Bakı 14°C
Koreyalıların İngiltərədəki fəxri - Portret
Futbol üzrə dünya çempionatı ən çox sevilən idman yarışlarındandır.
Hər dəfə milyonlarla izləyici 4 ildən bir keçirilən bu möhtəşəm idman tədbirinə
köklənir. Hətta futbolla maraqlanmayanlar belə, axın istiqamətində üzərək,
özləri də bilmədən bu yarışın izləyicisinə çevrilirlər. Azarkeşlərə bu turniri
sevdirən əsas xüsusiyyətlərdən biri də, burda Avropa və Cənubi Amerikanın
nəhəng futbol milliləri ilə yanaşı, Afrika, Uzaq Şərq, Avstraliya kimi bizə bir
xeyli uzaq olan bölgələri təmsil edən ölkələrin yığmalarının da yer almasıdır.
Bu bölgələrin milliləri mundiallarda heç vaxt çempionluğa oynamasalar da, öz
çıxışları ilə dördilliyin ən nəhəng futbol turnirlərinə əlavə rəng qatırlar. Futbol azarkeşləri məhz dünya çempionatlarında 4 il ərzində gözdən uzaqda olan
bu yığmaların oyunlarını izləmək imkanı əldə edə bilirlər. Bu millilər dünya
çempionatının favoritlərindən hesab edilməsə də, hərdən sensasiya etməyi bacaranlar
da var. Elə 2002-ci ildə Cənubi Koreya millisinin bacardığı kimi. Koreyalılar
Yaponiya ilə birgə təşkil etdiyi mundialda İtaliya, İspaniya kimi dünya
futbolunun nəhənglərini mübarizədən kənarlaşdırıb, yarımfinala adlamaqladünya futbol ictimaiyyətinin
diqqət mərkəzinə düşmüşdü. Cənubi Koreya kimi yığmalar hər nə qədər futbol
izləyicilərinə yad olsa da, bu cür millilərin də heyətində tanış simalara rast
gəlmək mümkündür. Bu yığmaların heyətində az da olsa, Avropanın əsas
liqalarının iddialı klublarında top qovan futbolçular yer alır. Elə məhz bu
oyunçular öz yığmasının "flaqman”ı, əsas qüvvəsi hesab edilir. Cənubi Koreya
millisinin də bu cəhətdən bəxti gətirib. Bu ölkənin millisinin heyəti ilə tanış
olan sıravi futbol azarkeşinə, yəqin ki, burdakı qəliz adların bir çoxu yad gələcək.
Ancaq Honq-Min Son adı yəqin ki, bir çox futbol azarkeşinə, əsasən də,
İngiltərə futbolunun həvəskarlarına yaxşı tanış olacaq. Son bir neçə ildə
"Tottenhem”in heyətində Premyer Liqadakı çıxışı ilə diqqət mərkəzinə düşən Son,
öz yığmasının ən məşhur futbolçusudur. Bu yazıda sizə London təmsilçisinin və
Cənubi Koreya yığmasının vingeri Son Honq-Mindən bəhs edəcəyik.
Yeni Zelandiyada keçən
uşaqlıq, vətənə qayıdış
Son Honq-Min 1992-ci il iyulun 8-də Cənubi Koreyanın Çunçeon şəhərində
dünyaya gəlib. Onun valideynləri səyahət etməyi sevib. Təsadüfi deyil ki,
balaca Honq məhz buna görə uşaqlıq illərinin bir qismini ölkə xaricində
keçirməli olub. Onun cəmi 3 yaşı olanda ailəsi Yeni Zelandiyaya köçüb. Honq-Min
məktəbə məhz burda getməyə başlayıb. O, yerli ingilis dili və ədəbiyyatı
təmayüllü məktəbdə təhsil almağa başlayıb. 9 yaşında isə ailəsi ilə birgə
vətənə - Cənubi Koreyaya qayıdıb. Honq-Minə futbola həvəs atasından, Vonq-Canq
Sondan keçib. Belə ki, ata Son futbolçu olub, hətta Cənubi Koreya millisində
bir oyun da keçirib. Maraqlıdır ki, Honq-Minin atası hazırda onun "Tottenhem”də
baş məşqçisi olan Maurisio Poçettino ilə dost olub.
"Hamburq”un diqqətini çəkən
topdaşıyan
Sonun uşaq vaxtından futbola olan həvəsi "Seul” akademiyasına
yazılması ilə nəticələnib. Honq-Min 2008-ci ildə bu komandada çıxış edib. O, bu
klubun əsas komandasının oyunlarında topdaşıyan kimi də iştirak edirdi. Ancaq
çox çəkmir ki, Son futbol skautlarının diqqətini cəlb edir. 2008-ci ildə ona
Almaniyanın "Hamburq” klubu "elçi düşür”. Bundesliqada çıxış edən klubun
skautları Sonun gələcək vəd etdiyini düşünüb, onu klub akademiyasına cəlb edirlər.
O isə burda özünü doğrultmağı bacarır. Cəmi iki il sonra koreyalı futbolçu
klubun əsas komandasına cəlb edilir. Son burda da öz oyunu ilə "dinozavrlar”ın
məşqçilər korpusunun etimadını qazanır. O, 8-i əsas heyətdə olmaqla, cəmi 13
oyunda şans qazanıb, 3 qola imza atır. 18 yaşlı gənc üçün heç də pis nəticə
deyil. Növbəti mövsümlərdə isə o, potensialının daha artığına imkan verdiyini
göstərir. 2011/12 mövsümündə 27 oyunda 5 qol vuran Son, 2012/13 mövsümündə
"Hamburq”un əvəzedilməz üzvünə çevrilir. O, 31-i əsas heyətdə olmaqla, cəmi 33
matçda şans qazanır, 12 qol vurur.
"Good job my Son”
"Hamburq”dakı parlaq çıxışı onu başqa klubların da diqqət mərkəzinə
salır. "Bayer” 2013-cü ildə gənc koreyalını heyətinə cəlb edir. Burda isə o,
nəinki Bundesliqada, həm də, Çempionlar Liqasında fərqlənmək bacarığını nümayiş
etdirir. Qitənin ən nüfuzlu klub turnirinin 2014/15 mövsümündə şans qazandığı
10 oyunda 5 qol vuran Son, İngiltərənin "Tottenhem” klubunun diqqətini cəlb
edir. O, 2015/16 mövsümündə "Bayer”də cəmi 1 oyun keçirdikdən sonra London
təmsilçisinə transfer olunur.
Son qısa müddətdə atasının dostu olmuş baş məşqçi Maurisio
Poçettinonun etimadını qazanır. O, hotspurluların heyətində keçirdiyi ilk
mövsümdə şans qazandığı 28 oyunda 4 qol vurur. Son "Tottenhem”in heyətində
Avropa Liqasında da fərqlənir. Koreyalı qitənin ikinci dərəcəli klub turnirində
şans qazandığı 7 oyunda 3 qola imza atır. Avroliqadan söz düşmüşkən, 2015/16
mövsümündə "Tottenhem”lə bir qrupda təmsilçimiz "Qarabağ” da yer almışdı. Ağdam
klubu ilə London təmsilçisi arasında "Vayt Hart Leyn” stadionunda baş tutan
görüşün taleyini məhz Son həll etmişdi. Belə ki, koreyalı komandasının 3:1
hesablı qələbəsinə 2 qolla töhfə vermişdi. Oyundan sonra yerli qəzetlərdən biri
manşetə matçla bağlı maraqlı bir başlıq çıxardı - "Good job my Son” ("Yaxşı iş
idi oğlum” - ingiliscə "son” "oğul” mənasını verir).
Sonrakı mövsümlərdə isə koreyalı "Tottenhem”in əsas üzvünə çevrildi.
Rekordçu
Son həm də rekordçudur. Belə ki, onun cəmi 25 yaşı olsa da, bir neçə
rekord qırmağa nail olub. O, ilk rekorduna "Hamburq”da imza atıb. Son
"dinozavrlar”ın heyətində Bundesliqada "Köln”ün qapısına yol tapmaqla, Manfred
Kaltsın uzunmüddətli rekorduna son qoyaraq, bu klubun heyətində fərqlənən ən
gənc futbolçu oldu. 2013-cü ildə isə "Bayer”in tarixinə düşür. "Hamburq”dan
Leverkuzen təmsilçisinə 10 milyon avro qarşılığında transfer olunan koreyalı,
"asprinlər”in ən bahalı transferi oldu.
Cəmi iki il sonra - 2015-ci ildə Son növbəti rekorda imza atdı.
"Bayer”dən "Tottenhem”ə 22 milyon funt-sterlinq (30 milyon avro) qarşılığında
transfer olunan Honq-Min, futbol tarixinin ən bahalı asiyalı futbolçusu
ünvanına yiyələnir. O, bununla, əfsanəvi yapon futbolçu Hidetoşi Nakatanın 14
illik rekordunu qırır. Nakata 2001-ci ildə "Roma”dan "Parma”ya 25 milyon avro
qarşılığında transfer olunmuşdu.
Sonun hələ ki, son rekordu bu ilə təsadüf edir. Noyabrın 5-də Premyer
Liqada "Kristal Pelas”la matçda (1:0) komandasına qələbə qazandıran qola imza
atan Honq-Min, bu çempionatdakı ümumi qollarının sayını 20-yə çatdırdı. Bununla
o, vaxtilə "Mançester Yunayted”in heyətində çıxış etmiş həmyerlisi Park
Ji-Sunqun rekordunu qıraraq, Premyer Liqada ən çox qol vurmuş asiyalı oldu. Bu,
hələ ki, onun son rekordudur. Ancaq bu gedişlə, koreyalı İngiltərədə hələ çox
rekordlara imza atacaq.
Oyun tərzi
Sonun əsas üstün cəhəti hər iki ayağından istifadə etməyi bacarmasıdır.
O, həm hücumçuların arxasında, həm də, yarımmüdafiənin cinahında, vinger kimi
çıxış edə bilir. Koreyalının özü üçün isə harada oynamasının fərqi yoxdur. Onun
fikrincə, əsas işi oyunu ilə komandasına kömək etməkdi.
Koreyalı futbolçunun digər əsas xüsusiyyətləri isə start sürətinin
çox yüksək olması, meydanda cəld hərəkəti və əzmkarlığıdır. Honq-Min meydanda
olduğu zaman komandasının qələbəsi üçün var qüvvəsi ilə mübarizə aparır.
Milli
Son Cənubi Koreya millisində 2010-cu il, dekabrın 24-də Suriya ilə
yoldaşlıq görüşündə debüt edib. Cəmi bir ay sonra - Asiya Kubokunun Hindistana
qarşı qrup oyununda isə (4:1) yığmada ilk qoluna imza atıb. Bu günə kimi
millidə 61 oyun keçirmiş vinger, 20 qola imza atıb.
Son yerli futbol azarkeşlərinin könlünü qazanmağı bacarıb. Vətənində
onu portuqaliyalı futbolçu Kriştiano Ronaldo ilə müqayisə edirlər. Honq-Minə
özünəməxsus ləqəb də verilib - "Sonaldo”.
Şəxsi həyatı
Honq-Minin atasının futbolçu olması barədə yuxarıda qeyd etdik. Ata
Son butslarını mismardan asdıqdan sonra da futbol sferasında çalışıb. O,
menecer kimi fəaliyyət göstərib. Honq-Minin anası daim öz oğluna dəstək verib.
Son öz açıqlamalarında da uğurlarında anasının rolunu xüsusi qeyd edib. Onun
özündən böyük bir qardaşı (Honq-Yun Son) var. O, bir müddət kiçik qardaşına
menecerlik də edib.
Son şəxsi həyatı ilə tez-tez gündəmə gəlmir. Ancaq onun Honq-Konqda
keçirilən əyləncə tədbirlərindən qalmadığı deyilir. Bir müddət öncə onun keçmiş
sinif yoldaşı So Yonq ilə sevgili olduğu açıqlanmışdı. Yonq hətta
açıqlamalarının birində Sonun ona bahalı hədiyyələr aldığını da bildirmişdi.
Ancaq bu sevgi macərası çox uzun çəkmir. Honq-Minin son olaraq koreyalı müğənni
və aktrisa Minayla sevgili olduğu barədə xəbərlər yayılıb.
Portret
Cənubi Koreya millisi kimi komandalar dünya çempionatı kimi nəhəng
futbol yarışlarına böyük məqsədlərlə yollanmırlar. Ancaq bu mötəbər yarışlarda
bu cür millilərin azarkeşlərini böyük iddialara heyətdə olan top-klubların
üzvləri vadar edir. Son artıq bir neçə ildir dünyanın ən güclü
çempionatlarından olan İngiltərə Premyer Liqasında, özü də, bu çempionatın
iddialı komandalarından olan "Tottenhem”də çıxış edir. Elə məhz bu amil onun
çiyinlərinə əlavə məsuliyyət qoyur. Son bu günə kimi çıxış etdiyi klublarda
olduğu kimi, millidə də özünü doğrultmalıdır. Lakin bu dəfə ümumi ansamblın bir
hissəsi kimi yox, lider kimi. Meydanda döyüşkən, məşqlərdə intizamlı xarakteri
ilə ad çıxarmış Sonun bu vəzifənin öhdəsindən necə gələcəyini gələn il Rusiyada
görəcəyik.
Elnur
