Məktəblilər ümummilli lider Heydər Əliyevin azərbaycançılıq siyasətini öyrənirlər - Fotolar
Dünən Humanitar Araşdırmalar İctimai Birliyi Azərbaycan
Respublikasının Prezidenti yanında QHT-lərə Dövlət Dəstəyi Şurasının maliyyə
yardımı ilə "Şagirdlər arasında vətənpərvərlik ruhunun gücləndirilməsi
istiqamətində tədbirlərin keçirilməsi” layihəsi çərçivəsində Tərəqqi Liseyində
şagirdlərlə növbəti görüşünü keçirib. Birliyin
sədri Nurlana Mustafayeva rəhbəri olduğu Humanitar Araşdırmalar İctimai
Birliyinin fəaliyyəti barədə məlumat verib. O qeyd edib ki, təşkilat ötən
müddət ərzində gənclərlə və tələbələrlə bağlı layihələr həyata keçirir:
"Azərbaycançılıq, vətənpərvərlik, jurnalistika və digər mövzularda
layihələrimiz həyata keçirilib. Budəfəki layihəmiz məktəblilərin
vətənpərvərlik, azərbaycançılıq və digər bu kimi mövzularda
maarifləndirilməsinə yönəlib. Bunun üçün də biz istərdik ki, çıxışlardan daha
çox, şagirdlərlə fikir mübadiləsi aparaq. Müzakirə edəcəyimiz mövzu isə "Ümummilli
lider Heydər Əliyev və azərbaycançılıq siyasəti” adlanır”.
N.Mustafayeva vurğuladı ki, layihə çərçivəsində şagirdlər arasında
yazı müsabiqəsi keçirilir: "İstərdim hər bir şagird bu müsabiqəyə
vətənpərvərlik, azərbaycançılıq mövzuları ilə bağlı düşüncələrinin yer aldığı yazı
ilə qatılsın. Əlbəttə ki, sonda təqdim edilən yazılar təşkilatımız tərəfindən
qiymətləndiriləcək”.
Azərbaycan Dillər
Universitetinin jurnalistika kafedrasının müdiri Nərgiz Qurbanlı bildirdi ki,
orta məktəblərdə şagirdlərin maarifləndirilməsində qeyri-hökumət təşkilatlarına
yaradılan şərait təqdir olunmalıdır: "Mövzuya gəlincə, ulu öndər Heydər
Əliyevin azərbaycançılıq ideyası hər zaman aktualdır. Ümummilli lider hər zaman
çıxışlarında bu ideyanın vacibliyini bu və ya digər formada aşılayıb. Bugünkü
şagirdlər onu sağ olarkən görməyiblər və ulu öndərin vətənpərvərlik çıxışlarını
canlı izləməyiblər. Lakin onunla ünsiyyətdə olan jurnalistlər, Heydər Əliyevin
necə bir istedad sahibi, siyasətçi olmasını yaxından görüblər. Ulu öndər Heydər
Əliyev dahi bir şəxsiyyətdir və bu gün bizim müstəqil, sabitliyin təmin
olunduğu bir ölkədə yaşamağımızda onun müstəsna rolu olub. Bizim hər birimiz
yaradılan bu yüksək şəraitə görə Heydər Əliyevə borcluyuq. Təbii ki, indiki
uşaqlar, yeniyetmələr sovetlər dövrünü və daha sonra müstəqilliyin ilk
illərindəki ağır sosial şəraiti görməyib və yaşamayıblar. Ötən əsrin 90-cı
illərinin əvvəllərində elə olurdu ki, orta məktəbə ac getməli olurduq, çörək
tapa bilmirdik. İşıq, qaz və hətta su problemə çevrilmişdi, evləri isitmək
mümkün olmurdu. Bu gün isə o problemlər artıq geridə qalıb və Azərbaycan bütün
sahələrdə inkişafa nail olub. Ölkəmiz beynəlxalq tədbirlərin ünvanına çevrilib.
Amma bütün bunlar heç də asan başa gəlməyib. Fəxrlə deyə bilərik ki, ulu öndər
Heydər Əliyevin siyasətini prezident İlham Əliyev uğurla davam etdirir və biz
Azərbaycanın inkişafının günbəgün şahidi oluruq”.
N.Qurbanlı qeyd etdi ki, ümummilli lider Heydər Əliyev azərbaycançılıq
ideyasının təbliği istiqamətində çox böyük işlər görüb: "O vurğulayırdı ki,
azərbaycanlılar harada yaşamasından asılı olmayaraq, orada milli mənəvi
dəyərləri qorumalı və onun təbliğatçısına çevrilməlidirlər. Türkiyəyə
tələbələri göndərərkən ulu öndər onlara təhsil alıb vətənə dönmələrini tövsiyə
edirdi. Çünki xaricdə əldə olunan biliklər və dünya görüşünə sahib olanlar onu
Azərbaycanda gənclərə ötürmək imkanı əldə edirlər. Bu vətənpərvərlik hissi hər
bir azərbaycanlının qanına-canına hopubdur. Xaricdə təhsil alan gənclər harada
Azərbaycan bayrağını görürdülərsə, onu öpüb gözünü üstünə qoyurdular. Çünki
Azərbaycan adının dünyada tanıdılması hər bir azərbaycanlının vəzifə borcu olmaqla
yanaşı, həm də qürur mənbəyidir. Heç təsadüfi deyil ki, ümummilli lider Heydər
Əliyev hər zaman qürurla "Mən fəxr edirəm ki, azərbaycanlıyam” deyirdi”.
Tərəqqi Liseyinin direktor
müavini Mehriban Salahova vurğuladı ki, təmsil etdiyi təhsil ocağında mütəmadi
olaraq vətənpərvərlik, azərbaycançılıq mövzularında tədbirlər keçirilir: "Bizim
məktəbimiz beynəlmiləl olsa da, çalışırıq ki, milliyyətindən asılı olmayaraq
hər bir şagird bu tədbirlərə qatılsın. Çünki hər kəsin borcudur ki, Azərbaycan
haqqında bilsin, öyrənsin və onun təbliğ eləsin. Elə bu məqsədlə 9
noyabr-Bayraq Günü münasibətilə yazısı müsabiqə elan etmişik. Bütün bu
tədbirlər şagirdlərin formalaşmasında böyük rol oynayır”.
Tərəqqi Liseyinin 9 b sinfinin şagirdləri Aytac Daşdəmirova və Ləman
Həsənzadə Humanitar Araşdırmalar İctimai Birliyinin elan etdiyi yazı
müsabiqəsinə təqdim etdikləri inşanı diqqətə çatdırdılar. Daha sonra tədbir
mövzu ətrafında müzakirələrlə davam etdirildi.
BƏXTİYAR