“İnqilabın buldozeri” həbs oluna bilər
Qırğızıstan Milli Təhlükəsizlik üzrə Dövlət Komitəsi prezidentliyə
namizədlərdən biri Azimbek Beknazarov barəsində cinayət işi qaldırmağı
planlaşdırır. İstintaq onun etdiyi çıxışlardan birini millətlərarası ədavətə
çağırış kimi qiymətləndirib. Prezidentliyə namizəd bildirib ki, "Qırğızıstan
qırğızların dövlətidir”. Əlavə edib ki, sabiq prezident Akayevin qurduğu bu
ümumi evi dağıtmaq lazımdır. Ekspertlərin məsələ ilə bağlı fikirləri fərqlidir
və haçalanıb. Bir qrup hesab edir ki, siyasətçinin səsləndirdiyi fikir cinayət
xarakterlidir. Digərləri isə hesab edirlər ki, Beknazarov ictimaiyyəti şoka
salmaq istəyib. Qeyd edilir ki, "Daimi xalq şurası”nın sədri Azimbek Beknazarovun
"Ata Jurd” partiyasının qurultayında etdiyi çıxışa hüquqi qiymət veriləcək.
"Siyasətçinin səsləndirdiyi fikirlər filoloji-siyasi ekspertizaya göndərilib”,
- deyə Qırğızıstan Milli Təhlükəsizlik üzrə Dövlət Komitəsindən bildirilib. Güc
strukturundan bildiriblər ki, ekspertiza Beknazarovun çıxışında milli zəmində
düşmənçilik elementlərinin olub-olmadığını araşdırıb yekun nəticəsini elan
edəcək. Cəmiyyətdə məşhur olan qalmaqallı siyasətçi, qırğız parlamentinin sabiq
deputatı Azimbek Beknazarov dövlət çevrilişlərinin fəal iştirakçısı olub. Buna
görə də, 2005-ci ildə ölkənin baş prokuroru vəzifəsini alıb. 2010-cu ilin aprel
hadisələrindən sonra isə müvəqqəti hökumətin baş nazirinin müavini və
"inqilabın buldozeri” ləqəbini qazanıb. Hazırda vəkilik fəaliyyəti ilə
məşğuldur. Bu günlərdə Qırğızıstan Mərkəzi Seçki Komissiyası onu müstəqil
şəkildə namizədliyini irəli sürən şəxs kimi qeydiyyata alıb. Bu səbəbdən də
onun "Ak-Yurd” partiyasının qurultayında çıxışı proqram xarakterli olmayıb - o
bu partiyadan namizədliyini irəli sürən şəxsləri – Qamçıbəy Taşiyevi və
Axmatbek Keldiyevi dəstəkləyib. Bu zaman isə səs-küyə səbəb olan çıxışı edib.
Öz çıxışında Beknazarov qeyd edib ki, Qırğızıstan yalnız qırğızlar üçündür. "Qırğızıstan
qırğızlara gərəkdir - bu qırğızların dövlətidir. Prezidentlər qırğızların
rifahı üçün çalışmalıdırlar, onlar ölkəsini qurmalıdırlar. Biz sabiq prezident
Askar Akayevin "Qırğızıstan bizim ümumi evimizdir” ideyasını dağıtmalıyıq”, -
deyə Beknazarov vurğulayıb. Qırğız siyasətçi hamını inandırmağa çalışıb ki,
"Ata-Yurd”dan namizədliyini irəli sürən Qamçıbəy Taşiyev və Axmetbek Keldibekov
etnik qırğızlardır: "Öz xalqına və vətəninə xidmət etməyə hazır olan, milli
ruhda tərbiyə edilən şəxsləri fərqləndirməyin vaxtı çatıb”.
Millətlərarası münasibətlər mövzusu Qırğızıstan üçün problemli məsələ
kimi qalır. Son vaxtlar ölkədə millətlərarası məsələləri qızışdırdıqlarına görə
bir neçə şəxs, o cümlədən kütləvi informasiya vasitələri və jurnalistlər
barəsində cinayət işi qaldırılıb. Qırğız siyasətçisi, politoloq Mars Sariyev
hesab edir ki, Beknazarovun tezisləri millətlərarası qarşıdurma yaradılması
ittihamı ilə üzləşə bilər. "Bəli, mənə elə gəlir ki, bu çağırışlarəsas verir ki, onun barəsində cinayət işi qaldırılsın. Bu, çox
təhlükəli çağırışdır. Bu cür bəyanatlar elə belə səslənmir. Çünki, milli
ritorika üzrə bəyanatlar adətən etnik prinsipə görə elektorat cəlb etməyə imkan
verir. Bu, çox təhlükəli fikirlərdir”, - deyə ekspert "K-nyus”a açıqlamasında
bildirib. Onun qənaətincə, Beknazarovun bəyanatları başqa bir namizəd – perspektivli
Omurbek Babanova qarşı çevrilib. "Məqsədi Babanovu dəstəkləyən elektoratı onun
əlindən almaqdır. Mən bu cür bəyanatları təhlükəli və yolverilməz hesab
edirəm”, -deyə ekspert vurğulayıb. "Beknazarovun sözlərinə diqqət verməmək
olardı. O çoxdan bəridir ki, siyasi marqinal hesab edilir. Narahat edən məsələ
başqadır – keçmiş baş prokuror Beknazarov əmindir ki, onun aqressiv notlu
çıxışları ölkəyə ziyan gətirməyə bilər. Lakin prezidentliyə digər namizədlər ölkədə problemlərin
olmadığını göstərmək istəsələr, onda onları asan gələcək gözləməyə bilər”, - deyə
MDB ölkələri üzrə ekspert Arkadi Dubnov bildirib. Yeri gəlmişkən, Qırğızıstanda
məşhur olan siyasətçi Feliks Kulov qurultayda iştirak etməyib. Lakin öz
kanalları vasitəsilə aydınlaşdırıb ki, heç də prezidentliyə namizəd belə bir
fikir səsləndirməyib. O, ehtimal edib ki, jurnalistlər tərcüməni düzgün
etməyiblər.
"Beknazarov hüquqşünasdır, keçmiş baş prokurordur və səsləndirdiyi hər
bir sözə görə cavabdehdir. Cinayət xarakterli hər hansı bir bəyanat səsləndirə
bilməz. Onsuz da ölkədə kompromatlar davası gedir”, - deyə Kulov bildirib.
Müxalifətçi deputat Ravşan Ceenbekov isə Beknazarovun çıxışlarını millətçi
ruhlu siyasətçinin fikirləri kimi qiymətləndirib. Lakin eks-baş prokurorun sözlərində
millətlərarası ədavət salmaq barədə hər hansı bir çağırış görmədiyini bildirib.
"Mən inanmıram ki, o, fikirlərində ciddi olub. O, prezidentliyə namizəddir və
özünə auditoriya cəlb etmək fikrindədir”, - deyə Ceenbekov bildirib. Prezident
seçkiləri kampaniyasında 32 namizədin ali dövlət postuna namizədliyinin irəli
sürüldüyünü nəzərə alsaq, onda namizədlər tanınmaq üçün bütün vasitələrdən
istifadə edirlər. Ceenbekov hesab edir ki, artıq əsas namizədlər müəyyən olunub.
"Onlar çoxdurlar. Bunlar kifayət qədər maliyyəyə sahib olan, müəyyən mənada
tanınan və Kremldən dəstək alan namizədlərdir. Yerdə qalan namizədlər seçkilərə
özlərinin piar məqsədi və müəyyən bonus əldə etmək üçün qatılanlardır”, - deyə
siyasətçi bildirib. Onun qənaətincə, Moskvanın real dəstəyinin nə qədər güclü
olduğunu seçkilərə az qalmış müəyyən etmək olacaq. Lakin siyasətçi hesab edir
ki, hakimiyyətə kimin gələcəyinin o qədər də əhəmiyyəti yoxdur. Çünki, onların
əksəriyyəti Kremlin nəzarəti altında olacaqlar. Bir faktı da qeyd edək ki,
Qırğızıstanda prezidentliyə namizədlər arasında azərbaycanlı da var. Bu şəxs
Nüsrət Məmmədovdur. Ötən həftə Qırğızıstan Respublikasının Mərkəzi Seçki
Komissiyası prezidentlik vəzifəsinə Qırğızıstan vətəndaşı Nüsrət Musa oğlu
Məmmədovun namizədliyini qəbul edib. N.Məmmədov 1957-ci ildə doğulub və
Qırğızıstan vətəndaşıdır. N.Məmmədov Türkdilli Dövlətlərin Siyasətinə Dəstək
Fonduna rəhbərlik edir.
Azər