Əsas məqsəd Türkiyəyə təzyiq göstərməkdir
Avropa Şurası Parlament Assambleyasının (AŞ PA)
Strasburqda keçirilən yaz sessiyasının plenar iclasında "Türkiyədə demokratik təsisatların
fəaliyyəti” adlı hesabat layihəsi müzakirə olunub. Konstitusiyaya dəyişikliklərlə
bağlı keçirilən referendumundan sonra ölkə üzrə məruzəçilərin hazırladıqları
hesabatda Türkiyənin monitorinq mərhələsinə qaytarılması təklif olunub. Gərgin
müzakirələr zamanı bəzi assambleya üzvləri sənədə əlavə və dəyişikliklər təklif
etsələr də, bu təkliflərin heç biri qəbul edilməyib. Türkiyənin postmonitorinq
prosesindən monitorinq mərhələsinə salınmasına dair müddəa olduğu kimi
saxlanılıb. Müzakirələr zamanı AŞ PA-dakı Türkiyə nümayəndə heyəti ilə bərabər,
Azərbaycandan olan nümayəndə heyəti də buna öz etirazını bildirib. Ancaq buna
baxmayaraq, sonda qətnamə layihəsi tam şəkildə səsə qoyularaq qəbul edilib.
AŞ PA-nın yaz sessiyasının plenar iclasında Türkiyə
ilə əlaqədar qəbul edilən qərar qardaş ölkədə olduğu kimi Azərbaycan cəmiyyətində
də narazılıqla qarşılanıb. Millət vəkilləri, siyasətçilər, politoloqlar Türkiyəyə
qarşı olan qərarı ədalətsiz və qərəzli münasibət kimi qiymətləndiriblər. Milli Məclisin Müdafiə,təhlükəsizlikvəkorrupsiyailəmübarizəkomitəsinin
üzvü Zahir Oruc da bu hadisəni şərh edərkən deyib ki, AŞ PA-nın siyasi təzyiq
alətinə çevrilməsi acınacaqlı vəziyyətə gətirib çıxaracaq. O, eyni zamanda
bildirib ki, AŞ PA-nın Türkiyə ilə bağlı monitorinqi bərpa etmək qərarı ədalətsizdir
və qərəzlidir. Millət vəkilinin sözlərinə görə, bu qərar təşkilatda islamofob
meyillərin üstünlük təşkil etdiyini, müsəlman ölkələrinə qarşı ikili
standartlar siyasətinin yeni dalğasının başlandığını göstərir. Deputat AŞ
PA-nın monitorinqlərinin müxtəlif dairələrin mənafeyinə xidmət etdiyini, müstəqil
dövlətlərə təzyiq göstərmək və onların milli maraqlarına zərbə vurmaq, daxili
işlərinə müdaxilə etmək məqsədi güddüyünü də söyləyib. O, Azərbaycanın da
zaman-zaman belə ədalətsizliklərlə, ikili standartlarla üzləşdiyini vurğulayıb.
Z.Oruc qeyd edib ki, bu qərarın qəbul edilməsi Türkiyənin demokratik nailiyyətlərini,
uzun illər ərzində keçdiyi yolu, regional təhlükəsizliyin təminatına verdiyi
töhfələri heçə saymaq deməkdir: "Avropa Şurasının missiyası ondan ibarətdir ki,
böyük bir qitə arealında dövlətlər arasında sülhü, əməkdaşlığı təşviq, eyni
zamanda, daxildə islahatlar prosesinə kömək etsin, hüquqi cəhətdən vahid bir
ailənin yaradılmasına təsir göstərsin. Bu qurum heç bir halda məhkəmə təsisatı
deyil və onun müəyyən dairələrin əlində siyasi təzyiq alətinə çevrilməsi çox
acınacaqlı vəziyyətə gətirib çıxaracaq. Türkiyə bu şəkildə məhkəməyə çəkilə
bilməz. Əksinə, bu ölkə beynəlxalq birlik tərəfindən ən yüksək yardımlara layiq
görülməlidir. Çünki bu gün Yaxın Şərqdə sabitliyin təmini, miqrantlarla bağlı
problemin həlli istiqamətində Türkiyənin gördüyü işlər göz qabağındadır. Söz
yox ki, Türkiyənin getdikcə güclənməsi, onun əldə etdiyi uğurlar bir çoxlarını
narahat edir. Buna görə də bu ölkə ilə bağlı belə cılız maneələr yaradılır.
Amma bu cəhdlər əbəsdir. Türkiyənin daxili işlərinə qarışmaq, kənardan idarəçilik
şərtləri diktə etmək yolverilməzdir. Bununla heç bir nəticəyə nail olmaq mümkün
deyil”.
Milli Məclisin
deputatı, "Dağlıq Qarabağ Bölgəsinin Azərbaycanlı İcması” İctimai Birliyinin
İdarə Heyətinin üzvü Rövşən Rzayev də hadisəni şərh edərkən AŞ PA-da Azərbaycan və
Türkiyəyə qarşı qüvvələrin fəaliyyət göstərməsinə diqqət çəkib. Deyib ki, AŞ
PA-nın ədalətsiz olaraq Türkiyə ilə bağlı monitorinqi bərpa etmək qərarı da məhz
bundan irəli gəlir. Millət vəkili qeyd edib ki, həm Azərbaycan, həm də Türkiyə
dəfələrlə beynəlxalq təşkilatlarda haqsızlıq və ikili standartlarla
qarşılaşıblar. Onun sözlərinə görə, buna baxmayaraq, hər iki ölkə birlikdə həmin
qurumlarda öz sözlərini deməlidir: "Biz beynəlxalq təşkilatlarda fəaliyyətimizi
davam etdirməli, öz mövqeyimizi ortaya qoymalıyıq. Bu gün də AŞ PA-da qardaş
Türkiyəyə qarşı qərəzli mövqe sərgilənməkdədir. Biz də öz mövqeyimizi, haqlı səsimizi
çatdırmalıyıq. Dövlət başçısı İlham Əliyevin AŞ PA-dakı uğurlu fəaliyyəti
dövründən Azərbaycanın Dağlıq Qarabağ münaqişəsi ilə bağlı mövqeyi düzgün şəkildə
bəyan olunub və AŞ PA-nın münaqişə ilə bağlı qərarlarında ölkəmizin ərazi
bütövlüyü təsbit olunub. Bu, Azərbaycanın xarici siyasətinin qələbəsidir. Orada
düşmən Ermənistan da var və biz onların qarayaxma kampaniyasının cavabını verməliyik.
Azərbaycan dövləti öz mövqeyini mütləq şəkildə AŞ PA-da nümayiş etdirməlidir”.
Türkiyənin
Texnologiyalar və İqtisadiyyat Universitetinin Beynəlxalq münasibətlər fakültəsinin
dekanı, politoloq Toğrul İsmayıl da hesab edir ki, AŞ PA-nın qərarında əsas məqsəd
rəsmi Ankaraya təzyiq göstərməkdir. Ekspertin sözlərinə görə, 2004-cü ildə əslində
Türkiyə bu vəziyyətdən çıxıb, təkrar bu vəziyyətə dönmək isə təbii ki, müsbət
hal deyil: "Avropanın bu qərarı ikitərəfli münasibətlərə mənfi təsir göstərəcək.
Bu səbəbdən Türkiyə Xarici İşlər Nazirliyi artıq qərara ciddi şəkildə etirazını
bildirib və vəziyyətin doğru yöndə qiymətləndirilməsini istəyib. Avropadakı bəzi
siyasi qrupların əlinə Türkiyədəki çevriliş cəhdindən sonra bir fürsət düşüb.
Onlar bu fürsətdən istifadə edərək Türkiyənin bir sıra terror qruplarına qarşı
mübarizə əzmini zəiflətmək istəyirlər. Avropa siyasətçiləri Türkiyənin daxili
işlərinə müdaxilə etməyə çalışırlar”.
Alpər TURAN