Jurnalistika fakültəsi və Bilik Fondu arasında niyyət sazişi imzalandı
Bu gün Bakı Dövlət Universitetinin Jurnalistika fakültəsi ilə Azərbaycan
Respublikası Prezidenti yanında Bilik Fondu arasında niyyət sazişi imzalanma
mərasimi keçirildi. Jurnalistika fakültəsində baş tutan tədbirdə qeyd edildi ki, bu sənəd fakültənin
professor-müəllim heyəti və tələbələri üçün yeni imkanlar açacaq.
Jurnalistika fakültəsinin dekanı Vüqar Əliyev bildirdi ki, niyyət
sazişinə əsasən müəllimlər və tələbələr Fondun həyata keçirdiyi layihələrdə
iştirak etmək imkanı qazanacaq: "Eyni zamanda Bilik Fondu ilə birgə tələbə
klubu yaradılacaq və onun nəzdində qəzetin nəşr olunması nəzərdə tutulub.
Niyyət sazişində digər məsələlər də nəzərdə tutulub ki, bu işlər gələcəkdə həyata
keçirildikcə ictimaiyyətə açıqlanacaq. Onu da qeyd edim ki, Bilik Günü Bilik
Fondu ilə belə bir sənədin imzalanması gələcək fakültəmiz üçün yeni imkanlar
açacaq”.
Bilik Fondunun sektor müdiri Xatirə Hüseynova fondun fəaliyyəti
barədə məlumat verdi. O vurğuladı ki, ölkə ərazisində geniş maarifləndirmə
işləri əsasən Bilik Fondu tərəfindən həyata keçirilir: "Kütləvi maarifləndirmə
tədbirləri çərçivəsində paytaxtda fəaliyyət göstərən xeyli sayda müəllim
bölgələrdə mühazirələrlə çıxış edir. Çox istərdim belə kütləvi tədbirlərimizdə
Jurnalistika fakültəsinin müəllimləri də yaxından iştirak etsin. Məhz, bu gün
imzalanacaq niyyət sazişinin əsas məqsədlərindən biri də budur. Eyni zamanda əminəm
ki, fakültənin tələbələri Bilik Fondunda təcrübəyə cəlb olunacaq və burada
onlar geniş təcrübə əldə edəcəklər”.
BDU-nun mətbuat xidmətinin rəhbəri Pərvanə İbrahimova Jurnalistika
fakültəsi ilə Bilik Fondu arasında imzalanacaq niyyət sazişinin əhəmiyyəti
barədə qeyd etdi və bu işdə hər iki tərəfə uğurlar arzuladı.
Daha sonra BDU-nun Jurnalistika fakültəsi və Bilik Fondu arasında
niyyət sazişi imzalandı.
BƏXTİYAR