“Kaspi”dən “Kaspi”yə
Mənim "Kaspi” qəzeti ilə bir oxucu kimi
ilk tanışlığım 1970-ci ildən başlayır. Kinonun tarixi ilə məşğul olduğum üçün
inqilabdan əvvəl nəşr edilən "Kaspi” qəzetinin Azərbaycan Dövlət Arxivində
saxlanılan nömrələrini diqqətlə vərəqləyir, kinoya aid faktları toplayırdım. Elə
bunun nəticəsi olaraq, kinomuzun tarixinin 1915-ci ildə çəkilmiş "Neft və
milyonlar səltənətində” bədii filmi ilə deyil, 1898-ci ildə lentə alınmış
xronikal-sənədli filmlərlə, o cümlədən "Bibiheybətdə neft fontanı yanğını”,
"Balaxanıda neft fontanı” və s. ilə başlanması faktlarının üzə çıxarılması və
sübuta yetirilməsi mümkün olmuşdur. Bununla əlaqədar, Ümummilli lider Heydər
Əliyev sərəncamla milli kinomuzun tarixini - 2 avqust 1898-ci ili təsdiq
etmişdir.
"Kaspi”ni vərəqləyərkən burada müxtəlif
sənət adamlarının - tanınmış ziyalılardan bəstəkar Ü.Hacıbəylinin, H.B.Zərdabinin
və başqalarının yazılarına rast gəlirdim. O vaxtlar bir jurnalist kimi ürəyimdən
keçirdi ki, kaş mən də bu qəzetdə çıxış edərdim. Amma mənim bu arzum bir neçə
on illərdən sonra reallaşdı. Mən artıq neçə illərdir ki, yenidən bərpa olunmuş,
Azərbaycan və rus dillərində nəşr olunan "Kaspi” qəzetində bir müəllif kimi
kino sənətinə aid məqalələrlə çıxış edirəm. Bugünkü "Kaspi” öz sələfinin adını
ləyaqətlə daşıyır, oxucuların maariflənməsində öz uğurlu işini inamla davam etdirir. Mən "Kaspi” qəzetinin
yenidən bərpa olunub nəşrə başlamasına görə, qəzetin təsisçisi, professor Sona
xanım Vəliyevaya öz dərin minnətdarlığımı bildirirəm. Çünki o, mənim kimi minlərlə
insanların arzusunu həyata keçirdi, "Kaspi”ni "Unudulmuşlar”ın siyahısına düşməsinə
imkan vermədi. Eyni zamanda, bugünkü "Kaspi”nin oxucular arasında
populyarlığını təmin etdiyinə görə, qəzetin baş redaktoru İlham Quliyev olmaqla,
bütün redaksiya işçilərinə demək istəyirəm: "Belə saxla sükanı!”
Bayramınız mübarək, əziz həmkarlarım!
Hörmətlə, Aydın Kazımzadə,əməkdar
incəsənət xadimi