Bakı 18°C
Marketdə nəyisə salıb sındırdınsa, pulunu verməlisən
Müasir dövrdə böyük marketlərdə alış-veriş etmək həm
də bir növ əyləncəyə çevrilib. Saatlarla vitrinlərin arasında dolaşmaqdan,
nələrisə seçib götür-qoy etməkdən yəqin ki, bir çoxlarımız zövq alırıq. Bəzən də
kiçik bir ehtiyatsızlıq ucbatından marketlərdə sıra ilə düzülən müxtəlif
məhsullara toxunub onlara zərər veririk. Belə hallar marketlərdə gündəlik hal alıb.Hətta əvvəllər bu barədə qəlibləşmiş bir ifadə də
var idi ki, birdən kiminsə qatıq bankasını sındırsan, ödəməyə cibində bir az
artıq pulun olsun. Bəs görəsən ehtiyatsızlıq nəticəsində hər hansı məhsula
istəmədən də olsa zərər vururuqsa, bu zaman dəyən zərəri kim ödəməlidir: mağaza
rəhbərliyi, yoxsa alıcı?
"Azad
İstehlakçılar Birliyi”nin sədri Eyyub Hüseynovbildirdi ki, alıcının
diqqətsizliyi və ehtiyatsızlığı ucbatından mağazada hər hansı məhsul yerə düşüb
sınarsa, yaxud xarab olarsa, alıcı dəyən ziyanı ödəməlidir: "İstehlakçı mağazanın satış zalında gəzişərkən
nəyəsə toxunub sındırdığı zaman məhsulun dəyərini o özü ödəməlidir.
Azərbaycandakı marketlərdə məhsulların düzülməsi üçün hər hansı standart tətbiq
olunmayıb. Hətta belə bir standartların olmadığı şəraitdə belə, istehlakçı
sındırdığı məhsulun pulunu ödəməlidir. Bundan başqa, istehlakçı məhsulu alarkən
satıcı onu plastik torbalara yığır. Bu zaman torba cırılar və məhsul yerə düşüb zay olarsa, bu zaman artıq
alıcı günahkar deyil. Bu zaman məsuliyyəti mağaza daşıyır. Çünki bəzən plastik
torbalar standartlara cavab vermir. Amma qalan bütün hallarda qeyd etdiyim
kimi, alıcının günahı ucbatından mağazaya dəyən zərərin məbləğini alıcı
ödəməlidir”.
Hüquqşünas
Ceyhun Cəfərli də
bildirdi ki, təqsirin kimdə olmasına dair mübahisəli məqamlar məhkəmədə
aydınlaşdırılmalıdır: "Bəzən ehtiyatsızlıqdan belə hallara rast gəlinir. Bu
zaman alıcı məhsulun dəyərini mağazaya ödəməlidir. Amma alıcının təqsiri
olmadan məhsul sınırsa, bu halda alıcı heç bir məsuliyyət daşımamalıdır. Çünki
bəzən məhsullar düzgün formada yığılmır, yaxud normadan çox yığılır. Əgər mağazadakı rəflər düzgün quraşdırılmayıbsa və
onların aşması nəticəsində rəfin üzərindəki mallar zədələnirsə, sınırsa, bu
halda məsuliyyət mağazanın üzərinə düşür. Mübahisəli məqamlar zamanı isə məsələ
məhkəmədə aydınlaşdırılır. Araşdırma zamanı müəyyən edilir ki, təqsirkar
kimdir. Bu zaman sübut və dəlillər toplanır. Müasir dövrdə bütün marketlərdə
nəzarət-müşahidə kameraları quraşdırılıb. Görüntü vasitəsilə bütün detallar
müəyyən edilir və məhsulun hansı səbəbdən aşıb sınması təyin edilir. Bu zaman
görüntülər məhkəmə mübahisəsinin predmeti olur. Sübut olunsa ki məsuliyyəti
mağaza və satıcı daşıyır, bu zaman istehlakçının məsuliyyəti istisna edilir.
Məhsulun istehlakçının məsuliyyətsizliyi və ehtiyatsızlığı ucbatından sındığı
aşkarlanarsa, o halda məsuliyyəti alıcı daşıyır. Bu, cinayət sayılmır, sadəcə
olaraq mülki hüquqi məsuliyyətdir”.
"Modern Marketing Group” şirkətinin təsisçisi, marketoloqYusif
Vəliyevdeyir ki, sırf
satışla bağlı Azərbaycanda hər hansı bir təhsil mərkəzi yoxdur. Amma müxtəlif
kurslarda satıcılara davranış qaydaları haqqında təlimlər keçilir. Eyni
zamanda, böyük supermarket şəbəkələri özləri öz əməkdaşları üçün təlimlər
təşkil edirlər. Bundan başqa, satıcılar
xarici qlobal supermarket şəbəkələrində treninqlər keçirlər: "Hazırda
bizim bir neçə supermarket öz əməkdaşlarını xaricə təcrübə üçün göndərib. Xarici
təlimçilərin Azərbaycana gətirilməsi və onların burada təlim keçməsi
istiqamətində də müəyyən işlər görülür. Bu, super və hipermarket şəbəkələrinin
rəhbərlikləri tərəfindən həyata keçirilir”.
"Bazarstore” supermarket şəbəkəsi ilə əlaqə saxladıq.
Bildirildi ki. belə hal zamanı dəyən ziyanı market özü ödəyir: "Alıcının
diqqətsizliyi ucbatından olsa belə, biz bu məqamlarda alıcıdan onun pulunu
tələb etmirik. Adətən belə hallarda
dəyən ziyanı market rəhbərliyi ödəyir. Alıcıya "pulu mütləq ödəməlisən” deyə
bilmərik”.
Məsələ ilə bağlı "Araz” supermarket şəbəkəsinə də müraciət etdik. Əlaqədar şəxs bu cür
hallarda məhsulun məbləğinin alıcı tərəfindən ödənilməli olduğunu qeyd etdi.
Şəbnəm
Mehdizadə
