Medal qazanıb, MDU-ya imtahansız qəbul haqqı qazanan məktəblilər - Qaliblər
Qazaxıstanın paytaxtı Astana şəhərində məktəblilərin
51-ci Beynəlxalq Mendeleyev Kimya
Olimpiadası keçirilib. Yuxarı sinif şagirdləri arasında keçirilən və 3 turdan
ibarət olan elm yarışmasında 20 ölkədən 120 məktəbli iştirak edib. Ölkəmizi təmsil
edən komanda isə böyük uğura imza atıb. Belə ki, Bakı şəhəri 160 nömrəli
Klassik Gimnaziyanın 10-cu sinif şagirdi Nəriman Mirişov gümüş, "İstək” liseyinin
10-cu sinif şagirdi Ramil Babazadə isə bürünc medala layiq görülərək,
bayrağımızı ucaldıblar. Biz də medal qazanan məktəblilərimizin təəssüratlarını
öyrənmək üçün onlarla söhbətləşdik.
"Əgər
ağıllısansa, mütləq nəticə əldə edəcəksən”
Ramil deyir ki, indiyə qədər 5 Kimya Olimpiadasında
iştirak edib və yalnız birindən medalsız qayıdıb. Müsahibimizin sözlərinə görə,
kimya və fizikada əzbərçilik tələb edilmədiyindən, bu fənləri sevir: "Kimya
maraqlı fəndir. Məsələlərin həlli yollarında hər şagirdin öz üsulu olur. Burada
bacarıqlı və məntiqi güclü olan şagird önə keçir. Əgər ağıllısansa, mütləq nəticə
əldə edəcəksən. Məhz bu məntiq, dəqiqlik və nəticə kimyanı digər fənlərdən fərqləndirir.
Mən bütün olimpiadalarda iştirak edəndə özümə güvənirəm və iştirak etdiyim bir
olimpiada istisna olmaqla, hamısından medalla qayıtmışam”.
"Xərçəngin dərmanını
kəşf etmək istəyirəm”
Ramil Azərbaycanı xaricdə təmsil edən kimyaçı
olmağı qarşısına məqsəd qoyub. Deyir ki, xüsusilə dərman kimyası ilə məşğul
olub, xərçəng xəstəliyini məhv edən, inkişafının qarşısını alan həbi kəşf etmək
istəyir: "Çağımızın ən qorxulu bəlalarından olan xərçəng xəstəliyinin dərmanı hələ
də tapılmayıb. Gün keçdikcə bu bəlaya düçar olanların sayı artır. Düşünürəm ki,
bu dərmanı kəşf etmək mümkündür. Mən də təhsilimi kimya üzrə davam etdirib,
bunun üçün çalışacağam”.
"Kimya həyatın
bütün sferalarında var”
Digər müsahibimiz Nəriman da kimya fənnini çox
sevir. Təsadüfi deyil ki, olimpiadadan gümüş medalla qayıdıb. Deyir ki, həyatımızda,
məişətdə istifadə etdiyimiz hər bir şeydə
kimya var və hər bir insanın az və ya çox dərəcədə kimyəvi biliklərə və
bacarıqlara ehtiyacı duyulur: "Kimyanın insanların dünyagörüşünün inkişafında,
onların bir şəxsiyyət kimi formalaşmasında rolu böyükdür. Bütün canlı və cansız
varlıqların tərkibində kimya var. Bütün canlı varlıqlar kimi, insanlar da kimyəvi
maddələrlə qidalanır, orqanizmlərində çox mürəkkəb kimyəvi çevrilmələr, analiz,
sintez və s. kimi proseslər nəticəsində yeni maddələr əmələ gəlir. Həyatımızda,
məişətdə istifadə etdiyimiz hər bir şeydə
kimya var. Hər bir insan ona lazım olan həyat amilləri haqqında ilkin bilik və
bacarıqları məktəbdə, daha sonralar müstəqil həyatda, istehsalatda qazanır.
Kimyəvi biliklər nəticəsində şagird, insanı təbiətin kamil bir hissəsi kimi qəbul
edir, bu kamilliyin nəticəsində insanın təbiət haqqındakı biliklərə malik ola
biləcəyini dərk edir. Beləliklə, kimya vasitəsilə dünyanın əsas komponentlərini
öyrənmək, əsas elmi metodlardan istifadə edərək, tədqiqat aparmaq və əldə edilən
nəticələrə əsasən mədəni dəyərlər sistemindən istifadə etmək mümkün olur. Kimya
bizə bu imkanları yaratdığı üçün bu fənni sevirəm”.
Nəriman həkim olmağı qarşısına məqsəd qoyub. Ramil
dərman kəşf edəcək, Nəriman isə həmin dərmanlar vasitəsilə xəstələrə şəfa verəcək:
"Kimya, fizikanı sevirəm. Olimpiadalarda da iştirak edib yer tuturam. Amma mən
Ramil kimi kimyaçı olmağı planlaşdırmıram. Əsas məqsədim gələcəkdə həkim
olmaqdır. Məhz insanlara şəfa vermək üçün gələcəyin tanınmış həkimlərindən
olmaq istəyirəm”.
Olimpiada
sinfinin şagirdləri
Ramilgilin sinfi olimpiada sinfidir. Məhz bu sahədə
seçilən uşaqlar bir-birləri ilə bilmədiklərini bölüşüb, hər gün müəyyən müzakirələr
aparırlar. Həmsöhbətimizin sözlərinə görə, olimpiadalarda iştirak edən təcrübəli
şagirdlər özlərindən kiçiklərə gördüklərini danışır, verilən suallarla bağlı hər
kəs öz mülahizəsini ortaya qoyur: "Biz dərsdə maddələri, maddələrin tərkibini,
quruluşunu, atom-molekul təlimini və s. izah edir, saf maddə və qarışıqlar, bəsit
və mürəkkəb maddələri xarakterizə edərək, bir-birindən fərqləndirir, maddələrin
kimyəvi formuluna, valentliyinə aid məsələlər həll edirik. Xüsusən, kimya
laboratoriyasında təhlükəsizlik texnikası qaydalarını öyrənməklə, zəhərli, tez
alışan, bir sözlə, təhlükəli maddələrlə davranma qaydalarına aid bacarıq və vərdişlərə
yiyələnərək, həyatda rast gəldiyimiz saf maddələri və qarışıqları fərqləndirərək,
həyat üçün lazım olanlarının təsirini, ayırma üsullarını mənimsəyirik. Üstəlik,
bu biliklərimizi də hər gün uşaqlarla müzakirə edirik. Bəzən olur ki, bir məsələdə
hər kəs eyni cavabı alır, amma hamının həll yolu fərqli olur. Fərqli həll
yollarını bir-birimizə izah edirik”.
"Elmdə
inqilab etmək istəyirik”
Gənc müsahiblərimiz düşünür ki, bir ölkənin rifahı,
gələcəyi normal təhsildən asılıdır. Məhz bu məqsədlə də təhsil alıb, özlərini
inkişaf etdirib bəzilərinə çarəsi mümkünsüz görünən kəşfləri belə həyata keçirmək,
ölkəni dünyada tanıtmaq üçün əllərindən gələni etmək istəyirlər: "Bir xalq
yalnız savadlı cəmiyyəti, inkişaf etmiş elmi ilə qürur duya bilər. Yalnız
savadlı cəmiyyətlə irəli getmək, uğurlara nail olmaq, ölkəni tanıtmaq
mümkündür. Elmin vacibliyini hələ qədim zamanlardan dərk ediblər və elmdə
nailiyyətlər əldə etmək üçün çalışıblar. Təbiəti öyrənib, bununla cəmiyyəti məlumatlandırmağa
səy göstəriblər. Biz də təhsilimizlə gələcəkdə elmdə inqilab etmək istəyirik”.
Qeyd edək ki, olimpiada qaliblərimiz M.V.Lomonosov
adına Moskva Dövlət Universitetinə imtahan vermədən ödənişsiz təhsil almaq
haqqına sahib olublar. Amma Ramil deyir ki, əgər Avropa ölkələrindəki
universitetə qəbul ola bilməsə, Moskva Dövlət Universitetində təhsil alacaq:
"Uşaqlıqdan arzum Avropa ölkələrində tanınmış universitetlərdən birində təhsil
almaqdır. Kimya elminin bütün dərinliklərini öyrənib ölkəm üçün yararlı olmaq,
mühüm kəşf etmək istəyirəm”.
Müsahiblərimizin gələcək planları və hazırkı ən
böyük arzuları qarşıdan gələn dünya kimya olimpiadasından qızıl medalla
qayıtmaqdır.
Qeyd edək ki, məhz bu olimpiadada Azərbaycan məktəbliləri
dörd qızıl, yeddi gümüş və 30 bürünc medal olmaqla, 41 medal qazanıblar.
Aygün ƏZİZ