Fəvvarələr meydanında Yeni il başlayıb - Reportaj
Zaman
elə sürətlə ötüb keçir ki, yeni ilin köhnə ili təzələməsindən xəbərimiz olmur. Yarpaqlar
tökülür, havalar soyuyur, qış qapımızı döyməyə başlayır. Qışın gəlişi ilə yağan
qar, Yeni il bayramı uşaqları daha çox sevindirir. Elə bir sevinc ki, orada şam
ağacının bəzədilməsi, Şaxta baba, Qar qız və sözsüz ki, hədiyyələr yer alır.
Ötən gün Fəvvarələr meydanından keçərkən şəhərimizdə xüsusi bayram ab-havasının
yaşandığını gördük.
Fəvvarələr
meydanında 46 taxta köşk quraşdırılıb
Burada
dekabrın 1-dən "Soyuq əllər, isti ürək” xeyriyyə yarmarkası "Nargis Fund”un
rəhbərliyi və "A+A Events”in təşkilati dəstəyi ilə start götürüb. Yağışlı
havaya baxmayaraq, vətəndaşlar və paytaxtın qonaqları bu yarmarkaya gəlir,
özləri üçün hədiyyələr alır, şəkillər çəkdirirlər. Əslində, bu yarmarka bizə Yeni
ilin müjdəsini gətirir. Beşinci ildir keçirilən bu xeyriyyə yarmarkasına artıq
öyrəncəli olmuşuq. Yeni ili bunsuz təsəvvür edə bilmirik. Çünki şəhərdə Yeni il
ab-havasına xüsusi rəng qatır, insanları nağıllar aləminə aparır. Onu da bildirək
ki, yarmarkadan toplanan vəsait ənənəyə uyğun olaraq, xeyriyyə işlərinə sərf
ediləcək.
Müşahidə
apararkən yarmarkaya təkcə paytaxt sakinləri deyil, dünyanın müxtəlif
guşələrindən Bakıya gələn qonaqların da böyük maraq göstərdiklərinin şahidi
olduq. Fəvvarələr meydanında 46 kiçik taxta köşk qurulub. Buradan hər kəs
yaxınları və əzizləri üçün Yeni il hədiyyələri, suvenirlər, kitablar, geyim,
şirniyyat və s. almaq, kiçik rahat kafelərdə ətirli qəhvə, isti şokolad və ya
çay içərək, təzə şirniyyatdan və milli yeməklərdən dadmaq imkanı əldə edir.
"Şaxta
babanın evi”nə pulsuz qonaq ola bilərsiniz
Yarmarka
ərazisində böyük səhnə və Yeni il yolkası, həmçinin bayramın əsas rəmzlərindən
biri sayılan "Şaxta babanın evi” qurulub. Əvvəlki illərdən fərqli olaraq, bu
evdə Şaxta baba və Qar qızla şəkil çəkdirmək ödənişsizdir. Gülərüzlü Şaxta baba
uşaqları ətrafına cəm edir və onlarla söhbət edərək şəkil çəkdirir. Havanın
soyuq olmasına baxmayaraq, Şaxta baba öz missiyasına isti yanaşırdı.
"FishPort”
kafedə çalışan İsrafil Məmmədovla bir qədər söhbət etdik. Müsahibimiz dedi ki,
vətəndaşların bu yarmarkaya böyük marağı var: "Bizim məkana tələbələr daha çox
gəlirlər. Onlar da dərsdən çıxdıqdan, saat 4-dən sonra gəlirlər. Bir də axşam
saat 6-dan sonra insanların sayı çox olur. Təkcə tələbələr deyil, burada
müxtəlif yaş təbəqələrindən olan insanlara rast gəlmək mümkündür. Hava
şəraitindən də çox şey asılıdır. Yerli vətəndaşlarla bərabər, turistlər də
buraya böyük maraq göstərir. Tez-tez ingilislərə, pakistanlılara və ərəblərə
rast gəlirik”.
İ.Məmmədov
deyir ki, onun çalışdığı köşkdə burgerə, sendviçə daha çox tələbat var.
Şəhərdəki qiymətlərlə buradakı arasında 1 manat fərq var.
"Sea
Food” kafeyə qonaq oluruq. Müştəri qismində kafenin menyusu və qiymətləri ilə
tanış olduq. Bu kafeyə gələnlər üçün qiymət belədir: Enerji içkiləri 4 manat,
adi su, ayran, meyvə şirələri 1 manat, "nar
fresh” və "portağal fresh” isə 4 manatdır. Balıq çubuqları 3 manat 50 qəpik,
balıq topları 4 manat 50 qəpik, "kilka free” 2 manat 50 qəpik.
58 qəpiyə kitab
Yarmarkada
insanların çox toplaşdığı bir köşkə yaxınlaşdıq. Məkanın "Qanun” Nəşriyyat
Evinə məxsus olduğunu gördük. Bu köşkdə alıcıların suallarını cavablandıran Mehriban
Şamudovaya biz də sual ünvanladıq. Mehriban xanım dedi ki, onların köşkündə ən
çox satılanlar endirimdə olan 1 manatlıq kitablardır: "1 manata olan
kitablarımız yerli və xarici ədəbiyyat nümunələridir. Müştərilərimiz bizim
yerli yazarlarımızı daha çox tələb edirlər. Düzdür, müasir və dünya ədəbiyyatına da maraq az deyil. Müştərilərimiz
arasında gənclər üstünlük təşkil edir. Alıcılarımızın çoxu tələbələrdir. Burda
ən bahalı kitablarımızdan biri "Osmanlı tarixi”dir ki, onun qiyməti 29
manatdır. 20 faiz endirimdə olduğu üçün 23 manat 20 qəpiyə satırıq. Bir də ən
bahalı kitabımız "Uşaq ensiklopediyası”dır ki, bu kitabın qiyməti 33 manatdır.
Ancaq endirimdə olduğu üçün 26 manat 40 qəpiyə satılır. Ən ucuz kitabımız isə
80 qəpikdir. Bundan başqa, "Qanun” Nəşriyyat Evi uşaqları da unutmayıb, onlar
üçün də endirimdə olan kitablarımız var”.
Qeyd
edək ki, "Əli və Nino” Kitab Evinin nümayəndəliyi də burada fəaliyyət göstərir.
Onların yerləşdiyi köşklərə də yetərincə tələbat var. Köşkün nümayəndəsi Anar
Quliyev deyir ki, alıcılar əsasən uşaq kitablarına üstünlük verirlər: "Valideynlər
Yeni illə bağlı oyun və nağıl kitabları alırlar. Gənclər də çox kitab alırlar. Ən
ucuz kitablarımız 58 qəpikdir. Müştərilərimiz bizdən daha çox klassik əsərlər
istəyirlər. Əsasən Viktor Hüqonun, Afito
Qoriyonun, Kafkanın kitabları alınır”.
"Müştərilərimizin arasında xaricilər də az deyil”
Gənc
xanımların ən çox maraq göstərdiyi məkan isə "Diva acsesories” köşkü idi. Köşkdə
müştərilərin suallarını cavablandıran Sevda xanım bizim də suallarımıza cavab
verdi: "Hazırda soyuq olduğu üçün xanımlar daha çox şərflərə üstünlük verirlər.
Ancaq bilərziklər də çox alınır. Zövqlər müxtəlifdir. Elə xanım var ki, onun
bəyəndiyini digər xanım bəyənmir. Çeşidlərimiz çoxdur. Ancaq köşkün qarşısında
qoyduğumuz bilərziklərimiz daha çox satılır. Qeyd edim ki, bütün məhsullarımız
endirimdədir”.
Bu
köşkdəki qiymətlərə nəzər saldıqda, onların şəhər qiymətlərindən heç də
seçilmədiyinin şahidi oluruq. Belə ki, bilərziklər 2 manat, boğaz üçün aksesuarlar
2 manat 99 qəpik, boyunbağılar 5 manat 99 qəpik, saç rezinləri 1 manat,
papaqlar 9 manat 99 qəpik, şərflər 14
manat 99 qəpikdir.
"Astaraçay”ı
təmsil edən köşkün satıcısı İsmayılov Qoşqar deyir ki, uşaq üçün olan çayları
daha çox istəyirlər. Çayların qiyməti dəyişikdir. 2 manat 80 qəpikdən tutmuş, 4
manata qədər dəyişir. Hər kəsin cibinə də uyğundur.
Uşaqların
ən çox sevdiyi köşk isə oyuncaqların satıldığı köşkdür. Yeni il aksesuarları
ilə zəngin olan bu köşkün təmsilçiləri Elvin və Nigar bizi mehribanlıqla
qarşıladılar. Bildirdilər ki, bu köşkdə ən ucuz hədiyyə şirin konfetlərdir ki,
qiyməti 80 qəpikdir. Ən bahalı oyuncaq ayı 223 manatdır: "Müştərilərimiz
kifayət qədərdir. Ən çox Yeni il oyuncaqlarımız satılır. Müştərilərimizin
arasında xaricilər də az deyil. Daha çox ərəblər bizə müraciət edirlər. Onlar
da Yeni ilə aid nələrsə almağa çalışırlar. Əslində burada yerimiz dar olduğu
üçün məhsullarımızın hərəsindən bir çeşid gətirmişik”.
Həm
ziyarət, həm ticarət edənlər çoxdur
Köşklərdən
aralanıb sakinlərə yaxınlaşdıq. Paytaxt sakini Mehman Məmmədov deyir ki, 2 uşaq
atasıdır və uşaqları Yeni il öncəsi əyləncə mərkəzinə deyil, məhz bu yarmarkaya
gətirir: "Mənim 2 oğlum var. Onlar Yeni ili çox sevirlər. Baxmayaraq ki bu
yarmarka bir həftədir ki, fəaliyyət göstərir, biz 3-cü dəfədir buraya gəlirik.
Daha çox "Xırtaxırt” kartoflarını alırıq. Çünki uşaqlar kartofla bişən hər şeyi
sevirlər. Bundan başqa, uşaqlar Şaxta baba ilə şəkil çəkdirirlər. Biz
yarmarkanın açılışında da iştirak etmişdik. Açılışda həm uşaqlara Yeni il alış-verişini
etdik, həm də xalq artistləri Zülfiyyə
Xanbabayeva, Brilliant Dadaşova, əməkdar artist Ədalət Şükürov və başqa
sənətçilərin ifalarını dinlədik. Biz bu konsertdən böyük zövq aldıq”.
Daha sonra Suşma Savari adlı hindli ilə həmsöhbət olduq. Ondan bu
yarmarkadan necə yararlandığını xəbər aldıq. Artıq 2 həftədir ki, ölkəmizə
qonaq gələn Hindistan vətəndaşı deyir ki, yarmarkaya zövq almaq və buradan
şəkillərlə geri qayıtmaq üçün gəlib: "Bu yarmarka çox gözəldir. İnsanlarda
bayram əhvalı var. Hər kəs sevinir. Elə hesab edirdim ki, insanların kitaba
marağı azalıb. Ancaq bu yağışlı havada insanların kitab almağa gəldiyini
gördükdə, çox sevindim. Mən bunu öz ölkəmdə də danışacağam. Burada mənim ruhum rahatlıq
tapır deyə, hər gün yolumu Fəvvarələr meydanından salıram”.
Gəzintimiz zamanı bir ərəb turistlə də qarşılaşdıq. Şirniyyat alan
turist xanımla ortaq dil tapmağa çalışsaq da, bu istəyimiz uğurlu olmadı.
Əlindəki şirniyyatı göstərib, "bu çox dadlıdır” deyərək gülümsədi.
Qeyd
edək ki, yarmarkanın əsas qonaqları olan uşaq evlərinin kiçik sakinlərini
məşhur insanlarla görüşlər, sevimli ifaçıların çıxışı, yarmarkanın
sponsorlarından ənənəvi suvenirlər, şirniyyatlar və hədiyyələr gözləyir. "Nargis
Fund” yarmarkanın sponsorları ilə birgə müalicə və əməliyyata ehtiyacı olan
uşaqlara, eləcə də aztəminatlı ailələrə yardım göstərəcək.
Məlumat
üçün bildirək ki, həftə sonları yarmarkada populyar ifaçıların iştirakı ilə
şou-proqram təqdim olunacaq, uşaqlar üçün müxtəlif əyləncələr təşkil ediləcək.
Xeyriyyə yarmarkası 2018-ci il yanvarın 15-dək davam edəcək.
Xəyalə
Rəis