Kitab nəşrləri üçün qonorar necə ödənməlidir?
Sovet dövründə kitabının nəşr olunması yazıçı və şair üçün üçqat
bayram sayılırdı - həm kitabı çapdan çıxır, həm oxucular tərəfindən tanınır,
həm də kitabının nəşrindən qonorar qazanırdı. Nəşriyyatlar kitabın satışına
görə müəllifə pul ödəyirdilər. Bu gün isə vəziyyət fərqlidir. Kitabını öz
hesabına nəşr etdirən müəllifin əlinə demək olar ki, satışdan qazanc gəlmir.
Nəşriyyatlar müəllifə ya qonorar
ödəmirlər, ya da hansısa şərtlərlə cüzi məbləğ verirlər. Belə olanda
müəlliflərdə yazmaq üçün həvəs və sevgi
ilə bərabər, bir o qədər də yazdıqlarından qazanmamaq ümidsizliyi yaranır.
Nəşriyyatlar niyə kitab çapına görə yazarlara qonorar ödəmir? Kitab
nəşrləri ilə bağlı sovet dövründəki kimi
qonorar sistemini bərpa etməyə ehtiyac
varmı? "Müzakirə”mizdə bu suallara cavab tapmağa çalışdıq.
Nəşr bazarı formalaşsa...
Yazıçı Firuz Mustafa qonorarın
verilməsini və ya köhnə qonorar sisteminin bərpasını oxucuların fəallığından və
dövlətin istəyindən asılı hesab edir.Yazar Səxavət Sahilin fikirləri isə
fərqlidir. O, bildirdi ki, kitablarla
bağlı qonorar sistemini bərpa etmək üçün nəşr bazarı formalaşmalıdır: "Bunun
üçün nəşriyyatlar müsabiqə təşkil edə, oxucular arasında rəy sorğuları
keçirməklə, yaxşı əsərləri ortaya çıxarıb, nəşr edə bilərlər. Digər tərəfdən, dövlət
də müəyyən məsələlərdə - vergi kimi məsələlərdə güzəşt edə, nəşriyyatların
müəyyən layihələrini dəstəkləyə bilər. Qonorar sistemi ilə bağlı fond da
yaradıla bilər. Bu tip fondların yaradılması ümumiyyətlə, bu sahədə mühüm
irəliləyişə gətirib çıxarar”. Yazarın fikrincə, qonorarın verilməməsi bir çox
səbəblərdən qaynaqlanır: "Əvvəla, onu yaddan çıxarmaq olmaz ki, kitab satışı o
qədər də ürəkaçan deyil. Lakin buna baxmayaraq, az da olsa qonorar verən
nəşriyyatlar var. Qonorarın heç verilməməsi o halda ola bilər ki, kitab təkrar
nəşr olunur və s.”
Kitab oxumağı sevməyən
toplum
Yazar Günel Eyvazlı dünya
praktikasından misal gətirərək, kitablarının satışından qazanc əldə edən
yazıçıların kifayət qədər olduğunu bildirir: "Bu yazıçıların əsas işi yazmaqdır. Kənar,
yararsız düşüncələrlə, maliyyə sıxıntıları ilə yüklənməyən ədiblər onlara
göstərilən qayğı, diqqət sayəsində pul qazana bilirlər. Xarici nəşriyyat şəbəkələri hər hansı bir
yazıçının piar, nəşr olunma məsələlərini öz üzərinə götürərək, həm yazıçının
imzasını tanıdır, həm də onun beyin məhsulundan yaxşı mənfəət əldə edə bilir.
Bu populyarlığın arxasında keyfiyyətli əsərlər olmaya da bilir. Hər halda,
yaxşı reklam yaxşı pul qazandırır. Həm yazıçıya, həm də nəşriyyata”. Yazarın
fikrincə, Azərbaycanda yazıçıların firavan zamanları sovet dönəmində qalıb: "Burada
yenə də söhbət keyfiyyətdən getmir. Sadəcə, müəyyən pullar ayrılırdı və çap
olunan şəxslər bunu qonorar şəklində ala bilirdilər. Ən acınacaqlı durum çağdaş
dövr nümayəndələrimizdədir. İndi yazıçıların çoxu özləri pul xərcləyərək, kitab
çap etdirirlər”. G.Eyvazlı bildirir ki, ölkəmizdə mövcud olan bəzi nəşriyyatlar və
onların gerçəkləşdirdiyi az sayda layihələr vardır ki, onlar öz maliyyə
hesablarına yazıçıya kitab nəşrində yardımçı olurlar. Qonorardan isə söz gedə
bilməz: "Kitabdan əldə olunan gəlirdən müəllifin ümumiyyətlə, xəbəri olmur.
Kitab layihənin hesabına dərc olunur, satışdan əldə olunan pullar isə həmin
nəşriyyatların öz cibinə gedir. Yazıçı yalnız kitab qazanır, maddi cəhətdən heç
nəsiz qalır. İntellektual zəhmət öz dəyərli qiymətini sosial, təfəkkür
intibahına məruz qalan toplumlarda alır. Yəni toplum öz idrakında və intellektində
elə səviyyəyə çatır ki, kitab və digər mədəni, mənəvi tələbatlar da onun
siyahısında öz yerini tutmuş olur. Əfsus ki, oxucularımızın hansı durumda
olması göz önündədir. Heç məmurlarımız kitab oxumur. Bu tərz məşğuliyyət, zövq olaraq hələ ki, cəmiyyətimizdə formalaşmayıb. Qısası, biz
kitab oxumağı sevməyən toplumuq”.
Nəşr olunan iki kitabına görə nəşriyyatdan bir qəpik də qonorar ala
bilmədiyini deyən yazar bildirdi ki, qonorarı saytlardakı köşə yazılarına görə
əldə edib: "Hal-hazırda qəzet və dərgilərdə olan yazılarıma görə qonorar
alıram. Bir də tərcümə olunan kitablara görə qonorar mövcuddur. İstənilən halda,
verilən haqq indiki bazarla müqayisədə olduqca azdır. Və yazıçının sırf bu qonorara
köklənib yaşaması qeyri-mümkündür.
Real durumda daxili bazarda böyük pullar qazanmaq ümumiyyətlə,
qeyri-mümkündür. Yaxşı qazanc və məşhurluq əldə etmək üçün xaricə çıxış
lazımdır. Çünki oxu səviyyəsi yüksək olan oxucular okeanların, dənizlərin o
tayındadır. Dərd burasındadır ki, dünyaya çıxmaq üçün kitabların tərcümə
olunmasına ehtiyac var. Və əgər sən tərcümə olunmaq istəyirsənsə, yenə də öz
maliyyənə arxalanmalısan. Yəni bunu sənin yerinə heç kim etməyəcək”.
Söz hörmətdən düşəndə
Yazıçı Aslan Quliyevə görə, müəlliflərə
yazılarına görə qonorar verilməsi nəşriyyatların imkanlarından, ən əsası da
kitab bazarının olmasından asılıdır: "Kitab satılmırsa, nəşriyyatın çap elədiyi
kitaba görə gəliri olmursa, müəllifə qonorar verə bilməz. Bunun üçün ilk
növbədə kitab dükanlarının sayı artırılmalı, oxucularda kitaba maraq
oyadılmalıdır. Ədəbi müsabiqələr keçirilməli, televizorlarda, radiolarda, qəzet
və jurnallarda kitablar təbliğ olunmalıdır. Oxucu yazıçını tanımırsa, kitabını
almayacaq. Məktəblərdə, institutlarda yazıçılarla görüşlər keçirilməli, bədii
kitablar müzakirə olunmalıdır. Amma bizdə kitabı öldürür, yazıçını gözdən
salırlar. Bu yaxınlarda Ramana kitabxanasında Süleyman Vəliyevin yüz illiyi
qeyd olunurdu. Kitabxana işçiləri gözəl, maraqlı tədbir təşkil eləmişdilər.
Süleyman Vəliyev də öz dövrünün ən keşməkeşli həyatı olan, müharibədə iştirak
eləmiş, əsir düşmüş, ən istedadlı yazıçılarından biridir. Di gəl, məktəb
direktoru müəllimlərə və şagirdlərə bu tədbirdə iştirak etməyi qadağan
eləmişdi. Öz kəndçilərinə bütün kəndin fəxr elədiyi yazıçının anım tədbirinə
qatılmağa qadağan eləyəsən?! Belə olan təqdirdə kitabın, yazıçının hörməti
olarmı? Kitab alarlarmı? Ölkənin, millətin gələcəyini düşünməyənlər bilərəkdən,
düşünülmüş surətdə sözü hörmətdən salırlar”. Yazar kitab qonorarı ilə bağlı
hazırkı vəziyyəti xarakterizə edərək bildirdi ki, naşirlər nəinki kitablarını
çap elədiklərinə görə yazarlara pul verirlər, əksinə, kitablarını çap eləmək
üçün pul alırlar: " Çünki çap elədikləri kitabı satmağa ümidləri yoxdur”.
Kitab nəşri sərf etmir
"Səda” Nəşriyyatının
rəhbəri Tərlan Quliyev yazarlara qonorar verilməməsini iqtisadi böhranla
əlaqələndirir: "Əvvəllər kitablar böyük tirajlarla nəşr olunurdu. Yazarlara da
qonorar vermək mümkün olurdu. İndi isə 200 tirajla çap olunan kitabdan yazıçıya
hansı qonorarı vermək olar?” Naşirin sözlərinə görə, bu gün nəşriyyatlar özləri
də zərərlə işləyir: "Heç bir qazanc yoxdur. Kitab nəşri heç yazarların özlərinə
də sərf etmir. Yazarlar yazırlar ki, kitab satılsın, insanlar oxusun, ancaq
kitab nə satılır, nə də oxunur. Heç kim kitab almır. Vəziyyət başqa ölkələrdə
də belədir”. Naşirin sözlərinə görə, bu gün yazarlar ən yaxşı halda 500 tirajla
kitab çap etdirirlər. Sovet dövründə isə bu rəqəm 200 və 500 min arasında dəyişib:
"Sovet dövründə kitablar yaxşı satılırdı və müəlliflər yaxşı pul qazanırdılar.
Nəşriyyatlar da kitab satışından yaxşı pul qazandıqları üçün müəllifə qonorar
ödəyirdilər. Bu gün vəziyyət tam fərqlidir”.
Nəyə görə köhnə qonorar
prinsipini bərpa edək?
"Altun kitab” nəşriyyatının
direktoru Rafiq İsmayılov hesab edir ki, bu məsələdə nə nəşriyyatları, nə də
müəllifləri günahlandırmaq olmaz: "Sovet dövründə nəşriyyatlar hamısı dövlət
nəşriyyatları idi. Onların fəaliyyəti qanunla tənzimlənirdi. Şeir idisə,
misrasına, nəsr əsəri idisə vərəqinə görə qonorarlar müəyyənləşmişdi. İndi isə
üzdə olan nəşriyyatların hamısı müəlliflərlə bir növ işbirliyi ilə kitabları
buraxırlar. Ya kitabları onlara sifariş edirlər, ya kitabın satışından faiz
verirlər. Onların da xərci və qonorar məbləği qarşılıqlı razılaşma ilə həll olunur.
Düzdür, bu sahədə müəyyən bir xaos yaranıb. Ancaq indi kifayət qədər nəşriyyat
da, müəllif də var. Müəlliflər özlərinə uyğun nəşriyyat seçirlərsə,
nəşriyyatlar da öz planlarına uyğun müəllif seçməlidirlər. Əgər hansısa
müəllifi əməkdaşlıq etdiyi nəşriyyat qane etmirsə, başqasına üz tuta bilər. Bu
məsələdə "filan qədər qonorar verəcəksən” - deyə direktiv akt tətbiq etmək
mümkün deyil”. Naşir qonorar sisteminin sovet dövründəki kimi bərpasına ehtiyac
görmür: "Nəyə görə köhnə qonorar prinsipini bərpa edək? O, düzgün prinsip
deyil. O, sovet dövrünə, sosializm cəmiyyətinə uyğun bir prinsip idi. Məsələn,
sovet dövründə Rəsul Rzaya şeirinin misrasına görə yazılan qonorar ədəbiyyata
yenicə gələn gəncə verilən qonorardan fərqli idi”. İndi tam fərqli qonorar prinsiplərinin
mövcud olduğunu deyən naşir həmin prinsiplərin biznes əsasında qurulduğunu
bildirir: "Əgər kitab satılırsa, onda nəşriyyat da həmin müəllifi seçməyə və
ona uyğun qonorar verməyə maraqlıdır. Bu, öz-özünə tənzimlənəcək. Bu prosesin
dövlət tərəfindən tənzimlənməsi hazırda işləri korlaya bilər. Əksinə, bu işi
müəlliflə nəşriyyatların öhdəsinə buraxmaq lazımdır. Onların hər ikisi müstəqil
fəaliyyət göstərən - hüquqi və fiziki
şəxslərdir. Onların aralarında qarşılıqlı razılaşma prinsipi əsas götürülə bilər.
Bu məsələdə kənar müdaxilə düzgün deyil”. Bu sahədə dünyada qəbul olunmuş
prinsiplərdən - birdəfəlik ödəniş və kitabın satışından faiz verilməsi
məsələsindən danışan naşirin sözlərinə görə, adətən əksər tanınmış müəlliflər
kitabın satışından faiz istəyirlər. Belə ki, onların da prodüserləri kitabın nə
qədər satılması ilə bağlı nəşriyyatın fəaliyyətinə nəzarət edirlər. Nəticədə,
nəşriyyatlar da qazanclarından müəllifə
qonorar ödəyirlər.
Təranə Məhərrəmova