“İndi dərsə həvəslə gəlirik” - Fotolar
Ölkə ərazisindəki qəzalı vəziyyətdə olan məktəblərin modul tipli məktəblərlə
əvəz edilməsi ilə bağlı dövlət başçısı İlham Əliyevin ötən il verdiyi tapşırığa
uyğun olaraq, ilk pilot layihə həllini tapır. Artıq layihə çərçivəsində 3 məktəb
təhvil verilib. Təhsil Nazirliyinin modul tipli məktəblərdən ikisinin yerləşdiyi
İsmayıllı və Göyçay rayonlarına təşkil etdiyi mediatur çərçivəsində jurnalistlər
yeni tikililərlə yerində tanış olmaqla bərabər, kənd sakinləri, müəllimlər və
şagirdlərin sevincinə şərik oldular.
Təhsil
Nazirliyinin İctimaiyyətlə əlaqələr sektorunun müdiri Cəsarət Valehov məlumat
verərək 2017-2018-ci illərdə 232 qəzalı məktəbin modul tipli məktəblərlə əvəz
olunacağını bildirdi: "Bu ilin sonuna qədər 42 rayonda 100 məktəb təhvil veriləcək.
Hazırda 17 rayonda 23 məktəbin quraşdırılmasına başlanılıb. May ayının sonunadək
daha 19 məktəbin quraşdırılması nəzərdə tutulub. Bu, məktəblər quraşdırılacaq ərazilərdə
yaşayan əhali üçün yaxşı təhsil mühitinin yaradılmasına xidmət edəcək”.
Dünya ölkələrinin təcrübəsini öyrənərək qəzalı məktəblərin modul
tipli məktəblərlə əvəz olunması təklifini irəli sürdüklərini deyən Təhsil Nazirliyinin əsaslı tikinti-təchizat
idarəsinin rəis müavini Fərhan Əliyev aparılan monitorinqlər və müraciətlərə
görə 230-dan çox qəzalı və 100 nəfərdən az şagirdi olan məktəblərin siyahısını
tərtib etdiklərini açıqladı. Modul tipli məktəblərin özəlliyindən danışan
F.Əliyev tikilinin sinif və müəllimlər otağı, sanitar qovşağı, istilik sistemi
ilə təmin edildiyini bildirdi: "Həmçinin məktəbdə video-müşahidə kamerası
quraşdırılacaq. Bu tip məktəblərin üstünlüyü onların azməsrəfli olması ilə
yanaşı, qısa müddət ərzində istənilən relyefdə quraşdırılması, asan daşınması,
sinif otaqlarının sayının şagirdlərin sayına uyğun olaraq rahatlıqla
azaldılıb-artırılmasıdır. Modul tipli məktəblərin digər üstünlüyü budur ki,
istilik itkisi digərlərindən iki dəfə azdır, rütubətlilik yoxdur, həmçinin qəzalı
vəziyyətdə olan təhsil müəssisələrində təmir-tikinti işləri aparılarkən tədris
prosesi dayandırılmır”. Məktəbin tikintisinin təxminən 30 günə başa gəldiyini
deyən F.Əliyev istifadə olunan materialların yerli inşaat materialları olduğunu
qeyd etdi: "Bu, həm də büdcəyə qənaət məqsədi daşıyır. Həmçinin məktəblərin
tikintisi üçün yerli insanların qüvvəsindən istifadə olunub”.
9 şagird, 7 müəllim
Dəniz səviyyəsindən 1000 metr hündürlükdə, rayon mərkəzindən 20 km məsafədə
yerləşən Yenikənd kəndini yerli sakinlər təbiətinə görə Azərbaycanın nadir guşəsi
adlandırırlar. Kəndə aparan palçıqlı, narahat yollarla irəliləmək o qədər də
asan deyil. Bu vaxta qədər şagirdlər kəndin köhnə, uçulub-sökülən, qəzalı məktəbində
dərs keçiblər. İndi kənddə modul tipli məktəbin istifadəyə verilməsi isə onlara
böyük sevinc yaşadıb. 150 nəfər sakini olan kənddə 8 məcburi köçkün ailəsi də
yerləşib. Kəndin uşaqları isə öz bacarıqları ilə həmişə fərqləniblər.
Aralarında elmlər doktoru, müəllimlər, həkimlər, hazırda ali məktəblərdə təhsil
alanları var...
Kənddə yer alan modul tipli məktəb 5 sinif və bir direktor otağından
ibarətdir. Kənd ümumi orta məktəbin
direktoru Gülağa Abbasov yeni məktəbin tikilməsinə görə keçirdiyi sevinc
hisslərini bizimlə bölüşdü: «İndiyə qədər uçuq-sökük məktəbdə dərs keçirdik. Müəllimlər
də, şagirdlər də çox əziyyət çəkirdi. Qəzalı məktəbdə dərs keçmək hamımız üçün
təhlükəli idi». Köhnə məktəb binasının 1950-ci ildə tikildiyini deyən direktor,
1994-1995-ci ildən məktəb statusu ilə fəaliyyət göstərdiyini söylədi: "Hazırki
komplekt məktəbdə 9 şagird təhsil alır. Onların təlim-tərbiyəsi ilə 7 müəllim məşğul
olur”. Direktor gənc ailələrin kəndə qayıdışı ilə əlaqədar gələcəkdə şagirdlərin
sayının artacağını da istisna etmədi: «Sakinlər kəndə qayıdır və təsərrüfatla məşğul
olmağa başlayırlar. Təbii ki, onların da övladları bu məktəbdə təhsil alacaq.
Bizim üzərimizə düşən vəzifə isə şagirdlərin təlim-tərbiyəsi ilə ciddi məşğul
olmaqdır».
Sinif otaqlarında dərs keçən müəllimlərin və şagirdlərin sevincləri
bizə də sirayət edir. İngilis dili müəllimi
Laçın Məhərrəmova bu kəndə Bakıdan işləmək üçün gəldiyini bildirdi: «13
ildir ki, bu kənddə işləyirəm. İndiyə qədər qəzalı vəziyyətdə olan məktəbdə
çalışırdıq. Yeni tipli məktəbin istifadəyə verilməsi bizi hədsiz sevindirib.
İnanıram ki, bu, şavgirdlərin təhsilinin keyfiyyətinə də müsbət təsir edəcək”.
Müəllimlərin bildirdiyinə görə, hazırda komplekt məktəbdə ibtidai sinifdən
tutmuş, 9-cu sinfə qədər şagirdlər təhsil alır. Daha sonra onlar İsmayıllı
rayonundakı tam orta məktəbə oxumağa yollanırlar.
İbtidai sinif müəllimi
Qalibə Həmidova dərs dediyi komplekt sinifdə 5 şagirdin təhsil
aldığını qeyd etdi: «İndiyə qədər məktəbimizin şəraiti olmasa da, yaxşı oxuyan
şagirdlərimiz olub. Hazırda respublikanın tanınmış ali məktəblərində oxuyan
şagirdlərimiz var. Yeni tipli məktəbi isə özümüz üçün böyük hədiyyə kimi qəbul
edirik”.
Kənddə yaşayan şuşalı məcburi
köçkün Nazilə Abbasova belə bir məktəbin tezliklə Şuşada tikilməsini
arzuladı: «İnsan yaşlandıqca, doğulduğu torpaq onu daha çox çəkir. Mayın 8-i
Şuşanın işğalı günüdür. Gün o gün olsun ki, biz belə yeni tipli məktəblərin
açılışını Şuşada edək”.
7-ci sinif şagirdi Elşən
Vəliyev də sevinc hisslərini bizimlə bölüşdü: «Yeni məktəbimiz çox rahatdır.
İndiyə qədər təhlükəli məktəbdə oxuyurduq. Məktəbin özəl şəraiti bizi yaxşı
oxumağa həvəsləndirir».
Kənd sakini Şakir Həkimov məktəbin
tikintisini kəndin həyatında hadisə adlandırır: «60-a yaxın yaşım var. Sevinirəm
ki, özüm oxumasam da, heç olmasa nəvələrim və kəndimizin uşaqları yeni tipli,
rahat məktəbdə təhsil alacaqlar».
Ağdamın Abdal-Gülablı kəndindən
olan Vüqar Zeynalov isə məktəbin tikintisində iş icraçısı kimi
çalışıb. Çətin relyefə malik bir kənddə işləməyin o qədər asan olmadığını
bildirən V.Zeynalov xüsusən uşaqların sevincindən həzz aldığını dedi: "Ən böyük
sevinc elə uşaqların fərəhlənməyini görməkdir. Onlar böyük həvəslə dərsə gəlirlər”.
Kəndin sakinləri, müəllimlər, valideynlər modul tipli məktəbin tikilib tez bir
zamanda istifadəyə verildiyinə görə ölkə başçısına, Təhsil Nazirliyinə minnətdarlıqlarını
bildirdilər.
Yenikənd kəndinin sakinləri, gözləri sevincdən gülən uşaqlar və müəllimlərlə
vidalaşıb, Göyçaya – Yeniarx kənd tam orta məktəbin Hacağabəyli kənd sinif komplekti
ilə tanış olmağa yollanırıq.
Qəzalı məktəbdən modul məktəbə
Göyçayın Yeniarx kəndinin 200-dən çox əhalisi var. Bu kənddəki köhnə
məktəb şəraitinə görə heç də Yenikənddəki məktəbdən fərqlənmir. Modul tipli məktəbin
ərazisində gəlişimizə sevinən sakinlər "şükür ki, uşaqlarımız bundan sonra
yaxşı şəraiti olan məktəbdə təhsil alacaqlar” dedilər. "Köhnə məktəb qəzalı vəziyyətdə
idi. Uşaqlar o şəraitdə dərs oxuya bilmirdilər”- deyən kəndin sakini Firəngiz Fətəliyeva uşaqların təhsil dalınca Yevlaxa
gedib-gəlməsinin çətin oduğunu bildirdi: "Yevlaxa getməmək üçün kəndin bütün
uşaqları uçulmaqda olan ibtidai məktəbdə dərs alırdılar. Bu isə təhlükəli idi».
Kənd sakini Əminə Kərimova da
bütün ailə üzvlərinin köhnə məktəbdə təhsil aldığını bildirdi: «Yeni məktəbə
görə çox sevinirik. Uşaqlar sevinclərindən nə edəcəklərini bilmirlər».
Yeniarx kənd məktəbinin
direktoru Ayaz Babayev kənd
uşaqlarının 4-cü sinifdən sonra rəhbərlik etdiyi məktəbdə oxuduqlarını bildirdi:
«Köhnə məktəb çox bərbad idi. Kənd sakinlərinin müraciət və xahişlərini nəzərə
alaraq, uşaqlar Yeniarx məktəbinə gedə bilmədikləri üçün oradan müəllim gələrək
bu kənddəki qəzalı məktəbdə uşaqlarla məşğul olurdu». Məktəbin komplekt olması
– müxtəlif siniflər üzrə şagirdlərin bir sinifdə dərs alması ilə bağlı sualı
cavablandıran direktor eyni yaşda olan 2 şagird üçün sinif açılmasının "Təhsil
haqqında” qanuna zidd olduğunu bildirdi: "Hazırda bir komplekt sinifdir. Çox
güman ki, yeni tədris ilində uşaqların sayı çox olarsa, iki sinif əlavə etməklə,
bir 3-cü, iki 4-cü sinif təşkil edə bilərik. Bununla bağlı Təhsil Nazirliyinə
müraciət etmişik. Hazırda bir komplekt sinifdə 6-9 yaş arası 16 şagird təhsil
alır. Əgər uşaqların sayı gələcəkdə artarsa, yəni hər sinifdə 8-10 şagird
olarsa, bu məktəbə "İbtidai məktəb” satatusu veriləcək”.
Məktəbin 4-cü sinif
şagirdləri Emil Xasıyev və İsmayıl Quliyev: «İlk dəfədir ki, belə
gözəl məktəbdə oxuyuruq» - deyə sevinclərini bölüşürlər: "Köhnə məktəbimiz
qaranlıq və soyuq idi. Orada oxuya bilmirdik, həmçinin dərsə gəlmək istəmirdik.
İndi isə dərsə həvəslə gəlirik”.
Modul məktəbin 5 sinif otağı 40 nəfərlik şagirdə hesablanıb. Məktəbin
həyətində içməli su hovuzu da tikilib.
Təranə Məhərrəmova
İsmayıllı-Göyçay