Bakı 12°C
İşsizliyin aradan qaldırılması üçün yeni addım
Müəssisə və təşkilat
rəhbərlərinin gənc kadrlara marağını artırmaq üçün layihə başladılır. Artıq iş
yerini itirən şəxslərin də yeni iş tapmaları problem olmayacaq. "Kaspi”
xezerxeber.az-a istinadən bildirir ki, bu, "İşsizlikdən sığorta haqqında”
qanunun tətbiqi ilə mümkün olacaq.
Hesablamalara görə, yeni mexanizm il ərzində Sığorta Fonduna 90 milyona yaxın
vəsait qazandıracaq. Vəsait müxtəlif sahələr üzrə xərclənəcək.
Əmək və Əhalinin Sosial Müdafiəsi
Nazirliyinin məşğulluq siyasəti şöbəsinin müdiri Elnur Süleymanovunsözlərinə görə, işəgötürən təhsilini yeni bitirən gənci ən azı 2 il ərzində
işlə təmin etməlidir. Bundan başqa, əmək bazarına daxil olmaqda çətinlik çəkən
sığorta olunanların da yeni işlə təmin olunması həyata keçiriləcək. Fond
hesabına görüləcək tədbirlər sırasında peşə hazırlığı və əlavə təhsil, peşə
yönümünə dair məsləhət xidməti, ayrılan qrantla əmək yarmarkasının təşkili və
s. var. Bağlanan və müflis olan müəssisələr nəzərə alınaraq fondun vəsaitinin
35 milyona yaxını işsizlik sığortasına ayrılıb.
"İşsizlikdən sığorta haqqında” qanun gələn il yanvar ayının 1-dən qüvvəyə
minəcək. İş yerini itirənlər işsizlik sığortası ilə aylıq ödəniş alacaqlar. Bu
layihədə əsas məqsəd işsizləri yeni iş axtarmağa sövq etməkdən ibarətdir.
Yeni layihənin gənc
kadrların iş tapmağına və işsizliyin aradan qalxmasına necə təsir edəcəyini
öyrənməyə çalışdıq.
"Ekonomiks”
Beynəlxalq İqtisadi Araşdırmalar Birliyinin rəhbəri, professor Fikrət Yusifov bildirib ki, sözügedən layihənin reallaşması nəticəsində
təqribən 8000-8500 ailənin bu proqrama cəlb edilməsi mümkün olacaq: "İşsizlikdən
sığorta haqqında” qanun cari ilin 30 iyun tarixində qəbul edilib və bu qanun
2018-ci ilin əvvəlindən qüvvəyə minəcək. Bununla bağlı ölkə prezidenti İlham
Əliyev müvafiq fərman imzalayıb. Fərmana əsasən Əhalinin Sosial Müdafiəsi
Nazirliyi tərəfindən mövcud qanunvericilik bazasında zəruri dəyişikliklər
aparıldıqdan sonra növbəti il üçün İşsizlikdən sığorta fondunun büdcəsi tərtib
edilərək müvafiq qaydada dövlət büdcəsinin layihəsi ilə birlikdə parlamentə
təqdim olunub. Həmin layihədə ilkin hesablamalara görə, 2018-ci il ərzində
təqribən 89 milyon manat vəsaitin daxil olması nəzərdə tutulur. Bu vəsaitin
təqribən 36 milyon manatının özünüməşğulluq proqramlarının, aktiv məşğulluq
proqramlarının icrasına yönəldilməsi nəzərdə tutulur. Bu isə onu göstərir ki,
bu layihənin reallaşdırılması yolu ilə təqribən hazırda özünüməşğulluq
proqramına cəlb edilənlərdən 6 dəfə çox ailənin, yəni təqribən 8000-8500
ailənin bu proqrama cəlb edilməsi mümkün olacaq”.
Müsahibimiz qeyd edir ki, bu layihə ali təhsil alıb iş təcrübəsi
kifayət qədər olmayan gənclər arasında işsizlik probleminin həllinə öz
töhfəsini verəcək: "İşsizlikdən sığorta haqqında” qanunun tətbiqi nəticəsində gənc
mütəxəssislərin işə götürülməsi sahəsində müəyyən güzəşt mexanizmlərinin
tətbiqi mümkün olacaq. Bu da öz növbəsində ali təhsil alıb iş təcrübəsi kifayət
qədər olmayan gənclər arasında işsizlik probleminin həllinə öz töhfəsini
verəcək”.
Vətəndaşların Əmək Hüquqlarını Müdafiə Liqasının sədri, Prezident
yanında Qeyri-Hökumət Təşkilatlarına Dövlət Dəstəyi Şurasının üzvü Sahib
Məmmədovbu layihənin heç bir istehsalat təcrübəsi
olmayan gənclərin işə qəbulunu stimullaşdıracağını deyir:
"Ümumiyyətlə bir çox
ölkələrdə ayrı-ayrı kateqoriyalı şəxslərin işə götürülməsi üçün dövlətin
yaratdığı xüsusi fondlar var. Məsələn, bu, əlillərin, gənclərin, qadınların işə
götürülməsi ilə bağlı ola bilər. Və həmin fondlar işsizlərin sayının azalması
istiqamətində bir sıra tədbirlər görürlər. Bunlardan biri də işəgötürənləri
stimullaşdıracaq təkliflərin irəli sürülməsidir. Bizdə "İşsizlikdən sığorta
haqqında” qanununa əsasən İşsizlikdən sığorta fondu yaradılıb. Həmin fondda isə
təxminən 90 milyona yaxın vəsait toplanacaq. Çox güman ki, həmin pulun müəyyən
bir qismi gənclərin işlə təmin olunması istiqamətində xərclənəcək. Yəni işə
götürən universiteti yeni bitirmiş, heç bir iş təcrübəsi olmayan gəncə yüksək
əmək haqqı vermək istəmir. Bu zaman həmin fond gəncə veriləcək maaşın yarısını
ödəyir. Təbii ki, bu çox yaxşı təşəbbüsdür. Məncə, həmin layihə təhsilini yeni
başa vurmuş, heç bir istehsalat təcrübəsi olmayan gənclərin işə qəbulunu stimullaşdıracaq”.
Günel
Azadə
