Fərid Əliyev: “Həkimlərin ümidinə qalsaydım, indi arabada gəzirdim”
Son illərdə ölkəmizdə bir
sıra özəl teatrlar fəaliyyətə başlayıb. Bu teatrlardan biri də əlilliyi olan və olmayan aktyorlardan
ibarət ilk və tək inklüziv teatrı olan ƏSA Teatrıdır. Bu teatrda fiziki
məhdudiyyətli gənclər xüsusi önəm kəsb edir. Bu gün haqqında danışacağım insan ƏSA
Teatrının aktyoru Fərid Əliyevdir. Fərid Teatrın əsas aktyorlarındandır.
O, uşaq yaşlarından beyin iflici
keçirib. Deyir ki, anası onu sağlam dünyaya gətirib: "Uşaq yaşımda qızdırma tutmuşam,
dilim qatlanıb və sudurqa keçirmişəm. 4-cü sudurqada beyin iflici xəstəliyinə tutulmuşam.
Canımdan bu xəstəliyin çıxması üçün valideynlərim hər üsula əl atıblar. Gəzmədikləri
yer qalmayıb, hətta xalq təbabətinə də müraciət ediblər. Hər səhər məni yeni kəsilmiş
qoyun dərisində basdırıblar ki, bu xəstəlik canımdan çıxsın. 4-5 yaşlarımda danışmağa
başlamışam. 17-18 yaşıma qədər isə yıxıla-yıxıla gəzmişəm. Bu xəstəlikdə gəzmək
möcüzəvi bir şeydir. Çox inadkar olmuşam. Uşaq beyin iflici xəstəliyindən əziyyət
çəkənlərin əksəriyyəti yerimir. Uşaq vaxtı evdə sürünə-sürünə gəzirdim. Bizim həyətdə
daş hasar var. Həmin hasar mənim özüm boyda idi. O hasardan tuta-tuta bir addım
atanda beş dəfə yıxılırdım. Ayağımdan qan açılana, sümüyüm daşa dirənənə qədər gəzməyə
çalışırdım. Sonra hasarsız da gəzməyi bacardım”.
İlk uğuru yerimək olan
Fərid qarşısına daha böyük məqsədlər qoyub. Özünə inkişaf edəcəyi və daha çox
şeylərə nail olacağı, həyatla mübarizə aparacağına dair söz verib, sözünü tutub
da: "Həkimlər mənə hər şeyi qadağan etdilər. Düşündüm ki, fiziki cəhətdən özümü
möhkəmləndirmək üçün idmana getməliyəm. Həkimlər isə buna icazə vermirdi. Anam məni
idmana yazdırdı. Ayağımı işlətmək üçün bütün günü onu məşq etdirməli və daha
möhkəm hala gətirməli idim. İdmanla buna nail oldum. Əvvəllər ayaqlarım bədənimi
saxlamırdı. Ayaqlarımı bərkitdikdən sonra bədənimi bərkitməyə başladım. Həkimlərin
ümidinə qalsaydım, indi arabada gəzirdim. Həkimlər dərman verirdi, deyirdilər ki,
sakit otur, heç bir hərəkət etmə. İndi sürücülük vəsiqəm olmasa da, hərdən dələduzluq
edib, maşın da sürürəm. Düzdür, bilirəm ki, qanunla olmaz, ancaq içimdəki
o həvəsi söndürürəm. Hər zaman həkimin dediyini yox, demədiyini etmişəm. Hər
insan özünün həkimidir və mən bədənimə, özümə həkimdən daha çox bələdəm”.
"Bundan sonra sağalmaq istəmirəm”
Fəridlə söhbətimizdə fikir verdim ki, o daima
gülür, çevrəsindəki insanlara pozitiv enerji ötürür. Deyir ki, ətrafda ona pis
gözlə baxan insanlara fikir vermir, həmin insanları gülüşü ilə cəzalandırır: "Bundan
sonra sağalmaq istəmirəm. Çünki bu xəstəliklə
dost olmuşam. Biz bir-birimizə məhkumuq və mən onu qəbul etmişəm. Qoy, Allah mənim
sağlamlığımı ehtiyacı olanlardan birinə versin. Məni axıra kimi belə saxlasın. Ölənə
qədər belə qalsam da, Allahıma şükür edərəm. Bu xəstəlik mənim qarşıma elə insanlar
çıxardı ki, ikiüzlüsünü də, ifritəsini də, xainini də görmüşəm. Ağıl insanın özünə
verilir, görünüşünə yox”.
26 yaşı olan müsahibimin
aktyorluq sevgisindən danışırıq. O, heç zaman aktyor olmağı arzulamayıb, heç bu
sənətə marağı da olmayıb: "Ən böyük arzum sistem işçisi olmaq idi. İstəyirdim
ki, ya polis, ya da əməliyyatçı və ya kəşfiyyatçı olum. Hərbi xidmətə getmək yaşım
gələndə dedilər ki, "sən hərbi xidmətə yaramırsan”. Bu yararsızlıq məni hər şeydən
soyutdu. O vaxta qədər dərslərimi çox yaxşı oxumuşam. Ondan sonra oxumağın bir mənası
olmadığını düşündüm. Bir gün bir filmə baxdım. Gördüm ki, baş rolda oynayan
aktyor fiziki məhdudiyyətlidir. Düşündüm ki, bəs, o insanlar rola çəkilə bilirlərsə,
mən niyə çəkilməyim? Rejissor dostlarıma müraciət etdim. "Bir ailəm var” serialına
çəkildim. Daha sonra Eyyub Yaqubovun "Sovetski” klipində yer aldım. Zaur Hacılı
adlı bir dostum var. Ona aktyor olmaq istəyimi yazdım. O dedi ki, Əsa Teatrında
fiziki məhdudiyyətli insanlarla tamaşa hazırlayırlar. Sosial şəbəkə vasitəsi
ilə teatrın rəhbəri Nihad Qulamzadəyə yazdım. O, isə məni teatra dəvət etdi. Əvvəlcə
Nihad məni teatra qəbul etmədi. 3 ay davamlı olaraq teatra getdim və nəhayət,
məni işə qəbul etdilər. Teatrda aktyor işləmək üçün 3 ay sürünmüşəm. Nəhayət,
mənə orada "Yuxum” tamaşasında aktyor və İppolit rollarını verdilər. Daha sonra
"Adamlar və siçanlar”da Karlson, "Paris partladı” tamaşasında Qulaməli obrazını
canlandırdım. İndi isə yeni hazırlanan "Göy quş” tamaşasında Şəkəri
oynayacağam. Özüm də şəkər kimi oğlanam. ƏSA Teatrında bizə qışqıran, göstəriş verən,
nəyisə tələb edən rəhbərliyimiz yoxdur. Hər kəs özü özünün müəllimidir. Əgər sən
tamaşaçı qarşısına çıxırsansa, öz üzərində işləməlisən. Aktyor rejissordan mizanları
və sözləri aldıqdan sonra öz üzərində işləməlidir”.
Fəridə "Necə bir obrazı canlandırmaq
istəyərsiniz?”- deyə sual verirəm. Gözü yol çəkir: "...Həyatda ən böyük arzumu -
polis obrazını canlandırmaq istəyərəm. Bu arzumu həyata keçirə bilməsəm də, heç
olmasa onun obrazını yaratmaq istəyərəm”.
İradəcə yox, bədəncə zəifik
Həmsöhbətim deyir ki, "hərbi
xidmətə yararsızsınız” sözündən sonra bir günün içində sanki böyüyüb: "O yaşa qədər
özümü əlil saymamışam. 2015-ci ilə qədər özümə əlil deməmişəm. Sonra fiziki
məhdudiyyətli insanları tanıdım. İndi mənim 100-dən çox əlil dostum var. O günə
qədər çevrəmdə olan insanların heç biri əlil olmayıb. Əlilləri tanıyandan sonra
gördüm ki, onların dostluğu, insanlığı sağlamlardan yaxşıdır. Çünki onlar daha sədaqətli,
daha istiqanlıdırlar”.
Fərid valideynlərindən
danışarkən onlara minnətdarlıq hissini gizlətmir: "Anam məni sağlam övlad kimi böyüdüb.
Bu xəstəliklə gəzməyimi anama borcluyam. Anam olmasaydı, indi mən həvəsdən düşərdim.
Bu vəziyyətə gəlməyim üçün 50 faiz özümə borcluyamsa, 50 faiz də anama borcluyam.
Ancaq atam hər zaman deyib ki, qoy, evdə otursun. Əlil uşaqlar kimi çölə çıxmağımı
istəməyib. Ancaq mən o qapıdan çölə çıxmağı bacardım”.
Həmsöhbətimiz cəmiyyətin
ona münasibətindən heç zaman narahat olmayıb: "Əslində, kənardakı insanların
mənə olan münasibəti vecimə olmayıb. Qohumlarımız haqqımda danışanda məni "xəstə”
adlandırırdılar. Bu söz mənə çox pis təsir edirdi. Çünki heç vaxt özümə xəstə gözü
ilə baxmamışam. O sözlər anama deyiləndə nə hisslər keçirdiyinin şahidi olmuşam.
Qohumlarım elə deyəndən sonra kənar adamların mənim haqqımda nə dediyinin heç bir
əhəmiyyəti yox idi”. "Bəs, həmin o insanlar
səhnədə sizi izləyirmi” – deyə soruşuram. Cavab məni qətiyyən təəccübləndirmir:
"Bəli. Bəlkə də o vaxt haqqımda söylədikləri sözlərin peşmançılığını çəkirlər.
Mənə xəstə deyən o insanın oğlu üçüncü qrup əlil statusunu aldı”.
Onunla ailədən, sevgidən,
gələcəkdən danışırıq. Fərid o qədər uşaq kimidir ki, səmimiliyi, saflığı
üzündən sezilir: "Mənə əlil deyəndə xətrimə dəymir, ancaq cəmiyyətimiz tərəfindən
bu söz çox pis qəbul olunub. Biz özümüzə zəif kimi baxırıq. İradəcə yox, bədəncə
zəifik. İradə cəhətdən biz sağlam insanlardan da güclüyük. İnsanlar əlil sözünü
elə qəbul edir ki, bu söz söyüşə bərabərdir. Mən gedib insanları bir-bir yığıb onların
ağızlarını yuma, dünyagörüşlərini dəyişə bilmərəm. Uşaq vaxtımdan özünə qapalı olmamışam.
Ancaq çevrəmdə, qohumlarımda elə insanlar olub ki, məni görəndə uşaqlarının və özlərinin
qulaqlarını çəkib yerə vurublar. Əvvəllər nəqliyyatdan istifadə edəndə gündə, ən
azı, belə düşünən 10-12 nəfərlə rastlaşırdım. İndi isə ayda bir dəfə. Guya onların
qulaqlarını çəkməklə Allah onun qarşısını alacaq?”.
İstəmirik ki, insanların
bizə yazığı gəlsin
Onu kədərləndirən bir
məsələ var. Deyir ki, eyni xəstəlikdən əziyyət çəkən həmyaşıdlarını görəndə bu ona pis təsir edir:
"Hər dəfə onları görəndə halım pisləşir. Çünki eyni xəstəliyin daşıyıcılarıyıq.
Onları gəzən görəndə çox sevinirəm. Mənim xəstəliyimdən əziyyət çəkən xəstələrin
95 faizi arabada gəzir. Mənim xəstəliyim elədir ki, daima hərəkətdə olmalıyam. Fiziki
məhdudiyyətli insanlarla tez-tez görüşlər keçirirəm. Evə qapanan əlillərlə danışıram.
Onlar ayağa durmaq üçün qarşılarına məqsəd qoymurlar. Bir addım atandan sonra yıxılırlarsa,
təzədən arabalarında otururlar. Ötən gün Salyan rayon Əlillər Cəmiyyətinə getdim.
Orada qeydiyyatda 250 əlil var. Cəmiyyət üzvündən xahiş etdim ki, onlarla görüşməyimə
şərait yaratsın. Baxım ki, onların xəstəliyi nədir ki, çölə çıxmaq istəmirlər. İstəyirəm
ki, onlar qapıdan bayıra çıxsınlar. Onları hər dəfə görəndə soruşuram ki, ev sizə
bu qədərmi maraqlı gəlir? Mən bütün günü hərəkətdə oluram, cəmiyyət içində oluram,
başqa cür mümkün deyil. Halbuki, bizim evdə oturmaq üçün hər bir şərait var”.
Son olaraq, Fəridlə ƏSA teatrından
danışırıq. Bildirir ki, bu teatr onların ailəsidir, bura bir ocaq kimi baxır: "Biz
ƏSA Teatrına ailə kimi baxırıq. Teatrı yaradan Nihad bizə müdir olmayıb, dost olub.
Orada biz hamımız dostuq. Mən bu teatrda işləmək üçün can qoymuşam. Səhnədə elə
bir performans göstəririk ki, bizim əlilliyimizə görə yox, tamaşalarımıza görə əl
çalsınlar. İstəmirik ki, insanların bizə yazığı gəlsin. Adam var üzdən xəstədir,
adam da var ki, içdən. Daxili xəstə olan insanlara yazığım gəlir. Bu dünya
imtahandır, mən də bu imtahanın bir parçasıyam”.
Xəyalə
Rəis