Bakı 25°C
“Goldsmiths” mükafatı “Xoşbəxt”-ə verildi
"Goldsmiths”
ədəbi mükafatının builki qalibi Nikola Barker oldu. Mükafat uğrunda son
mərhələdə Uil Self və Con Mak Qreqor kimi iki nəhəng imza ilə mübarizə aparan
xanım Barkerin "Xoşbəxt”-i ona sözün əsl mənasında xoşbəxtlik bəxş edib. Fondun
hər il qalib müəllif üçün ayırdığı 10000 funt sterlinqin builki sahibi Barker
olub. Nikola Barker müxtəlif romanları ilə dəfələrlə "Man Booker”, "Pulitzer”,
"Kafka”, "PEN Hemingway” kimi mükafatların qısa siyahısına daxil ola bilmiş
yazıçıdır.
Qalib romanın süjeti isə çox yaxın gələcəkdə
dünyanın kasıblığın və xəstəliklərin olmadığı bir yerə çevrildiyi utopik zamana
həsr olunmuş hekayə üzərində qurulub. Goldsmiths Universitetinin mühazirəçi
professoru və müsabiqənin builki münsiflər heyətinin sədri Naomi Vud: "İnsanın
beynində və əllərində mərmər kimi daşlaşıb qalan bir hekayədir. Kütləvi
elektronlaşdırmanın qurbanı olan, özünü dünyanın mərkəzi kimi hiss edən
insanların, Yer kürəsindəki aclıqdan, susuzluqdan, çarəsiz xəstəliklərdən
bixəbər olanların dünyası üçün yazılmış mükəmməlin fövqündə bir romandır. Bu
əsəri fəxrlə müsabiqənin qalibi elan etdim. Heç bir tərəddüd yaşamadan”.
Barker qalibiyyəti ilə bağlı verdiyi açıqlamada
özünü həqiqətən də "xoşbəxt” hiss etdiyini deyib: "Bu romana ad seçəndə çox
tərəddüd keçirmişdim. Amma mənə bu qədər uğur qazandıracağı ağlıma gəlməzdi.
Sona qalan əsərlərin dördünü oxumuşam. Tam səmimi deyirəm ki, iki əsərin
müsabiqənin sonuna qalması məni həyəcanlandırmışdı. Adlarını çəkmək istəmirəm.
Yaradıcılığını izlədiyim, heyran olduğum yazarlarla artıq eyni meydanlarda
rəqabət aparmaq möhtəşəm duyğudur. Bu mükafat kiminsə kimdənsə daha yaxşı
yazması demək deyil. Mən hekayəmə güvəndiyim üçün qatılmışdım. Və hisslərim
məni yanıltmadı”.
Onu da xatırladaq ki, "Goldsmiths” Böyük Britaniya
krallığına daxil ölkələrin yazarları üçün nəzərdə tutulmuş mükafatdır.
