Kinoteatrlar nazirliyin tövsiyəsini nəzərə almırlar
Bir neçə ildir ki, yerli filmlərimizin inkişafı ilə bağlı yazılar
yazır, onların təqdirəlayiq hal kimi qiymətləndiririk. Film çox olduqca, nəinki
rejissorlar, prodüserlər, hətta kinoteatrlar arasında da rəqabət halları
çoxalır. Əvvəllər film azlığından şikayətlənən tamaşaçı və film istehsalçıları
indi başqa problemlərlə üzləşməli olurlar. Artıq kino ölkəmizdə biznesə çevrilir...
Bu biznesin inkişafı üçün sərmayəçilər ilk növbədə kinoteatrların
sayını artırmağa qərar veriblər. Demək olar ki, şəhərdəki ticarət mərkəzlərinin
hamısında bir neçə zaldan ibarət kinoteatrlar fəaliyyət göstərir.
Kinoteatrlar şəbəkəsinin hər biri öz yayım şirkətini təsis edərək,
nümayiş olunan filmlərin reklam və yayımını həyata keçirir. Nəzərə alaq ki,
Azərbaycanda kinoteatrların əksəriyyəti paytaxt Bakıda fəaliyyət göstərir.
Yalnız "Cinemaplus” şəbəkəsinə aid kinoteatrlardan biri Gəncədə, "Park
Cinema”ya məxsus kinoteatrlardan biri isə Masallıda yerləşir.
Məsələyə nazirlik də
qarışıb
Məsələyə ümumi yanaşdıqda, ölkə ərazisinə yalnız bir və ya iki yayım
şirkəti nəzarət edə bilər. Ərazi və kinoteatr sayının az olması bunu deməyə
əsas verir. Ancaq bizim kinoteatrların demək olar ki, hər biri öz yayım
şirkətini təsis edib və buna görə film istehsalçılarından əlavə faiz (10 faiz)
tələb etməyə başlayıblar. Gəlirin 60 faizi kinoteatrın, 40 faizi isə
istehsalçının payına düşür. "Cinemaplus” və "Park Cinema” kinoteatrlar
şəbəkələri arasında başlayan rəqabət tamaşaçıların və film istehsalçılarının
ciddi narazılığına səbəb olub. Bu məsələ ilə bağlı da mətbuatda bir birinin
ardınca problemlər qabardıldı. Kinoteatrlar
film istehsal edən şirkətlər qarşısında şərtlər qoymağa başladılar. Ekrana
çıxan filmin prodüserləri öz məhsullarını bu balaca ölkədə tamaşaçıya
çatdırmaqda çətinlik çəkirlər. Kinoteatrların onların qarşısında qoyduqları
şərtə görə, ekrana çıxacaq film bir kinoteatr şəbəkəsində göstərilirsə,
digərində nümayiş oluna bilməz.
Təsəvvür edin, siz "Park Bulvar”dasınız və dostlardan birinin təriflədiyi filmə
baxmaq istəyirsiniz. "Park Cinema”ya yaxınlaşırsınız bilet alasınız, məlum olur
ki, o film ancaq "Cinemaplus” kinoteatrlar şəbəkəsinə aid zallarda göstərilir.
İndi siz həmin filmə baxmaq üçün "Park Bulvar”dan "28 Mall” və ya "Gənclik
Mall” ticarət mərkəzinə getməlisiniz ki, orada həmin filmi izləyəsiniz. Sözsüz
ki, bütün tamaşaçılar bu addımı atmır.
Məsələ o qədər qabardıldı ki, nəticədə məsələyə Mədəniyyət və Turizm
Nazirliyi münasibət bildirdi. Nazirliyin yaydığı məlumatda deyilir ki, ölkədə
müstəqil şəkildə fəaliyyət göstərən "CinemaPlus” və "Park Cinema” kinoteatr
şəbəkələri və onların nəzdindəki distribütor şirkətləri arasında son zamanlar
yaranmış xoşagəlməz münasibətlər cəmiyyətdə və internet məkanında müzakirələrə
səbəb olub: "Məntiqi izahı olmayan bu xoşagəlməz hal narahatlıq doğurmaya
bilməz. Statusundan, fəaliyyət növündən asılı olmayaraq hər bir mədəniyyət
müəssisəsinin vəzifəsi insanların asudə vaxtlarının səmərəli keçirilməsinə
şərait yaratmaq və onlara yüksək səviyyəli mədəni xidmətin göstərməkdir. O
cümlədən, kino sahəsində bir növ inhisarçı mövqe tutan müəssisələr tamaşaçı
marağını hər şeydən üstün tutmalı və bu marağa zərər verə biləcək addımlara yol
verilməməlidir. Hazırda ölkəmizdə dövlət sifarişli filmlərlə yanaşı, müstəqil
kino sahəsində də canlanma müşahidə edilməsi və milli filmlərə tamaşaçı
marağının artması müsbət hal kimi xarakterizə oluna bilər. Bu prosesin inkişaf
etməsi bütün maraqlı tərəflərin xoşməramlı münasibətindən asılıdır. Ona
görə də kino fəaliyyəti ilə məşğul olan hər bir müəssisə özəl biznes maraqları
ilə yanaşı, həm də ümumi mənafelərin qorunmasına çalışmalıdır”.
Mədəniyyət və Turizm Nazirliyi tərəfləri məsələnin qarşılıqlı hörmət
və anlaşma şəraitində müsbət həllinə və gələcəkdə ictimai narazılıq
doğuran halların baş verməməyi üçün son dərəcə diqqətli olmağa çağırdı.
Qeyd olunub ki, Azərbaycan filmlərinin yayımının təşkil olunması ölkəmizdə
fəaliyyət göstərən hər bir kinoteatrın vəzifə borcudur.
Hər
şəbəkənin öz tamaşaçısı var
Mövzu ilə bağlı "Park
Cinema” kinoteatrlar şəbəkəsinin marketinq üzrə direktoru Musa Axundovla əlaqə
saxladıq. O. Bildiridi ki, film başqa kinoteatrlarda gedirsə belə, "Park Cinema”
onu həvəslə öz kinoteatrımızda göstərməyə hazırdır: "Qeyd edim ki, kino
şəbəkələri arasında münaqişə mövzusu xəbər agentlikləri tərəfindən azərbaycanlı
rejissor və prodüserlər arasında keçirdiyi sorğu vasitəsilə gündəmə çıxıb.
Xəbər agentlikləri "Park Cinema” nümayəndələrindən münasibət öyrənməyiblər və
buna görə də məsələ ilə bağlı belə anlaşılmazlıq yaranıb”.
Musa Axundov Mədəniyyət və Turizm nazirliyinin Azərbaycanın kino
şəbəkələri arasında münaqişə ilə bağlı açıqlamasını şərh edərkən onu da əlavə
etdi ki, yaranmış vəziyyət haqqında ətraflı məlumat verməyi özlərinə borc
bilir: "Kino bazarında rəqabətin olması normal haldır, rəqabət olmadan irəliyə
doğru irəliləmək, inkişaf etmək mümkün deyil. Digər kinoteatrlardan fərqli
olaraq biz, film istehsalçılarından prokatda eksklüziv hüquq tələb etmirik.
Belə bir şey yoxdur və heç vaxt olmayıb da. Biz rejissorlarla görüşür və
prokatın təfərrüatlarını müzakirə edirik. Bu zaman filmin ancaq "Park Cinema”da
nümayişi barədə şərt qoymuruq. Əgər film digər kinoteatrlarda nümayiş olunursa
belə, biz onu kinoteatrımızda həvəslə göstərəcəyik. "Park Cinema”nın qapıları
hər zaman film istehsalçılarının üzünə açıqdır. Filmləri digər kinoteatr
şəbəkəsində nümayiş olunan istehsalçıları biz özümüz tapırıq və onlara filmi "Park
Cinema”da da prokata çıxarmağı təklif edirik”.
Marketinq üzrə direktor onu da
dedi ki, həm kinoteatrlara, həm də filmlərə inkişaf üçün geniş auditoriya
lazımdır: "Nümayişin eksklüzivliyi isə kino bazarına böyük zərər vurur.
Eksklüziv prokata razılıq verərkən, rejissorlar çox şey itirirlər, çünki hər
şəbəkənin öz tamaşaçısı var. Əgər film bir neçə şəbəkədə nümayiş olunarsa, ona
mümkün tamaşaçıların 100%-i tamaşa edə bilər, yox əgər şəbəkələrdən yalnız
birində gedərsə, mümkün tamaşaçıların sayı 65%-dək azalır. Bu isə aydın
məsələdir ki, film istehsalçısının prokatdan əldə etdiyi gəlirə təsir göstərir.
Bu zərərli mövqedir, amma bəzən rejissorlar eksklüzivliyə üstünlük verir və
itkilərlə üzləşirlər. Bu gün Azərbaycanda çoxlu sayda filmlərin istehsal
edilməsi yaxşı haldır, biz isə kinoteatr olaraq tamaşaçılarla film
istehsalçıları arasında vasitəçiyik. Təbii ki, "Park Cinema” kinoteatrı həm
filmlərin sayının artmasında, həm də daha çox tamaşaçı cəlb etməkdə maraqlıdır.
"Park Cinema” müasir Azərbaycan filmlərinin bütün kino şəbəkələrində nümayiş
olunmasının tərəfdarıdır və biz Azərbaycanda film istehsal edən bütün rejissor
və şirkətlərlə əməkdaşlığa açığıq. Bizim mövqeyimiz ədalətlidir və biz sözdə
deyil, əməldə də Azərbaycanda kino çəkən hər kəsi dəstəkləməyə hazırıq”.
Musa Axundov bildirdi ki,
artıq bir neçə ildir ki, "Park Cinema” Azərbaycanda ilin ən çox ziyarətçisi
olan kinoteatrlar şəbəkəsi adını qazanır: "2016-cı ildə "Park Cinema”
kinoteatrlar şəbəkəsi "Warner Bros.Pictures Intl” tərəfindən Azərbaycan ərazisində
geniş prokata çıxarılan filmlərə baxmış tamaşaçıların sayına görə lider olub”.
Qeyd edək ki, "Warner Bros.Pictures Intl” studiyasının
distribusiyasını həyata keçirən "İNTER CİNEMA” şirkəti, "Park Cinema”
kinoteatrlar şəbəkəsinin liderlik qazandığını rəsmi məktubla bildirib.
Filmi ekrana buraxmazdan
əvvəl kinoteatrlarla məsləhətləşmirlər
"CinemaPlus” kinoteatrlar
şəbəkəsinin baş direktoru Zaur Darabzadə bildirdi ki, deyilənlərin
əksinə, "CinemaPlus” bütün kinoteatrlarla fəal əməkdaşlıq edir, onların
rəhbərləri ilə sıx əlaqədədir və ara-sıra onlarla rəqabət aparan kinoteatrların
rəhbərlərini qapalı gecələrə və təqdimat mərasimlərinə dəvət edir: "Bəzi
filmlərin bir şəbəkədə göstərilib, digərində göstərilməməsi hər kinoteatrın bir
neçə ay əvvəldən hazırlanan repertuar planlaşdırması ilə əlaqədardır. Bəzi
yerli kino istehsalçıları filmi ekrana buraxmazdan əvvəl kinoteatrlarla
məsləhətləşmir. Buna görə də repertuar planlaşdırmasında artıqlıq yaranır. Bu
baxımdan, bu və ya digər filmin repertuarda yer almaması olduqca normal haldır”.
Müsahibimiz "CinemaPlus” kinoteatrlar şəbəkəsinin hər zaman yerli
kinematoqrafiyanı dəstəklədiyini və bundan sonra da dəstəkləyəcəyini dedi: "Bunu
sadəcə, kinoteatrın rəsmi saytında baxmaqla görmək olar. Orada çox sayda
Azərbaycan filminin yaratdığı rəngarənglik asanlıqla hiss edilir. Bunun bir
sıra səbəbləri və sübutu var. "Əli və Nino" filminin yalnız
"CinemaPus" kinoteatrlar şəbəkəsində nümayiş olunduğunu qeyd etmək
olar. Digər kinoteatrlar isə bu filmi nümayiş etdirməyin maliyyə cəhətdən
faydalı olmayacağını hesab etdi. Son uğurlu yerli layihələr olan, "Bayram
axşamı” və "Stalin Başı” filmləri distribyütor şirkəti tərəfindən alınıb və
"CinemaPlus” tərəfindən təqdim olunan daha sərfəli kommersiya şərtləri
nəticəsində onlara nümayiş hüququ verib. "CinemaPlus” yeganə kinoteatr
şəbəkəsidir ki, yerli dublyajın inkişafına investisiya edir və gündəlik olaraq
bu filmlərə bir neçə seans ayırır. Digər kinoteatrlar belə layihələri mənfəətli
hesab etmirlər. Baxmayaraq ki, dublyaj "Cinemazadeh” studiyasında peşəkarlar
tərəfindən edilir. Bizim üçün çox vacibdir ki, azərbaycanlı tamaşaçılar
sevdikləri xarici filmlərə doğma dillərində baxsınlar."CinemaPlus"
Bakıdan kənarda, Gəncə şəhərində müasir, 5 zallı kinoteatr açan ilk şəbəkədir. Bu
layihə təkcə paytaxtda yox, həm də Azərbaycanın digər şəhərlərində kino
mədəniyyətinin inkişafına böyük təkan verəcək”.
Xəyalə Rəis