Kremlin gürcü siyasətçiləri
Gürcüstanın siyasi həyatında ötən həftənin ən
önəmli hadisələrindən biri parlament partiyası - Vətənpərvərlər Alyansının
nümayəndə heyətinin Moskvaya səfəri olub. Parlament üzvləri Gerorgi Lomiya, Ada
Marşaniya və Nato Çxeidze iki günlük səfərləri zamanı Rusiya Dövlət Dumasında
olub, Rusiya-Gürcüstan münasibətlərinin perspektivlərini müzakirə ediblər. Bu
hadisə gürcü cəmiyyətində böyük rezonans doğurub. Və bir daha gürcü siyasi
həyatında necə bir təhlükəli tendensiyanın getdiyini üzə çıxarmış olub.
Gürcüstanda heç kimə sirr deyil ki, parlament
partiyası olan və adı ilə məramı uyğun olmayan Vətənpərvərlər Alyansı Kreml
agenturasının Gürcüstanda özəyidir. Belə bir özək postsovet respublikalarının
bir çoxunda fəaliyyət göstərir. 2016-cı ildə keçirilən parlament seçkilərində
Vətənpərvərlər Alyansı bu adı artıq neçə ildir ki, Kremldən müəyyən maliyyə
alan Nino Burcanadzedən təhvil almış oldu. Adıçəkilən partiyanın proqramı
populist çağırışlardan ibarət olub və öz sıralarında gürcü cəmiyyətinin ən
savadsız və geri qalmış təbəqələrini birləşdirməkdir. Son seçkilərdə isə bu
partiya digər siyasi qurumların narazılığına baxmayaraq, 5 faiz səs toplamağa
müvəffəq olub. Həmin partiyalar iddia edirdilər ki, Vətənpərvərlər Alyansı
saxtakarlıqlarla özünə səs toplamağa müvəffəq olub. Lakin bütün bu faktlar
təsdiqini tapmadı. Bütün bunlarla yanaşı, "vətənpərvərlər” işğalçıların
maraqlarını Gürcüstan parlamentində müdafiə etməkdə davam ediblər. Gürcü siyasi
cəmiyyətində bir növ Jirinovskinin liberal-demokratları kimi imicə malik olan bu
partiyanın liderləri dəfələrlə biabırçı bəyanatlar verməklə gülüş obyektinə
çevriliblər. Rusiya işğalı məsələsində isə xüsusi fəallıq göstərirlər.
Əvvəlki kremlyönümlü kollaborasionistlər kimi,
Vətənpərvərlər İttifaqı da Gürcüstan torpaqlarının 20 faizini işğal edən
Rusiyanı işğalçı dövlət kimi deyil, əsas siyasi oyunçu və Qafqazda
təhlükəsizliyin təminatçısı kimi görür. Gürcüstan mediası dəfələrlə bu
partiyanın antigürcü mövqeyini ortaya qoyan materiallarla çıxış edib, onların
Rusiya xüsusi xidmət orqanlarının tapşırığı ilə hərəkət etdiyini bildirib.
Gürcüstanın ərazi bütövlüyünün bərpasını tələb etməkdənsə, onlar Rusiya
rəhbərliyi ilə birbaşa dialoqa gedilməsinin tərəfdarıdırlar. Və dəfələrlə bəyan
ediblər ki, Rusiya Qafqazda sülhün yaranmasını istəyir. Xüsusi vurğulayırlar
ki, Rusiya ilə dil tapmaq və onun bütün şərtlərini yerinə yetirmək gərəkdir.
Gürcüstan qarşısında Rusiyanın şərti isə budur – separatçı abxaz və osetin
qurumlarının müstəqilliyinin tanınması, onların sülh danışıqlarında tərəf kimi
tanınması, onlara hüquqi status verilməsi, Gürcüstanın "İşğal olunmuş əraziləri
haqqında” qanununun dəyişdirilməsi və Kremlin əlaltıları ilə mənasız və sonsuz
danışıqlara gedilməsi. Təbii ki, Gürcüstanın ərazi bütövlüyünün təmin
edilməsinə hər hansı bir təminat verilmir və verilə də bilməz. Bu yalnız və
yalnız əks effektə yönəlib. Rusiya hökumətinin məqsədi tez bir zamanda
Gürcüstanı öz torpaqlarından hüquqi cəhətdən imtina etməyə məcbur etməkdir.
Bununla gürcü siyasilərinin gələcək nəsillərinin heç bir zaman onlara qarşı
iddia irəli sürməməsinə nail olmaqdır. Bunu isə qanunların köməyi ilə həll
etmək mümkündür.
Kreml separatçı qurumlara hərtərəfli dəstək verir
və onların hər vasitə ilə müstəqil olmalarına çalışır. Lakin məsələ ondadır ki,
dünya ictimaiyyəti və birliyi onların müstəqilliyini tanımır. Başqa bir yol isə
budur ki, Kreml Gürcüstanın separatçılarla iqtisadi və siyasi əməkdaşlığa getməsinə,
daha dəqiq desək, onların beynəlxalq subyekt kimi tanınmalarına nail olmağa
çalışır. Gürcüstanın Vətənpərvərlər İttifaqı da bu yöndə dəfələrlə bəyanatlar
səsləndirib. Faktiki olaraq Moskva Gürcüstanla bağlı 1921-ci il ssenarisinin
təkrarlanmasına və Qars müqaviləsinin gündəmə gəlməsinə çalışır. O zaman Kremlin
nəzarətində olan bolşeviklər öz imzaları ilə Gürcüstanın Rusiyanın tərkibinə
daxil olmasına nail olmuşdular. Eləcə də iddia edirlər ki, məhz kommunist
hökumət Rao və Klardjetinin Türkiyənin nəzarətinə keçməsinə nail oldu. Həmin
sazişlə də adıçəkilən ərazilər birdəfəlik Türkiyənin nəzarətinə verilib. İndi
isə həmin ssenari təkrarlana bilər. İndi vəziyyət Abxaziya və Samaçablo ilə
bağlıdır. Vətənpərvərlər İttifaqından olan kollaborasionistlər bu gün bütün gücləri
ilə buna çalışırlar.
Gürcü mediasının da ifadə etdiyi kimi, bu gün
satqın və işğalçıların bu arzunu reallaşdıra bilmək şanslarının olub-olmaları
yalınız və yalnız gürcü cəmiyyətindən və hər bir vətəndaşın onlara qarşı
müqavimətindən asılı olacaq.
Azər