Ermənistanın ən çox silahlanmış ölkə olması nəyin təzahürüdür?
"Global
Militarisation Index”- Bonn Beynəlxalq Konversiya Mərkəzinin beynəlxalq
silahlanma indeksinə dair 2016-cı il üçün hesabatında deyilir ki, Ermənistan
artıq dördüncü ildir, Avropada ən çox silahlanmış ölkədir. Növbəti sıralarda
Rusiya, Kipr, Yunanıstan və Azərbaycan yer alır. Azərbaycan əvvəlki hesabatda
Avropa üzrə 4-cü yerdə olub. Qeyd edək ki, 152 ölkəni əhatə edən hesabat hər
min nəfər əhaliyə düşən hərbçilərin sayına, hərbi xərclərin ÜDM-ə nisbətinə, hərbi
xərclərin səhiyyə xərclərinə nisbətinə, həmçinin ordunun və ağır silahların
sayına görə müəyyən edilir. Ümumilikdə, Azərbaycan dünyada bu göstəriciyə görə
hazırda 9-cu yerdə, Ermənistan isə 2013-cü ildən başlayaraq dünyanın 3 ən çox
silahlanmış dövləti sırasında yer alır.
Bu fakt
haqda fikirlərini bölüşən ekspertlər düşünürlər ki, belə hallar Ermənistanın
işğal siyasətini davam etdirmək istəyinin real göstəricilərindəndir. Belə ki,
illərdir işğal etdiyi torpaqlardan çıxmayan Ermənistan danışıqlardan da
yayınır. Vaxt uzatmaqla əlavə silahlar əldə edir. Diqqət çəkən odur ki, Ermənistan
kasıb ölkədir, büdcəsi Azərbaycanın büdcəsindən xeyli azdır. Amma buna
baxmayaraq, sahib olduğu silahlara görə xeyli ölkəni qabaqlayır. Deməli, yenə də
kompromisə gəlməyi düşünmürlər və işğal siyasətindən əl çəkmək fikrində deyillər.
"Hesabatdakı rəqəmlər Ermənistanın yox, Rusiyanın
gücünün göstəricisidir”
Millət vəkili
Elşən Musayev "Kaspi”yə açıqlamasında dedi ki, əslində, Ermənistanın iqtisadi
gücü nə vəziyyətdədirsə, hərbisi də ona adekvatdır. Amma sırf öz
potensiallarını nəzərə alsaq: "Fəqət,"Global Militarisation Index”- Bonn
Beynəlxalq Konversiya Mərkəzinin beynəlxalq silahlanma indeksinədair
2016-cı il hesabatı daxil bütün hesabatlardakı rəqəmlər əslində Ermənistanın
deyil, Rusiyanın gücünün göstəricisidir. O anlamda ki, Ermənistanı qüvvətli edən
Rusiya ilə hərbi ittifaqdır. Elə onları başından, resursundan, gücündən yekə
danışmağa məcbur edən səbəb də məhz budur. Sadəcə, bu ittifaq və sövdələşmə
Rusiya tərəfindən başqa bir kontekstdə izah olunur. Onların əsaslandırması
bundan ibarətdir ki, hətta Dağlıq Qarabağ qaytarılacağı təqdirdə belə, Ermənistanın
Beynəlxalq hüquqla tənzimlənən sərhədləri guya gələcəkdə təhdid altında qala
bilər. Təbii, yanlış fikirdir və onlar hamını öz arşınları ilə ölçdükləri üçün
belə düşünürlər.Eyni zamanda, əsas məram və məqsədi gizlətmək üçün. Belədirsə,
deməli, regionda münaqişənin var olması, davam etməsi böyük güclərin
marağındadır. Ona görə "İsgəndər” raketlərindən tutmuş, digər hərbi
avadanlıqlara qədər Ermənistana peşkəş edib, ardınca da bu cür hesabat
ajiotajları yaratmağa çalışırlar. Hərgah, Ermənistanın elə gücü olsaydı, aprel
döyüşlərindən bu cür məğlub çıxardımı? Deməli, ortada alt məqsədlər var. Hansı
ki, bütün saxta hesabatlar da, sabun köpüyünə bənzər mif də, hərbi güc haqqında
nağıllar da məhz həmin məqsədlərə hesablanıb. Hər halda, Azərbaycan üçün
maraqlı olan reallıqdır, faktdır. Fakt isə ondan ibarətdir ki, torpaqlarımız
düşmən tapdağı altındadır və Ermənistan istəyir hərbi potensialına görə Avropada
deyil, lap dünyada birinci olsun, yenə haqq mübarizəsini uduzacaq”.
"Bütün bunlar Azərbaycan silahlı qüvvələri ilə
müqayisədə, elə də böyük təhlükə yaratmır”
Hərbi
ekspert, ehtiyatda olan polkovnik-leytenant İbrahim Rüstəmlinin fikrincə, Ermənistanın
bu gün dünyada və Avropada ən çox silahlanmış ölkələr sırasında olması yeni
informasiya deyil: "Bu cür informasiyanın qabardılması son zamanlar Ermənistanın
geriləməsi ilə bağlıdır. Onlar əvvəlki illərdə informasiya cəbhəsində çox böyük
üstünlüyə nail olmuşdular. İndi artıq bu sahədə də geriləməkdə davam edirlər.
Ona görə də bu informasiya məhz belə bir vaxtda üzə çıxır. Yəni hansı sahədə zəiflik
varsa, o sahədə də informasiyalar dövriyyəyə buraxılır. Bu gün Ermənistana
silah Rusiya vasitəsilə ötürülür. Özü də güzəştli şərtlərlə. Ermənistanın
silahlanmasının əsas maddi bazası erməni lobbisinin dəstəyidir. Bu gün erməni
lobbisi Qarabağla bağlı Ermənistanın silahlı birləşmələrinə külli miqdarda vəsait
ayırır. Bu vəsait hesabına Ermənistan silah əldə edir. Mən fikirləşirəm ki,
bütün bunlar Azərbaycan silahlı qüvvələri ilə müqayisədə, elə də böyük təhlükə
yaratmır. Bütün hallarda, Ermənistanın silahlanma siyahısında ön yerlərdə
dayanması onun aqressiyasından, hərbi təcavüz istəyindən xəbər verir. Onun bu
sahədəki ümumi niyyəti üzə çıxır. Ermənistan silahlanmasını davam etdirməklə, Qarabağ
problemin sülh yolu ilə həllini tapmasından yayınır və status-kvonun
saxlanmasına çalışır. İşğalçının sülhə aparan yolda maneələr yaratması tamamilə
gözləniləndir”.
İ.Rüstəmli
vurğuladı ki, Ermənistan rəhbərliyinin son bəyanatları da işğal etdikləri Azərbaycan
torpaqlarını geri qaytarmaq niyyətində olmadıqlarını göstərir: "Məsələn, Ermənistan
prezidenti Sarkisyanın son bəyanatını da bu yerdə xatırlamaq yerinə düşər. Onun
son bəyanatında deyilirdi ki, əgər Azərbaycan yeni ərazilər itirmək istəmirsə,
Ermənistana qarşı guya aqressiyanı dayandırmalıdır və mövcud vəziyyətlə
barışmalıdır. Bu, bilavasitə Ermənistan siyasətinin hazırkı mövqeyini nümayiş
etdirən bir bəyanat idi. Hansı ki, heç bir beynəlxalq hüquqa sığmayan bəyanatdır.
Çünki Ermənistanın işğal etdiyi ərazilər hər hansı bir müstəqil dövlətin ərazisi
kimi heç bir dövlət tərəfindən tanınmayıb. Hətta Ermənistanın özü də o əraziləri
müstəqil bir dövlətin ərazisi kimi tanımayıb. Mən deməzdim ki, Ermənistan Azərbaycana
qarşı müharibəyə hazırlaşır. Əksinə, Ermənistan sadəcə, bununla indiki
mövqeyini qorumağa çalışır və Azərbaycanın hərbi gücündən qorxur. İstər beynəlxalq hüquq, istər nüfuzlu
beynəlxalq təşkilatların bəyanatları, istər qəbul olunmuş qətnamələr - bütün
bunlar hamısı Azərbaycanın tərəfindədir. Azərbaycan beynəlxalq hüquq tərəfindən
müdafiə olunan bir ölkədir. Yəni təcavüzə məruz qalmış, işğala məruz qalmış ölkə
kimi tanınır. Ona görə də Ermənistanın bu sayaq hərəkətləri onun təcavüzkar
siyasətinin davamı kimi dəyərləndirilə bilər”.
Şəfa
Tapdıq