“Əsrin müqaviləsi”nin uzadılması bəzi suallara son qoyur
Sentyabrın 6-da
Bakı Gəmiqayırma zavodunda "Şahdəniz-2”
layihəsi çərçivəsində inşa edilən "Xankəndi” sualtı tikinti gəmisinin təqdimat
mərasimində çıxış edən prezident İlham Əliyev bir neçə gündən sonra "Azəri-Çıraq-Günəşli”
(AÇG) yatağı üzrə yeni kontraktın imzalanmasının nəzərdə tutulduğunu bəyan
edib: "Biz o yataqdakı fəaliyyətimizi 2050-ci ilə qədər uzadacağıq. Bu da bir
daha onu göstərir ki, Azərbaycanın çox böyük neft ehtiyatları var. 1994-cü ildə «Əsrin kontraktı» imzalananda
bizi istəməyən bəzi qüvvələr həm ölkə daxilində, həm xarici qüvvələr deyirdilər
ki, Azərbaycanda kifayət qədər neft yoxdur. Deyirdilər ki, "Azəri-Çıraq-Günəşli”də
neft azdır. Heç bir neft kəmərinin tikintisinə ehtiyac yoxdur, çünki bu kəmər
boş qalacaq. İndi 20 ildir ki, biz "Azəri-Çıraq-Günəşli”-dən neft və qaz hasil
edirik. Burada hasilat 1997-ci ildən başlayıb. 20 ildən sonra yeni kontrakt
imzalanır ki, 2050-ci ilə qədər "Azəri-Çıraq-Günəşli”dən lazımi səviyyədə neft
hasil ediləcək. Bu, həm o bədbin və qərəzli fikirlərə bir cavabdır, eyni
zamanda, onu göstərir ki, ölkəmizin böyük enerji potensialı var”.
Bəs görəsən
müqavilənin uzun müddətə uzadılması Azərbaycana hansı perspektivləri vəd edir?
Neft Araşdırmaları Mərkəzinin rəhbəri, enerji məsələləri üzrə
ekspertİlham Şaban"Kaspi”yə
açıqlamasında bildirdi ki,müqavilənin müddətinin uzun müddətə uzadılması
ilə Azərbaycan
Xəzərdəki ən böyük neft yataqları blokundan stabil olaraq öz neft hasilatını
çıxarmaqda davam edəcək: "Digər tərəfdən "Azəri-Çıraq-Günəşli” yataqlarından indiyə
kimi cəmi 434 milyon ton neft hasil edilib. Amma orada ümumi ehtiyatlar təqribən
1 milyard tondur. Bu isə o deməkdir ki,
ehtiyatların yarıdan çoxu hələlik hasil edilməyib. Düzdür, neftin pik həddi
arxada qalıb. 2010-cu ildən bəri hasilatda azalmalar başlayıb. Artıq 1997-ci
ildən bəri faktiki olaraq 20 ilə yaxındır ki, orada hasilat gedir. Növbəti mərhələdə
bundan sonrakı 30 ildə də hasilatın
davam etdirilməsi planlaşdırılır. Bu müddətdə əvvəlki illərdə hasil edilmiş
neftdən daha çox neftin çıxarılması gözlənilir. İndi bu yataq yaşlanıb və daha
çox qulluq tələb edir. Bunun üçün isə müxtəlif müasir texnologiyalara ehtiyac
var. Azərbaycan tərəfi növbəti mərhələdə də əvvəllər həmin yataqda işlədiyi
şirkətlərlə fəaliyyəti davam etdirməyi qərara alıb. Bu çox düzgün addımdır.
Çünki şirkətlər bu ölkəni artıq yaxşı tanıyırlar. Bu ərazini onlar özlərinə
doğma hesab etməklə yanaşı, həm geoloji,
həm iqtisadi, həm də siyasi baxımdan da tam öyrəniblər. Bundan sonra həmin şirkətlərə
burada işləmək kommersiya baxımından rahatdır. İndi biz daha sərfəli şərtlər çərçivəsində
öz əməkdaşlığımızı irəli sürürük. Yeni müqavilə çərçivəsində Azərbaycan bu əməkdaşlığı
davam etdirməkdə maraqlı olduğunu ortaya qoyub. Onun tərəfdaşları da götür-qoy
etdikdən sonra buna razı oldular. Çünki qeyd etdiyim kimi, Azərbaycanda bütün
infrastruktur artıq hazırdır və kadrlarla işləməyə ehtiyac yoxdur. Yerli
kadrların 85 faizə qədəri bütün mürəkkəb işləri görməyə hazırdır. Ona görə də
bu şəraitdə şirkətlər üçün işləmək daha rahatdır. Bizim üçün əlverişli olan
odur ki, əldə olan imkanlarımızdan daha yaxşı istifadə edə biləcəyik. Xarici
şirkətlər isə əlavə investisiya qoymaq şərti ilə uzunmüddətli qazanc əldə edə
biləcəklər”.
İqtisadçı-ekspert Rəşad Həsənov bildirdi ki, əsrin
müqaviləsinin növbəti mərhələ üçün uzadılması məsələsi uzun müddət idi ki, Azərbaycan
və beynəlxalq korporasiyalar arasında müzakirə edilirdi: "Müqavilənin
uzadılması ilə Azərbaycanın "Əsrin müqaviləsi” çərçivəsində tərəfdaşlıq etdiyi
neft şirkətlərinin ölkənin neft sektoruna yatırdığı investisiyanın həcmi artacaq. İnvestisiya həcminin
artırılması isə dərinlikdə olan neftin hasil edilməsini asanlaşdıracaq. Çünki dənizdə
olan neftin hasil edilməsi prosesi daha bahalı prosesdir və iri həcmli investisiyalar
tələb edir. Son illərdə Azərbaycanın yerin üst yataqlarındakı neft ehtiyatının
azalması artıq dərinlikdə olan neftin
hasilatını gündəmə gətirib. Belə bir şəraitdə ilk olaraq investisiya axını
mühüm məqamlardan biridir. Müqavilənin uzadılmasından sonra şirkətlər arxayın şəkildə
ölkəmizə investisiya yatıracaqlar. Çünki onlar "Əsrin müqaviləsi” bitdikdən sonra nəyin baş verəcəyini bilmədiyi
üçün biznes kommersiya subyekti olaraq haqlı narahatlıqlar keçirirdilər.
Müqavilənin uzadılması ilə bu narahatlıqlar da aradan qalxmış olacaq. Müqavilənin
uzadılması digər bir məqamı da gündəmə gətirir. Belə ki, Azərbaycanda neft
hasilatının səviyyəsinin gözlənildiyi qədər də azalmaması və yaxud tam tükənməməsi
haqda narahatlıqlara son qoydu. Çünki
hazırda ictimaiyyətin ən böyük narahatlığından biri də neft hasilatının
azalması və bu azalmanın hara qədər davam edəcəyi məsələsi idi. Hətta verilən bəzi
proqnozlarda 2025-ci ildə Azərbaycanın neft hasilatının təxminən 2000-2001-ci
illər səviyyəsinə qədər azalması ehtimal edilirdi. Lakin müqavilənin uzadılması
və beynəlxalq enerji şirkətlərinin prosesdə aktivliyi bir daha onu göstərir ki,
hələlik bizim bildiyimiz və bilmədiyimiz enerji resursları var və bu
resurslardan növbəti dövrlərdə də istifadə edilərək ölkə iqtisadiyyatını
canlandırmaq və ictimai gəlirləri təmin etmək olar”.
Şəbnəm Mehdizadə