Kompüter piratçılığından necə qurtulmalı?
"Bu gün Azərbaycanda istifadə edilən
proqram təminatlarının əksəriyyəti lisenziyasızdır”. "Microsoft” şirkətinin
Bakıda təşkil etdiyi"Device Day” tədbirində səslənən bu fikirlər
ölkəmizdə piratçılığın vəziyyəti və ona qarşı aparılan mübarizə tədbirlərini
yenidən gündəmə gətirib. BSA şirkətinin rəsmisi Nəriman Ramazanov Azərbaycanda
piratçılığa qarşı apardıqları maarifləndirmə işlərinin öz təsirini verdiyini və
ölkə bazarında piratçılığın ümumi səviyyəsinin 92%-dən 86%-ə, sonra isə 84%-ə
düşdüyünü deyib.
Belə ki, Azərbaycanda sahibkarlıq
sahəsində yoxlamaların qadağan edilməsi piratçılığın inkişafına müsbət təsir
edir: "2015-ci ilin dekabrında qərar çıxdı ki, sahibkarlıq sahəsində yoxlamalar
2 illik dayandırılsın. Əvvəllər biz yoxlamalar üçün hansısa quruma müraciət
edirdik, amma indi bu, alınmır. Bu səbəbdənhələ də piratçılığın səviyyəsi
84% civarında qalıb”. N.Ramazanovun sözlərinə görə, bazarda daha böyük paya
malik olan şirkətlərin pirat proqramlarının yayılmasında rolu böyükdür: "Əslində,
əgər lisenziyalı sistem olmasa, mağazalar texnikanı proqramı təminatı olmadan
satmalıdır. Amma bir çox hallarda onlar pirat proqramlarından istifadə edir.
Düzdür, bu sahədə moratorium elan edilib. Amma bizim məhkəməyə müraciət etmək
hüququmuzu kimsə almayıb”.
İnternet proqramları ilə bağlı piratçılığın qarşısını almaq üsulları
necə həyata keçirilir? Nəzərə alsaq ki, Müəlliflik hüququ və əlaqəli hüquqlar
haqqında Azərbaycan Respublikasının Qanununa əsasən, pirat proqram təminatının
istifadəsi və ya hər hansı formada yayılması müəllif hüquqlarının pozulması
hesab olunur, onda məsələnin nə qədər əhəmiyyətli olduğu anlaşılır.
Piratçılığa münasibətdə mübarizə üsullarından tutmuş, açıqlanan
rəqəmlərə qədər ekspertlərin və qurumların bəzən üst-üstə düşməyən fikirləri
isə məsələnin aktuallığını daha da artırır.
Hər 3
proqram məhsulundan 1-i
AMEA İnformasiya Texnologiyaları
İnstitutunun şöbə müdiri Rasim Mahmudovun sözlərinə
görə, bu gün proqram təminatı sənayesinin inkişafını əngəlləyən əsas
problemlərdən biri kompüter piratçılığıdır. Belə ki, hazırda bütün dünyada
quraşdırılmış hər 3 proqram məhsulundan 1-i pirat proqramdır: "Kompüter
piratçılığı yalnız proqram məhsullarının istehsalçılarına ziyan vurmur,
bütövlükdə, informasiya texnologiyaları sənayesinə ciddi problem yaradır.
Nəzərə almaq lazımdır ki, bu gün dünya iqtisadiyyatında və onun milli
sektorlarında artım da müəyyən dərəcədə proqram təminatının inkişaf
səviyyəsindən asılıdır. Kompüter piratçılığının vüsət alması iş yerlərinin
itirilməsi, proqramçıların işsiz qalması, əmək haqlarının aşağı olması və ən
əsası, dövlətin gəlirlərinin azalması və informasiya texnologiyalarına
investisiya qoymağa marağın azalması deməkdir. Kompüter piratçılığı dövlətin
informasiya təhlükəsizliyi baxımından da böyük risk yaradır. Bir çox hallarda
pirat distribüter şəbəkəsi vasitəsi ilə konfedensial informasiya, o cümlədən
dövlət sirri yayılır”.
R.Mahmudov hesab edir ki, kompüter piratçılığı ilə effektli mübarizə
aparmaq, proqram təminatı sənayesinin dayanıqlı, effekli inkişafını təmin etmək
üçün bir sıra zəruri şərtlərlə yanaşı, müvafiq hüquqi platformanın yaradılması
vacibdir. O cümlədən proqramlaşdırma fəaliyyətinin yaradıcı fəaliyyət sahəsi
olaraq intellektual mülkiyyət obyekti qismində hüquqi qorunması üçün zəruri
əsasların yaradılması xüsusi aktuallıq kəsb edir. Şöbə müdirinin sözlərinə
görə, kompüter piratçılığı termini proqram təminatına dair müəlliflik hüququnun
pozulmasını ifadə edir: "Birbaşa mənada müəllif hüququ anlayışı - nüsxələrini
yaratmaq hüququ kimi izah olunur. Müəllif hüququ, öz növbəsində, intellektual
mülkiyyətin qorunması formalarından biri kimi çıxış edir. Proqram məhsulunun
lisenziyalı nüsxəsini alarkən istehlakçı yalnız ondan istifadə hüququnu əldə
edir. Proqramın özünə müəlliflik hüququ onu yaradanda qalır, alıcının
mülkiyyətinə yalnız proqramın yayıldığı maddi daşıyıcılar keçir. Kompüter
piratçılığı dedikdə, adətən, proqram təminatının icazəsiz olaraq nüsxələnməsi,
istifadəsi və yayılması anlaşılır”.
R.Mahmudov hazırda proqram təminatının qanunsuz nüsxələnməsi və
yayılmasında internetin böyük rol oynadığını bildirir: "Piratçılığın bu növü
ona görə xüsusi olaraq fərqləndirilir ki, internet meydana gəldikdən sonra
piratçılıq daha geniş miqyas almağa başlayıb. Pirat proqram məhsullarının
reklam edilməsində də internetin imkanlarından geniş istifadə olunur”.
Piratçılıqla mübarizə üsullarından danışan şöbə müdiri dünya təcrübəsinə
istinad edərək təbliğat-təşviqat, istifadəçilərə təlim keçmək, onları öyrətmək,
tematik seminarların, konfransların keçirilməsi, metodik və sorğu xarakterli
ədəbiyyatın nəşri vasitəsi ilə istifadəçilərə qanuni əsaslarla daha ucuz
proqram təminatını əldə etməyin yollarını öyrətməyin əsas istiqamətlərdən biri
olduğunu deyir. Digər bir istiqamət kimi qiymət siyasəti göstərilir: "Poqram
məhsulunu qanuni yolla əldə etmək üçün məsrəflər nə qədər çox olarsa, onun qeyri-qanuni
yolla daha ucuz qiymətə əldə edilməsi halları bir o qədər artır. Kasıb
ölkələrdə piratçılığın səviyyəsinin daha yüksək olması da bunun əyani
göstəricisidir. Ona görə də proqram təminatı istehsalçıları kasıb ölkələrə
münasibətdə güzəştli qiymət siyasəti həyata keçirməlidirlər ki, piratçılıq
halları minimuma ensin”.
Piratçılıqla mübarizədə digər bir istiqamət kimi hüquqi metod və ya
güc metodu tətbiq edilir: "Bu metod qeyri-leqal məhsulların istehsalçıları və
satıcılarının müəyyən edilərək, onların cinayət və ya inzibati məsuliyyətə cəlb
edilməsini nəzərdə tutur. Bu prosedur dövlətin hüquq-mühafizə orqanlarının –
polis, prokurorluq, antiinhisar, gömrük və məhkəmə orqanlarının birgə
fəaliyyəti sayəsində effektli ola bilər”. R.Mahmudov bildirir ki, kompüter
piratçılığı ilə effektli mübarizə aparmaq üçün kompüter proqramlarının hüquqi
qorunmasının təmin edilməsi vacibdir: "Kompüter proqramları hüquqi qorunmaya
ədəbi əsər kimi cəlb edilir. Həmçinin kompüter proqramı müəllifin
(həmmüəlliflərin) yaradıcılıq fəaliyyətinin nəticəsini özündə əks
etdirməlidir”.
Qiymətlər bahadır
"Mikrosoft”un statistikasını tam real
olmasa da, reallığa yaxın rəqəm hesab edən müstəqil
ekspert Tural Mustafayevin fikrincə, piratçılıqla mübarizəni əsasən
əlaqədar müstəqil qurumlar həyata keçirməlidir. Belə ki, böyük şirkətlərə
öncədən xəbərdarlıq etməklə monitorinq aparırlar: "Onlar qanuni formada həmin
təşkilatlarda kompüterləri, server avadanlıqlarını yoxlayırlar. Əgər
lisenziyasız proqram təminatları ortaya çıxırsa, piratçılıq halları qeydə
alınır”. Ekspertin fikrincə, piratçılığın aradan qaldırılması istiqamətində
atılan addımlardan biri aparılan yoxlamalardır. Digər tərəfdən, bu,
qanunvericiliklə tənzimlənməlidir: "Amerikada şəbəkədən lisenziyasız proqram
yükləyirsinizsə və bunu hər hansı provayder ortaya çıxararsa, məhkəmə qərarı
ilə həmin insanın evinə gəlib lisenziyasını yoxlaya bilərlər. Üzə çıxan
detallar da məhkəmə qarşısında sübut kimi istifadə oluna bilər”.
Ekspert istifadə olunan proqramların
qiymətlərinin baha olduğunu inkar etmir: «Devalvasiyadan sonra proqramların
qiymətləri bir qədər də artdı. Düzdür, akademik müəssisələr, təhsil
müəssisələri üçün müəyyən güzəştlər var, ümumilikdə isə qiymətlər bahadır. Evdə
istifadə olunan ofis paketinin müxtəlif versiyaları mövcuddur və onların
qiyməti 300-400 dollardan başlayır. Əgər adi istifadəçi windows sisteminin ofis
paketləri üçün 500 dollara yaxın pul xərcləyəcəksə, bu, o qədər də ucuz deyil”.
Ekspert məsələnin psixoloji tərəflərinin də olduğunu deyir: "Biz əvvəldən
proqram təminatına pul verməyə öyrəşməmişik. Biz fikirləşirik ki, texniki
avadanlığı pul verib alırıq, ancaq proqram təminatı virtualdır. "Əgər
avadanlığa pul vermişəmsə, bunun proqramı pulsuz olmalıdır” deyə düşünürük.
Necə ki, televizor alıb proqramlara pulsuz baxmaq istəyirik, bu proqramlardan
da eyni qaydada istifadə etmək istəyirik”.
T.Mustafayevin fikrincə, Müəllif
Hüquqları Agentliyi bu istiqamətdə maarifləndirmə işləri həyata keçirməli, ictimai
aksiyalar təşkil etməli, "Mikrosoft”la danışıqlar aparıb hər hansı endirimlərə
də nail olmalıdır.
84%
- həqiqəti əks etdirmir
Müəllif Hüquqları Agentliyinin Əsərlərin Qeydiyyatı
və Hüquq şöbəsi də öz növbəsində bildirir ki, son
illər Azərbaycan hökuməti tərəfindən piratçılığa, o cümlədən kompüter
piratçılığına qarşı mübarizə çərçivəsində ardıcıl və məqsədyönlü tədbirlər həyata
keçirilir. O cümlədən "Əqli mülkiyyət hüquqlarının təminatı və piratçılığa
qarşı mübarizə haqqında” Qanun qəbul edilib və əqli mülkiyyət məhsulları bazarı
daim Agentliyin monitorinqi altındadır: "Agentlik ilə "Microsoft Azərbaycan”
şirkəti arasında uzun illər faydalı əməkdaşlıq mövcuddur və şirkət tərəfindən
qaldırılan bir sıra problemli məsələlərin həllində yaxından kömək göstərilib. Bu
əməkdaşlıq uğurlu nəticələr verməkdədir. Məsələn, bütün dövlət orqanlarında, ali və orta ixtisas təhsil
müəssisələrində lisenziyalı proqram təminatından istifadəni təmin etmək üçün
Agentliyin öz səlahiyyətləri çərçivəsində aidiyyəti dövlət orqanları ilə
müvafiq işlər aparılıb və qeyd edilən qurumlarda lisenziyalı proqram
təminatından istifadə təmin edilib. "Əqli mülkiyyət hüquqlarının təminatı və
piratçılığa qarşı mübarizə haqqında” Qanunun tələblərinə uyğun olaraq əqli
mülkiyyət məhsulları bazarına çıxarılan malların qanunauyğunluğunu təsdiqləyən
nəzarət markalarının tətbiqinə başlanılıb, dövlət qurumlarında tam lisenziyalı
proqram təminatına keçid təmin edilib və digər antipirat tədbirləri həyata
keçirilib. Bütün bunların nəticəsində ölkəmizdə piratçılığın səviyyəsi müxtəlif
seqmentlər üzrə xeyli aşağı düşüb”.
MHA
bəzi beynəlxalq təşkilatların, xüsusən də BSA-nın Azərbaycanda kompüter
təminatı sahəsində piratçılığın səviyyəsinin 84% olması barədə açıqladığı
rəqəmin həqiqəti əks etdirmədiyini bildirir: "Əslində bu sahədə piratçılığın
səviyyəsinin həmin rəqəmdən çox aşağı olduğu dəlillərlə sübuta yetirilib. Gələcəkdə
belə hesabatlar hazırlanarkən bu sahədə fəaliyyət göstərən qurumların
verdikləri məlumatların əsas götürülməsi diqqətə çatdırılıb”. MHA-dan
bildirildiyinə görə, müəlliflərin (hüquq sahiblərinin) pozulmuş müəlliflik
hüquqları ilə bağlı sorğularını cavablandırmaq üçün Agentlikdə 960 nömrəli
"Qaynar xətt” və ictimai əsaslarla "Hüquq məsləhətxanası” fəaliyyət göstərir.
Agentliyin elektron poçtuna, facebook səhifəsinə, "Hüquq məsləhətxanası”na və
"Qaynar xətt”ə pozulmuş müəlliflik hüquqları ilə bağlı daxil olan hər bir
müraciət və sorğu operativ şəkildə cavablandırılır, müraciətdə qaldırılan
məsələ barədə ətraflı məlumat verilir, məsələnin həlli yolları izah edilir və
Agentliyin səlahiyyətləri çərçivəsində müvafiq köməklik göstərilir: "Pozulmuş
müəlliflik hüquqları ilə bağlı Agentliyə daxil olmuş yazılı müraciət müvafiq
qaydada araşdırılır. Bu məqsədlə müəllif (hüquq sahibi) əsərin, o cümlədən
proqram təminatının və pirat ehtimal edilən əsərin, o cümlədən proqram
təminatının nüsxələrini Agentliyə təqdim etməlidir. Agentlikdə onların
müqayisəli ekspertizası keçirilir və piratçılıq faktının olub-olmaması barədə
rəy hazırlanaraq müəllifə (hüquq sahibinə) təqdim edilir. Eyni zamanda,
piratçılıqda təqsirləndirilən tərəf Agentliyə dəvət edılir, müəllifin (hüquq
sahibinin) müraciəti barədə məlumatlandırılır, ondan müraciətdə qaldırılan
məsələ barədə izahat alınır. Bundan başqa, məsələyə müəllifin (hüquq sahibinin)
iddiası əsasında qanunvericiliyə uyğun qaydada məhkəmə qaydasında baxıldığı
halda, Agentliyin nümayəndəsi ekspert qismində məhkəmə iclaslarında çıxış
edir”.
Göründüyü kimi, ölkəmiz piratçılığa
qarşı beynəlxalq səviyyədə mübarizənin fəal iştirakçılarından biri olsa da,
problem qalmaqdadır. Digər tərəfdən, ekspertlərin dediyi kimi, əgər proqram
təminatı sənayesinin inkişafı yeni cəlbedici, yüksəködənişli və yüksəktexnoloji
iş yerlərinin yaradılmasını stimullaşdırır, dövlətin gəlirlərini və bütün
iqtisadi fəaliyyət sahələrində keyfiyyət və effektivliyi artırırsa, onda problemə
niyə daha çox diqqət yetirilməsin?
Təranə Məhərrəmova