıqca cəmiyyətimiz də gücdən
düşəcək, sabahımız şübhə altına alınacaq: "Mənəvi dəyərlər bizim sabaha olan
təminatımızdır. Bu təminatın möhkəmlənməsində media hamıdan öndə olmalıdır. O
baxımdan, jurnalistlərin görə biləcəyi iş başqalarına nisbətdə daha çoxdur. Biz
media təmsilçiləri olaraq elə etməliyik ki, mənəvi dəyərlərin təbliğində öndə
olaq. Bunun ən yaxşı üsulu yaxşı örnəkləri daim diqqətdə saxlamaq, qabartmaq,
populyarlaşdırmaqdır. Yəni elə etməliyik ki, oxucu-istifadəçi mediada bir qayda
olaraq yaxşı örnəklərə alışsın, daim gözü belə örnəkləri axtarsın. Biz belə
davranacağımız təqdirdə mənəvi dəyərlərə sayğı cəmiyyətdə vərdişə çevriləcək.
Belə bir vərdişsə o dəyərlərin yaşarlılığını təmin edəcək. Şəxsi örnək, başqalarının
yaxşı örnəkləri yaxşı mənada yoluxucudur. Media hər kəsi belə örnəklərə
yoluxdurmaq üçün vasitəçi rolunu layiqincə oynamalıdır.”
Azərbaycanın
mənəvi mühitinə medianın təsir gücü
Şərqşünas Seyid Camal Əzimbəyli hesab edir
ki, Azərbaycanda milli-mənəvi dəyərlərin, mədəni irsimizin dövlət tərəfindən həqiqi
təəssübkeşliyi yüksək səviyyədədir. O, bunu Azərbaycan xalqının böyük uğuru
kimi dəyərləndirib: "Milli-mənəvi dəyərlərimizin qorunmasında, təbliğində
medianın rolu misilsizdir. Çox təəssüf ki, bəzi hallarda bir sıra xəbər
saytları bu rola məsuliyyətsiz yanaşır, uyğunsuz materialları tirajlamaqla
milli-mənəvi dəyərlərimizə zərbə vurur. Bu, üzücüdür. Lakin bütövlükdə
milli-mənəvi dəyərlərin təbliği ilə bağlı Azərbaycanda həm onlayn medianın və
mətbu orqanların, həm də radio-televiziyaların özünəməxsus xidmətləri var. Bu
xidmətlər içərisində mənim daha çox görmək istədiyim ondan ibarətdir ki,
Azərbaycanın mənəvi mühitində təsir gücü olan, əməlləri ilə milli-mənəvi
dəyərləri öz həyatına transfer edən insanlar da gündəmə gətirilsin. Mənəvi
dəyərlərə heç bir aidiyyəti olmayan, dini cameədə, toplumda, cəmiyyətdə, hətta
öz ailəsində belə sözü keçməyən, öz kəndində, qəsəbəsində, məhəlləsində
sevilməyən, qəbul olunmayan bəzi şəxslərin ekspert qismində geniş ictimaiyyətə
təqdim olunmasına da yol vermək olmaz. Belələrinin fikirlərinin insanlarımıza
çatdırılmasını düzgün hesab etmirəm. Hər zaman çalışmaq lazımdır ki, mənəvi
dəyərlərin təbliği zamanı Azərbaycan dövlətçiliyinə, milli mənafeyimizə zidd
olacaq addımlar atılmasın. Sevindirici haldır ki, dövlətimizin bu sahədə həyata
keçirdiyi çoxsaylı layihələr var. Zaman-zaman həmin layihələrdə ekspert kimi
mən də iştirak etmişəm. Son olaraq vurğulamaq istərdim ki, ümumən medianın
milli-mənəvi dəyərlərin qorunmasında xidmətləri böyükdür”.
Rufik İSMAYILOV
Yazı Azərbaycan
Respublikasının Dini Qurumlarla İş üzrə Dövlət Komitəsinin tabeliyində Mənəvi
Dəyərlərin Təbliği Fondu tərəfindən elan olunan "Media və mənəvi dəyərlər”
mövzusunda məqalə müsabiqəsinə təqdim edilir