“Hərə bir əsgər, hər ev bir səngər” - Fotolar
"Cəbhəyanı bölgələrdə müvafiq tədbirlərin təşkilinə dair təşəbbüslər və
"ordum.az" saytının yaradılması” layihəsi
çərçivəsində, sentyabrın 16-da Tovuz
rayonunun Ağdam kəndində "Hərə bir əsgər, hər ev bir səngər” adlı
tədbir keçirilib. Azərbaycan
Respublikası Prezidenti yanında Qeyri-Hökumət Təşkilatlarına Dövlət Dəstəyi
Şurasının maliyyə yardımı ilə keçirilən görüş-tədbirin məqsədi düşmənlə təmas xəttində, sərhəd kəndlərimizdə yaşayan vətəndaşlarımıza
mənəvi dəstək olmaqdır. Bununla yanaşı, onları vətənin keşiyini çəkən
əsgərlərimizə arxa durmağa, tarixi torpaqlarımız olan ata- baba yurdlarına daha
möhkəm bağlanmağa sövq etmək, yerli əhalini - əsasən də yeniyetmə-gəncləri
düşmənlərimizin millətimizə, dövlətimizə qarşı törətdiyi cinayətlər barədə
maarifləndirməkdir. Eyni zamanda layihənin məqsədi gəncləri ölkəmizin
mənafeyini, xalqımızın milli-mənəvi dəyərlərini, öz yurdlarını qorumağa,
işğalçılara qarşı mübarizəyə səfərbər
etməkdir.
Elə bu ovqat üstə köklənmiş Hərbi
mövzular Üzrə İxtisaslaşmış Jurnalistlər” İctimai Birliyinin üzvləri və
qonaqlar şəhid ailələri ilə birlikdəTovuz rayonunun Ağdam kəndində şəhidlər
xiyabanını ziyarət edib, şəhidlərin və Azərbaycanın Milli Qəhrəmanı Naiq
Yusifovun məzarı üzərinə tər çiçəklər qoyaraq xatirələrini yad ediblər.
Xatırladaq ki, Qarabağ
müharibəsi başlayandan ərazi bütövlüyümüz uğrunda Ağdam kəndi 15 şəhid verib
ki, onlardan biri – Naiq Yusifov Azərbaycanın Milli Qəhrəmanı adına layiq
görülüb.
Milli Qəhrəmanın adını
daşıyan məktəbin qarşısında kənd sakinləri ilə keçirilən görüşdə "Bütöv
Azərbaycan” qəzetinin redaktor müavini Azadə Bayramova müstəqil ölkəmizin suverenliyinin
möhkəmləndirilməsi naminə xalq-ordu əlaqələrini möhkəmləndirmək kimi mühüm
vəzifələrdən söz açıb.
Tovuz rayon Gənclər və İdman
İdarəsinin rəisi Sahib Ələsgərov qonaqları salamlayaraq qeyd edib ki, Dağlıq
Qarabağ münaqişəsi başlayandan bəri Tovuz rayonu düşmənlə təmas xəttində daim
mərdliklə dayanıb.
Biz sizlərdən vətən sevgisini, yurda necə can-dildən
bağlanmağı öyrənməyə gəlmişik, deyə sözə başlayan "Hərbi Mövzular üzrə İxtisaslaşmış
Jurnalistlər” İctimai Birliyi İdarə Heyətinin sədri Tamxil Ziyəddinoğlu "Hərə
bir əsgər, hər ev bir səngər” mövzusunda məruzə edib. O, Azərbaycan Respublikası Silahlı
Qüvvələrinin Ermənistan Respublikası Silahlı Qüvvələri ilə təmas xəttinə
bitişik ərazilərdə təhlükəsizlik tədbirləri haqqında Azərbaycan Respublikası
Prezidentinin 24 sentyabr 2014 –cü il tarixli sərəncamını xatırladaraq, döyüş bölgəsində
yaşayan əhalinin ayıq-sayıqlığının artırılması zərurətindən danışıb. Qürur
huissilə qeyd edib ki, torpaqlarımızı indi 1990-cı illərdəki kimi əliyalın
könnüllülər deyil, nizami ordumuz qoruyur. Azərbaycan oğulları Silahlı
Qüvvələrimizin bütün qoşun növlərində şərəflə xidmət keçirlər. İstər
sərhədlərimizin keşiyində, istərsə də, təhlükəsizliyimizin, asayişimizin
qorunmasında vətənə layiqli xidmət
edirlər. Hərbçilərimiz NATO Sülhməramlı Qoşunlarının tərkibində İraqda,
Kosovada nümunəvi xidmətləri ilə Azərbaycanımıza həmişə baş ucalığı gətiriblər. Silahlı Qüvvələrimiz hazırda Cənubi Qafqazın ən güclü
ordusuna çevrilib. Ötən ilin aprel döyüşləri bunu bir daha sübüt elədi.Cəbrayıl
rayonunun Cocuq Mərcanlı kəndinin düşməndən azad edilərək, orada ilkin olaraq
50 evin inşası və daha 100 evin tikintisinə başlanması yurd yerlərimizə böyük
qayıdışın başlanğıcı oldu. İnanırıq ki, tezliklə Azərbaycanın əraziləri
işğaldan azad ediləcək və xalqımız əmin-amanlıq şəraitində indiki inkşaf
dinamikasını daha yüksək səviyyədə davam etdirəcək. Bütün bunlar isə xalq-ordu
birliyində öz təcəssümünü tapacaq. Biz daimi olaraq ordumuza dəstək
olmalı,ordumuzun şəxsi heyəti ilə təmaslarımız sıx olmalıdır.
Azərbaycanın Milli Qəhrəmanı Naiq Yusifovun
atası Nəsir Yusifov qeyd edib ki, Azərbaycan xalqının tarixində qəhrəmanlıq
ənənələri davam edir: "Böyük Vətən Müharibəsində təkcə Tovuz rayonundan 3 nəfər
Sovet İttifaqı Qəhrəmanı adına layiq görülüb. Mənim oğlum kimi neçə-neçə
oğullar da vətənin müdafiəsinə qalxıb, torpaq, xalq uğrunda canlarını fəda
ediblər”.
Milli Qəhrəmanın adını daşıyan məktəbin
direktoru Şahnaz Eyubova yetirmələrinin qəhrəmanlığını qeyd etməklə bərabər, bildirib
ki, 25 ilə yaxın davam edən münaqişə dövründə bir nəfər də olsun kəndi tərk
etməyib, hazırda da hər kəs öz təsərrüfat işləri ilə məşğuldur. Bildirilib ki, kənddə
Alı Baba ziyərətgahı və kənd qəbiristanlığı hələ də düşmən nişangahındadır: "Məktəbimizdə
vətənpərvərlik tərbiyəsi daha yüksək aşılanır. Neçə-neçə şagirdlərimiz hərbi
akademiyada təhsil alır, Türkiyədə, Cəmşid Naxçıvanski adına Hərbi Liseylərdə təhsil alırlar. Biz
Azərbaycanın Prezidenti cənab İlham Əliyevə arxalanırıq və onunla fəxr edirik”.
"Xoşbəxt günlərimin acı göz yaşları” ,
"Başkəsənlər”, "Anama məktub”, "Novruzda açılan atəş”, "Tanrı ürəklərdədir” və.s. kitabların müəllifi, publisist Elman
Rüstəmov da öz ürək sözlərini söyləyib.
Tovuz rayonunun Ağdam kəndinin camaatı ilə görüşünün rəsmi
hissəsindən sonra bədii hissəyə yer verilib. Gənc aşıqlar Zirəddin Cilovdarlı və Muxtar Məmmədov Firuddin Süleymanovun
balabanda müşayiəti ilə öz ifalarını təqdim ediblər.
Dağlar qoynunda
sazın, sözün şirinliyinə bələnmiş bu
görüş hər kəsdə xoş ovqat yaradıb. Yerli camaat qonaqlarla xatirə şəkilləri
çəkdiriblər. Görüş iştirakçılarına şair Hafiz Baxışın
"Bütöv Azərbaycan” qəzeti redaksiyasında çapa hazırlanmış "Ana layla deyir”
kitabı və təhlükəsizlik tədbirlərinə aid bukletlər paylanıb.