Kreml Aİİ və KTMT-də ziddiyyətləri yoluna qoyur
Rusiya öz himayəsində olan Avrasiya İqtisadi İttifaqı, eləcə də
Kollektiv Təhlükəsizlik Müqaviləsi Təşkilatında (KTMT) yaşanan ikitirəlik və
ziddiyyətləri aradan qaldırmağa müvəffəq olub. Bəlli olduğu kimi, hər iki qurum
daxilində gərginlik o həddə çatmışdı ki, Belarus kimi təşkilatın bel sütunu
olan dövlət onun iclaslarına qatılmaqdan imtina etmişdi. Eləcə də, Aİİ və KTMT-nin
digər bir nüfuzlu üzvü Qazaxıstan da arabir tənqidi fikirlər səsləndirirdi. O
ki qaldı Ermənistana - bu ölkə ötən il apreldə yaşadığı biabırçı məğlubiyyətdən
sonra hər iki qurumu tənqid edən bəyanatlar səsləndirmişdi.
Bütün bunlar isə qurum daxilində ziddiyyətləri artırmışdı və çoxları
ümid edirdi ki, bütün bunlar qurumun sonunu yaxınlaşdıracaq. Lakin bu ilin
əvvəlindən bəri gözləntilərin əksi baş verir. Rusiya ilk növbədə hər iki
qurumla bağlı narazı fikirlər səsləndirən Belarusu ram edib. İki ölkə arasında
yaşanan ticarət müharibəsinə son qoyaraq, ziddiyyətləri aradan qaldırmağa müvəqqəti
də olsa müvəffəq olub. Bəziləri hesab edir ki, hər iki qurumda Moskva
gərginliyi aradan qaldırmağa müvəffəq olsa da, narazılıq səngiməyəcək. Lakin
hələ ki gəlinən qənaət budur ki, Rusiya prezidenti Vladimir Putin gərginlikləri
keçə bildi.
Yeri gəlmişkən, nüfuzlu araşdırma mərkəzləri, nəşrlər, ekspertlər də
hər iki qurumda ziddiyyətlərin aradan qalxdığını vurğulayırlar. Rusiyanın
rəhbərlik etdiyi Kollektiv Təhlükəsizlik Müqaviləsi Təşkilatı və Avrasiya
İqtisadi İttifaqının nüfuzu yüksəlməkdədir. Regionun həssas təhlükəsizlik
mühiti və Avropada gedən parçalanma blok üzvlərini Moskvayla daha sıx
əməkdaşlığa sövq edəcək. Amma bu iki qurumun üzvləri yaxın gələcəkdə çoxalmayacaq
və bu da Rusiyanın öz periferiyasında nüfuzunun artırılmasında həmin
qurumlardan istifadəsini məhdudlaşdırır. Bu haqda nüfuzlu "Stratfor” Araşdırmalar
Mərkəzi hesabat yayıb. Hesabatda qeyd edilir ki, Sovet İttifaqı dağılandan
sonra Rusiya ilk olaraq Müstəqil Dövlətlər Birliyini (MDB) yaratdı, ancaq bu
qrup getdikcə simvolikləşdi, üzvləri yerli və xarici siyasətlərini özləri
inkişaf etdirməyə meyilləndilər. Bundan sonra KTMT və Aİİ Rusiyanın əsas
inteqrasiya bloklarına çevrildilər. Rusiya Aİİ vasitəsilə regional iqtisadi
inteqrasiyasını dərinləşdirə bildi. KTMT isə NATO-ya alternativ kimi təqdim
olunurdu, Rusiyanın güclü qlobal dövlət imici yaradılırdı. "Yeganə problem
Rusiyanın imic məsələsinin özünü doğrultmaması idi. 2015-ci ildə Aİİ-ə
Ermənistan və Qırğızıstan qoşuldu. KTMT isə 2012-ci ildə Özbəkistanı itirdi.
Baltik ölkələri Qərb qurumlarında mövqelərini möhkəmlətdikcə, Ukrayna,
Gürcüstan və Moldova da nə vaxtsa onların yoluyla gedəcəklərinə ümid bəsləməyə
başladılar. Azərbaycan, Özbəkistan və Türkmənistan isə beynəlxalq bloklarla
bağlı neytrallığa meyillənir, nə Şərq, nə də Qərbə yan alırdılar”, - deyə təhlildə
vurğulanır.
Məqalədə bu iki blok daxilində yaranmış fikir ayrılıqları
xatırladılır: "Məsələn, KTMT ötən il Dağlıq Qarabağ münaqişəsiylə bağlı neytral
mövqe tutmağa çalışdı. Baxmayaraq ki, Ermənistan hökuməti qurumdan siyasi
dəstək istəyirdi. Bundan başqa, KTMT-nin baş katibi postuna Ermənistandan
namizədin təsdiqlənməsi bir neçə dəfə ertələndi. Çünki Azərbaycanla güclü
münasibətləri olan Belarus və Qazaxıstan buna qarşı çıxırdı. Hətta belə bir
fikir formalaşırdı ki, onlar Ermənistanın bu hərbi blokun başına keçməsinin
əleyhinədirlər”. Amma "Stratfor” son aylar hər iki qurumda müsbət
dəyişikliklərin də baş verdiyini yazır. Ermənistan ordusunun baş qərargah rəisi
olmuş Yuri Xaçaturov aprelin 14-də KTMT-nin rəhbəri postuna təsdiqləndi. Digər
tərəfdən, Avrasiya məkanında yaraqlıların hücumlarının çoxalması KTMT üzvlərini
Rusiyayla daha sıx əməkdaşlığa məcbur edir. "Bəzi təsdiqlənməmiş məlumatlara
görə, KTMT Əfqanıstanla həmsərhəd Mərkəzi Asiya ölkələrinə çevik qüvvə
yerləşdirməyi nəzərdən keçirir. Bu arada Belarusla Rusiya apreldə təbii qaz və
borc mübahisələrini yoluna qoya biliblər. Uzun müddət Qərbə meyillənən Moldova
blokda müşahidəçi statusuna təsdiqlənib. Moldova prezidenti İgor Dodon
Rusiyayla daha sıx iqtisadi və siyasi münasibətləri genişləndirməyə çoxdan can
atırdı”, - deyə hesabatda vurğulanır.
Qeyd edək ki, Rusiya Dumasının spikeri Vyaçeslav Volodinlə görüşü
zamanı İqor Dodon söyləyib ki, "Moldovanın NATO-ya üzvlüyü qətiyyən
qəbuledilməzdir. "Mənim heç vaxt danışıqlar predmeti olmasına izn verməyəcəyim
4 şey var. Bunlar Moldovanın dövlətçiliyinin qorunması və onun heç bir dövlətlə
birləşməsinə izn verməmək (Moldova və Rumıniyada bəzi qüvvələr bu iki ölkənin
birləşməsinə çalışırlar – red.), neytrallığımızı qorumaq, pravoslavlığımız. Dördüncü
qəbuledilməz məqam isə Rusiya ilə strateji tərəfdaşlıqdan imtinadır”, – deyə o
bildirib.
"Stratfor” yazır ki, regiondakı təhlükəsizlik mühiti, üstəgəl, Qərbdə
davamlı parçalanmalar keçmiş sovet ölkələrinin seçimini azaldır, onlar həmin
bloklara üz tutaraq ziddiyyətlərini həll etməyə çalışırlar. "Bu qurumlar, ancaq
üzvlərinin sayı artarsa, daha çox iş görə bilərlər. Di gəl, bu yaxınlarda heç
birinin böyüyəcəyi gözlənilmir. Əvəzində, həmin bloklar Rusiyanın
periferiyasından kənara əl uzatmaq cəhdlərinin bir hissəsinə çevrilə bilər.
Axı, Moskva Avrasiya sərhədləri boyunca açıq Qərblə rəqabət halındadır”, –
təhlildə vurğulanır.
Kamran