Gözəl nənə - Fotolar
Latın
Amerikasının «sabun köpüyü» seriallarının qəhrəmanı Meksikada imkanlı ailədə
doğulub. O hələ 16 yaşında «Caballero» kişi jurnalının üst qabığında çılpaq şəkli
ilə mühafizəkar valideynlərini şoka salıb. «Anam və qardaşım dəhşət içində idilər»
- Veroniko Kastro xatırlayır: «Utanmırsan?» - hər ikisi hirslənmişdi. O, "daha
heç vaxt çılpaq kamera qarşısına çıxmayacağam” – deyə valideynlərinə söz versə
də, bu sözünü 60 yaşında – oğlu Mişelin filmində tamamilə çılpaq çəkilərkən
pozdu. Veronika gəncliyindən bəri uğur naminə hər şeyə hazır idi. Maraqıdır ki,
riskləri Veronikaya yalnız şöhrət gətirirdi.
Bir
çox "ulduz” aktyorlardan fərqli olaraq, o, karyerasına erkən başlayıb. Ancaq təhsilini
də unutmayıb. Universitetdə politologiya üzrə təhsil alaraq diplomat ixtisasına
yiyələnib. İxtisası üzrə işləməyərək aktrisa karyerasını seçib və səhv etməyib.
Ona dünya şöhrətini isə «Varlılar da ağlayır» serialındakı rolu gətirib. Bu, "sabun
köpüyü” təkcə Qərbdə deyil, Sovet İttifaqına daxil olan bütün ölkələrdə
ekranlara çıxıb. Serialın ilk epizodları efirə çıxandan sonra "Ostankino”nun rəhbərliyi
serialın uğurlarından şübhələnir və nümayişi saxlatdırır. Ancaq tezliklə
televiziyaya daxil olan yüzlərlə tamaşaçı məktubu serialı yenidən efirə
qaytarır. Bu, meksikalı aktrisanın o illər üçün qeyri-adi uğuru idi. Sonrakı
illər Kastro "sabun köpüyü” seriallarının kraliçası kimi «İolanda Luxan» və
«Yabanı qızılgül» seriallarında çəkiləndə, artıq dünyanın ən məşhur
qadınlarından biri idi. Onu dünyanın dörd bir bucağında tanıyırdılar.
Aktrisanın filmoqrafiyasında 17 serial və
23 bədii film var. Müğənni kimi 20-dən çox diski işıq üzü görüb. Aktrisa özünün
çəkildiyi «Varlılar da ağlayır»dakı Marianna və «Yabanı qızılgül»dəki Roza kimi
dünyada tanınmasından heç də narazı deyil.
90-ci
illərin sonlarında Amerika kütləvi mədəniyyəti Latın Amerikası televiziyasının
sərhədlərini sıxışdıranda, artıq tamaşaçılar sentimental seriallardan cana
doymuşdular. Onlar bahalı Hollivud "boyevik”lərini istəyirdilər. "Sabun köpüyü”
seriallarının ulduzlarının karyeraları sona çatsa da, Veronika Kastro öz şöhrətini
qoruya bildi. O özünü musiqidə, kinoda və teatrda sınadı. Nəhayət, televiziyada
şəxsi şousunun məşhur aparıcısına çevrildi. Hazırda Kastronu mütəmadi
teleaparıcı kimi görmək olar.
Nikah bizlik deyil
Keçən
il Meksikada Veronika Kastro haqqında bir-birini təkzib edən iki xəbər yayıldı.
Bəziləri iddia edirdilər ki, aktrisa ciddi agciyər xəstəliyindən Amerikanın
Hyuston xəstəxanasında vəfat edib. Başqa bir xəbərdə isə Veronikanın ilk dəfə
nikaha girməsi haqqında məlumatlar yer almışdı. Kastronun yeni sevgilisi isə
guya 3 ildir ki, görüşdüyü uruqvaylı
biznesmen idi.
"Nənə
ölmədi, nənə axşam qonaqlığına getdi” – deyə Veronika zarafat edir: "Mən
Hyustona şəhərin ispandilli sakinləri qarşısında çıxış etməyə getdim. Həqiqətən
məni heç bir əməliyyat etməyiblər. Mən əvvəlki kimi, yeganə zərərli vərdişim
olan siqaret çəkməkdən imtina edə bilmirəm. Çox da çəkmirəm və özümü əla hiss edirəm.
Nəhayət, həkimlər bir neçə il bundan əvvəl «Böyük qardaş» realiti şousunun
final çəkilişləri zamanı zədələdiyim onurğamı da sakit buraxıblar. Mənim bel
sümüyüm (aktrisa çəkilişlər zamanı filin üstündən düşüb) artıq ağrımır”.
Aktrisa
həyatı haqqında heç nəyi gizlətmir. Veronika boynuna alıb ki, böyük pulları o
öz səsinə görə qazanıb. Kastro 26 disk buraxdırıb, mütəmadi konsertlər verib və
sifarişçilər üçün oxuyub. Veronika gözəlliyini saxlamaqda ona işinin peşəkarı
olan cərrahın kömək etdiyini gizlətmir. Kastro deyir ki, gözəl əhval-ruhiyyədə
qalmasına və kökəlməməsinə onun genləri və ən başlıcası, düzgün həyat tərzi
keçirməsi kömək edir.
Aktrisa
istədiyi vaxt cavan sevgililəri dəyişir. Hərçənd Veronikanın şəxsi həyatı
aktyorluq karyerası kimi uğurlu olmayıb. Aktrisa heç vaxt ailə qurmayıb. Mətbuat
onun meksikalı milyonçularla macəraları haqda yazsa da, Veronika həmişə belə xəbərləri
inkar edib: «Ailə xoşbəxtliyinin nə olduğunu bilmirəm. Mən hədsiz dərəcədə iki
kişini sevmişəm – uşaqlarımın atalarını. Ancaq bunlar sonu kədərlə bitən
seriallar idi. Həyatımda kişilər var – düzdür, ancaq nə vaxtsa ərə getməklə
bağlı təklif almağım isə cəfəngiyatdır. Mənim ailəmin tarixçəsinə baxın. Onda
başa düşərsiniz ki, nikah bizlik deyil. Qardaşıma və böyük oğluma da nikah
yaxşı heç nə gətirməyib. Oğlum Kristian ikinci arvadından qalmaqalla ayrıldı. O
vaxtdan bəri iki uşağı aralarında bölə bilmirlər. «Mən daha evlənməyəcəyəm. Ailə
həyatı mənimçün əzablı idi. Boşanma isə məni sarsıtdı. Heç kəs məni yenidən bu
cəhənnəmə düşməyə məcbur edə bilməz» - deyə oğlum qəzəblənir. Əlbəttə, mən nəvələrimlə
telefonla danışdığıma görə kədərlənirəm, ancaq oğlumu geri qaytardığıma görə
xoşbəxtəm” - deyir aktrisa.
Kastro
anası və qulluqçuları ilə gözəl malikanədə yaşayır. Bir neçə il bundan əvvəl
aktrisanın anası liftə minərkən lift sınıb-dağıldığına görə, hazırda əlil
arabasında gəzir. Anası reanimasiyada yatarkən Veronika Kastro iki həftə onun
yatağının yanından ayrılmayıb: «Mənim oğullarımı anam tərbiyə edib. Mən həm də
onların atasını əvəz etdiyimdən pul qazanmalı idim. Özümü yalnız evə gələrkən
ana sayırdım. Çünki yaxşı yaşamağımız üçün pul qazanmalı idim”. Aktrisanın
oğlanları varlı, ehtiyacsız böyük kişilərdir: böyük oğlu Kristian populyar müğənni
və bəstəkardır, kiçik oğlu Mişel rejissor və prodüserdir. Kastro Mişelin çəkdiyi
filmdə baş qəhrəmanın anası – depressiv alkoqolik qadın rolunu oynayıb.
Veronika bir neçə il böyük oğlu ilə küsülü olduğundan əlaqə saxlamayıb. Çünki
onun seçdiyi qadın anasının xoşuna gəlmirdi. Veronika oğlu ilə küsülü
olduğundan nənə olmasını mətbuatdan öyrənib. Hazırda Kristian boşanıb və buna
görə də anası tez-tez ailəvi naharlar təşkil edir.
Nəvəsinin
olması ilə bağlı xəbər isə onun üçün əsil
sürpriz olub. Rafaella adlı balaca qızın anası inad edib ki, Kristian onun
qızının atasıdır. Buna görə Kristian atalıq testindən keçməli olub. Məlum olub
ki, doğrudan da Rafaella onun qızıdır. İndi Rafaella tez-tez sosial şəbəkələrdə
nənəsinin qonağı olur. Veronika nəvəsinin müvəffəqiyyətlərini və şəkillərini
sosial şəbəkədə bölüşür.
Deyilənə
görə, Veronika gəlini xoşuna gəlmədiyindən kiçik oğlunun da ailəsini dağıdıb. Mətbuatda
bəzən Veronikanın öz var-dövlətini bölmək istəmədiyi üçün oğullarını qanadı
altında saxlaması ilə bağlı xəbərlər də yazılır: "Veronika ömür boyu topladığı
sərvətinə kimsəni ortaq etmək istəmir. Ona görə təkcə oğullarını yanında
saxlamağa çalışır və buna nail olur”.
Keçmişə önəm verən nəsillər
Veronika
Kastro 81 yaşlı Roxelio Qerra ilə dostluq edir («Varlılar da ağlayır» filminin
qəhrəmanı Luis Alberto). Onlar tez-tez zəngləşirlər və yaradıcılıq gecələrində
birlikdə iştirak edirlər. Əlbəttə, bu da mətbuatın gözündən yayınmır...
65
yaşlı aktrisanın zahiri görkəminə həmkarları indi də həsəd aparır. Veronika
gününün çox hissəsini idman zalında keçirir. «Həftənin 5 günü güc toplayıram.
Masaj prosedurları ilə maraqlanıram. Piyada gəzməyi xoşlayıram. Yeməyimə diqqətlə
yanaşıram. Mənim vücudum gəncliyimdə xatırladığınız obrazımdan heç də pis
görünmür» - deyə aktrisa bildirir. Aktrisanın idman məşğuliyyəti və dietası öz
nəticəsini verib. O, «Playboy» jurnalının üz qabığında yaşlı vaxtında çəkilən
modellərdən biri olub. Düzdür, aktrisa plastik cərrahların xidmətindən istifadə
etdiyini gizlətmir. Hətta deyilənə görə, onlardan biri ilə macəra da yaşayıb.
İndi aktrisa gücünü biznesdə də sınayır. Kosmetika salonları, dükanlarına nəzarət
edir. Aktrisa həyatını dolğun yaşayır, tədbirlərdə oxuyur, teatr tamaşalarında
(dramatik və opera) oynayır və nəvəsi ilə mütəmadi kübar tədbirlərdə iştirak
edir, sosial şəbəkələrdə pərəstişkarları ilə ünsiyyətdə olur. Dediyinə görə,
Rusiyadan olan pərəstişkarları hələ də ona hədiyyə olaraq yaylıqlar, "valenka”lar,
suvenirlər göndərirlər. 25 ildən çox vaxt keçsə də, rusiyalı tamaşaçılar
«Varlılar da ağlayır» serialından onun Mariannasını və «Yabanı qızılgül»dəki
Roza Qarsiyasını unutmayıblar. Aktrisa vətəni Meksikada bir çox filmlərə çəkilsə
də, rusiyalılar onu bu iki filmə görə tanıyırlar. "Nəsillər var ki, keçmişə
daha çox önəm verirlər. Onlar artıq tarixə qarışan filmləri, əsərləri, sənət
nümunələrini sevirlər. Müasir dövrün çağırışları onların ruhunu poza bilmir.
Onlar keçmişdən qopmaq istəmirlər. Mənim pərəstişkarlarım da elədir. Onlar çəkildiyim
serialları unutmurlar. Məni yaşadan, mənə ruh verən həm də tamaşaçılar tərəfindən
sevilməyimdir. Onlarla məni bağlayan bağlar qırılmayıb. Uzaq Meksikaya əli
çatmayanlar sosial şəbəkələrdən məni izləyirlər. Axı Meksikada belə bir məşhur
söz var: "İspan dilini bilirsinizsə, sosial şəbəkələrdə Veronika Kastroya yaza
bilərsiniz. Gec də olsa, o sizə cavab yazacaq”.
Aktrisa
facebook-dakı səhifəsinə özü nəzarət edir. Müxtəlif rollardakı şəkillərini
qoyur, şəxsi mülahizələrini və xatirələrini bölüşür. Yaşının çox olmasına
baxmayaraq, dağ xizəklərində sürüşməyi sevir. "Mən xöşbəxt aktrisayam” - Veronika
Kastronun müsahibələrində tez-tez işlətdiyi bu cümlə onun bütün həyatının
güzgüsüdür.
Rusiya
mətbuatından çevirdi
Təranə
Məhərrəmova