Ermənistanda “qaynana sindromu”
Sosial-iqtisadi problemlərin içində çabalayan Ermənistan hökuməti
vəziyyətdən çıxış yollarını kadr dəyişikliklərində görsə də, aparılan islahatlar
effekt vermir. Əksinə, atılan addımlar ölkənin sosial-iqtisadi həyatında daha
da gərgin vəziyyət yaradır. Prezident Serj Sarkisyan baş nazir Ovik Abramyanın
istefasından sonra bu vəzifəni Karen Karapetyana tapşırsa da, o da problemləri
həll etmək iqtidarında deyil. Müşahidəçilərin gəldiyi rəy budur ki, eks-baş
nazir hökm sürən siyasi böhrana görə "günah keçisi” seçilərək istefaya getməyə
məcbur edilib. Əksəriyyət Karen Karapetyanın ölkədə hansısa ciddi dəyişiklik
edə biləcəyinin inandırıcı olmadığını vurğulayıb. Bunu Karapetyanın özü də
etiraf edir. Yeni baş nazir parlamentdə çıxışında vəziyyətin heç də yaxşı
olmadığını bildirib. Və bəyan edib ki, iqtisadiyyat çox ağır vəziyyətdədir. Az
sonra isə hökumətin iclasında Ermənistan hökuməti aparatının rəhbəri David
Harutunyan dövlət orqanlarında çalışan məmurlara təyyarə biletlərinin
alınmasında istifadə olunan elektron sistemi təqdim edib. Bu zaman baş nazir
Karen Karapetyan kəskin bəyanat verib: "Kifayət qədər mürəkkəb sistemdir. Nəyə
yönəldiyini də bilirsiniz. Elə buna görə də əmr verilir – biz xırda oğurluğa
son qoymaqdan ötrü mürəkkəb mexanizmlər seçəcəyik. İdarələrinizi qaydaya salın.
Hansı sxemlərə əl atıldığını mənə danışırlar... Bu insanlar bu ağlı başqa yerdə
istifadə etsəydilər, effekti bundan qat-qat yaxşı olardı”.
Baş nazirin kəskin bəyanatından sonra hökumət üzvlərinin heç biri heç
nə deməyib. İclasda iştirak edən hüquq-mühafizə orqanlarının rəhbərləri də
sükutu pozmayıblar.Baş nazir hansı "primitiv oğurluq”dan söhbət getdiyini və onun kim
tərəfindən törədildiyini açıqlamayıb. İclasda baş nazir oğurluqdan danışan
zaman hüquq-mühafizə orqanlarının rəhbərlərinin heç bir reaksiya verməməsi
"Haykakan Jamanak” qəzetinin iqtisadi şərhçisi Haik Gevorkyanı qəzəbləndirib.
"Oğurluq konkret cinayət kateqoriyasıdır. Baş nazir oğurluğun olduğunu deyirsə,
deməli, cinayət işi açılmalı, istintaq aparılmalı, adamlar cəzalandırılmalıdır.
Ya da bu bəyanatı verən adam üzr istəməli, bunun səhv olduğunu deməlidir”, -
deyə Gevorkyan bildirib. Onun sözlərinə görə, dövlət orqanlarının Ermənistan
vətəndaşlarından toplanan vəsaiti səmərəsiz xərcləməsinə çoxlu misallar
göstərmək olar. "Nümunələrdən biri Mərkəzi Bankın Dilicanda tikilmiş tədris
mərkəzidir. Rəsmi sənədlərə görə, onu 153 milyon dollara tikiblər. Dövlət Gəlirləri
Komitəsinin Dilicanda tikilmiş tədris mərkəzini də göstərmək olar. Ona 70
milyon dollara yaxın vəsait xərclənib”, - deyə Haik Gevorkyan vurğulayıb.
Müxalifət də baş nazirin hökumətdə oğurluq faktları barədə qalmaqallı
bəyanatı ilə bağlı cinayət işinin qaldırılmasını tələb edir. Maraqlıdır ki,
ədliyyə naziri Arpine Ovanisyan bildirib ki, cinayət işi qaldırılmayacaq.
"Bunun üçün hüquqi əsas yoxdur”, - deyə nazir vurğulayıb. O bildirib ki, baş
nazir oğurluq dedikdə, aviabiletlərin alınması ilə bağlı qanun pozuntularının
olduğunu demək istəyib. "Daşnaksütyunun” parlament fraksiyasının üzvü, Armen
Rustamyan hesab edir ki, baş nazirin bəyanatı cinayət işinin başlanması üçün
kifayət edir. "Bu bəyanat cinayət, oğurluq haqqındadır - bu, Cinayət
Məcəlləsinin konkret maddəsidir. Bu bəyanatın ardınca hüquq-mühafizə orqanları
cinayət işləri açmalı idilər”.
Baş nazirin bəyanatı hakimiyyət daxilində də intriqalara yol açıb.
Məlumatlara görə, yeni baş nazir bəzi kadr dəyişiklikləri etməyi nəzərdə tutur
və bu məsələdə heç də prezidentin mövqeyini nəzərə almır. Ümumiyyətlə, bu
şəxsin hələ paytaxt meri olan zaman əhalinin və rəhbərliyin fikrini nəzərə
almadan atdığı addımlar və xalqa uzaq olması mütəmadi şəkildə narazılıq
yaradırdı. Arxasında xarici qüvvələr duran baş nazir kabinet üzvlərinin 80
faizinin işinə xitam vermək istəyir. Yerli media yazır ki, Karapetyan əvvəlki
iş yeri olan "Qazprom”da necə fəaliyyət göstəribsə, Ermənistanın bu şirkətə 300
milyon dollar borcu yığılıb. Hökumətin dəyişilməsinə xalqın münasibəti mövzusunda
Gümrü şəhərində keçirilmiş ictimai rəy sorğusunda da nikbin nəticələr qeydə
alınmayıb. Rəyi soruşulanlardan biri bildirib: "Baş nazir, nazirlər, prezident
- onların hamısı özləri, öz şəxsi həyatlarını yaxşılaşdırmaq üçün işləyirlər.
Baş nazir, yaxud prezident dəyişilsə də, biz yenə bir tikə çörək üçün ölkəni
tərk etmək məcburiyyətindəyik”.
Vəziyyət o qədər ağırlaşır ki, artıq əksər məmurlar bütün mülklərini
yaxınlarının adına keçirməyə tələsirlər.Məsələni hətta deputatlar
parlamentdə qaldırıblar. Deputat Vaan Babayan parlamentdə deyib ki, "Bizim
ölkədə bir pis ənənə var – "qaynana sindromu”. O izah edib ki, məmur öz
mülkiyyətini çox vaxt qayınanasının adına yazdırır. O soruşub ki, yeni qanun
layihəsi bu "qaynana sindromunu” necə həll edir?” "Aravot"qəzeti
yazır ki, Babayan bu sualı Ermənistan parlamentində gəlir bəyannaməsi və gəliri
haqda məlumat verənə yaxın olan adamların siyahısı haqda məsələ müzakirə
olunarkən verib. Ədliyyə naziri vəzifəsini icra edən Arpine Hovanisyan bildirib
ki, "qaynana sindromu” Antikorrupsiya komissiyasında müzakirə olunub. O deyib
ki, gəlirini bəyan edənlə bağlı şəxslərin dairəsi gələcək qanunlarda
genişləndiriləcək.
Yeri gəlmişkən, "Ermənistanda ədalət” adlı təşəbbüs qrupunun
təşkilatçılığı ilə bir qrup diaspora üzvü, yerli ziyalılar ölkədə baş verən
qanun pozuntuları ilə əlaqədar imzatoplama kampaniyasına başlayıblar.
Kampaniyaya məşhur musiqiçilər və rok ifaçıları da qoşulub. Onlar Ermənistanda
insan haqlarının kobud şəkildə pozulduğunu, polis zorakılığına yol verildiyini
bəyan edirlər. 3000-ə yaxın insanın imza atdığı sənəddə bildirilir ki, onlar
korrupsiyaya, avtokratiyaya "yox” deyirlər. Təşəbbüs müəllifləri Ermənistan
hakimiyyət orqanlarından apreldəki parlament seçkilərini legitim və şəffaf
qaydada keçirməyi tələb edirlər: "Biz sadəcə, Ermənistanda demokratiyanın
formalaşmasını istəyirik”.
Azər NURİYEV