“Gürcü arzusu”un növbəti qələbəsi
Gözləntilərin əksinə olaraq, "Gürcü arzusu” koalisiyası oktyabrın
21-də Gürcüstanda keçirilmiş bələdiyyə seçkilərinin qalibi olub. Hakim partiya
merin birbaşa seçki ilə seçildiyi 5 şəhərdən 4-də mübarizədən qalib çıxıb. Onun
namizədləri elə birinci turda Tbilisi, Batumi, Poti və Rustavidə mer kreslosuna
sahibləniblər. Tbilisi meri vəzifəsi uğrunda ümumilikdə 13 namizəd mübarizə
aparırdı. Seçkinin qalibi İtaliyanın "Milan” klubunun keçmiş oyunçusu Kaxa
Kaladze olub. O, səslərin 51,13 faizini toplaya bilib. "Vahid Milli Hərəkat”ın
namizədi Zaal Udumaşvili 17,49, müstəqil namizəd Aleko Elisaşvili isə 16,53
faiz səs toplayıblar. Gürcüstanın ikinci böyük şəhəri olan Kutaisidə "Gürcü
arzusu” partiyasının namizədi seçicilərin 48 faizinin dəstəyini ala bilib. Burada
ikinci tur olacaq. Mərkəzi Seçki Komissiyası (MSK) 1,6 milyona yaxın seçicinin
səsverməyə getdiyini bildirir ki, bu da seçicilərin 45,64 faizi deməkdir. Müxalifət
üçün təsəlliverici hal yalnız budur. Eləcə də 64 yerli şuranın 2 min 58 üzvü
seçilib.
Yeri gəlmişkən, Kaladzenin namizədliyini "Gürcü arzusu”nun
yaradıcısı, ölkənin ən zəngin adamı, keçmiş baş nazir Bidzina İvanişvili də dəstəkləyirdi.
İvanişvili 2013-cü ildə siyasətdən getsə də, bir çoxları inanır ki, o, "kulis”dən
"Gürcü arzusu”nu idarə etməkdə davam edir. Kaladze turizmi daha da inkişaf
etdirməyi, idarəçilikdəki bürokratik əngəlləri aradan qaldırmağı, yeni
nəqliyyat şəbəkəsi qurmağı vəd edir. Seçkilərin ən çox dartışılan mövzuları
tikintilər, söküntülər, nəqliyyatın ekologiyanı çirkləndirməsi olub. Çirklənmə
ən çox Tbilisidə problemdir, çünki son illərdə şəhərdə böyük tikinti layihələri
reallaşdırılmaqdadır. Oktyabrın 11-də Tbilisidə polislə müxalifət fəalları
arasında toqquşma da olmuşdu. Aksiyaçılar meriyanın İvanişvili ilə əlaqəli
tikinti şirkətinə şəhərdə torpaq sahəsi ayırmasına etiraz ediblər. Torpaq
sahəsi şəhərin mərkəzindədir. Orada hotel və dayanacaq tikiləcək.
Əksəriyyət əvvəldən hesab edirdi ki, keçirilən bələdiyyə seçkiləri
hakimiyyətdə olan "Gürcü arzusu” üçün bir sınaq olacaq. Çünki gələn il
prezident seçkiləri olacaq. Bələdiyyə seçkiləri hakim partiyanın xalq arasında
populyarlığını nə dərəcədə qoruya bildiyini göstərmiş oldu. "Gürcü arzusu”
2012-ci ildə keçmiş prezident Mixail Saakaşvilinin partiyasını məğlub edərək
hakimiyyətə gəlib.
Yeri gəlmişkən, Avropada Təhlükəsizlik və Əməkdaşlıq Təşkilatı
(ATƏT)oktyabrın 21-də Gürcüstanda keçirilən bələdiyyə seçkilərinə qiymət
verib. ATƏT bildirib ki, "namizədlər azad kampaniya apara biliblər”, seçkidə
"fundamental azadlıqlara ümumilikdə sayğı göstərilib”. Amma ATƏT "protokolların
nəticələrin tamamlanmasında bəzi qanunsuzluq və çətinliklərin” olduğunu
daqeyd edib. ATƏT adətən siyasi mövqeyilə seçilən ölkə mediasının
"getdikcə azad və fəal” olduğunu, "daha böyük siyasi debatın” inkişafına yardım
etdiyini bildirir. Ancaq qurum "bəzi zorakı insidentlərin də baş verdiyini”
vurğulayıb. "Seçicilərə təzyiq hallarıyla yanaşı, dövlət resurslarından
sui-istifadə halları da qeydə alınıb”, – deyə, bəyanatda deyilir.
Mərkəzi Seçki Komissiyasının məlumatına görə, seçkidə 22 partiya, 5
siyasi blok və 1 təşəbbüs qrupu iştirak edib. Son aylarda hakim partiyanı
inzibati resurslardan öz namizədlərinin xeyrinə istifadə etməkdə, dövlət
televiziyasında birtərəfli olaraq onlara dəstək verməkdə suçlayanlar az
olmayıb.Lakin MSK-nın rəhbəri Tamar Jvaniya deyib ki, inzibati
resurslardan istifadə halları olsa da, belə pozuntuların sayı əvvəlki illərlə
müqayisədə azalıb. Seçkini 600-ə yaxın xarici müşahidəçi də izləyib.Ekspertlər
Saakaşvili tərəfdarlarının məğlubiyyətini əhalidə ona olan inamım zəifləməsi
ilə əlaqələndirirlər. "GHN” analitik agentliyinin rəhbəri David Avalişvili
hesab edir ki, "insanlar Saakaşvilinin eyni zamanda həm Gürcüstanda, həm də
Ukraynada uğur qazanacağına inanmır və onun populist bəyanatlarından yorulublar”.
Azər