Kaspi Ağ Şəhər Liseyi dərslərə start verdi
Sentyabrın 15-də Kaspi Ağ Şəhər Liseyi qapılarını yenidən şagirdlərin
üzünə açdı. Lisey COVİD-19 pandemiyasının təhsil sahəsində yaratdığı uzun fasilədən
sonra 2020-2021-ci tədris ilinə start verdi. Bu gün təhsil müəssisəsində I-IV
siniflərin şagirdləri parta arxasına keçdilər. Təhsil müəssisəsində tədris
bütün ümumtəhsil məktəblərində olduğu kimi Hibrid model üzrə həftədə iki dəfə əyani,
3 dəfə distant (məsafədən) keçiriləcək. Dərslər I-IV günlər rus bölməsi, II-V
günlər Azərbaycan bölməsi üzrə tədris olunacaq.
Liseyin direktoru Səbinə
Əliyeva təhsil müəssisəsində xüsusu karanrin rejimi qaydalarına tam əməl
olunduğunu bildirdi: "Uşaqların sağlamlıq və təhlükəsizlik məsələsi bizim üçün hər
şeydən önəmlidir. Hətta onlar məktəbə gələnə qədər ünsiyyətdə olduqları
insanları, əhatə olunduqları mühiti də öyrənirik ki, digər uşaqlar üçün virusa
yoluxma ilə bağlı hər hansı təhlükə yaranmasın. Məktəbdə Nazirlər Kabinetinin və
Operativ Qərargahın qayda və qərarlarına, eləcə də Təhsil Nazirliyinin təlimatlarına
maksimum əməl etməyə çalışırıq. Gigiyena qaydalarına əməl olunması, yeməyin necə
paylanması, fasilələrdə dezinfeksiya tədbirlərinin həyata keçirilməsi məsələlərinə
diqqət yetirilir. Müəllimlər qaydalarla bağlı tam məlumatlanıb”. Tədrisin
Hibrid modelinə gəlincə, direktor bildirdi ki, keçən tədris ili məktəbin müəllimləri
üçün böyük təcrübə olub: "Zoom proqramı üzrə dərslərimiz yüksək səviyyədə
keçdi. Mən həmişə müəllimlərə deyirəm ki, siz dərsi uşağa deyil, bütün ailəyə
keçirsiniz. Yəni bu proqramla tədris zamanı uşağın valideynləri, baba-nənəsi də
iştirakçı ola bilər. Proses zamanı müəllimlər böyük təcrübə qazandlar. Bütün
videodərslərimiz hazırdır. Təlimatlara uyğun olaraq şagirdlərə 2 gün əyani, 3
gün distant (məsafədən) dərslər keçiləcək. Əyani dərslərdə daha vacib fənlərə və
mövzulara, distant dərslərdə isə onları tamamlama kimi nisbətən asan mövzulara
və fənlərə vaxt ayıracağıq”.
Direktor şagirdlərin həftədə iki dəfə dərsə gəlmələrini
də onların təhsilində irəliləyiş kimi dəyərləndirir: "Şagirdlər iki gün də dərsə
gəlsələr məktəb ab-havası onlar üçünəhəmiyyətli olacaq. Bu, onlarda məktəbə həvəsi artıracaq və məsuliyyət
hiss edəcəklər. İnşallah, tezliklə əvvəlki tədris illərində olduğu kimi normal
ab-havaya qayıdarıq. Ümid edirəm ki, gərgin qrafiklə də işləsək çətinliklərin
öhdəsindən gələcəyik”.
Qeyd
edək ki, ilk dərs günündə müəllimlər dərs zamanı şagirdlərə COVID-19
pandemiyası ilə əlaqədar məktəblərdə davranış qaydaları, təhsilalanların
sağlamlıqlarını qorumaları üçün şəxsi gigiyena qaydalarına ciddi riayət etmələri
barədə geniş məlumatlar veriblər. Həmçinin məktəblilərə koronavirus
infeksiyasından qorunmaq üçün digər insanlarla ünsiyyətdə olarkən sosial məsafəni
gözləmələri, əllərini tez-tez və qaydalara uyğun yumaları, başqalarının əşyalarına
toxunmamaları, sinfi və məktəbi təmiz saxlamaları, kütləvi toplaşmaqdan çəkinmələri
barədə müvafiq tövsiyələr verilib.