“Hədəfim Azərbaycanda “Youtube”dan ən çox qazanan sənətçi olmaqdır” - Fenomen
Elcan Rəsulov: Sosial şəbəkə
vasitə ilə məşhurlaşanların istəyi sonradan televiziya ekranlarında görünməkdir
Onunla zaman sürətlə keçir. Pozitiv enerjisi, fərqli ab-havası var.
Danışıb-gülməyi sevdiyi qədər də, yeri gəldikdə ciddiyyəti ilə insanları təəccübləndirməyi
bacarır. Müsahibimiz komediya aktyoru, stund up ustası Elcan Rəsulovdur. Onunla
sosial şəbəkələrin yaratdığı imkanlardan danışdıq.
- Günlük olaraq sosial şəbəkələrə
nə qədər zaman sərf edirsiniz?
- Demək olar ki, hər gün 6 saat sosial şəbəkədən istifadə edirəm.
- Sosial şəbəkələr siz sənətçilərə
nələr qazandırır?
- Birbaşa olaraq ünsiyyət, müəyyən mənada pul qazandırır. Onu da qeyd
edim ki, bu yaxınlarda "Youtube” kanalımı yaratmışam. Yaxın bir neçə il ərzində
sosial şəbəkə üzərindən ən çox qazanan sənətçilərdən biri də mən olacam. Hədəfim
Azərbaycanda "Youtube”dan ən çox qazanan sənətçi olmaqdır.
- Sizcə, izləyicinin çox
olması üçün məşhurluğun, yoxsa istedadın
rolu böyükdür?
- İzləyicinin çox olması üçün ilk növbədə tamaşaçının zövqünü oxşamaq
lazımdır. Gündəmlə ayaqlaşmaq, izləyicilərdən biri olmaq, onların problemini
yaxından izləmək, yeri gəldikdə, tamaşaçı rolunu oynamaq əsas məsələlərdən
biridir.
- Sizcə, blogger yaxşı
aktyor ola bilərmi?
- Yaxşı aktyor əgər istəsə, yaxşı blogger ola bilər. Yaxşı blogger isə,
yaxşı aktyor ola bilməz. Çünki aktyorluq özü bir istedaddır.
- Ancaq biz bu gün
bloggerləri seriallarda, filmlərdə az görmürük.
- Bu, filmləri çəkən rejissorların istəyindən asılıdır. Onlar məşhur
bloggerlərin reklamından istifadə etmək üçün bu addımı atırlar ki, daha çox
tamaşaçı cəlb etsinlər. Bir dönəm rejissorlar elə düşünürdülər ki, tanınmış
bloggerlərdən öz filmlərində istifadə etsələr, filmləri daha çox satılacaq.
Ancaq bu təcrübə özünü doğrultmadı.
- Doğurdanmı, sosial şəbəkələr
televiziyaları üstələyib?
- Dünyanın ən inkişaf etmiş ölkələrində belə televiziya öz sanbalını
qoruyub-saxlamağı bacarıb. Sosial şəbəkələr heç vaxt televiziyanı üstələyə bilməz.
Çünki televiziya peşəkar qurumdur. Sosial şəbəkə vasitə ilə məşhurlaşanların
istəyi televiziya ekranlarında görünməkdir. Sosial şəbəkə vasitəsilə məşhurlaşan
ifaçılarımız az deyil. Orada sərhəd yoxdur və hər kəs istədiyi şəkildə özünü təqdim
etmək imkanı əldə edir. Sən orada ağılsızlıq, hörmətsizlik edə bilərsən, özünü ən
pis yola qoyub, məşhurlaşa da bilərsən. Ancaq televiziyada tamaşaçıya hörmət
edilir. Misal üçün, ailənizlə televiziya qarşısında əyləşib, hər hansı verilişi
rahatlıqla izləyə bilərsiniz, ancaq sosial şəbəkədə əlin elə bir videoya toxuna
bilər ki, ona görə ailənin yanında utanarsan.
Sosial şəbəkəyə çox da arxayın olmaq olmaz.
- Amma sosial şəbəkənin
verdiyi azadlığı televiziya vermir.
- Bu da sosial şəbəkənin
üstünlüyüdür. Sosial şəbəkədə hansısa bir videoya baxırsan, onun ardınca elə
bir video başlaya bilər ki, baxanda peşman olursan. Elə bir reklam qarşınıza
çıxar ki, siz ondan utanarsınız.
- Elcan Rəsulov sosial şəbəkədə
nə qədər azaddır?
- Mənim müəyyən çərçivələrim yoxdur, hər şeydən danışa bilərəm, hətta
yumordan da. Yumor olduğu üçün tamaşaçı məni qınamaz. Ancaq sosial şəbəkədə müəyyən
mənada tanınan insanlar var ki, onların rahat, sərbəst davranması absurddur.
Misal üçün, biri çalışır ki, özünü dindar kimi göstərsin, ətrafına dini inancı
olanları toplamağa başlayır. Başqa biri açıq-saçıqlıqla özünü tanıtmağa cəhd
edir, çevrəsinə daha sərbəst olanları toplayır. Sosial şəbəkədə hər cür insan
var.
- Sosial şəbəkədə şəxsiyyətini
gizlədən, özünü fərqli göstərməyə çalışanlar da az deyil.
- Onlar müəyyən tamaşaçı kütləsi toplayana qədər belə obrazdan-obraza
girirlər. Bir müddətdən sonra dostluğundakı insanlar səni olduğun kimi tanımağa
başlayırlar.
- Sizcə, bir insanın
sosial şəbəkədəki səhifəsi onu xarakterizə edirmi?
- Haradasa bəli. Ancaq bəzi məşhurlar var ki, onların sosial şəbəkədəki
hesabını kimlərsə idarə edir. O sənətçi özünü necə tanıtdırmaq istəyirsə, o
istiqamətdə göstərişlər verir və bu işdə PR menecerləri sənətçilərə kömək edir.
Belə məşhurlarımız çoxdur. Onların sosial şəbəkəni idarə etmək anlayışı
olmadığından işlərini köməkçiləri edir. Çünki o səhifələri özü idarə etsə, hörmətdən
və gözdən düşə bilər. Ona görə bu sahəni daha yaxşı bilənlərə həvalə edirlər,
onlar da pulun müqabilində işlərini görürlər.
- Bir müddət Kəbirlə
birlikdə siz özünüz də videolar çəkməyə başladınız. Bu, tutarlı olmadığı üçünmü
davam etdirmədiniz?
- Əslində, onunla birlikdə çəkdiyim videolar tutarlı oldu. Hətta o qədər
tutarlı oldu ki, Kəbirə bundan sonra toy təklifləri gəlməyə başladı. Kəbir onun
üzərindən seriala çəkilməyə başladı. Bu, sadəcə məndə bir həvəs idi. Yenə də
bunu davam etdirmək niyyətindəyəm.
- Bunu daha peşəkar şəkildə
edəcəksiniz, yoxsa əvvəlki kimi həvəskar formada?
- "Youtube” peşəkar işləri sevmir. Bu bütün dünyada belədir.
"Youtube” izləyiciləri daha çox həvəskar çəkilişlərə üstünlük verir. Mənim
"Youtube”da yeni bir kanalım var, adı Elcan Rəsulovdur. 2300 izləyicim var.
Kanalımın 2 milyon300 min olmaq ehtimalı var. "Youtube” kanalında təkcə
Azərbaycan dilində deyil, eyni zamanda rus və ingilis dillərində materiallar
hazırlayacağam. Belə ki, milli Azərbaycan nağıllarını rus və ingilis dillərində
səsləndirib göstərməyə çalışacam. Başqa ölkələrdən olan balaca uşaqlar bu
nağılları dinləyib, ölkəmizin mədəniyyəti haqqında məlumatlı olacaq.
- İngilis və rus dilini
bilirsinizmi?
- Əlbəttə.
- Sizcə bu, xarici
uşaqların diqqətini cəlb edə biləcəkmi?
- Məncə, edəcək. Ən azından, bir ingilis anası övladını yatıranda
Elcan Rəsulovun videosu onun qarşısına çıxacaq və onun səsləndirdiyi "Məlikməmməd”
nağılını övladına dinlətdirəcək.
- Bəzən deyirlər ki,
"Youtube”-da ən çox izlənmə reytinqi toplayan videolara müdaxilələr olunub.
- Sosial şəbəkəni idarə etməyi bacarmayanlar belə fikirlər səsləndirir.
İndi sosial şəbəkə rəhbərləri özləri də buna imkan vermirlər. Hətta aktivliyi
az olan istifadəçilərin hesablarını silirlər. Tanınmış ifaçılar deyirlər ki,
sosial şəbəkələrdə izləyiciləri artırırlar. Əgər sizin videonuzu 100 min insan
izləyirsə, demək ki, siz 100 milyona maraqlısınız.
- Elcan Rəsulovun tamaşaçı
kütləsində daha çox hansı nəsil üstünlük təşkil edir?
- Mən hər nəslin zövqünü oxşamağı bacarıram. Bəzən yolda məni görəndə,
"səni tanıyıram” deyib yaxınlaşır və isti münasibət göstərirlər.
- "Ər və arvad” layihəsi
bitdi və bildiyimiz qədəri ilə, Kəmalə Piriyeva ilə yeni layihə üzərində
çalışırsınız.
- Yeni layihəmiz "1 kişi və 1 qadın” adlanır. Köhnə layihə yeni adda
tamaşaçılara daha peşəkar səviyyədə təqdim olunacaq. Yenilik etmək lazım idi.
- Sizcə, bu, tutarlı olacaqmı?
- Əlbəttə ki, "Ər və arvad” da
tutarlı layihə idi, sadəcə, çəkilişlərimiz gec-gec olurdu deyə, tamaşaçıları
qaçırdıq. Həftədə bir seriya təqdim etmək lazım olduğu halda, bəzən 2 aya bir
seriya təqdim edirdik. Düşünürəm ki, bu da tamaşaçıları uzaqlaşdırdı. Burda
özümüz-özümüzə şərt qoymuşuq ki, nə olursa-olsun, hər həftə tamaşaçılara yeni
seriya təqdim edəcəyik.
- Nə üçün bizdə qadın və
kişi üzərində qurulan verilişlər daha çox izlənilir?
- Son 10 ildə bizdə qadın və kişi münasibətlərində problemlər daha da
artmağa başlayıb. Hazırda
televiziyalarda bir çox verilişlər qadın və kişi arasında baş verən problemlərin
üzərində qurulub. Son bir neçə ildə bu səbəbdən psixoloqlara müraciət edənlərin
sayı artıb. Əvvəllər bizdə belə bir hal yox idi. Bir neçə il bundan öncəyə qədər
bizdə bu qədər psixoloq yox idi və psixoloqlara müraciət edənlər də bu qədər
deyildi.
- Deyirlər, Azərbaycanda
stund up yoxdur. Bu fikrə münasibətiniz necədir?
- Kim deyir ki, Azərbaycanda stund up yoxdur, çağırsınlar məni, gedim
onlara danışım. İndi Yeni il ərəfəsidir, ən böyük şirkətlərin korporativ tədbirlərinə
gedib stund up danışıram. Məni heç vaxt heç kim heç kimə bənzətmir. Onlar bilir
ki, səhnədə Elcan Rəsulov danışır və bu mənim öz üslubumdur. Dünyada tanınan
stund up-çıların heç birinə baxmıram, heç mənə maraqlı da deyil ki, onlar nə
danışırlar. Ona görə ki, birdən özüm də bilmədən oradan nəsə beynimin alt
qatına hopmuş olar, kiməsə danışaram. Ona görə də onların çıxışlarını izləmirəm
və mənə maraqlı deyil. Hərə öz qabına və beyninə uyğun şəkildə gülüş yaradır.
Eyni əhvalatı siz danışarsınız, gülməli olmaz, mən fərqli danışaram, gülməli
olar. Bəs onda bu insanlar nəyə gülür?
- Elcan Rəsulovun danışdığı əhvalatlar
niyə gülməlidir?
- Yumor reallıqdan yaranır. Bir də əsas məsələ, gərək gündəm üzərindən
çalışasan. Hər gün bu yumor yenilənir. Sənin
bir həftə qabaq yazdığın bir həftə sonra kiməsə maraqlı olmaya bilər. Belə məqamlara
diqqət etmək lazımdır. Bunun da bir yolu var, hər gün maraqlanmaq, hər gün
oxumaq.
- 2019-cu ilin son həftələrini
yaşayırıq. Geridə qoyduğumuz bu ili sizin üçün uğurlu hesab etmək olarmı?
- 2019 o qədər də uğurlu il olmadı mənim üçün. Düzdür, yeni işlər,
yeni layihələr təqdim etdim. Ancaq buna
baxmayaraq, ilin əvvəlində qarşıma qoyduğum daha böyük məqsədlər var idi
ki, onlar həyata keçmədi. İstəyirəm ki,
o arzular 2020-ci ildə həyata keçsin.
- 2020-ci ildən gözləntiləriniz
nələrdir?
- 2020-ci ildən gözləntilərim çoxdur. İstəyirəm, yeni ildə əməkdar
artist adına layiq görülüm. Bunun üçün də daha çox çalışacam. Sosial şəbəkələrdə
bir az da aktivləşib, insanlara daha da yaxınlaşacam. Televiziya layihələrində
geniş və uğurlu şəkildə təqdim olunmağı da hədəfləyirəm.
Xəyalə Rəis