“Lapşinin ekstradisiyası Ermənistan xarici siyasətinin çökməsi idi”
Azərbaycan dövləti əleyhinə yönəlmiş açıq çağırışlar edən və dövlət
sərhədini qanunsuz olaraq keçən bloger Lapşinin ekstradisiyası ədalətli
qərardan əlavə, ermənilərə vurulan ciddi zərbə kimi qiymətləndirilir. Ekspertlərin
fikrincə, bu, işğalçıların aprel döyüşlərindən sonra aldığı ikinci ciddi
məğlubiyyət hesab olunmalıdır.
Bu haqda fikirlərini "Kaspi” ilə bölüşən millət vəkili Hikmət Babaoğlu dedi ki, bu fakt dünya ölkələri
arasında münasibətlərdə yeni bir presedent olıdu və bunu Azərbaycan yarada bildi:
"Bu gün dünyada bir sıra ölkələrin əraziləri işğal altındadır və həmin
ərazilərə müxtəlif səfərlər olur. Amma indiyə qədər heç birinin ərazi bütövlüyünü
tapdayan blogerlə bağlı bu cür ekstradisiya həyata keçirilməmişdi. Bu, bir ilkdir
və əlamətdardır. Bu gün Amerika mətbuatında bu haqda danışılanda deyilir ki, Azərbaycan
bu mövzuda yeni bir presedent yaratdı. Bundan sonra başqa ölkələr də onların icazəsi
olmadan sərhədlərini pozan şəxsləri, jurnalistləri tələb edə bilərlər. Məsələnin
ikinci tərəfi ondan ibarətdir ki, bu, həm də Azərbaycanın Ermənistana vurduğu
növbəti zərbədir. Erməni mətbuatı qeyd edir ki, Lapşinin ekstradisiyası Ermənistan
xarici siyasətinin çökməsi idi. Bunu Ermənistanla bir qurumda olan Belarus etdi.
Ermənistan mətbuatı sual edir ki, Lukaşenko doğulanda, Azərbaycana sevgi ilə doğulmamışdı.
Azərbaycanın siyasəti, diplomatiyası onu bu ölkə ilə yaxşı münasibətlər qurmağa
vadar etdi. Deməli, növbəti dəfə digər dövlətlər də bu cür addım ata bilərlər. Göründüyü
kimi, erməni mətbuatı bu kimi məqamları açıq qeyd edir və panika içərisindədirlər.
Azərbaycan bir daha sübut etdi ki, öz suveren hüquqlarını bütün ərazisində bərpa
etmək iqtidarındadır. Azərbaycan torpaqlarının 20 faizi işğal edilsə də, gec-tez
öz torpaqları üzərində suveren hüquqlarını bərpa edəcək”.
Millət vəkili əmindir ki, bundan sonra Dağlıq Qarabağa səfər etmək istəyən
jurnalistlər, mədəniyyət xadimləri və başqaları bu məsələ haqda iki dəfə düşünəcəklər.
Çünki ürəklərində daim xof, narahatlıq olacaq ki, yaxalanıb təhvil verilə bilərlər:
"Bu hadisə Azərbaycan prezidentinin qətiyyətini, dövlətin gücünü göstərən bir hadisə
idi”.
Qhtxəbər.az saytının baş
redaktoru Sənan Nəcəfov qeyd etdi ki, aprel döyüşləri Azərbaycanın şanlı
tarixlərindən biridir: "Bunu ölkə başçısı keçirilən tədbirlərdə, Dünya
Azərbaycanlılarının Həmrəylik günündə səsləndirib. Düşmən bir saniyə də olsun
təxribat-informasiya müharibəsində fasilə vermir. Eləcə də biz. Ümumiyyətlə, bu,
müharibənin qanunlarıdır. Burada ani fasilə, arxayınlıq böyük fəlakətin əsasını
qoyar. Baxın, son günlərdə bir qrup sözdə QHT təmsilçisinin, guya ictimai
fəalın xaricdə aksiya keçirməsi, Avropa Parlamentinə və AŞPA-ya müraciət
ünvanlamasını sakit və təmkinli qarşılaya bilmirik”.
S.Nəcəfov qeyd etdi ki, indiyə kimi belə təxribatlar çox olub: "Azərbaycan
prezidentinin son illərdə milli və həssas məsələlərlə bağlı atdığı son
addımları xatırlayın. Ramil Səfərovun ekstradisiyası (Xədicə İsmayıl öz dəstəsi
ilə bu məsələdə ermənilərin "balta” ironiyasını təkrarlamaqdan yorulmadı, sosial
şəbəkələrdə müzakirə açıldı və s.), Milli Qəhrəman Mübariz İbrahimovun nəşinin
Azərbaycana gətirilməsi (ermənilərin diversant adlandırdıqları milli
qəhrəmanımızın geri qaytarılması üçün bizim donosbazlar bir dəfə də olsun
müvafiq təşkilatlara müraciət etmədilər), sonuncu fakt - Çingiz Qurbanovun
nəşinin geri alınması və dərhal Milli Qəhrəman adının verilməsi və nəhayət,
Lapşin məsələsi. Lapşinin ekstradisiyası son illərdə izlədiyim ən uğurlu və
hədəfə tam dəymiş ən böyük diplomatik hərəkətimiz idi. Bununla bağlı beynəlxalq
münasibətlər üzrə ekspertlər danışa bilərlər. Mən başqa səmtdən fikrimi
bildirəcəyəm. Məsələyə az öncə söylədiyim informasiya müharibəsi yönündən
yanaşaq. Sirr deyil ki, separatçı rejim sözdə müstəqilliyini dünyaya çatdırmaq
üçün turizm "potensialını” ortaya qoyub. Yəni eşşək yarışı, Qədim alban
kilsələrini erməniləşdirərək "ən qədim xristian kilsələri” adı ilə tanıtmaq, ən
uzun dolma və s. festivalları buna hesablanıb. Eyni hal Dnestryanı, Abxaziya,
Cənubi Osetiya sayaq separatçı rejimlərin mövcud olduğu ərazilərdə də var. Bu
ərazilərdə qurulmuş separatçı rejimlər bir-birilə əlaqə yaradaraq, "özümüzü
necə tanıdaq” sayaq fikir mübadiləsi aparır, bir-birinin ərazisinə pasportsuz
getmə və s. haqda razılığa gəlirlər. Təbii ki, bu ölkələrin ərazilərinə
tanınmış və məlumatsız insanların dəvət olunması PR kampaniyanın tərkib
hissəsidir. Ağıllı, dünyagörüşü olan insan bu addımı atmaz. Amma Lapşin kimi
təxribatçılar, 150 dollara özünü satanlar yetəri qədərdirlər. Belə halda, ərazisi
işğal olunmuş, separatçı rejimlərin nəzarəti altında olan ölkələr nə etsinlər?
Mənim xatirimdədir, QHT-lərə Dövlət Dəstəyi Şurasının maliyyə dəstəyi ilə 2014-cü
ildə Tbilisidə İşğal olunmuş ərazilərə qanunsuz səfərlərin qarşısının alınması
ilə bağlı beynəlxalq konfrans təşkil olunmuşdu. Orada müxtəlif məruzələr
dinlənildi, fikirlər səsləndi. Yekun nəticə bu oldu ki, dövlətlərin yanaşması
fərdidir, kim necə bacarırsa, elə mübarizə aparsın. Misal üçün, Gürcüstan bu
haqda qanun qəbul edib. Azərbaycan isə XİN-in qara siyahısına salmaqla cəza
tətbiq edir. Və məncə, uğurlu variantlardan biri idi. Bir neçə dəfə qara
siyahıda olan tanınmış insanların Azərbaycandan rəsmi şəkildə üzrxahlıq
etdiyinin şahidi olmuşduq. Onların üzrxahlığı həm də dünyaya bəyan edir ki,
bizim ərazilərimizə Azərbaycanın icazəsi olmadan gedənlərin cəzası var.
Lapşində vəziyyət başqa idi. Bu beynəlxalq fırıldaqçı erməni PR-ının siması idi
və onun Azərbaycan dövlətinə qarşı qarayaxmaları, hədyanları əndazəni keçirdi.
Və təbii ki, dövlət bunu boş buraxmayacaqdı və onunla bu tonda danışan adamı
sonunda əli-qolu bağlı ölkəyə gətirib, beynəlxalq hüququn verdiyi imkan
daxilində hüquqi cəzalandıracaqdı, necə ki, etdi”.
Həmsöhbətimiz qeyd etdi ki, Lapşinin ölkəyə gətirilməsi erməni
lobbisinə, diplomatiyasına və özlərini tanıtmaq üçün tutduqları PR yola sərt sillə
idi: "Bu sillə illərlə ölçüldü və məhz bir diplomatik jestlə uğurla başa
çatdırıldı. Aprel döyüşləri ilə bu hadisənin bir-birinə bağlılığı nədədir? Hər
ikisində gözləmə və bir anlıq çevik hərəkət çoxdan gözlənilən uğurlu nəticəni
gətirdi.
İkincisi isə, bir az kobud səslənsə də, sözün əsl mənasında, bizimlə
bu tonda danışanın sonda "anası ağlayır” mesajını vermək idi. Lapşinin anası
xahiş-minnətə gəlib. Həmin ərəfədə İrəvanda "Əsgər anaları” təşkilatı Sarkisyan
rejiminə qarşı növbəti aksiya keçiriblər. Erməni analar ağlayırlar ki, övladlarımızı
nahaq ölümə verməyin.
Son günlərdə cəmiyyətdə və mediada olan ruh yüksəkliyini biz davamlı
yaşayırıq. Faktları sadaladım. Ümid edirəm ki, belə sevincli xəbərlər almaq,
dövlətimizlə hər zamankı kimi fəxr etmək və Ali Baş Komandanın atdığı hər
addımdan qələbə və qürur hissi keçirmək uzun müddət nəsibimiz olacaq”.
Şəfa Tapdıq