İfası unudulmayan sənətkar
Sənət aləmindəki qalmaqallardan,
çəkişmələrdən uzaq olan Məmmədbağır Bağırzadəni yalnız öz peşəsi və xalqın
zövqü maraqlandırırdı
"Sən gəlməz oldun”, "Belə qəmli
dayanma, "Axşamlar”, "Tello”, "İstəmir məni”, "Darıxıram sənin üçün”, ”Azərbaycan
oğluyam”, "Sənli günlərim”, "Gecə yaman uzundur”... Bu mahnıların hər birini
özünəməxsus tərzdə və şövqlə oxuyardı. İfası ilə möhür vurduğu bu mahnılar təkcə
milli radiomuzun Qızıl Fondunda deyil, həmçinin insanların yaddaşında qorunur,
dodaqlardan qəlblərə süzülür... Ağayana, ciddi görkəmi, şirin təbəssümünə
qarışan mahnılar, təsniflər, muğamlar səsləndikcə, o zaman evlərin, ailələrin
çağırılmamış sevimli qonağına çevrilərdi Məmmədbağır Bağırzadə. Onda səhnədən,
ekrandan birbaşa dinləyicinin qəlbinə nüfuz etmək bacarığı vardı.
Böyük sənətkarların hər biri kimi, onun
da sənət yolu toylardan, el
şənliklərindən başlamışdı. Cabbar Qaryağdıoğlu, Xan Şuşinski, Hacıbaba
Hüseynov, Ağaxan Abdullayev, Arif Babayev, Sabir Mirzəyev, Əlibaba Məmmədov kimi
ustad sənətkarları yetişdirən və xalqa sevdirən el məclisləri onu da gənc
yaşlarından tanıtmışdı. Şirin səsi, qəlbə yatan ifası gənc müğənnini el
şənliklərinin sevilən sənətkarına çevirmişdi.
İstər bəstəkar, istər xalq mahnıları
M.Bağırzadə 1970-ci ildə doğulduğu
Nardaran qəsəbəsində musiqiçi kimi əmək fəaliyyətinə başlayıb. İfaçılığa kənd camaatının qarşısında çıxışlarla
başlayıb. Hələ 12 yaşında ikən
Nardaran kəndindəki bir toy məclisində sənətkarlar qarşısında
"Bayatı-Şiraz" muğamını oxuyan Məmmədbağırın gələcəkdə yaxşı müğənni
olacağına hamı inanıb.
Klubda xalq çalğı alətləri ansamblının
bədii rəhbəri kimi çalışaraq qısa müddət ərzində təkcə doğulduğu kənddə deyil,
ətraf rayonlarda da tanınıb.
M.Bağırzadənin
ailəsində də musiqiyə böyük həvəs olub. Dayısı Lətifin gözəl səsi varmış.
Muğamı Seyid Şuşinski kimi böyük xanəndədən öyrənən Lətifin boğazları
Məmmədbağırın səsində hiss olunub. Sonralar muğamın sirlərini Asəf Zeynallı
adına Musiqi Kollecində Xalq artisti Əlibaba Məmmədovdan, Əməkdar müəllim Nəriman
Əliyevdən öyrənib. Bununla da yeni dövrdə Azərbaycan muğam ifaçılarının Seyid
Şuşinski ənənələrini layiqincə mənimsəyib. Həm bəstəkar mahnılarını,
təsnifləri, həm də özünün yazdığı nəğmələri fərqli bir ifa ilə oxuyaraq
dinləyicilərin könlünə nüfuz edib. M.Bağırzadə musiqi məktəbini
bitirdikdən sonra İncəsənət
İnstitutunda oxuyub.
Müxtəlif illərdə Azərbaycan Dövlət
Filarmoniyasında, Azərbaycan Dövlət Konsert Birliyində çalışan müğənni, öz
ecazkar səsi ilə milli musiqi xəzinəmizi zənginləşdirən ifaçılar sırasına daxil
olub, Azərbaycanın qüdrətli sənətkarlarının layiqli davamçısına çevrilib. M.Bağırzadə
adətən öz mahnılarını oxusa da, klassik, müasir bəstəkar və şairlərin
yaradıcılığına müntəzəm müraciət edirdi. Xüsusilə də, şairəZivər Ağayevailə yaradıcılıq əlaqələri nəticəsində
Azərbaycan milli musiqi sənətinə çox sayda gözəl mahnılar bəxş edib.
Müğənni rəhbərlik etdiyi "Dilkəş” instrumental ansamblı ilə respublikanın
bütün bölgələrində çıxış edərək hər yerdə rəğbətlə qarşılanırdı. Muğam ifaçılığımızın
gözəl ənənələrini ləyaqətlə qoruyub yaşadan istedadlı müğənni, eyni zamanda,
özünün orijinal bəstələri ilə Azərbaycan musiqisini daha da inkişaf etdirib. M.Bağırzadədə
öz ifası ilə istər bəstəkar mahnılarını, istərsə də xalq mahnılarını və
muğamları minlərlə dinləyiciyə sevdirə bilmək istedadı olub ki, bu da onu
həmişə məclislərin arzuolunan qonağına çevirib.
"Azərbaycan oğluyam”
Müğənninin repertuarına Oqtay Kazıminin,Nəriman Məmmədovun,Tahir Əkbərinvə
b. tanınmış bəstəkarların mahnıları da daxil idi. Onlar mahnılarını Məmmədbağır
Bağırzadənin ifasında eşitmək istəyirmişlər. "Sən oxuyanda mahnıya həyat
verirsən” deyirmişlər. Təəssüf ki, müğənninin özü kimi, oxuduğu mahnıları yazan
bəstəkarlar da köçlərini çəkib bu dünyadan gediblər. Amma musiqi xəzinəmizə nə
qədər əvəzsiz mahnılar bağışlayıblar...
Həmçinin M.Bağırzadənin bir müğənni
kimi yetişməsində bəstəkar Ələkbər Tağıyevin xüsusi əməyi olub. 1976-cı ildən
başlanan müğənni-bəstəkar tanışlığı sonradan möhkəm yaradıcılıq əlaqəsinə
çevrilir. Bəstəkarın "Söylə, yadındamı?”, "Sənsən həyatım”, "Mənəm”, "Sən
gəlməz oldun”, "Kəndimizin gözəlləri”, "Təzə gəlin”, "Yadıma düşdü”, "Xızı
dağları” kimi mahnıları müğənninin yaradıcılığında xüsusi yer tutub. O, konsertlərini
Ələkbər Tağıyevin "Azərbaycan oğluyam” mahnısı ilə açıb. Ona görə də bu mahnı
onun konsert proqramlarının rəmzinə çevrilib.
Müğənni 1985-ci ildən ömrünün sonuna qədər Azərbaycan Televiziya və
Radio Verilişləri Komitəsində solist kimi çalışıb. M.Bağırzadə dünyanın
müxtəlif ölkələrində - Almaniya, Misir, Hindistan, Şri-Lanka, Əlcəzair,
Macarıstan, Fransa, Norveç, Türkiyə və İranda, habelə keçmiş SSRİ məkanında
keçirilən mədəniyyət günlərində çıxış edib, milli musiqimizin təbliğinə öz töhfələrini
verib. M.Bağırzadənin milli radiomuzun
fonotekasında saxlanılan "Rast”, "Segah Zabul” dəstgahları, "Şikəsteyi-fars”
şöbəsi onun mahir muğam ustası olduğunun təsdiqidir. Müğənni "Segah Zabul”
muğamına üç təsnif yazaraq əlavə edib. Bəstələdiyi digər mahnıları isə, özünün
də etiraf etdiyi kimi, çox sevdiyi "Şur” və "Dilkəş” ladlarından bəhrələnərək
ərsəyə gətirib.
Belə
bir insanı tez itirdik
Müğənni Xalq şairi Fikrət Qocanın sözlərinə yazılmış «Gecə yaman uzundur»
mahnısını da böyük şövqlə oxuyub. İndi Xalq şairi onu böyük məhəbbətlə
xatırlayır: «Çox gözəl sənətkar idi. Hay-küysüz, sakit, təvazökar, həm də
ciddi. Əsl Azərbaycan kişilərinə xas olan xüsusiyyətləri var idi. Mahnını çox
ürəklə oxuyurdu. İfaçılıq sahəsində nadir sənətkarlardan idi. Azərbaycan dilini
gözəl bilirdi. İfa etdiyi muğam və mahnılardakı
sözləri çox aydınlıqla, ustalıqla dinləyiciyə çatdırırdı. Onun ifasını
heç kəs təkrar edə bilməz. Məmmədbağırın öz səsi, öz tərzi vardı. Köhnə
bakılılara məxsus qədimliyini qoruyub saxlamışdı.
O, səhnə mədəniyyəti, geyim-kecimi, zahiri görünüşü ilə də fərqlənirdi. Bu
mənada Məmmədbağır musiqi aləmində gözəl ifaçılığından savayı, ədəb-ərkanı,
səmimiyyəti ilə də seçilirdi. Təkcə bəstəkarlar deyil, şairlər də onunla
işləməyə maraqlı idi. Çünki bilirdilər ki, Məmmədbağır sözə dəyər verməyi
bacarır və onların yazdıqları da unudulmayacaq».
F.Qoca deyir ki,
musiqi dünyasında yalnız Məmmədbağır səsinə, ifaçılığına xas olan zəngulələr,
"boğaz xırdalıqları” vardı: "Bunlar onun muğam ifasına, nəğmələrinə xüsusi bir
şirinlik gətirirdi. O, oxuduğu mahnılara sanki həyat verirdi və onları sənət
əsərinə çevirərək xalqa yaxınlaşdırırdı”.
M.Bağırzadə təkcə müğənni deyildi, həm
də bəstəkar idi. 30-dan çox mahnı onun
bəstəkarlığı ilə dillər əzbərinə çevrilib. "Darıxıram”, "Dözə bilmirəm”, "Güman
yeri var”, "Qaldı dağlarda”, "Olmaz”, "Axtarır gözüm səni”, "Qəhrəmanlıq
nəğməsi”, "Dindir məni”, "Ana dünyası", "Xoşum gəlir" kimi
mahnılar M.Bağırzadənin yaradıcılığının məhsulları idi.
M.Bağırzadə son mahnılarından birini müğənni Baloğlan Əşrəfov üçün yazmışdı.
«Nə etdim» adlı mahnını müğənni ilk dəfə Mahnı Teatrında Məmmədbağır
Bağırzadənin xatirəsinə həsr olunan gecədə oxuyub. «Bu mahnını Baloğlan üçün
yazıram. İstəyirəm o oxusun” demişdi» - deyə müğənni xatırlayır: "Mən də
mahnını böyük sevgi ilə ifa etdim. Özünün də, oğlunun da xoşuna gəldi. Bizim
gözəl münasibətimiz var idi. O, həmyaşıdım idi. Hər gecə telefonla danışar,
dərdləşərdik. Məmmədbağırın o biri müğənnilərdən fərqi onda idi ki, onun həm də
bədii savadı vardı. Hər müğənninin səsi ola bilər, amma hər müğənninin bədii
savadı olmur. Buna görə mənim ona böyük rəğbətim vardı. O, şeiriyyəti,
qəzəliyyatı gözəl bilirdi. Bayağı mahnı oxuyan müğənniləri xoşlamazdı. Onda
xoşuma gələn bir cəhət də vardı: sənət aləmindəki qalmaqallardan, çəkişmələrdən
uzaq idi. Onu yalnız öz sənəti və xalqın zövqü maraqlandırırdı. Xoşbəxtlikdən,
xalqın zövqünü tutmağı bacarmışdı. Respublikanın hər yerində insanlar onu
sevirdi. O, toylarda oxuyanda bütün ətrafdakılar onu dinləməyə gələrdi. O, əsil
xalq dilində, onun qəlbinə yaxın tərzdə oxuyurdu. İfa etdiyi hər bir mahnının da
ünvanı vardı. Məmmədbağır toyxanalarımızın bəzəyi idi. Toylarda bəyə, gəlinə,
ataya, anaya, nənəyə, nəvəyə həsr olunan mahnıların əksəriyyətinin müəllifi
Məmmədbağır idi».
B.Əşrəfov deyir ki, həmkarının ölümü
ona çox pis təsir edib. Hətta bir müddət stress yaşayıb: «Məni tanıyanlar yaxşı
bilir, Məmmədbağırın ölümü mənə çox pis təsir etdi. Bəlkə buna görə səhhətimdə
müəyyən narahatlıq da yarandı. Çünki mənim onun sənətinə də, şəxsiyyətinə də
böyük rəğbətim var idi. Heyf ki, belə bir insanı çox tez itirdik».
Yadigar
ifa
İfaçılıq sənətindəki uğurlarına görə
Məmmədbağır Bağırzadə 1989-cu ildə Əməkdar artist, 2002-ci ildə isə Xalq
artisti fəxri adlarına layiq görülüb.
Məmmədbağır Bağırzadənin repertuarında
"Xatırlayarsan” mahnısı da geniş yer tuturdu.
Fani dünyadan, insanın bir gün dünyanı tərk edəcəyindən, vəfasız ömürdən oxuyurdu.
Sanki erkən ölümünü duyubmuş kimi oxuyurdu...
Məmmədbağır Bağırzadə cəmi 56 il
yaşadı. Amma bu qısa ömür mənalı, xalq üçün faydalı keçdi. O, musiqi xəzinəmizə
yaddaşlardan silinməyən ifa, unudulmayacaq mahnılar, təsniflər, muğamlar
yadigar qoydu...
Təranə Məhərrəmova