“Ölkə başçısının nitqinin əvvəli də, axırı da “xalq”dır”
Yanvarın 30-da Heydər Əliyev Mərkəzində "Azərbaycan Respublikası
regionlarının 2014-2018-ci illərdə sosial-iqtisadi inkişafı Dövlət Proqramı”nın
icrasının üçüncü ilinin yekunlarına həsr olunan konfrans keçirildi. Konfransda
çıxış edən ölkə başçısı İlham Əliyev bildirdi ki, bütün obyektiv çətinliklərə
baxmayaraq, 2016-cı ildə Azərbaycan iqtisadiyyatı inkişaf edib və bütün əsas
vəzifələr icra olunub:"İqtisadiyyatın əsas göstəriciləri müsbətdir. Kənd təsərrüfatı 2,6
faiz, ölkəmizin qeyri-neft sənayesi isə 5 faiz artıb. Dünyada neftin qiymətinin
üç-dörd dəfə aşağı düşməsinə baxmayaraq, əvvəlki illərdə görülmüş işlər və
keçən il apardığımız dərin islahatlar nəticəsində biz bu inkişafı təmin edə
bilmişik. Əlbəttə, dünyada bu gün də davam edən iqtisadi və maliyyə böhranı
bizim işimizə də öz mənfi təsirini göstərdi. Ancaq hesab edirəm ki, Azərbaycan
digər ölkələrlə müqayisədə bu ağır vəziyyətdən minimum itkilərlə çıxa bildi.
Keçən il yüz mindən çox daimi iş yeri yaradıldı. Bu proses 2004-cü ildən bu
günə qədər davam edir. Biz Neft Fondunun valyuta ehtiyatlarını qoruya bilmişik.
Hesab edirəm ki, bu da çox əlamətdar hadisədir. Çünki neftlə zəngin olan
ölkələrin böyük əksəriyyəti öz valyuta ehtiyatlarının bir hissəsini xərcləyib.
Biz isə çalışdıq və buna nail olduq ki, valyuta ehtiyatlarımızı qoruyaq. Çünki
valyuta ehtiyatlarımız həm bu gün, həm də sabah üçün lazım olacaq və bütövlükdə
bu, bizim iqtisadi imkanlarımızı, iqtisadi müstəqilliyimizi möhkəmləndirən
amildir”.
Prezident onu da qeyd etdi ki, Davos Dünya İqtisadi Forumu Azərbaycan
ilə bağlı verdiyi hesabatda yenə də müsbət rəy bildirib. Ölkələrin
rəqabətqabiliyyətliliyinə görə Azərbaycan üç pillə irəliləyərək, 37-ci yerdə
qərarlaşıb: "Biz, əlbəttə ki, öz işimizi reytinq almaq üçün qurmuruq. Ancaq,
əlbəttə, belə bir fikirlər ortalığa qoyulanda bu, həm bizi daha da sevindirir,
eyni zamanda, bu, dünyanın bütün maliyyə qurumlarına bir siqnaldır. Ona görə bu
gün Azərbaycan üçün istənilən layihəyə kredit almaq artıq çoxdan problem deyil.
Bir sözlə, hesab edirəm ki, 2016-cı ildə ümumi iqtisadi inkişaf müsbət
qiymətləndirilməlidir. Xüsusilə, bölgələrdə aparılan işlər də öz dinamikasını
saxlayıb. Keçən il bölgələrdə çox böyük işlər görülüb”.
Konfrans haqda fikirlərini "Kaspi” ilə bölüşən millət vəkili Elman Nəsirov dedi ki, prezident "Azərbaycan
Respublikası regionlarının 2014-2018-ci illərdə sosial-iqtisadi inkişafı Dövlət
Proqramı”nın icrasının üçüncü ilinin yekunlarına həsr olunan tədbirdə çox mühüm
tezislərlə çıxış etdi: "Prezident xüsusi qeyd etdi ki, 2016-cı ildə dünyada maliyyə
böhranı davam edib. Eyni zamanda, Azərbaycan neftinin qiyməti xeyli aşağı düşüb.
Bütün bunlar Azərbaycanın 2016-cı ildə iqtisadi inkişafını qoruyub saxlamasına mane
olmayıb. Belə ki, qeyri-neft sektorunun inkişafı bizim üçün əsas hədəfdir. Kənd
təsərrüfatı sahəsi qeyri-neft sektorunda xüsusi yer tutur. Bu sahədə artım qeydə
alınıb. Azərbaycanda sahibkarlığın inkişafına dövlət dəstəyi davam etdirilib. Sahibkarlara
2004-cü ildən bu yana 2 milyard manatdan artıq güzəştli kreditlər ayrılıb. Hər il
sahibkarlığın inkişafı ilə bağlı təxminən 200-250 milyon manatlıq kreditlər ayrılırdı.
Bu, çox mühüm məsələdir. Prezident qeyd etdi ki, Azərbaycan özünün sosial siyasi
xəttinə sadiqdir. Dövlət başçısı vurğuladı ki, bu illər ərzində ölkədə üç mindən
artıq məktəb tikilib və ya təmir edilib. 600-dən artıq tibb ocağı tikilib və ya
təmir edilib, 40-dan çox olimpiya kompleksi tikilib. Bu proses bu gün də davam etdirilir.
Azərbaycanın regionlarında yol çəkilişi məsələsi də daim diqqətdə saxlanılır. Bu
məsələlərdə də uğur əldə etmişik. Prezident qeyd etdi ki, qazandığımız nailiyyətlər,
həyata keçirdiyimiz böyük layihələr həm də regionda olan kənar ölkələrin də mənafeyinə
xidmət edib, onların inkişafına gətirib çıxarıb. Prezident 2006-cı ildə istifadəyə
verilmiş Bakı-Tbilisi-Ceyhan, 2007-ci ildə istifadəyə verilmiş Bakı-Tbilisi-Ərzurum
boru kəmərləri ilə bağlı məsələləri diqqətdə saxladı. Daha sonra qeyd etdi ki,
21-ci əsrin layihəsi olan "Cənub” qaz dəhlizi ilə bağlı işləri həyata keçiririk.
2016-cı ilin fevralında "Cənub” qaz dəhlizi Məşvərət Şurasının ikinci toplantısı
Bakıda keçirildi”.
Millət vəkili qeyd etdi ki, bu sahədə bizim ciddi nailiyyətlərimiz var.
Azərbaycanın təşəbbüskar olduğu bu layihə uğurla həyata keçirilir: "Prezident xüsusilə
vurğuladı ki, Azərbaycanın qazandığı uğurları bəzi beynəlxalq siyasi dairələrin
gözü götürmür, heç bir halda belə faktları həzm edə bilmirlər. Ona görə də Azərbaycana
qarşı təzyiq yolunu seçirlər. Qarayaxma kampaniyasını həyata keçirirlər. Amma bunların
heç biri nəticə verməyəcək, bizim yolumuz haqq yoldur. Biz düzgün yoldayıq. Ən əsası
odur ki, bütün dəyişiklikləri, islahatları, prezidentin təşəbbüskar olduğu bütün
layihələri xalq birmənalı şəkildə dəstəkləyir. Bizi ruhlandıran da məhz bu məqamdır.
Ölkə prezidenti dəfələrlə qeyd edib ki, Azərbaycanın müstəqil siyasət yeritməsini
bəzilərinin gözü götürmür. Azərbaycanda beynəlxalq dairələrin diktəsi ilə deyil,
məhz Azərbaycan xalqının mənafelərinə uyğun olaraq siyasət həyata keçirilir. Biz
dünyada etibarlı tərəfdaş kimi tanınırıq. Bu, müəyyən qüvvələri qıcıqlandırır. Ona
görə də ənənəvi qarayaxma kampaniyalarından əl çəkmirlər. Amma bunların heç bir
nəticəsi olmayacaq. Xalqımız prezidentin yanındadır. Xalqımız ölkə siyasətini
dəstəkləyir. Bu baxımdan, keçən il sentyabrın 26-da keçirilən referendum
deyilənlərin təsdiqi kimi qiymətləndirilə bilər”.
Millət vəkili Elşən Musayev prezidentin
konfransda söylədiyi bütün fikirləri biri-birindən dəyərli hesab edir: "Diqqət
etdinizsə, ölkə başçısı ənənəvi olaraq, nitqinin əvvəlini də, axırını da yenə
xalq və millət kəlməsi ilə əhatələyir. İqtisadiyyatın müxtəlif sahələrindəki
inkişafla, perspektivlə, uğurlarla bağlı danışarkən, hətta məmurlara növbəti
ismarıcını göndərərkən belə, hər cümləsində xalq və millət sözünü işlədir, hər
şeyin xalq naminə olduğunu söyləməyi unutmur. Bu, İlham Əliyevin öz xalqına nə
qədər bağlı olmasının əyani göstəricisidir, sübutudur. Prezident öz məzmunlu
nitqində demək olar ki, ölkədə baş verən bütün hadisələrə, həssas məqamlara öz
münasibətini bildirdi. Ələlxüsus da, iqtisadiyyatla bağlı. Milli biznes
faktorunun xüsusi qabardılması da önəmli haldır. Yəni artıq xaricdən idxal
asılılığımız azalacaq, yekunda isə sıfırlanacaq. Həm heyvandarlıq, həm də digər
sahələrlə bağlı. Və ya olsun xalçaçılıq, kosmik sənaye və s. Bəlkə də bu
sahələr lokal sahələrdir, amma bununla belə, ölkə başçısı ən xırda məqamlara
qədər hər şeyi nəzarətində saxladığını diqqətə çatdırır. Cənab prezidentin
"ASAN Xidmət”lə bağlı söylədikləri də hər birimizin ürəyindən xəbər verdi.
Gerçəkdən, bu xidmət Azərbaycanın brendidir və İlham Əliyevin öz layihəsi, öz
təşəbbüsü kimi artıq tarixə düşüb”.
E.Musayevin fikrincə, prezident çox haqlı olaraq qeyd etdi ki, Azərbaycanın öz ayağı
üzərində dayanması çoxlarını narahat edir və bizi sevməyən qüvvələr
yetərincədir: "Amma kimsə bizim dövlətimizin müstəqilliyinə xələl gətirə, kimsə
bizə diktə edə, kimsə bizimlə "ağsaqqal” dilində danışa bilməz. Bizim hətta
neftimiz, neft gəlirlərimiz də məhz xalq üçün və xalqın dəstəyi ilə, gücü ilə, birliyimiz
ilə əlimizdəki müstəqilliyi əbədiyyən qorumaq üçündür! – bunu da dövlət başçısı
fikrinin davamı olaraq xüsusi nida ilə vurğuladı. Hesab edirəm ki, bu
konfransdan hər kəs özü üçün nəticələr çıxarmalı və prezidentin apardığı
siyasətə dəstəyini verməlidir”.
Şəfa Tapdıq