Mehriban Əliyevanın tapşırığı əsasında şəhidin kredit borcu ilə bağlı məsələ həll olunub
Aprel şəhidi Xaliq Əzizzadənin "Para" BOKT
ASC-yə olan kredit borcu bağlanıb və müvafiq sənəd ailəsinə təqdim edilib.
Qeyd edək ki, bu məsələ birbaşa Azərbaycanın Birinci
vitse-prezidenti Mehriban Əliyevanın nəzarətində idi.
Birinci vitse-prezidentin köməkçisi Anar Ələkbərov şəhidin anası ilə danışıb və
bildirib ki, bütün şəhid ailələri, o cümlədən siz Mehriban Əliyevanın diqqətindəsiniz.
Qeyd edək ki, Mehriban Əliyeva həmişə
şəhid ailələrinə diqqətlə yanaşıb. O, hələ ötən ilin
7 aprelində şəhid anaları ilə görüşüb. Belə ki, Heydər
Məscidində Azərbaycan və Ermənistan qoşunlarının təmas xəttində ermənilərin təxribatının
qarşısını alarkən qəhrəmanlıqla şəhid olan hərbçilərin ruhuna Heydər Əliyev
Fondunun prezidenti Mehriban Əliyevanın adından ehsan verilib. Azərbaycanın
1-ci xanımı Vətən uğrunda qəhramanlıqla şəhid olan və yaralanan hərbçilərin ailə
üzvləri və yaxınları ilə görüşərək həlak olan Azərbaycan oğullarına Allahdan rəhmət,
yaralananlara isə şəfa diləyib.
Şəhid ailələrinin qayğıları sonrakı dövrdə də Azərbaycanın Birinci
vitse-prezidentinin daim diqqət mərkəzində olub, onların bir sıra problemləri
öz həllini tapıb.
Onun Birinci vitse-prezident kimi keçirdiyi ilk
iclasın qaçqın və məcburi köçkünlər, ikinci görüşün isə aprel döyüşlərində
yaralanmış hərbçilərlə bağlı olması da təsadüfi deyil. Uzun illərdir ölkəmizin
ictimai-siyasi, mədəni, humanitar, sosial həyatında mühüm və fəal rol oynayan
Mehriban xanım Əliyeva Azərbaycanın Birinci vitse-prezidenti təyin olunduqdan
sonra sosial məsələləri daim diqqət mərkəzində saxlamaq, işlərini əhalinin aztəminatlı
hissəsinin problemlərinin həlli üzərində qurmaq niyyətində olduğunu bəyan
etmişdi: "Ayrı-ayrı insanların problemlərinə heç vaxt biganə qalmamışıq.
İnsanlarla ünsiyyətdə olmaq, onları dinləmək, köməyə ehtiyacı olanlara kömək
etmək, mənəvi dəstək vermək ümdə vəzifəmizdir”.
Xatırladaq ki, "Para" BOKT ASC kredit borcuna görə
məhkəməyə müraciət etmiş, şəhid ailəsi evini itirmək təhlükəsi ilə üzləşmişdi.