İşğalçı ölkənin diplomatik nokautu - Fotolar
Prezident İlham Əliyev
oktyabrın 2-də Rusiya dövlət başçısı Vladimir Putinin dəvəti ilə Soçi şəhərinə işgüzar
səfərə gəlib. Oktyabrın 3-də Soçidə prezidentlərin görüşü olub. V.Putin ölkələrimiz
arasında münasibətlərin uğurla inkişaf etdiyini diqqətə çatdıraraq, ticari-iqtisadi
əlaqələrin möhkəmləndiyini, ötən il əmtəə dövriyyəsinin həcminin 2,5 milyard
dollara çatdığını, bu istiqamətdə yaxşı perspektivlərin olduğunu diqqətə
çatdırıb.Prezident İlham Əliyev beynəlxalq
siyasi diskussiya klubu sayılan "Valday klubu”nun işində iştirak etməkdən
məmnunluq duyduğunu vurğulayaraq, bu
klubu müasir dünya nizamının qlobal aktual məsələlərinin müzakirəsi üçün çox
mühüm beynəlxalq məkan kimi dəyərləndirib. İki ölkə arasında strateji tərəfdaşlıq
münasibətlərinin olmasını xatırladan dövlət başçısı İlham Əliyev qeyd edib ki,
prezidentlərin mütəmadi görüşü bu əlaqələrin inkişafına təkan verir. Nümayəndə
heyətlərinin geniş tərkibdə görüşündən sonra Azərbaycan və Rusiya prezidentləri
təkbətək söhbət ediblər.Elə həmin gün Prezident İlham
Əliyev Soçidə Rusiyanın "Rossiya” və "Birinci” televiziya kanallarının müxbirlərinin
suallarını cavablandırıb.
Bununla yanaşı, oktyabrın 3-də Soçidə "Valday”
Beynəlxalq Diskussiya Klubunun XVI illik iclasının plenar sessiyası keçirilib.
Əvvəlcə Prezident V.Putin, İordaniya Kralı II Abdulla sessiyada çıxış edərək
gündəlikdə duran məsələlərin Asiyaya aid olduğunu deyiblər. Ardınca Azərbaycan
Prezidenti İ.Əliyev sessiyada çıxış edib. Ermənistan-Azərbaycan, Dağlıq Qarabağ
münaqişəsindən danışan dövlət başçısı Ermənistanın işğalının nəticələrinə
diqqət yetirib, BMT Təhlükəsizlik Şurasının münaqişənin nizamlanmasına dair
qəbul etdiyi 4 qətnamənin 25 ildən çoxdur yerinə yetirilmədiyini vurğulayıb: "Son
vaxtlar Ermənistanın Baş Naziri tez-tez deyir ki, münaqişənin həlli Azərbaycan,
Ermənistan və Dağlıq Qarabağ xalqı üçün məqbul olmalıdır.Bu məsələyə
aydınlıq gətirmək üçün deməliyəm ki, 1921-ci ildə Qafqaz bürosunun qərarında
Dağlıq Qarabağın, çox vaxt erməni tərəfinin interpretasiya etdiyi kimi,
Azərbaycana verilməsi deyil, onun Azərbaycanın tərkibində qalması göstərilib. Dağlıq
Qarabağ xalqı anlamı mövcud deyil. Dağlıq Qarabağın əhalisi var ki, onlar da
münaqişəyə qədər bərabər hüquqlara malik Azərbaycan və Ermənistan əhalisindən
ibarət olub. Azərbaycan üçün hansı həllin məqbul olmasına gəlincə, bu, bütün
dünya tərəfindən tanınan ərazi bütövlüyünün bərpası, qaçqın və məcburi
köçkünlərin öz torpaqlarına, o cümlədən Dağlıq Qarabağa qaytarılmasından
ibarətdir. Bu, BMT Təhlükəsizlik Şurasının qətnamələrinə və Helsinki Yekun
Aktına uyğundur. Ermənistanın Azərbaycan qarşı hərbi aqressiyası bu gün də
davam edir. Dünən erməni snayperi tərəfindən münaqişə zonasından uzaqda olan
Qazaxın dinc sakini vurulub. Həmçinin deməliyəm ki, 2016-cı ilin aprelində
hərbi təxribat zamanı qız uşağı daxil olmaqla, Azərbaycanın altı dinc sakini
öldürülüb”.
Prezident İlham Əliyev
Ermənistanın baş nazirinin "Qarabağ Ermənistanın hissəsidir və nöqtə”
bəyanatının yalan olmasına da diqqət çəkib: "Mən Ermənistan Baş Nazirinin,
təəccüb doğuran "Qarabağ-Ermənistanın bir hissəsidir və nöqtə” bəyanatına
toxunmaq istərdim. Birincisi, bu, yumşaq desək, yalandır. Qarabağ aranlı-dağlı
bütün dünyada Azərbaycanın ayrılmaz hissəsi kimi tanınmışdır. Qarabağ - Azərbaycandır və nida işarəsi”.
Azərbaycan Prezidentinin
səsləndirdiyi fikirləri "Kaspi” qəzetinə şərh edən millət vəkili, politoloq Hikmət Babaoğlu ilk öncə bildirib ki, Prezident
İ.Əliyevin Soçidə təşkil olunan "Valday” diskussiya klubunda iştirak və çıxış
etməsi olduqca maraqla qarşılanıb, mühüm siyasi ismarıclarla yadda qalıb. Politoloqun
sözlərinə görə, budəfəki tədbirdə dünyanın 40-a qədər ölkəsindən çoxsaylı
dövlət xadimləri, nüfuzlu şəxslər və media nümayəndələri iştirak ediblər və
belə mühüm bir platformada Azərbaycan Prezidentinin səsləndirdiyi fikirlər
ölkəmiz barədə həqiqətlərin bir daha yeni rakursdan dünyaya çatdırılması idi: "Prezident
İlham Əliyev ilk növbədə Ermənistanın baş naziri Nikol Paşinyana və onun sərsəm
bəyanatlarına qətiyyətli və tutarlı cavab verdi. Bu, işğalçı ölkənin başı
üstündə ildırım kimi çaxdı. Nəzərə almaq lazımdır ki, işğalçı ölkəyə məhz
Rusiya Federasiyasından, "Valday” diskussiya klubu kimi nüfuzlu platformanın
tribunasından cavab verilməsinin özü olduqca ciddi bir ismarıcdır. Prezident
İlham Əliyev "Qarabağ xalqı” kimi təxribatçı ifadələrə də cavab verərək qeyd
etdi ki, bu, kökündən yanlış ifadədir, yalnız Qarabağ əhalisi var və bu,
azərbaycanlı ilə erməni icmasından ibarətdir. Münaqişə başlayanda bu nisbət
75-in 25-ə azərbaycanlıların lehinə olub. Prezident bir daha bəyan etdi ki,
problem BMT Təhlükəsizlik Şurasının məlum qətnamələri, Helsinki yekun aktının
prinsipləri və Azərbaycanın ərazi bütövlüyü çərçivəsində həll olunmalıdır”.
Rusiya-Azərbaycan
münasibətlərinə gəldikdə isə, politoloq bildirib ki, hazırkı mürəkkəb
beynəlxalq münasibətlər şəraitində ölkələrimiz arasındakı əlaqələr qarşılıqlı maraqlar
kontekstində mühüm əhəmiyyət kəsb edir: "Azərbaycan Prezidentinin Rusiya Federasiyasına
baş tutan işgüzar səfəri və Soçidə Vladimir Putinlə keçirdiyi görüşlərdə
müzakirə olunan məsələlər bir daha ondan xəbər verir ki, bu münasibətlərin
strateji müttəfiqlik səviyyəsində olması iki ölkənin maraqlarına tamamilə
uyğundur. Azərbaycan Prezidenti iki ölkə arasında mövcud olan əlaqələrdən
danışarkən bildirdi ki, Azərbaycan üçün Rusiya ən mühüm tərəfdaş, dost, mehriban
qonşudur. Əlbəttə, münasibətlərin belə yüksək səviyyəsi hazırda mövcud olan
mürəkkəb geostrateji çağırışlar kontekstində iki dost və qonşu ölkənin təhlükəsizlik
maraqları baxımından da aktualdır. Ona görə də bu səfər iki ölkə arasında
strateji müttəfiqlik səviyyəsində qiymətləndirilən münasibətlərin gələcək
perspektivləri baxımından olduqca önəmlidir”.
Millət
vəkili, siyasi şərhçi Sahib Alıyev də bildirib ki, Paşinyanın
sayıqlamalarına Soçidə Prezident İ.Əliyev tərəfindən tutarlı cavab verilib. O, N.Paşinyanın
Ermənistan ordusunun işğal etdiyi Xankəndidəki sayıqlamasının cəfəngiyat
olduğunu xatırladıb. Qeyd edib ki, əslində onun məqsədi özünü Qarabağ klanından
daha radikal göstərməklə, daxili auditoriyanın rəğbətini qazanmaq idi: "Biri
var 2050-ci ildə Ermənistanı dünyanın az qala lider ölkəsinə çevirmək barədə
nağıl danışıb populistlik edəsən, biri də var ki, Azərbaycan torpaqlarını öz
adına çıxasan. Təbii ki, birinci nağıldan fərqli olaraq, onun Qarabağ haqqında
sayıqlaması cavabsız qala bilməzdi və qalmadı da. Dövlətimizin başçısı İlham
Əliyev Rusiya Prezidenti Vladimir Putinin, digər ölkələrin prezidentlərinin,
yüksək səviyyəli rəsmilərinin və tanınmış beyin mərkəzlərinin analitiklərinin
iştirak etdikləri "Valday” Beynəlxalq Diskussiya Klubunun plenar sessiyasındakı
çıxışı zamanı Paşinyana layiqli cavab verdi. Bu cavab Ermənistan baş nazirinin
sözlərinin doğrudan da sayıqlama olduğunu, onun həddini aşdığını elə dəqiqliklə
əsaslandırdı ki, Paşinyan özü orada olsa idi belə, etiraz etməyə söz
tapmayacaqdı. Paşinyanın cavabını vermək üçün bundan doğru zaman, uyğun
auditoriya, eləcə də yer ola bilməzdi və bu cavab işğalçı ölkənin diplomatik
nokautu deməkdir”.
Rufik
İSMAYILOV