Əsas məqsəd yeni bazarlara çıxmaqdır
Bu ilin aprel ayı
ərzində 377 şirkət tərəfindən 143 mln. ABŞ dolları həcmində qeyri-neft
sektoruna aid mal ixrac olunub. "APA-Economics” İqtisadi İslahatlar Mərkəzinin
nəşr etdiyi "İxrac icmalı”nın II buraxılışına istinadən xəbər verir ki, apreldə
qeyri-neft məhsullarının ixrac edildiyi ölkələrin siyahısında ilk beşlikdə
Rusiya, Türkiyə, İsveçrə, Gürcüstan və İtaliya qərarlaşıb. 2017-ci ilin 4 ayı ərzində
qeyri-neft sektoru üzrə ixrac 2016-cı ilin müvafiq ilə müqayisədə 22% artıb.
Bu ixrac əməliyyatlarında 846 şirkət iştirak edib. Azexport.az portalına
2017-ci ilin 4 ayı ərzində 42 ölkədən ixrac sifarişləri daxil olub. Aprel
ayında ilk dəfə portala sifariş daxil olan ölkələr isə Hindistan, Çin,
İspaniya, Gürcüstan, Yəmən, Əlcəzair, Sinqapur, Avstraliya və Fələstindir.
Azexport.az portalına aprel ayında daxil olan sifarişlərin ümumi dəyəri isə
29,9 mln. ABŞ dolları olub. Ümumiyyətlə, 2017-ci ilin yanvar ayında
"azexport.az” portalına 48 mln. ABŞ dolları, fevral ayında 6,5 mln. ABŞ
dolları, mart ayında isə 27 mln. ABŞ dolları, aprel ayında isə 29.9 mln. ABŞ
dolları dəyərində ixrac sifarişləri daxil olub. Aprel ayında sifarişləri
məhsullar üzrə təhlil etdikdə aydın olur ki, qeyri-neft sektorunda istehsal
edilən müxtəlif məhsullara konyak, şərab, soğan, noxud, göbələk, yumurta, kərə
yağı, pendir, pambıq yağı, albalı şirəsi, nar şirəsi, fındıq ləpəsi, quru süd,
toyuq əti, bibər turşusu, günəş paneli, mühərrik yağı, boya sifariş olunan
məhsullar arasındadır.
İqtisadçı-alim Vüqar Bayramov qəzetimizə
açıqlamasında bildirdi ki, qarşıdakı əsas hədəf yeni bazarlara çıxış əldə
etməkdir: "Bizim əsas ixracatımız kənd təsərrüfatı və qida
sənayesi məhsulları ilə bağlıdır. Bu məhsullar da daha çox Rusiya bazarına
çıxarılır. Bütövlükdə aqrar sektoru ixrac qabiliyyəti ilə ümumi qeyri-neft
sektorunun ixrac qabiliyyətinin artmasına səbəb olur. Lakin təkcə aqrar sektorla
kifayətlənmək olmaz. Ümumiyyətlə, qeyri-neft sektoru məhsullarının ixrac
potensialının artırılması bizim əsas hədəflərimizdəndir. 2017-ci ilin birinci
rübünün yekun nəticələrinə əsasən də ümumilikdə bu sahədə artım müşahidə
edilir. Təbii ki, rəqəmlərdə əks olunan artımın müxtəlif səbəbləri var. O
cümlədən, ixrac prosedurlarının sadələşdirilməsi də burada rol mühüm oynayan
amillərdən biridir. Düzdür, hələlik daha çox ənənəvi bazarlara məhsul
göndəririk. Yəni keçmiş MDB ölkələrinə və Rusiya bazarlarına göndərilən
məhsulların həcmi daha çoxdur. Lakin hazırda əsas məqsədlərimizdən biri də yeni
bazarlara çıxış əldə etməkdir. Belə ki, Körfəz ölkələrinin və Avropa Birliyinə
daxil olan ölkələrin bazarına daha çox məhsulun ixrac olunması istiqamətində
işlər görülür. Bütün hallarda sözügedən sektorda müşahidə olunan tendensiya
müsbətdir. Qeyri-neft məhsullarının ixracatında artım birmənalı şəkildə müsbət
hal kimi qiymətləndirilməlidir. Bunun dayanıqlı olması üçün Azərbaycan yeni
bazarlarda sənaye məhsulları ilə çıxış əldə etməlidir. Məhsulların
diversifikasiyası bu baxımdan çox önəmlidir. Yəni aqrar məhsulların, sənaye
məhsullarına keçidinin təmin olunması çox vacibdir. Qeyd etdiyim kimi hazırda
daha çox aqrar məhsullarının ixracı üstünlük təşkil edir. Lakin gələcəkdə yeni
bazarlara çıxış təmin olunarsa, sənaye məhsullarının da ixracına imkan
yaranacaq. Yevlaxda keçirilən müşavirə zamanı prezident İlham Əliyev iş
adamlarına tapşırıq və tövsiyələrində də qeyd etdi ki, digər ölkələrin
bazarlarına çıxış təmin edilsin”.
Milli Məclisin
İqtisadi Siyasət, Sənaye və Sahibkarlıq komitəsinin üzvü, millət vəkili Vahid
Əhmədov deyir
ki, ixrac potensialı yaxın gələcəkdə
daha da artırılacaq: "2016-cı ilin sonlarından başlayaraq prezidentin göstərişinə
uyğun olaraq qeyri-neft sektorunun inkişafı ilə əlaqədar xüsusi tədbirlər həyata
keçirilir. Bununla bağlı strateji proqram tərtib olunub və proqramın əsas məqsədi 11 sahə üzrə
qeyri-neft sektorunun inkişaf etdirilməsidir. Göründüyü kimi, son bir ildə bu
sahəyə diqqət xüsusilə artıb. Hələlik əsasən kənd təsərrüfatı, turizm, tikinti
sahəsində irəliləyişlər daha çox hiss edilir. Artıq 2017-ci ildən bu sahədə
görülən işlər öz bəhrəsini verməyə başlayıb. İxrac olunan məhsullarımızın həcmi
ötən illə müqayisədə xeyli artıb. Hələlik daha çox yaxın qonşu ölkələrə məhsul
ixrac edirik. Ümumilikdə, düşünürəm ki, bu sahənin inkişafı yaxın illərdə daha
da artacaq. Çünki yaxın illər ərzində sənaye parkları və sənaye məhəllələri
istifadəyə veriləcək. Sənaye məhsullarımız gələcəkdə bir çox ölkələrin
bazarlarına çıxarılacaq. Hazırda bir sıra sənaye müəssisələri fəaliyyətə
başlayıb. Məsələn, Sumqayıtda STP fəaliyyət göstərir. Orada günəş batareyaları,
müəyyən qurğular, kabellər və digər məhsullar istehsal edilir. Həmçinin
Sumqayıtda polietilen, gübrə zavodlarının bu ilin axırı gələn ilin əvvəllərinə
kimi fəaliyyətə başlayacağı gözlənilir. Bu zavodların ixrac potensialı kifayət
qədər böyükdür. Bundan başqa, Mingəçevirdə 9 zavoddan ibarət böyük sənaye parkı
tikilir. Bu zavod da emal sənayesi sahəsinə aiddir. Belə ki, sözügedən zavodda
kənd təsərrüfatı məhsullarının emalı həyata keçiriləcək. Hesab edirəm ki, görülən
bu işlər yaxın gələcəkdə ümumi ixrac həcmini daha da artıracaq. İxracın həcminin
artması ölkəyə daha çox valyuta axını deməkdir ki, bu da öz növbəsində manatın
stabilləşməsinə gətirib çıxarır”.
Şəbnəm Mehdizadə