Əsas prioritet sosial yönümlülükdür
Azərbaycanın 2018-ci il üzrə dövlət və icmal
büdcəsi layihələrinin Milli Məclisdə müzakirəsi davam edir. Büdcə zərfinə daxil olan qanun layihələri
Milli Məclisin komitələrində müzakirə edilərək plenar iclasa tövsiyə edilib.
Millət vəkili Elman Nəsirov hesab edir ki, yeni
büdcə layihəsində sosial yönümlülük qorunub saxlanılıb: "Dövlətimiz sosial
dövlətdir. Çünki cənab prezidentin müəyyən etdiyi siyasətin mərkəzində
Azərbaycan vətəndaşı və onun sosial rifahı dayanır. Ona görə də 2018-ci ilin büdcəsi
də sosial yönümlüdür və 33,5 faiz sosial xərcləri özündə ehtiva edir. Büdcə
layihəsində 1 milyon 330 min pensiyaçı və onların sosial müdafiəsi ilə bağlı
addımların atılması öz əksini tapıb. Həkimlərin, müəllimlərin maaşlarının
artırılması ilə bağlı təkliflər səsləndirilir. Hesab edirəm ki, plenar iclasda
2018-ci ilin büdcəsi öz təsdiqini tapacaq və qəbul ediləcək. Qeyd edim ki, növbəti
ildə ən böyük xərclər hərbi, elm, təhsil və sosial sahələr üçün nəzərdə
tutulub. Qeyri-neft sektoru ölkəmizin əsas prioritetlərindən biri olaraq
qalmaqdadır. Qeyri-neft sektorunun və ixrac yönümlü iqtisadiyyatın inkişafının
stimullaşdırılması ilə bağlı bütün məsələlər hazırda ön plandadır. Bu xətt önümüzdəki
ildə də davam edəcək. Bir məqamı da qeyd edim ki, Azərbaycanın 2018-ci il üçün
büdcəsi Ermənistan büdcəsini 4,5 dəfə qabaqlayır. Azərbaycanın təkcə elm və
təhsil üçün ayırdığı xərclər Ermənistanın bütöv büdcəsinin yarısı qədərdir.
Hərbi sahəyə ayırdığımız büdcə isə Ermənistanın ümumilikdə bütün büdcəsinə
bərabərdir. Ölkəmizin bundan sonrakı davamlı inkişafı ilə bağlı məsələlərin öz
həllini tapacağını indidən cəsarətlə demək olar. Xüsusi ilə qeyri-neft sektoru
ilə bağlı inkişaf məsələləri və iqtisadiyyatın şaxələndirilməsi siyasətinin
təminatı üçün maliyyə vəsaitlərinin təmin edilməsi ön planda olacaq”.
Millət vəkili Azər Badamov da deyir
ki, 2018-ci il üçün nəzərdə tutulan büdcə layihəsi əsasən sosial yönümlüdür: "Layihəyə
əsasən, bir çox sosial yönümlü investisiya layihələrinin yerinə yetirilməsi
nəzərdə tutulur. Dövlət büdcəsinin həcmində artım da gözlənilir. Bu isə
Azərbaycan iqtisadiyyatının artımı deməkdir. Davamlı iqtisadi inkişaf bu artıma
imkan yaradır. Əlbəttə, həyata keçiriləcək olan layihələrin sayı gələn il daha
çox olacaq. Hesab edirəm ki, nəzərdə tutulan büdcə layihəsi ölkəmizin dayanıqlı
inkişafına tam təminat verir. Bu büdcəni sosial büdcə də adlandırmaq olar. Çünki
2018-ci ildə sosial yönümlü xərclərin tərkibində bəzi artımlar olacaq. Təqaüd
və müavinətlərin, əmək haqlarının artımı nəzərdə tutulur. Sosial istiqamətdə
investisiya layihələrinin artımı müşahidə ediləcək. Görülən bütün işlər isə Azərbaycan
dövlət büdcəsinin 2018-ci ildə Azərbaycan vətəndaşının yaxşı yaşamasının
təminatına yönəldiyindən xəbər verir”.
Milli Dirçəliş
Hərəkatı Partiyasının sədri, Milli Məclisin Avronest PA-dakı nümayəndə
heyətinin üzvü Fərəc Quliyev bildirdi
ki, bütün sahələr üzrə prioritetlər büdcə layihəsində
qeyd olunub: "Azərbaycan hazırda müharibə şəraitində olan ölkədir. Ona görə də
düşünürəm ki, hərbi xərclərimizin artırılması təbii qarşılanmalıdır. Bununla
yanaşı, sosial yönümlü məsələlərlə də bağlı büdcə layihəsində müəyyən
dəyişikliklər var. Müəyyən məsələlərlə bağlı bizim də təkliflərimiz var. Müharibə
aparmağımıza baxmayaraq, Azərbaycanın büdcəsi, bütün sahələri əhatə etməyə
çalışır. Bu il neftin qiymətində də müsbətə doğru dəyişikliklər ehtimal edilir.
Bununla yanaşı, qeyri-neft sektorunun inkişafı ilə bağlı uğurlarımız artıq göz
qabağındadır. Amma zənnimcə, bununla kifayətlənmək olmaz. Daha uğurlu nəticələr
qazanmaq üçün çalışmaq lazımdır”.
Şəbnəm Mehdizadə