Həmişə özünüz oldunuz
Hörmətli
Cahangir müəllim!
Bəlkə də bu məktubdan çox bir etirafdır. Bilirəm
ki, düşüncələrim sizdən dərs almış bütün
tələbələrin ürəyincə olacaq. İllərin sınaqları, təzadları, müxtəlif məqamlar, dəyişən
və dəyişməyən münasibətlər - yaşadığımız bu ağlı-qaralı həyatın özü bütün gizlinləri
ilə bir güzgüdür. Onun həqiqətindən uzun müddət yayınmaq mümkün olsa da, əbədi
deyil. Əslində, Cahangir müəllim, sizin mənə avtoqrafla göndərdiyiniz kitabınız
barəsində ürək sözlərimi qələmə almaq istəyirdim. Sizə olan rəğbətim, hörmətim
həmişə şifahi şəkildə bildirilib. Böyük məhəbbət və qürurla söyləmişəm ki,
baxın, hansı tələbə müəlliminə "dədə”, müəllimi də ona "nənə” deyir? Sizin sadəliyiniz,
mehribanlığınız, səmimiyyətiniz həmişə tələbələrinizlə aranızda bu cür mənəvi
körpünü qura bilib. Bu qış ömrünüzün 75-ci pilləsinə qədəm qoyursunuz. Elə bu səbəbdən
də kitaba keçməzdən əvvəl sizin şəxsiyyətinizlə bağlı illərlə ürəyimdə mürgüləyən
bəzi fikirləri qələmə almaq istədim.
Ötən əsrin 70-ci illərində Bakı Dövlət
Universitetinin jurnalistika fakültəsində sözün həqiqi mənasında ideal müəllimlər
dərs deyirdilər. Düzlük, saflıq, müqəddəslik havasının içində idik. Sovet dövrü
idi. Quruluşun öz qayda-qanunu var idi. Amma müəllimlərimiz bizi savadlı,
dünyagörüşlü, əsl vətəndaş və milli ruhda yetişdirmək üçün əllərindən gələni əsirgəmirdilər.
Bilirəm ki, onların adlarını çəkməsəm, məndən inciyərsiniz: Əzizə Cəfərzadə,
Mir Cəlal, Qulu Xəlilov, Nəsir İmanquliyev, Famil Mehdi, Tofiq Rüstəmov, Şamil
Qurbanov, Şirməmməd Hüseynov... Jurnalistika fakültəsi bizim üçün bir Kəbə
eviydi. Biz müəllimlərimizi sevirdik, inanırdıq, müəllimlərimiz də bizə öz
doğmaları kimi yanaşırdılar. Qiymət kəsmək, tələbəni incitmək, ondan nəsə ummaq
- bu cür mənfi hallar fakültəmizin kollektivindən çox uzaq idi. Hətta təqaüd
ala bilməyən tələbə barəsində də onun özünün xəbəri olmadan xeyirxahlıqlar
edilirdi. Onda siz çox gənc idiniz. Bəlkə tələbələr arasında yaşıdlarınız da
var idi. Amma həmişə sadəliyiniz, həssaslığınız ilə seçilirdiniz. Siz bütün tələbələrin
doğması idiniz. Dərdimizdən-sərimizdən xəbər tutardınız.
İllər keçdi.
Fakültəmizin təkcə binası deyil, o müəllimlərin əksəriyyəti öz dünyasını, müəyyən
abı-hava da sanki "iqlim”ini dəyişdi. İçimdəki narahatlıq mənə əzab verirdi. Mən
əvvəlki fakültəmizi görmək istəyirdim. Doğrudur, indi də orada xətrini çox istədiyim,
elmi və pedaqoji fəaliyyətini təqdir etdiyim alicənab insanlar, eləcədə fədakar
müəllimlər, yaxın dostlarım çalışırlar. İnciməsinlər məndən, məhz o havanı ala
bilmirdim. Cahangir müəllim, nolar mənim fikirlərimi təqdir edin. Səmimiyyətimə
də inanın, çünki ömrüm boyu çalışmışam ki, həqiqəti deyim, ya da bu mümkün
deyilsə, susmuşam. İndi susmaq istəmədim. Sizə necə güvəndiyimi bilirsiniz.
Fakültəmizin əvvəlki çağlarını görmək istəyirəm. Bu naxışları vurmaq çətin
deyil ki, sizə? "Alim olmaq asandır, insan olmaq çətin” belə deyib müdriklər.
Qoy ikisi də çətinləşsin. Amma onları birləşdirən meyarlar, ənənələr və nəhayət,
qüdrətli idarəetmə var olsun. Umduğum budur!
Ətrafınızdakı dəyərli insanlar sizə kömək edərlər!
Siz 1968-ci ildən - məhz fakültəmizi
bitirən gündən bu ünvanda çalışırsınız. Kimin kim olduğu bəllidir. Sizin köhnə
tələbələriniz arasında necə böyük hörmət və məhəbbətiniz var, mən bunu yaxşı
bilirəm. İndiki nəslin xətrinə dəyməsin. Mən hələ də o dövrün ovqatındayam. Əlbəttə,
siz bütün zamanlarda öz mərdliyinizi saxlaya bildiniz. Qəlbiniz yaxşılıq və nəcib
hisslərlə doludur. Həmişə özünüz oldunuz! Dəyişmədiniz. Şöhrət sizə yaxınlaşdı,
siz onun ardınca getmədiniz. Siz bütün tələbələrin məhəbbətini qazandınız. Tale
elə gətirdi ki, çalışdığım telekanalda sizinlə bir neçə dəfə həmmüsahib oldum.
Bu yaşımda yenə də sizdən öyrənməkdən zövq aldım. Mənin ömürlük müəllimim! Mərd
insan həmişə dayaq olur, mayaklıq edir. Xəyanətdən, mənfi aura yaratmaqdan
uzaqda dayanır. Elə bu məziyyətlərinizə görədir ki, dara düşəndə də yenə sizi
axtarırıq. "Cahangir müəllimə deyərik” fikri artıq həmkarlarım arasında bir
çıxış yoluna çevrilib. Adınız çəkilən kimi çöhrələrdə işıq yanır. Çünki siz
etibarlı və xeyirxah insansınız.
Sizə belə məktub yazdığım üçün, məni
qınamayın. Ad gününüz ərəfəsində mənin də təbrikim belə alındı. İstədim ki, biləsiniz,
biz sizi çox sevir və qürur duyuruq. İndi isə tələbənizin sizin kitabınız barəsindəki
fikirlərilə tanış olun. Qiymətiniz maraqlıdır. Məni əlaçılıqdan salmayacaqsınız
ki? Yəqin ki, təqaüdümü "Kaspi” verməli olacaq.
Biləsiniz ki, "Dünya sözə qalacaq” adlı
kitabınıza yazdığınız avtoqraf əslində jurnalistlik fəaliyyətimə verdiyiniz
qiymət kimi məni çox kövrəltdi: "Azərbaycan ədəbi-ictimai mühitinin yüksək qiymətləndirdiyi,
insanlığı, peşəkarlığı ilə hər kəsin məhəbbətini qazanmış, müqəddəs fakültəmizi
bitirməsindən qurur duyduğum Flora xanıma-ən böyük arzu və diləklərlə-müəllifdən-
müəllimindən!” Sözün insan qəlbində yaratdığı ən dərin sevinc və fərəh hisslərindən
biri də məhz öz böyüyündən, müdrik sandığı insandan belə dəyəri duymaqdır. Ürəyinizə
və qələminizə sağlıq! Söz insanın içinin
ətri və xarakterinin göstəricisidir. Bəzən insanlar xoş söz deməyə də belə xəsislik
edirlər. Siz bütün mənalarda səxavətli və alicənabsınız. Sizdən öyrəniləsi
nümunələr çoxdur. Məktəb belə yaranır.
1977-ci ildən - universiteti bitirəndən
mətbuatdayam. Düz 40 ildir ki, əlimdə qələm adidən aliyə - çoxundan yazmışam.
Amma həmişə sizin - əziz müəllimlərim haqqında söz deyəndə istər-istəməz həyəcan
keçirmişəm. Bu gün də belədir. Həmişə bu ruhdakı yazılarımı müəllimlərim
qarşısında bir hesabat və imtahan sanmışam. Böyük həvəslə kitabınızı oxudum. 27
ədəbi tənqidi məqaləniz - elmi publisistik əsəriniz milli düşüncəmizin müasir əks-sədası
təsirini bağışladı. Kitaba ön söz yazmış filologiya elmləri doktoru, professor Nəsir
Əhmədlinin fikirləri ürəyimdən xəbər verdi: "Cahangir Məmmədlinin ən adi
yazılarında da bədii sözün işartısı var. Onun üçün ən yaxşı bədii əsər ədəbi aləmdə
bir hadisədir və o, həmin hadisəyə mütləq reaksiya verir. Bu kitabda Cahangir Məmmədlinin
hadisə hesab etdiyi əsərlərə rəyləri toplanıb.” Bu məqamda sizin bizə
verdiyiniz bir tövsiyəni də xatırladım: "Bədii ədəbiyyata yaxın olmayan adamın
öz üslubu olmur”. Həyat-qələmlə uzun illər bağrıbadaş olmağım da sübut etdi ki,
siz haqlısınız. Bilirsinizmi, Cahangir
müəllim, siz sözün səsini eşidən, yerini bilən, qüdrətini duyan və üstəlik də
onun xiridarı olan alim pedaqoqsunuz. Bu səbəbdən də yazılarınızın şah damarı
elə sizin səmimiyyətinizdir. "Sənətkarın
estetik ideallar sistemi” adlı yazınız sizin də müəlliminiz olmuş yazıçı Mir Cəlalın
iki cildliyi ("Mir Cəlal həyatı, mühiti, ədəbi, elmi və pedaqoji fəaliyyəti”-2014.
"Nurlar” nəşriyyatı.) barəsindədir. Mir Cəlal XX əsr Azərbaycan ədəbiyyatının
bünövrəsini qoyanlardan biridir. Mir Cəlal həm də çoxumuzun ən unudulmaz,
sevimli müəllimi olmuşdur. Yaradıcılığı və pedaqoji fəaliyyətilə oxucularını, tələbələrini-millətini
həmişə kamilləşdirmık istəyi ilə yaşayan və bu missiyanı ləyaqətlə yerinə
yetirməyi bacaran Mir Cəlalın ömür yolundakı məziyyətlərini bir daha göz önündə
canlandırırsınız. "Bu böyük yazıçıdan, müəllimdən və alimdən öyrənmişik, öyrənirik
və öyrənəcəyik” deyirsiniz. Cahangir müəllim, bax haqq budur, söz budur! Yeni nəslə
tapşırıq da elə budur!
Xalq yazıçıları Anar və Elçinin yaradıcılıqları
və onların barəsində yazılanlarla bağlı qələmə aldığınız ədəbi-tənqidi məqalələrdə
də siz bədii sözün qüdrətini ustalıqla təqdim edərək zamanın ucalığında dayanan
ədiblərimizə bəslədiyiniz ehtiramınızı, sevginizi gənclərə aşılıya bilirsiniz.
Ümumiyyətlə, məhz sizi oxuyanı düşündürürsünüz. Ədəbi-tənqidi məqalənin bədii əsər
kimi maraqla bir nəfəsə oxunması müəllifin məharətidir. Bu sizin qələminizin
gücüdür.
Kitabda mənim çox sevdiyim, şəxsiyyətinə
böyük rəğbətim olan Sona Vəliyevanın yaradıcılığı ilə bağlı dörd məqalə oxudum.
Ayrı-ayrı vaxtlarda mətbuatda da diqqətimi çəkən bu yazılarda Sona xanımın yaradıcı portreti mükəmməl
alınıb. Sözlə bu missiyanı ustalıqla yerinə yetirmək həm xanım yazarın
istedadını, həm də müəllifin sözə verdiyi dəyərin önəmliliyini şərtləndirir. Sona Vəliyevanı "Yollara yağan yağışın poetik
ovqatı”nda zərif duyğulu bir şair, "İşığa gedən yolun roman taleyi”ndə milli
ruhlu yazıçı, "Şəxsiyyətin və yaradıcılığın uyarlıq məqamı”nda fədakar tədqiqatçı
, "Klassikaya yeni qayıdış” da isə vətən sevdalı yaradıcı şəxsiyyət kimi
görürük. Ayrı-ayrı adlarda və vaxtlarda
yazılsa da bu ədəbi-tənqidi məqalələrin bir sarı simi var: Vətənə, xalqa
bağlılıq, günün aktual problemlərini görməyi bacarmaq, ədəbi istedad və sonu
görünməyən zəhmət.
Vaqif Səmədoğlu, Şirməmməd Hüseynov,
Yavuz Axundlu, İsa Həbibbəyli, Rəşad Məcid, Afaq Məsud, Aqil Abbas, Bəhruz
Axundov, Əli Əmirli, Natəvan Dəmirçioğlu, Zərdüşt Şəfizadə və digərlərinin
yaradıcılığı barəsində yazdığınız məqalələrdə də estetik ideyalarınıza sadiq
qalmısınız. Siz böyük rəğbətlə qəhrəmanlarınızın vətəndaşlığından, ziyalı
mövqeyindən, şərəfli ömür yollarından danışır, onların hər birini örnək kimi təqdim
edirsiniz. Sevdirməyi bacarırsınız, elə bu da sizin mənəviyyatınızın
güzgüsüdür. Dəyişməz xarakterə, dəyanətə və iradəyə sahibsiniz. Sanmayın ki,
illər sizi qocaldıb. Zəhmətiniz, səmimiyyətiniz, elminiz, ətrafa olan münasibətiniz
sizi ucaldıb. Üzünü görmədiyiniz qələm
sahibinin qəzetdə şeirlərini oxuyub təsirlənirsiniz , onun barəsində mətbuatda
çıxış edirsiniz, xoş sözlər söyləyirsiniz, uğur olsun deyirsiniz. Gənc qələm
sahiblərinin boynuna elə haqq qoyursunuz ki, onların yaxşı yazmaqdan başqa əlacları
olmur. Nə gözəl üsuldur. Tərif bəzən tənqidin missiyasını elə məharətlə yerinə
yetirir ki... Buna işıq ucu tapmaq deyirlər. Bu seçimi, bu böyüklüyü də hər kəs
bacarmaz. Zəmanətləriniz də həmişə özünü doğruldur. Tələbəniz Ulusay Akif barəsində
yazdığınız "Qadın şeirə sığmaz, qadın şeirin özüdür” ədəbi münasibətinizi
yuxalmış ürəklə qarşıladım. Bir ovuc bulaq suyunu xatırladan şeirlərə həssaslıqla yanaşmanız, qiymətləndirməniz
sizin söz xiridarlığınızdan və gənc istedadlara olan qayğınızdan xəbər verir.
Bir də siz bu gənc şairi elə məsuliyyətə çəkirsiniz ki, pis yazmağa, tələskənliyə
haqqı yoxdur. İşartı görmək özü də bir istedad və böyüklükdür. Sizin verdiyiniz
məsləhətlərin, hətta tənqidin özündə də ədəbiyyatın, şerin tələblərinin çox incəliklə
ifadə olunması da inama, gələcəkdə daha yaxşı olacaq ideyasına söykənir. Əlbəttə,
bütün məqamlarda istedadın var olmasının fərqinə varırsınız. Siz səhvləri
bağışlamağı bacararsınız, amma günahı əfv etməzsiniz. Mən yanlış düşünmürəm ki,
əziz müəllimim?!
Bu kitabda mənim üçün maraq kəsb edən
bir məsələ də var. Bütün ömrü boyu sözlə işləyən, onun minbir rəngini əzbər bilən,
illərlə tələbələrinə öyrədən Cahangir Məmmədli öz kitabının adını cavan bir
şairin əlyazma şəkilində oxuduğu şerlərindən təsirlənərək onun misralarından
seçir? Eyni başlıqlı yazını oxudum və
sizi başa düşməyə çalışdım. Bu da gəncləri tanıtmağın bir yoludur. Əgər Ələmdar
Cabbarlının şeirləri sizi bu qədər valeh edibsə, demək, ədəbiyyatımıza,
şeirimizə çox istedadlı bir şair gəlib. Stolumun
üstündə qalaqlanmış şeir kitablarını son vaxtlar çox ehtiyatla vərəqləyirəm. Zəif
şeirlər məni onlara yaxın düşməkdən uzaq salıb. Məhz yazınızdan sonra oxudum və
sizə minnətdaram, Cahangir Məmmədli! Ürəyim
parçalandı:
Vətən həsrətiylə,
yurd həsrətiylə
Gözümdən tökülən
yaşım göynəyir.
O eli, obanı xatırladıqca
Yaddaşım od tutur,
huşum göynəyir.
Mən indi
bildim ki, sizi düşündürən nə imiş? Bu ovqatdan sonra əllərim sözümə baxmadı,
dayandım. Sizinlə müxtəlif tədbirlərdə, fakültəmizdə tez-tez görüşürük,
telefonla danışırıq. Bilirsinizmi, indi nə arzulayıram? Növbəti yaşınızı
Qarabağda- Ağdamda qeyd edək! Aparıcı da icazə versəniz, mən olum. Bilmirəm, bu
sözüm yerinə düşdümü?
Flora
XƏLİLZADƏ,
əməkdar
jurnalist