Həm kürdlər, həm də katalonlar aldadıldılar
Bir neçə gün əvvəl İraqın Kürd Muxtariyyətinin rəhbəri Məsud Bərzani
istefa verib. Onun istefası barədə məktubu muxtariyyət parlamentinin qapalı
toplantısında oxunub. M. Bərzani noyabrın 1-də başa çatan səlahiyyət müddətinin
uzadılmasını qəbul etməyəcəyini vurğulayıb. Bununla da 2015-ci ildən İraqın
Kürd Muxtariyyətinin rəhbəri postunu tutan və iki dəfə səlahiyyət müddəti
uzadılan M.Bərzaninin istefası rəsmiləşib.
Bundan sonra müxtariyyətin başçısı vəzifəsini müvəqqəti olaraq
Bərzaninin qardaşı oğlu və muxtariyyətin baş naziri Neçrivan Barzani icra
edəcək. Əyalətə yeni başçı seçilənədək qərarları muxtariyyətin parlamenti və ya
Ədalət Şurası qəbul edəcək. N.Barzani isə həmin qərarların icrası ilə məşğul
olacaq.
Muxtariyyət parlamentinin qərarına əsasən, İraqın Şimalındakı Yerli
İdarəetmənin Başçılıq Rəyasət Heyəti də ləğv olunub.
Məlum olduğu kimi, kürd muxtariyyətində vəziyyət heç də sabit deyil
və yerli hökumət daxilində narazıların sayı durmadan artır. Belə olan halda M.Bərzaninin
istefasından sonra bölgədəki vəziyyət sabitləşəcək, yoxsa daha da
gərginləşəcək?
Mövzu ilə bağlı "Kaspi” qəzetinə açıqlamasında "Oğuz” Müstəqil Araşdırmaçılar Mərkəzinin rəhbəri, analitik Vüqar
Zifəroğlu bildirdi ki, M.Bərzaninin istefası müəyyən mənada kürd muxtar
idarəetməsinin yumşaq ötürülməsidir: "Yəni, əslində vəziyyətin
yumşaldılmasından söhbət gedir. Yeni gələn komanda isə əslində heç də yeni
deyil. Burada da Bərzaninin yaxın ətrafı və digər namizədlər var. Rəhbərliyə
gələn komandanın başlıca məqsədi Türkiyə ilə münasibətlərin normallaşması
olacaq. Çünki bu, Kürd Muxtariyyəti üçün son dərəcə vacibdir. Onların neft
ixracı məhz Türkiyə vasitəsilə həyata keçirilib. Eləcə də iqtisadi yatırımlar
və sair Türkiyə vasitəsilə reallaşdırılırdı. Hesab edirəm ki, yenidən Türkiyə
ilə münasibətlərin qurulması ön planda olacaq. Bundan başqa, rəsmi Bağdadla
münasibətlərin normal məcraya yönəldilməsi məsələsi də muxtariyyətin yeni
rəhbərliyinin qarşısında duran məsələlərdəndir”.
V.Zifəroğlunun sözlərinə görə, "Kürdüstan” adlı dövlətin elan
edilməsi indiki zamanda mümkün deyildi: "Çünki buna xarici və daxili faktorlar
imkan vermir. Xarici faktorlar dedikdə, Yaxın Şərqdə baş verən geosiyasi
prosesləri, daxili faktorda isə, konkret regional dövlətlərin məsələyə
münasibətini nəzərdə tuturam. Qeyd olunan faktorlar yeni dövlətin yaranmasını
mümkün etmirdi. Referendum sadəcə bir oyun idi və bu oyunda Bərzani uduzdu. İndiki
məqamda muxtariyyət üçün Bağdadla, İranla və eləcə də Türkiyə ilə
münasibətlərin normallaşması son dərəcə vacibdir. Çünki bu olmasa, muxtariyyət
öz nüfuzunu itirəcək, həm də daxildə narazılıqlar güclənəcək. Bir sıra kürd
tayfaları var ki, onlar ümumiyyətlə referendum qərarının və bu oyuna getməyin
əleyhinə idilər”.
"Atlas” Araşdırmalar Mərkəzinin
rəhbəri, politoloq Elxan Şahinoğlu bildirdi ki, Bərzani
istədiyi nəticəni əldə etmədiyi üçün istefa verdi: "Əslində referendum etməklə
çox böyük riskə getdi. Bərzani düşünürdü ki, Amerika və ya İsrail onu qoruya
biləcək. Elə sonuncu çıxışında da Amerikanı ittiham etdi. O düşünürdü ki, ABŞ dəstək verəcək, amma bu, baş vermədi
və məcbur olub vəzifəsindən istefa verdi. Çox maraqlıdır ki, ona qarşı olan
müxalifət də güclənib. Türkiyənin xarici işlər naziri Çavuşoğlunun da maraqlı
açıqlaması oldu ki, əslində Şimali İraqdakı kürdlərin müstəqillik və
referendumla bağlı vahid fikri yox idi və müəyyən bir hissə buna etiraz edirdi.
İndi isə etiraz edənlərin səsi güclənib. Çünki şimali İraqın vəziyyəti
ağırlaşıb, sərhədlər bağlanıb, iqtisadi çətinliklər yaranıb və bununla yanaşı,
Kərkük kimi bir şəhəri itiriblər. Ona görə də Bərzani bu məsuliyyəti bölüşməmək
üçün vəzifəsindən istefa verdi. Yox, əgər müstəqillik ona divident gətirsəydi,
problemlər olmasaydı, Amerika dəstək versəydi, inanmıram ki, vəzifədən gedərdi”.
E.Şahinoğlu əlavə etdi ki, kürdlər arasında müxtəlif qruplaşmalar var
və onlar arasında silahlı toqquşmalar ola bilər: "Əvvəllər Bərzaniyə bağlı
qruplarla Təlabaniyə bağlı birləşmələr savaşırdılar və demək olar ki, şimali
İraqda vətəndaş müharibəsi gedirdi, daha sonra barışdılar. Son hadisələrdən
sonra Təlabani tərəfdarları Bərzani dəstəkçiləri ilə tərs düşüblər. Ona görə də
mümkündür ki, bölgədəki liderlik uğrunda mübarizədə çox kəskin toqquşmaların
şahidi olaq”.
Politoloqun fikrincə, referendumun nəticələri indiki halda
dondurulub: "Bununla bağlı Türkiyə və İranın tələblərinin nədən ibarət olması
maraqlıdır. Referendumun dondurulması indiki vəziyyət üçün keçərlidir, amma ola
bilsin 10-15 ildən sonra münasib zaman yetişən kimi yenidən müstəqilliklərini
elan etsinlər. Çünki həmin sənəddə nəticələrin hansı vaxtı əhatə etməsi
göstərilmir. Ona görə də bu məsələ hələ qaranlıq qalır. Fikrimcə, son hadisələrdə
elə bir zərbə aldılar ki, yaxın illər ərzində müstəqillik haqqında düşünmələri
alınmayacaq. Elə katalonları da eyni vəziyyət gözləyir. Belə demək olar ki, həm
kürdlər, həm də katalonlar aldadıldılar”.
Bəxtiyar MƏMMƏDLİ