“İki yad adam” Pekindən qalib döndü - Fotolar
Son zamanlar yerli
filmlərimizin istehsalının çoxalması kino aləmində irəliləyişə səbəb olub. Bu
gün yerli filmlərimiz kinoteatrlarımıza da ayaq açır. Hətta izlənmə sayına görə
xarici filmlərlə rəqabət aparır. Bəli, bu günün gəncləri film çəkir və onu
nəinki yerli, hətta xarici film bazarlarında belə nümayiş etdirirlər. Bu gün
gənclərimizin səsi müxtəlif ölkələrdə keçirilən festivallardan eşidilməkdədir.
Elə ötən həftə, "Addım”
təşkilatının sifarişi ilə görkəmli yazıçımız Mir Cəlal Paşayevin "Kəmtərovlar
Ailəsi” hekayəsinin motivləri əsasında çəkilən "İki yad adam” filminin xarici
bir festivalda mükafata layiq görülməsi xəbərini eşitdik. Belə ki, sözügedən
filmimiz Çin Xalq Respublikasının paytaxtıPekin şəhərində World Cultural
Open Organization-ın dəstəyi ilə keçirilən Grand Asian Film Festivalının final
gecəsində nümayiş olunub. Beynəlxalq "Cinematic Group”-un təşkilatçılığı ilə ənənəvi
olaraq hər il müxtəlif dünya ölkələri paytaxtlarında gerçəkləşən festivalın
final nümayişində "İki yad adam” filmi yerli tamaşaçılar tərəfindən rəğbətlə
qarşılanıb. Tədbirdə ölkəmizi təmsil edən "Addım” təşkilatının və layihənin
rəhbəriHüseyn Cavadzadə,eləcə də filmdə baş rolun ifaçılarından
biriolan Riad Abduljurnalistlər və qonaqların suallarını cavablandırıb.
Daha sonra filmə "Ən yaxşı sosial mövzuda film” və "Ən yaxşı aktyor oyunu”
nominasiyalarında mükafatlar təqdim olunub. Bundan başqa, filmdə əsas
qəhrəmanlardan birini ifa edən R.Abdul Çin mətbuat nümayəndələrinə film və
layihə ilə bağlı geniş müsahibələr verib.
Səfərdən dönər-dönməz,
layihənin rəhbəriHüseyn Cavadzadəilə söhbət etdik, festivalla bağlı
onun təəssüratlarını xəbər aldıq. H.Cavadzadə deyir ki, Pekində onlara böyük
maraq göstəriblər: "İlk olaraq bildirim ki, ilk dəfə Azərbaycandan "Grand Asian
Film Festivalı”nda biz iştirak etmişik. Bu festival kifayət qədər tanınmış və
müəyyən nüfuza malik bir festivaldır. Nə xoş bizə ki, bu festivalda iştirak
etmək məhz bizim qismətimizə düşdü. Orada dünyanın müxtəlif ölkələrindən gəlmiş
iştirakçılar vardı. Eyni zamanda, kino aləmində tanınan və bu aləmdə sözünü
deyən film nümayəndələri, kino mütəxəssisləri iştirak edirdilər”. Müsahibimiz festival
Novruz bayramı günlərinə təsadüf etdiyi üçün orada bayram ab-havası
yaratdıqlarını bildirdi: "Bilirsiniz ki, ölkəmizdə Novruz bayramı keçirilən
zaman biz həmin festivalda iştirak edirdik. Bunun üçün istədik ki, belə bir
festivalda xalqımızın adətləri və milli mətbəxi haqda festival iştirakçılarını
məlumatlandıraq. Bayram bir növ orada ölkəmizi təmsil etmək üçün bir fürsət
oldu. Filmimizin nümayişindən sonra festival iştirakçılarını Azərbaycanın milli
şirniyyatlarına qonaq etdik, bayram ab-havası yaratdıq. Bu da hardasa
Azərbaycan mədəniyyətinin təbliği idi”.
Mütəxəssislərin filmimiz
haqqında fikirlərinə gəlincə isə, H.Cavadzadə deyir ki, onlar "İki yad adam”
filmi haqqında yaxşı rəylər bildiriblər. Müsahibimin sözlərinə görə, festivalda
nümayiş olunan filmlər haqqında müxtəlif tənqidi fikirlər səslənsə də, bizim
filmimiz haqqında heç bir irad səslənməyib. Bu da Azərbaycan filminin uğurunun
göstəricilərindəndir. Əslində, tənqidlərə də açıq olduğunu deyən Hüseyn
Cavadzadə filmin bu qədər seviləcəyini gözləmədiyini qeyd etdi.
Festivalda "İki yad adam”a
bir çox təkliflər də gəlib: "Filmin müxtəlif ölkələrdə nümayişi üçün bir çox
dəvətlər aldıq. Qeyd edim ki, filmimiz buradakı premyerasına qədər də bir neçə festivalda
iştirak edəcək. Digər təşkilatçılardan da müəyyən dəvətlər almışıq. Hazırda
onlarla bağlı müzakirələr aparırıq. Yəqin bir qərara gəldikdən sonra mətbuat
nümayəndələrinə məlumat veriləcək. Filmin başqa festivallarda iştirakı da
gözlənilir. Hələ ki, biz filmin trellerini, hostelini paylaşmamışıq. Film hazır
olan kimi, biz onu festivala göndərdik. Aprel ayının axırlarında onu ölkəmizdə
nümayiş etdirməyi düşünürük. İnşallah, filmin trellerini üzümüzə gələn
həftələrdə paylaşacağıq. Premyerasına qədər bir neçə xarici ölkələrdə nümayiş
olunacaq. Bacardığımız qədər filmin PR-ı ilə məşğul olacağıq”.
Layihə rəhbərinə "filmi
festivala göndərərkən birincilik əldə edəcəyini güman edirdinizmi” – sualını ünvanladıq.
Cavabında isə müsahibimiz qalibiyyət əldə edəcəklərini güman etmədiklərini dedi:
"Nominasiya olduğumuzu bilirdik. Ancaq bilmirdik ki, iki qalibiyyəti birdən
əldə edəcəyik. Filmin rus və ingilis dilində tərcüməsini gecikdirmişdik. Biri
var festivalda bizə qalibiyyət diplomu verələr, bir də var ki, iştirakçı. Biz
oradan qalib diplomu ilə geri döndük. Bu, artıq böyük bir uğurdur. Biz
düşünürdük ki, yəqin iştirakçı diplomu alarıq. Ancaq gözlədiyimizdən artıq oldu”.
Qeyd edək ki 1930-cu
illərdə qələmə alınan əsər gəncAzərbaycan ailəsinin həyatından bəhs edir.
Filmdə fərqli iş yerlərində, fərqli iş saatlarında çalışan və aylarla görüşə
bilməyən ər-arvadın maraqlı ünsiyyətindən bəhs olunur.
Filmdə baş rolları Duyğu
Dəvəli, Riad Abdul və əməkdar artist Gülşad Baxşıyeva ifa ediblər. Digər
rollarda isə Faiq Mirzəyev, Fərqanə Quliyeva, Aysel Osmanlı, Vüsalə Məmmədzadə
və başqaları çəkilib. Filmin ssenari müəllifi Nicat Dadaşov, operatoru Ruslan
Ağazadə, montajçısı Murad Muradlı, səs rejissoru Ədalət Xəlilov, musiqi
tərtibatçısı Elvin Musayev, prodüseri Azər Həsənovdur. Layihənin rəhbəri Hüseyn
Cavadzadədir. Film Caspian Media Group şirkətində istehsal olunub.
Film aprel ayında
Azərbaycanda ilk dəfə Səhiyyə Nazırliyi, Ailə, Qadın və Uşaq Problemləri üzrə Dövlət
Komitəsi və İctimai Səhiyyə və İslahatlar Mərkəzinin dəstəyi ilə gerçəkləşəcək
1-ci Gənc Ailələrin Forumunda təqdim olunacaq.
Xəyalə Rəis