“İkinci Torqovı” - xələf sələfə tay olacaqmı?
Azərbaycanda turizmin inkişafı məqsədilə Nizami
küçəsinin "Torqovı" adı ilə tanınan hissəsi kimi daha iki küçənin
yaradılması ilə bağlı təkliflər var. Trend-in məlumatına görə, bunu Milli
Turizm Təbliğat Bürosunun mətbuat katibi Kənan Quluzadə deyib.
K.Quluzadə qeyd edib ki, Mərkəzi Univermaqdan
"5 mərtəbə"yə gedən küçələrin ikisinin avtomobil hərəkəti olmadan gəzinti
küçəsi olması nəzərdə tutulur: "Bununla bağlı təkliflər var, lakin hansı
qərarın veriləcəyi barədə indidən danışmaq çətindir”.
K.Quluzadə həmçinin bildirib ki, Bələdçi Akademiyasının
yaradılması ilə bağlı təkliflər də var: "Bir çox bələdçilər Azərbaycan
tarixini və mədəniyyətini, yer adlarını düzgün bilmədiyi üçün turistlərə düzgün
məlumat vermirlər. Ona görə də istəyirik ki, peşəkar bələdçilər hazırlansın”.
Onun sözlərinə görə, həmçinin Gürcüstanla birgə
regional turizm paketlərinin hazırlanması nəzərdə tutulur: "Bu paket
çərçivəsində turist həm Gürcüstana, həm də Azərbaycana səfər edəcək”.
Bəs görəsən belə bir küçənin yaradılmasının
hansı əhəmiyyəti var? Sözügedən küçə turizmin inkişafına faydalı ola bilərmi?
Azərbaycan Turizm Assosiasiyası (AzTA) sədrinin müşaviri Müzəffər
Ağakərimov bildirdi ki, sözügedən ərazidə belə bir küçənin salınması üçün
əlverişli şərait var: "Vaxtilə bu küçə alış-verişin çox olduğu bir ərazi
olduğuna görə, xalq arasında ona «Bazarnıy» küçəsi deyirdilər. Hətta, indi burada
"Torqovı”ya bənzər bölgülü tunel də var ki, orada mağazalar mövcuddur. Ərazi həm
də İçərişəhərə yaxın olduğu üçün turistlərin diqqətini cəlb edəcək. Burada ən
əsas məqam nəqliyyat vasitələrinin tənzimlənməsi məsələsidir. Çünki orada
birtərəfli nəqliyyat yolu var. "Torqovı” deyiləndə, insanların ağlına rahat, arxayın gəzə və alış-veriş edə biləcəyi
bir yer gəlir. Amma həmin ərazidə müəyyən maneələr yarana bilər ki, onları
mütləq aradan qaldırmaq lazımdır. Gələcəkdə belə küçələrin sayının artırılması mümkündür. Çünki
bu, həm də turistlərin cəlb olunması baxımından vacibdir. "Torqovı” şoppinq
festivalların keçirilməsi üçün münasib yer hesab olunur. Ümumilikdə isə insanların
ailəsi ilə rahat gəzib istirahət edə bilməsi üçün şərait yaradılır. Hətta,
orada Nizami, Sabir bağı da var ki, bu da onların rahatlığını təmin edə bilər. Gələcəkdə digər ərazilərdə
belə bir küçələrin salınması mümkündür. Amma bu küçələrin konkret olaraq hansı
ərazidə salınmasını Bakı şəhər İcra Hakimiyyətinin Şəhərsalma Şöbəsi müəyyənləşdirə
bilər”.
"Luna Travel” turizm agentliyinin direktoruRəhman Quliyev deyir ki, indiki halda bu,
çox faydalıdır: "İkinci ticarət küçəsinin salınması artıq
müzakirə mövzusudur. Bu barədə müəyyən işlər görülməyə başlanılıb. Hesab edirəm ki, belə ticarət küçələrinin
açılması, indiki halda çox vacibdir. Çünki biz ölkəyə daha çox turist cəlb
etməkdə maraqlıyıq. Yeni yaradılacaq ticarət küçələrində nəqliyyat vasitələrinin hərəkəti
tam məhdudlaşdırılacaq. Yəni küçə ancaq piyadalar üçün nəzərdə tutulur. Biz bu
küçələri yaradarkən dünya təcrübəsindən yararlana bilərik. Məsələn, Türkiyədə
belə böyük ticarət küçələrinin sayı çoxdur. Bayram ərəfələrində həmin yerlərdə xüsusi
tədbirlər təşkil olunur. Həmçinin, Romada, Milanda, Parisdə də xeyli sayda belə
küçələrə rast gəlmək olur. İkinci "Torqovı” həm də turistin təkcə böyük ticarət mərkəzlərinə tıxanıb
qalmasının da qarşısını alacaq. İndi Bakıya gələn turistlərin əksəriyyəti "Mall”lara
üz tutur. Ticarət küçələrində isə təmiz
havada gəzərək, istədiyin alış-verişi edə bilirsən. Avropada ticarət
küçələrində hətta müxtəlif ölkələrin musiqiləri səsləndirilir. Bizdə də bu
təcrübənin olması turistlərin diqqətini cəlb edə bilər. Bunun üçün Bakıda
kifayət qədər ərazi var. Təkcə, "Gənclik”, "Nərimanov” "28 May” ərazilərində deyil, Bakının digər fərqli
ərazilərində də bu layihələr həyata keçirilsə, daha yaxşı olar. Qeyd edim ki, artıq bu
praktika İstanbulda özünü doğruldub. Əvvəllər "Taksim”də ticarət küçələri var
idi, sonra Kadıköydə ikinci bir istiqamət açıldı və bu, çox böyük effekt verdi.
İndi İstanbula gələn turistlərin 30 faizi məhz bu istiqamətə yönəlir. Yəni
turistlər üçün fərqli seçimlər yaradılmalıdır”.
Turizm üzrə ekspert Ruslan Quliyevbildirdi ki, belə ticarət küçələrinin, ictimai
yerlərin və parkların açılması asudə vaxtın səmərəli keçirilməsi üçün nəzərdə
tutulur: "Ona görə də, bu, çox müsbət haldır və yalnız alqışlana bilər. Düşünürəm
ki, bu, Bakıya gələn turistlərin də diqqətini cəlb edə biləcək bir layihədir. Çünki
infrastrukturların uğurla həyata keçirilməsi, gələn qonaqların istirahətlərinin
səmərəli təşkilinə şərait yaradır. Bu küçələrdə müxtəlif ticarət mərkəzləri və
ictimai-iaşə obyektlərinin fəaliyyət göstərməsi turizmin inkişafına təkan verə
bilər. Çünki belə küçələrə insanlar çox maraq göstərirlər. Amma bu işi həyata keçirərkən planlı şəkildə
hərəkət etmək lazımdır”.
Şəbnəm Mehdizadə