“İşğalçıya öz gücümüzü göstərəcəyik”
Sərhəddə
gərginlik yaradan Paşinyan hakimiyyəti üçüncü qüvvələri öz çirkin siyasətinin əsirinə
çevirib,onların arxasında daldalanmağa çalışır
İyulun 12-də Ermənistan silahlı qüvvələrinin bölmələri
növbəti dəfə təxribata əl ataraq Azərbaycan-Ermənistan dövlət sərhədinin Tovuz
istiqamətində mövqelərimizi ələ keçirtməyə çalışıb, artilleriya atəşindən
istifadə edərək hücuma cəhd edib. Azərbaycan Ordusunun ayıq-sayıqlığı, həyata
keçirdiyi əks-tədbirlər nəticəsində düşmən geri otuzdurulub, onun canlı qüvvəsinə
və hərbi texnikasına ciddi zərər yetirilib. Azərbaycan Ordusunun əks-tədbirləri
adekvat xarakter daşıyıb, Ermənistanın təxribatna qətiyyətli cavab verilib.
Yayılmış videolardan da göründüyü kimi, Azərbaycan Ordusu Ermənistanın hərbi
bölmələrinin mövqeyinə güclü zərbə endirib, nəticədə düşmənin texnikası və
canlı qüvvəsi məhv edilib. Azərbaycan Müdafiə Nazirliyinin yaydığı məlumat göstərilib
ki, iyulun 13-dən 14-nə keçən gecə və səhər saatlarında Azərbaycan-Ermənistan
dövlət sərhədinin Tovuz rayonu istiqamətində şiddətli döyüşlər davam edib.
Tovuz rayonu istiqamətində gedən döyüşlər zamanı bölmələrimizin cavab tədbirləri
nəticəsində böyük itkilər verən düşmən geri çəkilməyə məcbur edilib. Düşmənin
aktiv fəaliyyətinin qarşısının alınması məqsədilə görülən cəza tədbirləri nəticəsində
ona məxsus müxtəlif təyinatlı hərbi texnika, döyüş vasitələri, komanda məntəqəsi,
müdafiəsinin dərinliyindəki ehtiyatlar və yüzlərlə canlı qüvvəsi məhv edilib.
Hazırda bu istiqamətdə vəziyyət gərgin olaraq qalır, ağır döyüşlər gedir. Təəssüf
ki, Azərbaycan Ordusunun 7 hərbçisi də bu döyüşlərdə qəhrəmancasına həlak olub.
Qarşı tərəf mülki əhalini və yaşayış məntəqələrimizi atəşə tutur. Düşmənə qarşı
həyata keçirilən cavab tədbirləri davam edir. Əməliyyat şəraiti bölmələrimizin
tam nəzarəti altındadır.
Azərbaycan
və Ermənistan dövlət sərhədinin Tovuz rayonu istiqamətində son gərginliyin hərbi
təhlili onu göstərir ki, təxribat Ermənistan tərəfindən başlanıb. Ermənistan məqsədyönlü
şəkildə bu təxribata hazırlaşıb. Ermənistan tərəfi qəflətən artilleriya qurğularından
istifadə edib və nəticədə Azərbaycan hərbçiləri şəhid olublar. Ermənistan tərəfinin
itkiləri daha sonrakı vaxtda Azərbaycan ordusunun cavab atəşi nəticəsində baş verib.
Ermənistan iddia edir ki, guya Azərbaycan UAZ maşını ilə erməni mövqelərinə hücuma
keçib. Bu, olduqca gülünc və ağlasığmaz bir iddiadır. Azərbaycan tərəfi hücuma keçmək
istəsəydi, onda UAZ-dan deyil, öz ordusunun arsenalında olan güclü, dağıdıcı vasitələrdən
istifadə edərdi. Ermənistanın bu təxribatı törətməkdə məqsədi təkcə diqqəti ölkədə
olan ağır sosial-iqtisadi vəziyyətdən və COVİD-19 ilə bağlı acınacaqlı durumdan
yayındırmaq deyildi. Məqsəd həm də sərhəddə gərginlik yaradaraq Kollektiv Təhlükəsizlik
Müqaviləsi Təşkilatını (KTMT) münaqişəyə cəlb etmək idi. Ermənistan KTMT ölkələrini
öz çirkin siyasətinin əsirinə çevirməyə və təşkilatın arxasında daldalanmağa
çalışırdı. Lakin onların bu ümidləri də puç oldu. KTMT daxilində sağlam məntiq qalib
gəldi. Sözügedən məsələ ilə bağlı təşkilatın planlaşdırılan növbədənkənar daimi
şura görüşü ləğv olundu. Bu barədə xəbər KTMT internet ünvanından silindi. Çünki,
KTMT ölkələri də Ermənistanın məkrli niyyətini yaxşı başa düşür.
Milli Məclisin
Müdafiə, təhlükəsizlik və korrupsiya ilə mübarizə komitəsinin sədr müavini,
politoloq Hikmət Babaoğlubildirib ki, Ermənistan silahlı qüvvələri Azərbaycanla sərhədin Tovuz rayonu
istiqamətində törətdiyi təxribat zamanı istər hərbi texnika, istərsə də canlı
qüvvə baxımından ciddi itkilər verərək geri oturdulub. Deputatın fikrincə, bu təxribatın
ardınca işğalçı Ermənistan müxtəlif istiqamətlərdə yeni siyasi–diplomatik və
informativ təxribatlara əl atmağa başlayıb: "İşğalçı dövlət ilk növbədə, müxtəlif
regional və beynəlxalq təşkilatlara yalan informasiyalar ötürməklə Azərbaycanı
ittiham etməyə başladı. Lakin heç bir dövlət və beynəlxalq təşkilatdan arzu
etdiyi münasibəti görə bilmədi. Hətta ən çox ümid etdiyi və elə ən çox da
münaqişəyə tərəf kimi cəlb etmək istədiyi Kollektiv Təhlükəsizlik Müqaviləsi Təşkilatı
belə, Ermənistanın çağırışı ilə heç formal toplantı belə keçirmədi.Ermənistan təxribatçı
əməlləri ilə Azərbaycanın informasiya məkanına da müdaxilə etməyə çalışır, ölkəmizdə
olan ictimai həmrəyliyi pozmağa cəhd göstərir. Müxtəlif vasitələrlə sosial
media platformasına guya Azərbaycanın öz itkilərini gizlətdiyi ilə bağlı
dezinformasiyalar ötürür. Bu, düşmənin informasiya təxribatıdır. Əsla bu təxribata
inanmaq, onu ciddiyə almaq olmaz. Əslində itkiləri gizlədən Ermənistandır və
işğalçı ölkənin sosial mediası bu cür xəbərlərlə doludur. Sosial media iştirakçıları
çoxsaylı erməni hərbçilərinin şanlı ordumuz tərəfindən öldürülməsilə bağlı
arqumentləşdirilmiş xəbərlər yaysa da, işğalçı ölkənin rəsmi qurumları hələ də
bunu etiraf etmək istəmirlər”.
Milli Məclisin
deputatı Elnur Allahverdiyev də hesab edir ki, Ermənistan Azərbaycanla sərhəddə bu təxribatı törətməklə
KTMT-ni bu münaqişəyə cəlb etmək, eyni zamanda diqqəti daxildəki qarşıdurmadan
yayındırmaq istəyir: "Dünya ölkələri COVID-19-a qarşı mübarizə apardığı halda
Ermənistan yenə öz təcavüzkar niyyətindən əl çəkmir. Düşmənin növbəti təxribat əməli
bir daha onu göstərir ki, Ermənistan və onun rəhbərliyi demokratiya pərdəsi
altında gizlənərək nəinki regiona, bütün dünyaya, bəşəriyyətə təhlükə
yaradırlar. Bu, onu bir daha sübut edir ki, Ermənistanın BMT Baş katibinin
COVID-19 ilə əlaqədar qlobal atəşkəs təşəbbüsünü dəstəkləməsi ikiüzlülükdür. Biz
çox məkrli və hiyləgər bir düşmənlə üz-üzəyik. Ermənistan Azərbaycanla sərhəddə
bu təxribatı törətməklə həm Kollektiv Təhlükəsizlik Müqaviləsi Təşkilatını bu
münaqişəyə cəlb etmək, həm də diqqəti daxildəki qarşıdurmadan yayındırmaq istəyir.
Paşinyan xalq arasında dayaqlarını sürətlə itirdiyindən bu təxribatı
sanksiyalaşdıra bilər. Hazırda Ermənistanda vəziyyət kritik həddə çatıb.
Koronavirus pandemiyası ilə əlaqədar ölkədə ciddi böhran yaşanır”.
Deputat bildirib ki, düşmənin Tovuz rayonundakı
növbəti təxribatı Paşinyan hökumətinin Ermənistan-Azərbaycan Dağlıq Qarabağ
münaqişəsinin danışıqlar yolu ilə həllində maraqlı olmamasını bir daha göstərir:
"Azərbaycanlıları öz dədə-baba torpaqlarından didərgin salan və bu torpaqları həyasızcasına
özününkü hesab edən Ermənistanın bu hərəkətinə beynəlxalq ictimaiyyət münasibət
bildirməlidir. 30 ilə yaxındır ki, Azərbaycana qarşı işğalçılıq siyasəti yürüdən
Ermənistan beynəlxalq birlik qarşısında cavab verməlidir. BMT Təhlükəsizlik
Şurasının Dağlıq Qarabağ münaqişəsi ilə bağlı qətnamələri hələ də kağız üzərində
qalır. Təcavüzkar Ermənistan BMT-nin qəbul etdiyi 4 qətnaməni heçə sayır. İşğal
olunmuş Azərbaycan torpaqları – Dağlıq Qarabağ və ətraf 7 rayon qətnamənin tələblərinə
uyğun olaraq qeyd-şərtsiz boşaldılmalıdır. Görünür ki, Ermənistan ordusu
2016-cı ildəki Aprel döyüşlərini yaddan çıxarıb və həmin günləri yenidən
yaşamaq istəyir. Azərbaycan Ordusu düşmənlə döyüşə hər an hazırdır və biz
işğalçıya öz gücümüzü göstərəcəyik”.
Rufik
İSMAYILOV