Mədəniyyət ocaqları IV İslam Həmrəyliyi Oyunlarına hazırdır
Artıq Bakıda
keçiriləcək IV İslam Həmrəyliyi Oyunlarının başlamasına bir neçə həftə qalıb. Bir
sıra tədbirlərə ev sahibliyi etmiş ölkəmiz may ayının 12-22-si aralığında IV
İslam Həmrəyliyi Oyunlarına da ev sahibliyi edəcək. Bu mötəbər yarışa ciddi hazırlıq
işləri görülür. Bu yarışın ölkəmiz üçün əhəmiyyətini
nəzərə alaraq, paytaxtımızda fəaliyyət göstərən mədəniyyət ocaqlarımız da
yarışın aurasınadan kənarda qalmamalıdırlar. Bəzi mədəniyyət ocaqları ilə əlaqə
saxlayıb, onların İslam Həmrəyliyi Oyunları üçün tədbir
planlarını öyrəndik.
Heydər Əliyev sarayında yenilik gözlənilir
Heydər Əliyev sarayının mətbuat
xidmətinin rəhbəri Anar Fərəczadə deyir
ki, Bakıda keçiriləcək IV İslam Həmrəyliyi Oyunları ərəfəsində Azərbaycan
Respublikası Mədəniyyət və Turizm Nazirliyinin təşkilatçılığı ilə bir sıra mədəni
proqramların hazırlanıb keçirilməsi nəzərdə tutulub. Yarış günlərində Heydər
Əliyev sarayında qonaqlara və turistlərə islam mədəniyyəti, Azərbaycanın zəngin
mədəniyyəti və incəsənətini əks etdirən müxtəlif tədbirlər və konsert
proqramları təqdim ediləcək. Belə ki,
Bakı Şoppinq Festivalının açılış mərasimində Azərbaycan Dövlət Rəqs
Ansamblının iştirakı ilə premyerası keçirilən konsert proqramı yenidən paytaxt
sakinlərinə və xarici qonaqlara təqdim olunacaq. Obrazlığı, rəngarəngliyi və
ifaları böyük maraqla qarşılanan, qonaqlar tərəfindən yüksək qiymətləndirilən
Azərbaycan Dövlət Rəqs Ansamblının "Mənim Azərbaycanım” yeni konsert proqramı və
"Koroğlu” bir pərdəli baleti mayın 20-də Heydər Əliyev Sarayında baş tutacaq.
Konsertin bədii rəhbəri və quruluşçu rejissoru Rusiya Federasiyasının xalq
artisti Dikalu Muzakaevdir”.
Saraydan
verilən məlumata görə, İslam Həmrəyliyi Oyunlarının keçirildiyi müddətdə gerçəkləşəcək
konsertdə yeni əsərlərə də yer veriləcək. Belə ki, Mayın 21-i Heydər Əliyev
Sarayında əməkdar artist, xanəndə Fərqanə Qasımova solo konsert verəcək.Bundan
əlavə, aydın oldu ki, may ayının 12, 13 və 14-də Heydər Əliyev Sarayında "Ginessin
rekordlar kitabı”na iki dəfə düşmüş, dünyada üç ən böyük rəqs
qruplarından biri, 90-dan çox ölkədə ən məşhur səhnələrdə 35 milyona yaxın tamaşaçı
qarşısında çıxış etmiş"Anadolu Atəşi” rəqs ansamblı öz
möhtəşəm "İpək Yolu” adlı yeni proqramını təqdim edəcək: "Bildirək ki, "Anadolu
Atəşi" rəqs qrupu bir neçə dəfə Azərbaycanda öz möhtəşəm proqramları
ilə çıxış edibvə böyük auditoriyanın rəğbətini qazanıb”.
Heydər
Əliyev Sarayı öz təşəbbüsü ilə mədəniyyət müəssisələri və təşkilatları arasında
daha bir ilkə imza ataraq, sarayının mobil tətbiqini istifadəyə verib. Bu layihəni
reallaşdırmaqda əsas məqsəd isə IV İslam Həmrəyliyi Oyunları, "Formula-1” Azərbaycan
Qran-prisi və Bakı Şoppinq Festivalı kimi mötəbər tədbirlərin keçiriləcəyi müddətdə
ölkəmizə gələcək xarici qonaqlara, turistlərə və yerli tamaşaçılara beynəlxalq
standartlara uyğun, ən yüksək səviyyəli xidmət göstərməkdir. Belə ki, həmin ərəfədə
Sarayda IOS və Android əməliyyat sistemli mobil cihazların istifadəçiləri Heydər
Əliyev Sarayının mobil tətbiqini "App Store” və "Google play” mağazalarından
yükləyə bilərlər. Xarici qonaqlar, turistlər və yerli tamaşaçılar bu tətbiq
vasitəsi ilə Heydər Əliyev Sarayı və keçiriləcək təbdir və konsertlər haqqında ətraflı
informasiya ala bilərlər. İstifadəçilər mobil tətbiq vasitəsilə Heydər Əliyev
Sarayının "facebook”, "instagram”, "youtube” səhifələrini və sarayın saytını
izləmək imkanı əldə edəcək, eyni zamanda e-bilet bölməsindən Heydər Əliyev
Sarayında keçirilən bütün tədbir və konsert proqramlarına onlayn bilet əldə edə
biləcəklər. Qeyd edək ki, bu, Azərbaycan mədəniyyət ocaqları arasında bir
ilkdir.
Milli Dram Teatrı İslamiada ilə bağlı tamaşaları rus və ingilis dillərində subtitrlərlə nümayiş etdirir
"Ölkəmizdə keçirilən IV İslam Həmrəyliyi Oyunları ilə bağlı Azərbaycan Dövlət Akademik Milli Dram Teatrının səhnəsində nümayiş olunan tamaşalar müvafiq olaraq rus və ingilis dillərində subtitrlərlə nümayiş olunur”.
Bu sözləri "Kaspi” qəzetinə teatrın mətbuat xidmətinin rəhbəri Cavid Zeynallı deyib. C.Zeynallının sözlərinə görə, Mədəniyyət və Turizm Nazirliyinin dəstəyi ilə təqdim edilən səhnə əsərlərinin tərcümə edilməsinə və müvafiq xarici dillərdə nümayişinə xüsusi şərait yaradılıb.
"Artıq may ayının əvvəlindən başlayaraq teatrımızda subtitrlərlə tamaşaların nümayiş olunmağına başlanılıb və bu, uğurla davam edir. Subtitrlər səhnənin hər iki tərəfində tamaşaçıların bütün istiqamətlərdən görə biləcəyi şriftlərlə əks olunur. Bu da imkan verir ki, əcnəbi tamaşaçılar, şəhərimizin qonaqları tamaşadakı obrazların dialoqlarını rahat oxuya bilsinlər. Repertuara həm klassik, həm də müasir Azərbaycan dramaturgiyasının nümunələri əsasında hazırlanan səhnə əsərləri daxil edilib. Məqsəd İslamiada zamanı ölkəmizə təşrif gətirən turistlər və yarış iştirakçılarında çağdaş Azərbaycan teatrı və dramaturgiyası haqqında zəngin təəssürat yaratmaqdır. C. Cabbarlının "Almaz”, Cəlil Məmmədquluzadənin "Ölülər”, İ. Əfəndiyevin "Boy çiçəyi”, H. Mirələmovun "Vəsiyyət”, N. V. Qoqolun "Müfəttiş”, E.De.Filipponun "Silindr”, B.Nuşiçin "Nazirin xanımı”, A. Saqarelinin "Xanuma” tamaşalarını xarici qonaqlar subtitrlərlə izləyə biləcəklər. İnanırıq ki, ölkəmizin paytaxtında keçiriləcək IV İslam Həmrəyliyi Oyunlarının iştirakçıları da Akademik Milli Dram Teatrının səhnəsində oynanılacaq tamaşalardan məmnun qalacaq və Azərbaycandan xoş təəssüratla ayrılacaqlar”.
Gənc Tamaşaçılar Teatrı da tam hazırdır...
Dövlət Gənc
Tamaşaçılar Teatrının direktoru Mübariz Həmidov bizimlə söhbətində bildirdi ki, dünyanın müxtəlif ölkələrindən turistlərin Azərbaycana axın edəcəyini nəzərə
alaraq, ADGTT da bütün hazırlıq işlərini artıq yekunlaşdırıb: "İslam Həmrəyliyi
Oyunlarının ölkəmizdə keçirilməsi Azərbaycanın onsuz da yüksək olan nüfuzunu
bütün dünyada daha da artıracaq. Bu yarış ölkəmizin siyasi, mədəni, ictimai və
sosial həyatında olduqca əhəmiyyətli hadisə kimi tarixə düşəcək. Oyunların
keçiriləcəyi 12-22 may tarixlərində şəhərimizə təşrif buyuracaq qonaqları və
xarici turistləri qəbul etməyə tam hazırıq. Qonaqların tamaşalara daha rahat şəkildə
baxmaları üçün cari repertuarımızda olan tamaşların ingilis dilinə tərcümə
olunub səhnədəki qurğu ilə subtitrlər vasitəsilə ötürülməsi və s. təşkilati məsələlər
təmin edilib”.
Teatrın
rəhbəri onu da əlavə etdi ki, artıq teatrın cari ilin may ayı üçün nəzərdə
tutulan xüsusi repertuarı tərtib edilib, repertuara Azərbaycan və dünya
klassiklərinin, eləcə də müasir yazarların
əsərləri daxil edilib: "Qonaqlar üçün dünya dramaturgiyasının ən məşhur
nümunələri ilə bərabər, Azərbaycan dramaturgiyasından da ən gözəl seçmələri -
M.F.Axundzadənin "Müsyö Jordan və dərviş Məstəli şah”, Ə.Haqverdiyevin "Pəri
Cadu”, H.Cavidin "Şeyx Sənan”, M.Makdonaxın "Yalqız Qərb”, "Gözəllik kraliçası”, "Konnemarada bir kəllə”, L.Nurenin "Mən gəldim, qızlar” ("Müharibə”), U.Şekspirin
"Romeo və Cülyetta” tamaşaları nümayiş
etdiriləcək. Ümidvaram ki, ölkəmizdə keçiriləcək IV İslam Həmrəyliyi
oyunları günlərində Azərbaycan Dövlət Gənc Tamaşaçılar Teatrı bütün yaradıcı və
texniki qüvvəsini səfərbər edərək, mədəniyyətimizi növbəti dəfə də layiqincə təmsil
edəcək”.
Musiqili Teatr qonaqların yolunu səbirsizliklə gözləyir
Dövlət Musiqili Teatrı İslamiada
ilə əlaqədar xüsusi tədbirlər planı hazırlayıb. Teatrın direktoru Əliqismət Lalayev teatrının hazırlıqları başa
çatdırdığını dedi: "May ayında
teatrımızda 26 tamaşanın nümayiş olunması nəzərdə tutulur. Mayın 5-dən 30-a
kimi demək olar ki, hər gün 2 tamaşa qonaqlara, turistlərə, yarış iştirakçılarına
təqdim olunacaq. Nümayişini planlaşdırdığımız səhnə əsərlərinin siyahısına
klassik, müasir və uşaq tamaşaları daxildir. Gələn ay ölkəmizə, xüsusilə də
idman yarışlarının keçiriləcəyi paytaxtımıza dünyanın müxtəlif ölkələrindən
çoxsaylı qonaqların – turistlərin, azarkeşlərin gəlməsi gözlənilir. Bunu nəzərə
alaraq, repertuarımıza ingilis dilinə tərcümə olunmuş bir sıra əsərləri daxil
etmişik. Üzeyir Hacıbəylinin "O olmasın, bu olsun”, "Ər və arvad”, Ə.
Haqverdiyevin "Kimdir müqəssir?”, O. Kazimi və R. Heydərin "Qızıl toy”, R.
Hacıyevin "Talelər qovuşanda” və başqa əsərlər ingilis dilində əcnəbi
qonaqlarımıza təqdim olunacaq. Azərbaycan Respublikası Mədəniyyət və Turizm
Nazirliyinin dəstəyi ilə repertuarımızdakı əsərlərin tərcümə edilməsi tamaşalarımızın
xarici dillərdə nümayişinə xüsusi şərait yaradır. Biz artıq bu təcrübədən
istifadə etmişik və kifayət qədər də uğurlu nəticələr əldə olunub. Yeri gəlmişkən
bildirim ki, gələn ay bir sıra tamaşalarımız rus dilində də nümayiş olunacaq.
Bütün bunlara əsaslanaraq tam məsuliyyətlə deyə bilərəm ki, Azərbaycan Dövlət
Musiqili Teatrı IV İslam Həmrəyliyi Oyunlarına hazırdır. Qonaqlarımızın yolunu
səbirsizliklə gözləyirik. İnanırıq ki, onlar Azərbaycandan xoş təəssüratlarla
ayrılacaqlar”.
Kukla Teatrı da qonaqlarını qarşılamağa hazırdır
Abdulla
Şaiq adına Dövlət Kukla Teatrı İslam oyunları həyəcanına hazırlaşır. Teatrın mətbuat xidmətinin rəhbəri Həmidə Rüstəmova bizimlə söhbətində
bildirdi ki, artıq may ayının repertuar planı məhz İslam Oyunlarının keçirilməsinə
uyğun şəkildə hazırlanıb: "Repertuarımızdakı ən yaxşı tamaşaları may ayında ölkəmizə gələn əcnəbilərə və yerli
tamaşaçılarımıza təqdim edəcəyik. Bilirsiniz ki, Kukla Teatrı şəhərimizin mərkəzi
hissəsində yerləşir Bu baxımdan teatrımız ölkəmizə gələn xarici turistlərin də
diqqətini cəlb edəcək. Biz də bu məqsədlə teatrımız haqqında rus və ingilis dilində ətraflı məlumatların olduğu
dəftərcələri turistlərə təqdim edəcəyik.
Biz də idman bayramına bu cür reaksiya veririk. Bir sözlə, Abdulla Şaiq
adına Dövlət Kukla Teatrı böyük məmnuniyyətlə qonaqlarımızı qarşılamağa
hazırdır”.
Nizami kinoteatrında Bakı haqqında sənədli filmlər
nümayiş olunacaq
Nizami Kino Mərkəzinin mətbuatxidmətinin rəhbəriArzuƏhədovabizimlə söhbətində bildirdi ki, IV İslam Həmrəyliyi
Oyunlarına ciddi şəkildə hazırlaşırlar. Belə ki, mayın 12-dən 22-ə kimi Nizami
Kinoteatrında Bakı haqqında sənədli filmlər nümayiş olunacaq. Eyni zamanda, IV
İslam Həmrəyliyi Oyunları ərəfəsində yerli filmlərimiz də nümayiş olunacaq.
Xarici turistlərin aydın şəkildə anlaması üçün həmin filmlər ingilis dilində
titrlərlə nümayiş olunacaq. Məlumat üçün bildirək ki, IV İslam Həmrəylik
oyunları ərəfəsində Beynəlxalq Muğam Mərkəzində "Muğam axşamı”, Natiq Şirinovun
rəhbərlik etdiyi "Natiq Ritm Qrupu”nun, caz ifaçılarının xüsusi konsertləri də təşkil
ediləcək.
Xəyalə Rəis