İndoneziya səfiri ATU-nun qonağı olub
Azərbaycan
Tibb Universitetinin (ATU) rəhbərliyi beynəlxalq münasibətlərinin daha da
genişləndirilməsi istiqamətində görüşləri, müxtəlif təşəbbüsləri davam etdirir.
Bu fəaliyyət çərçivəsində ATU-nun rektoru, professor Gəray Gəraybəyli
İndoneziyanın Azərbaycandakı Səfiri Husnan Bey Fananieni qəbul edib.
Görüşün
əvvəlində Səfir Husnan Bey Fananie təmsil etdiyi ölkə və oradakı təhsil sistemi
haqqında məlumat verib. Onun sözlərinə görə, adalar ölkəsi olan İndoneziyada 800-dən
çox tayfa və etnik qrup yaşayır: "Burda əhali 500-dən çox dinə sitayiş edir. Dini
ölkə olmasa da, İndoneziyada hər kəs inanclıdır. Ölkəmiz çox genişdir. Onun
şərqindən qərbinə qədər olan məsafə Bakıdan Londona qədər olan məsafəyə
bərabərdir. İndoneziya 34 əyalətdən ibarət, ən böyük sahilə malik olan ölkədir.
Ekvator üzərində yerləşdiyindən İndoneziyada qar yağmır, nə çox isti, nə də
soyuq olmur. Orada ya quru mövsüm olur, ya da yağışlı”.
Cənab
səfir Fananie Azərbaycan xalqının çox mehriban, qonaqpərvər olduğunu bildirdi.
O, hələ uşaqlıq illərindən ölkəmiz haqqında məlumatlı olduğunu, Azərbaycan
ədəbiyyatı ilə tanış olduğunu dedi. Uşaq yaşlarında xüsusilə də Nizami
Gəncəvinin əsərləri, "Leyli və Məcnun”u oxuduğunu söylədi.
Səfir
Husnan Bey Fananie İndoneziyada fəaliyyət göstərən universitetlər və səhiyyə
sistemi haqqında məlumat verdi. Onun sözlərinə görə, ölkəsində 400-ə yaxın universitet
fəaliyyət göstərir. Bunların bir qismi də tibb sahəsi üzrə ixtisaslaşıb. Universitet
və institutlarla yanaşı, İndoneziyada ixtisaslaşmış kolleclər və akademiyalar
da fəaliyyət göstərir. İctimai universitetlərin hamısı dövlət tərəfindən
maliyyələşir. İndoneziyada müxtəlif səviyyələr üzrə təhsil almaq mümkündür. İndoneziya
universitetləri arasında dünyanın ən yaxşı 100 ali məktəbi sırasına düşənləri
də var.
ATU rektoru,
professor Gəray Gəraybəyli ətraflı məlumata görə səfir təşəkkürünü bildirərək
gələcəkdə İndoneziya universitetləri ilə qarşılıqlı əlaqələrin sıxlaşdırılmasının
tərəfdarı olduğunu qeyd etdi. O, istər təhsil, istərsə də səhiyyə sahəsində bu
cür ölkə ilə təcrübə mübadiləsinin hər tərəfə faydalı ola biləcəyini vurğuladı:
"Bizim ölkə İndoneziya qədər geniş deyil. Lakin Azərbaycan ali təhsil
müəssisələri dünya üzrə nüfuzlu universitetləri arasına daxil olmaqdadırlar. Azərbaycan
Tibb Universiteti ölkəmizdə yeganə tibb
təhsili verən qurumdur”.
G.Gəraybəyli
indiyədək dünyanın müxtəlif ölkələrindən olan universitetlərə əməkdaşlıq
qurulduğunu qeyd edərək, bu sırada İndoneziyanın da adının olmasını istədiyini
bildirdi: "İndoneziya universitetləri və ya klinikalarından nümayəndələr ATU-da
mühazirə ilə çıxış edə bilərlər. Həmçinin, ATU mütəxəssisləri də öz
təcrübələrini sizin ölkədə paylaşa bilərlər. düşünürəm ki, bu, hər iki tərəf
üçün maraqlı və faydalı olardı”. G.Gəraybəyli ATU-nun ən çox əcnəbi tələbə
qəbul edən universitetlərdən biri olduğunu da bildirdi. Qeyd olundu ki, hazırda
universitetdə təhsil alan 7000 tələbədən təxminən 1500-dən çoxu xaricilərdir.
Daha
sonra qarşılıqlı əməkdaşlığın əsasları ilə bağlı fikir mübadiləsi aparıldı. Görüşdə
ATU-nun beynəlxalq əlaqələr şöbəsinin müdiri İkram Rüstəmov, rektorun köməkçisi
Ceyhun Məmmədzadə iştirak edirdilər.