Lavrovun boğçasında nə olub?
Dağlıq Qarabağ probleminin həlli ilə bağlı son aylarda yenidən
ATƏT-in Minsk qrupunun həmsədrləri və onların təmsil olunduğu ölkələrin
tərəfindən hərəkətlilik müşahidə edilir. Burada əsas hərəkətverici məqamlardan
biri Türkiyə prezidenti Rəcəb Tayyib Ərdoğanın Rusiyaya səfəri oldu. Səfərdən
sonra Türkiyə və Rusiya münaqişənin tez bir zamanda həllində maraqlı
olduqlarını dilə gətiriblər. Həmsədr ölkələrdən biri kimi Rusiya bir neçə il
əvvəl münaqişə tərəflərinin problemin həllinə yaxınlaşması üçün ayrıca
təşəbbüslə çıxış etmişdi. Amma Ermənistan Dağlıq Qarabağda status-kvonu
saxlamaq üçün danışıqları pozdu. Onu da qeyd edək ki, Ermənistan Minsk qrupunun
həmsədrlərinin təklif etdiyi mərhələli həll planına razılaşsa da, sonrakı
illərdə müxtəlif bəhanələrlə münaqişənin uzanmasına çalışır. Buna baxmayaraq,
bu günlərdə Rusiya yenidən Qarabağ məsələsinin həlli istiqamətində hərəkətə keçdiyini
nümayiş etdirdi. Bu proseslərin nəticəsi kimi Rusiyanın xarici işlər naziri
Sergey Lavrov Azərbaycana səfərə gəlib. Səfər çərçivəsində Azərbaycan-Rusiya
əlaqələri, Dağlıq Qarabağ probleminin həlli ilə bağlı müzakirələr keçirilib.
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, Rusiya
qlobal maraqları olan dövlətlərdən biridir: "Bu nöqteyi-nəzərdən Rusiya xarici
işlər nazirinin Azərbaycana, ardınca isə Ermənistana səfəri heç şübhəsiz,
siyasi əhəmiyyətli hadisədir. Səfər çərçivəsində ən çox müzakirə olunan
məsələnin Ermənistan-Azərbaycan, Dağlıq Qarabağ münaqişəsi olacağı öncədən də
proqnozlaşdırılırdı.Onu qeyd edim ki, son günlər münaqişənin tənzimlənməsi prosesində
görüşlərin sayının artması baxımından bir intensivlik, dinamika müşahidə
olunmaqdadır. Belə ki, noyabrın 13-də Soçidə Türkiyə və Rusiya prezidentlərinin
görüşü, noyabrın 14-də Ermənistan xarici işlər nazirinin Moskvaya səfəri və
həmsədrlərlə görüşü, bunun ardınca Azərbaycan xarici işlər nazirinin həmsədrlərlə
Rusiya paytaxtında apardığı danışıqlar, Sarkisyanın Putinlə görüşü və indi isə
Sergey Lavrovun Azərbaycana və Ermənistana səfəri bu intensivliyin əyani təzahürüdür.
Bütün bunlar onu göstərir ki, tənzimlənmə prosesində kəmiyyət baxımından heç bir
problem yoxdur, amma bizim gözləntimiz keyfiyyətlə bağlıdır. Yəni, münaqişənin
həlli ilə bağlı aparılan intensiv danışıqların məntiqi sonluğu olaraq bir
irəliləyiş əldə edilsin”.
E.Nəsirov qeyd etdi ki, dekabrın 7-8-də Vyanada ATƏT-in xarici işlər
nazirləri şurasının toplantısında da Azərbaycan və Ermənistan XİN başçılarının görüşünün
keçirilməsi planlaşdırılır: "Yəni qeyd etdiklərimizdən bu qənaətə gəlmək olar
ki, həmsədrlərin özlərinin də vurğuladığı kimi, onlar regiona turist səfəri
etmək istəmirlər. Onlar bu münaqişənin həllinə töhfə vermək istəyirlər. Əslində
elə biz də onu gözləyirik. Hesab edirəm ki, həmsədr dövlətlərdən birinin,
Rusiyanın xarici işlər nazirinin Bakıya və Yerevana səfəri tənzimlənmə
prosesindəki mövcud dinamikanı bir qədər də gücləndirə bilər. Biz heç olmasa,
münaqişənin həlli ilə bağlı müəyyən taktiki tərpənmələrin şahidi ola bilərik”.
"Atlas” Araşdırmalar
Mərkəzinin rəhbəri, politoloq Elxan Şahinoğlu da düşünür ki, S.Lavrovun
səfərində əsas müzakirə mövzusu olan məsələ Dağlıq Qarabağ münaqişəsinin həlli
prosesi olub. S.Lavrov Azərbaycan prezidenti İlham Əliyevlə görüşdə Rusiyanın
ATƏT-in Minsk qrupunun həmsədrlər üçlüyünün üzvü kimi düyünün açılmasına hərtərəfli
kömək göstərməkdə və Dağlıq Qarabağ münaqişəsinin həlli istiqamətində
irəliləyişi təmin etməkdə maraqlı olduğunu dilə gətirib: "Eyni zamanda o, bu
istiqamətdə fəal səylərin göstərilməsinin lazımlığını vurğulayıb. Bu
açıqlamalar görüşün mətbuata açıq hissəsində səslənib. Görüşün qapalı
hissəsində nələrin danışıldığını ancaq ehtimal edə bilərik. Ancaq Lavrovun
mətbuat üçün açıq hissədə dediyi bir neçə cümlədən gəldiyim qənaət budur ki, onun
münaqişənin həlli ilə bağlı yeni ideyası yoxdur. İkincisi, Rusiya münaqişənin
həlli məqsədilə Ermənistana təsir etməyəcək, deməli, Azərbaycanın tələb etdiyi
"mərhələli həll” planına soyuq yanaşır. Üçüncüsü, Lavrov "fəal səylər dedikdə”
əslində topu Azərbaycanın meydanına atır ki, "əgər münaqişənin həllini istəyirsinizsə,
biz deyəni qəbul etməlisiniz, ermənilərin referendum keçirmək hüququnu
tanımalısınız”.
E.Şahinoğlunun fikrincə, Rusiya XİN başçısının "BMT Təhlükəsizlik
Şurasının Qarabağla bağlı qətnamələrindəki bəzi məsələlər səylər tələb edir”
fikri Moskvanın Ermənistanı bu qətnamələri yerinə yetirməyə məcbur etməyəcəyi
anlamına gəlir: "Onu da qeyd edim ki, Lavrov bölgəyə ötən səfərində də demişdi
ki, Dağlıq Qarabağ münaqişəsinin həlli Azərbaycanın daxili işi deyil”.
Bəxtiyar MƏMMƏDLİ