“Öhdəliklərin müddəti uzadılmasa, neft ölkələrinin gəlirləri aşağı düşəcək”
OPEC-in neft
hasilatının sutkalıq 1,8 milyon barrel azaldılması qərarından sonra bazarda qiymətlərdəki sabitləşmə tendensiyası
davam edir. Bir az da dəqiq olsaq, deyə bilərik ki, qərardan sonra qiymətlər 14
faiz artaraq 55-60 dollar arasında dəyişir. Bu stabilləşmə və 60 dollara yaxın
qiymət demək olar ki, OPEC və qeyri-OPEC
ölkələrini qane edir. Bu günlərdə
OPEC-in əsas üzvlərindən biri hesab olunan Səudiyyə Ərəbistanı da 2017-ci ildə
qiymətləri 60 dollar civarında saxlamaqda maraqlı olduğunu bildirib. Lakin
sözügedən razılaşma 2017-ci iln iyun
ayına qədər qüvvədədir. Belə demək olarsa, müddətin bitməsinə az bir zaman
qalıb. Bəs görəsən gələcəkdə də bu tendensiya davam etdiriləcəkmi? Praktik
olaraq buna nail olmaq mümkündürmü? Səudiyyənin bu planı perspektivdə nə dərcədə
realdır? Mövzu ilə bağlı ekspertlərin rəyini öyrəndik.
İqtisadçı-alim
Vüqar Bayramov deyir ki, 60
dollara yaxın stabilləşmə birmənalı şəkildə təqdirəlayiqdir: "Nəticə etibarilə
bu qiymət tərəflərin gəlirlərinin artmasına xeyli müsbət təsir göstərib. Nəzərə
alsaq ki, neftin qiymətlərinin aşağı düşməsindən təqribən 3 ilə yaxın müddət
keçib, artıq 100 dollara öyrəşmiş neft ölkələri neftin aşağı qiymətlərinə
adaptasiya olunub. Bu baxımdan mövcud qiymət indiki halda neft ölkələrinin
maraqlarına xidmət edir. Ona görə də indiki məqamda neft ölkələri
çalışmalıdırlar ki, bu qiyməti qoruyub saxlaya bilsinlər. Burada vacib məqamlardan
biri məhz OPEC-ə üzv ölkələrin hasilatın azaldılması ilə bağlı imzaladığı öhdəliklərə
əməl etməsidir. Bildiyiniz kimi, öhdəliklərin müddəti artıq bu ilin
yayında başa çatacaq. Hesab edirəm ki,
bu halda həmin öhdəliklərə əməl edilməsi və uzadılması çox vacibdir. Əgər bu
müddət uzadılarsa, nəticə etibarilə imkan verəcək ki, artıq 2017-ci ilin ikinci
yarımilində də mövcud qiymətləri saxlamaq mümkün olsun.
İqtisadçı hesab edir ki, növbəti aylarda da bazarda formalaşan və
özünə yer tapan qiyməti saxlamaq mümkün olacaq: "Bu xeyli dərcədə real görünür.
Əgər növbəti dövrdə xüsusən, ABŞ kəskin ixracatı artırmazsa və hər hansı bir
siyasi faktor olmazsa, növbəti aylarda mövcud qiymət qorunub saxlanıla bilər.
İlin ikinci yarısında isə qiymətlər birbaşa olaraq OPEC-in hasilatın
azaldılması ilə bağlı öhdəliyini
uzadıb-uzatmamasından asılı olacaq. Yəni əgər hasilatın azaldılması ilə bağlı
yeni qərar qəbul edilərsə, o zaman 2017-ci ilin ikinci yarısında da artıq
mövcud qiymət səviyyəsini saxlamaq mümkün olacaq. OPEC və qeyri-OPEC ölkələri
hasilatın azaldılması ilə bağlı qərarı dəstəkləməzsə, bu halda ilin ikinci
yarısında qiymət azalmaları qaçılmazdır. Artıq 2017-ci ilin ikinci
yarısında qiymətin dəyişməsi və necə
formalaşması birbaşa OPEC-in hansı qərar qəbul etməsindən asılı olacaq. Məntiqlə
götürsək, tərəflər özləri də bu öhdəliyi saxlamaqda maraqlı olmalıdırlar. Əgər
tərəflər bu öhdəliklərə əməl etməyəcəklərsə, bu amil onların gəlirlilik səviyyəsinin aşağı düşməsinə
səbəb olacaq. Çünki öhdəliklərin uzadılmaması qiymətin yenidən aşağı düşməsinə
birbaşa təsir edəcək”.
İqtisadiyyat Nazirliyi
İqtisadi İslahatlar Elmi-Tədqiqat İnstitutunun aparıcı elmi işçisi
Pərviz Heydərovqəzetimizə açıqlamasında bildirdi ki, qiymətlər
48-58 dollar arasında dəyişəcək: "Məsələ
bundadır ki, Amerika dünya bazarlarına satış üçün xam neft çıxarışı həcmini
getdikcə artırır. Bir tərəfdən də OPEC və ona üzv olmayan ölkələr hasilatı məlum
olduğu kimi azaldır. Məhz bunun müqabilində ABŞ-ın ixracı getdikcə artırması
sözsüz ki, heç də təsadüfi xarakter daşımır. Deməli, bu, qiymətləri ya
ucuzlaşdırmaq məqsədi daşıyır, ya da ki, OPEC-i və onu dəstəkləyənləri qərarlarından
vaz keçməyə çağırır. Məsələn, ötən həftələrin birində adı çəkilən ölkə tərəfindən
dünya bazarlarına düz 7 milyon barrel həcmində xam neft çıxarıldığı deyildi.
Eyni zamanda isə OPEC-in bazarda məhz göstərilən həcmdə "azaldılmaya və
yaxud ixtisara" getdiyi bildirilir. Odur ki, maraqlı situasiya yaranır.
Bir tərəfdən, neftin bahalaşması ABŞ-a bu sahədə öz ixracını (şist hasilatını
canlandırmaq yolu ilə) əslində, genişləndirməyə imkan açır, digər tərəfdən isə
bu, adı çəkilən tərəfə bazarda təklifi açıq-aşkar yüksəltməyə imkan yaratmaqla,
belə çıxır ki, bahalaşmanı əngəlləməyə meydan açır. Bəli, aydın məsələdir ki,
ABŞ neftin dünya bazar qiymətlərinin çox da yüksəlməsini istəmir. Lakin iş
ondadır ki, bu sahədə çox ucuzlaşma da Amerika üçün sərfəli deyil. Belə ki,
neft 40 ABŞ dolları həndəvərində olanda Amerikada şist sənayesi durğun vəziyyətlə
üzləşir. Odur ki, neftin 1 barelinin qiymətinin hələ uzun müddət 48-58 dollar
arasında rəqs edəcəyi gözlənilir. Buna isə qarşılıqlı olaraq, həm OPEC-in istəyi,
həm də ABŞ-ın siyasəti şərait yaradacaq”.
Şəbnəm
Mehdizadə